Amós 1 - Bible in Tzeltal de Oxchuc y Tenejapa

Sc'oplal Amós

¹ Ja' sc'op te Amós, te jcanan-chij ta lum Tecoa, te ac'bot ta swenta yalel yu'un Dios te sc'oplal Israel. Cheb ja'wil sc'an xtal nijq'uel a, ta yorail Uzías te muc' ajwalil ta Judá, soc Jeroboam snich'an Joás te muc' ajwalil ta Israel.

² Jich la yal: —C'alal ya xchicnaj tel sc'op Cajwaltic jichuc chawuc ta wits Sión, ta Jerusalén, ya sayub te aquiltic soc te sba wits Carmelo —xi'.

Xchajbanel nacionetic nopol ay ta Israel

³ Jich ya yal te Cajwaltic: —Te mach'a ayic ta Damasco bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel la stenic jichuc trigo te mach'atic ay ta Galaad, la swuyic ta taq'uin c'oem.

⁴ Jich yu'un ya cac'bey sc'aal spalacio te muc' ajwalil Hazael, tan ya xjil yu'un te muc'ul naetic yu'un Ben-hadad.

⁵ Puersa me ya jambey yochibal sts'ajc'ul te Damasco; ya me jmil te mach'a ya xmandalaj ta Bicat-avén soc te mach'a ya xmandalaj ta Bet-edén. Te siriaetique ya me x'ic'otic bael ta mosoil ta Kir —xi' te Cajwaltique.

⁶ Jich ya yal xan te Cajwaltique: —Te mach'a ayic ta lum Gaza bayal buelta spasojic te bila amene. Ma me jichuc nax ya xjil, ya cac'bey castigo yu'un. Melel la yiq'uic bael ta chuquel spisil yajwal te jpam lume, la xchonic bael ta mosoil ta Edom.

⁷ Jich yu'un ya cac'bey sc'aal te ts'ajq'uetic yu'un lum Gaza, tan ya xjil yu'un te tulanil ts'ajq'uetique.

⁸ Ya jmil te mach'a ya xmandalaj ta lum Asdod, soc te mach'a ya xmandalaj ta lum Ascalón. Ya me cac' bael jc'ab ta scontroinel te lum Ecrón, asta ta slajibal te filisteoetic ya me xlajic —xi'.

⁹ Jich ya yal xan te Cajwaltique: —Te mach'a ayic ta lum Tiro bayal buelta spasojic te bila amene. Ma me jichuc nax ya xjil, ya cac'bey castigo yu'un. Melel la xchonic bael ta mosoil ta Edom spisil yajwal te jpam lume, manchuc me ay trato yu'unic te jun yo'tan sbaique.

¹⁰ Jich yu'un ya cac'bey sc'aal te ts'ajq'uetic yu'un Tiro, tan me ya xjil yu'un te muc'ul naetique —xi'.

¹¹ Jich ya yal xan te Cajwaltique: —Te mach'a ayic ta Edom bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel ma la sna'beyic yo'bolil sba te yermanotac israeletic, la snutsic ta puñal. Ma la scomic yilimba, te slab yo'tanic ma'yuc ta comel.

¹² Jich yu'un ya cac'bey sc'aal Temán, tan me ya xjil yu'un te muc'ul naetic ta Bosra —xi'.

¹³ Jich ya yal xan te Cajwaltique: —Te mach'atic yal-snich'an Amón bayal buelta spasojic te bila amene. Ma me jichuc nax ya xjil, ya me cac'bey castigo yu'un. Melel toyol yo'tan ta smuc'tesel xan te sq'uinale, jich muc' la sjambey xch'ujt' ta puñal te antsetic te yic'oj alal ta xch'ujt'ic te ayic ta sq'uinal Galaad.

¹⁴ Jich yu'un ya me cac'bey sc'aal te ts'ajq'uetic yu'un Rabá, tan me ya xjil yu'un te muc'ul naetic te c'alal ay aw yu'un guerra, soc xpumet nax me, jichuc yic'al ja'al ta yorail.

¹⁵ Ya me x'ic'ot bael ta yan lum te muc' ajwalil soc spisil te winiquetic yu'un te muc' sc'oplalique —xi' te Cajwaltique.