Abdías 1 - Bible in Tzeltal de Oxchuc y Tenejapa

La yich' pejc'anel Edom

¹ Te bila ac'bot yil Abdías yu'un te Cajwaltique ta swenta sc'oplal Edom: Ay caiyojtic stojol sc'op Cajwaltic, ja' te c'op te bajt' ta albeyel te nacionetic te jich albotique: —Jajch'ucotic ta beel, conic cac'beytic guerra Edom —xi'.

² Ya yal te Cajwaltic ta stojol Edom: —Ch'in ya cac'at yu'un a te yantic nacionetique, soc ya jpejc'anat ta c'axem to xan.

³ Ja' la slo'layat te atoybaile. Te ja'at tey nainemat ta japal tontiquil soc nainemat ta toyol witstiquil, jich c'oem ta awo'tan te ma'yuc mach'a ya sjinat ta ac'ope.

⁴ Manchuc me ya xwilat moel jichuc águila, soc teme ya apas apechech ta bay eq'uetic, tey me ya jch'ojat coel tel a —xi'. Te Cajwaltic tulan ya yal:

⁵ —Te taluc j'eleq'uetic ta ajc'ubal ta yelc'anbelat, ma ba la yich'ic bael spisil; te taluc ta atojol te mach'atic ya stulic ts'usub, ay to nix a jil yu'unic te jichuque. Yan te acontrotaque jc'axel la sjinat ta jyalel.

⁶ ¡Obol aba, Esaú! Jc'axel la spojbat loq'uel te abiluque; la yelc'anbat ta jc'axel ta spisil te ac'ulejale.

⁷ Spisil te mach'atic te jun awo'tan soque, la slo'layat; la sloq'uesat bael ta mero aq'uinal. Manchuc me mero ajoy aba soc, la yac' sbaic ta scontroinbelat. Te ajo'tac te smuc'ulinej awo'tane, la spasbat ayaquil. ¡Obol aba, Edom! Ma'yuc sp'ijil awo'tan —xi'.

⁸ Te Cajwaltic tulan ya yal: —C'alal ya cac'bey castigo Edom, ya me jch'aybey ta jc'axel spisil te mach'atic p'ijic yu'une. Jc'axel me ya jlajin te mach'atic ay sp'ijilic ta witstiquil yu'un Esaú.

⁹ Te soldadoetic yu'un Temán te ma xiwique ya me xnijq'uic yu'un xiwel; soc ta witstiquil yu'un Esaú ma me ayuc mach'a cuxul ya xjil tey a —xi'.

Muliletic yu'un Edom

¹⁰ La yal xan te Cajwaltic: —Ya me smucat jilel q'uexlal, soc jinbilat me sbajt'el q'uinal, ta scaj te la awuts'in soc la amil te awijts'in Jacob.

¹¹ C'alal la spojbey sc'ulejal te scontroe, soc c'alal la slombeyic ochel yochibal sts'ajc'ul lum Jerusalén te mach'atic soldado-jyanlumetique, te ja'at la aq'uej aba ta jejch'. C'alal la spasbeyic snumeroil ta na'el mach'a ya yich' te bila la spojique, soc te la yich'bey bael sc'ulejalic, ja'at nix jich la apas.

¹² La sc'an te ma binuc nax awo'tan ta yilel xq'uexlal te awermano te c'alal ay swocole; soc te ma binuc nax awo'tan ta yilel swocol te Judá te c'alal la yich' jinele; la sc'an te ma la alaban a te c'alal ay swocole.

¹³ La sc'an te ma ochucat ta lum cu'un te c'alal ay swocole; la sc'an te ma binuc nax awo'tan yu'un swocol la sta, te c'alal ma'yuc yutsil c'ot ta loq'uele; la sc'an te ma la awelc'anbey sc'ulejal te c'alal c'ax bayal swocole.

¹⁴ Ja' lec te manchuc la atejc'an aba ta bay ya sta sba beetic ta swenta smilel te mach'atic la scoltay sbaique; la sc'an ma la awac' ta c'abal te mach'atic anic te c'alal la sta swocolique.

¹⁵ Jich te bit'il la apasbey te yantique, jich nix ya spasbotat: ya me x'ac'botat atoj te bitic la apase —xi' te Cajwaltique. Ya yal xan te Cajwaltic: —Nopolix tel sc'aalelal te Cajwaltic ta swenta spisil te nacionetique.

Toyesel sc'oplal Israel

¹⁶ Te ja'ex ch'a la awaiyic te bila ay ta vaso te la awuch'ic ta ch'ul wits cu'une. Ja' nix me jich ch'a ya yaiyic te bila ay ta vaso te yantic nacionetique, c'unc'un ya yuch'ic bael; jich me jc'axel ya xch'ayic bael.

¹⁷ Yan te wits Sión, ja' ch'ul wits ya xc'ot, ay me ya xba scoltay sbaic tey a. Te sts'umbalic Jacob ya xcha'yich'ic xan te slum-sq'uinalique.

¹⁸ Te mach'atic sts'umbalic Jacob soc José, ja'ic me c'ajc' c'oemic; yan te sts'umbal Esaú ja' me taquin aquetic, jc'axel ya xtil ta c'ajc' ta spisil. Ma me ayuc jtuluc sts'umbal Esaú te ya xcole. Jo'on Ajwalilon te jich caloje —xi'.

^19-20 Te israeletic te ayic ta Néguev ya me x'och yu'uninic te witstiquil yu'un Esaú; soc te israeletic te ayic ta peq'uel witstiquil ya me x'och ta sc'abic sq'uinalic te filisteoetique. Ja' nix jich ya yu'uninbeyic sq'uinal Efraín soc sq'uinal Samaria. Te sts'umbal Benjamín ya me yu'uninic Galaad. Yan te tsobol israeletic te yantesbil slumalique, ya me x'och yu'uninbeyic te sq'uinal cananeoetic c'alal ta lum Sarepta. Soc te jayeb yajwal Jerusalén te ic'otic bael ta mosoil ta sq'uinal Sefarad, ya me x'och yu'uninic te lumetic te ay ta Néguev.

²¹ Yaiyojiquix tsalaw a ya me xmoic bael ta wits Sión, swenta yu'un ya yac'bey castigo te mach'atic ayic ta witstiquil yu'un Esaú. Te Cajwaltic ja' me ya xmandalaj stuquel.