3 Juan 1 - Bible in Tzeltal de Oxchuc y Tenejapa

Yutsil sc'oplal te Gayoe

¹ Jo'on, te ancianoone, ya jpatbat awo'tan, ja'at quermano Gayo, te c'uxat ta co'tan ta melele.

² Te ja'at te c'uxat ta co'tane, ja' ya jc'an te lec ayat soc spisil te bila ya apase, soc te bujts'an q'uinal ya awaiy ta spisil orae, jich te bit'il lec ayat ta stojol te Diose.

³ Bayal bujts'naj co'tan yu'un te c'alal jul yalbonic caiy cha'oxtul quermanotactic te bit'il jc'axel ay ta awo'tan te smelelil c'ope, soc te jun nax awo'tan yacat ta spasel te bila smelelile.

⁴ Ma'yuc yan te bila ya xbujts'naj co'tan ta lec yu'une, ja' nax te c'alal ya caiy stojol te jun yo'tanic ta spasel te bi ya yal te smelelil c'op te mach'atic cal-jnich'nabe.

⁵ Ja'at te c'uxat ta co'tane, lec te bit'il awac'oj aba ta abatinel yu'un spisil te quermanotactique, manchuc teme ma ba ya ana'bey sbae.

⁶ Ja' la xcholiquix ta stojol te jtsojp jch'uunjeletic li'to te bit'il la yich'ic c'uxtayel awu'une. Jich yu'un ya calbat wocol yu'un te jichuc yacuc acoltaybon xan ta swenta sbeibic, swenta ma'yuc swocolic te ya xbeenic te bit'il ay ta swentaic spasel yat'el te Diose.

⁷ Melel ja' yaquic ta beel ta swenta te Jesucristoe, soc ma'yuc bila ya sc'anbeyic ta stojol te mach'atic ma ba xch'uunejic te Diose.

⁸ Jich yu'un jo'otic te jch'uunejtic te Diose, ya sc'an ya jwentaintic scoltayel, swenta yu'un jich ya jcoltaytic ta at'el ta xcholel te smelelil c'ope.

Controinwan te Diótrefese

⁹ Te jo'one la jpasbey scarta te jch'uunjeletic te banti ayate, ja'uc me to, te Diótrefes, ma ba ya yich'bon ta muc' te cat'el quich'oje, melel ja' ya smulan te stuquel ya x'ich'ot ta muc' ta yolil te quermanotactique.

¹⁰ Jich yu'un teme talone, ya me calbey ta jamal te bila amen ya spase. Yu'un ma tic'uc ya yaiy a te ya slotbon jc'oplal, melel ma sc'an yic' ta stojol te quermanotactic te ya xtalic ta q'uejele. Soc teme ay te jch'uunjeletic te toyol yo'tanic ya xnajc'anwanique, ya yich'ic comel ta ora yu'un soc ya xtenotic loq'uel ta xch'uunel Dios yu'un.

¹¹ Te ja'at te c'uxat ta co'tane, ma me xac'ain te bila amene. Ja' me xapas a te bila leque. Te mach'a ya spas te bila leque, ja' me yu'un Dios abi. Yan te mach'a ya spas te bila amene, yu'un nanix ma yilojuc a te Diose.

Lec sc'oplal te Demetrioe

¹² Yan te Demetrioe, lec ay sc'oplal yu'unic ta spisilic stuquel, soc jich ya yal uuc te smelelil c'ope. Soc jo'on testigoon yu'un uuc in to. Ja'ex ya ana'ic stojol te bit'il smelelil te bi ya cale.

Slajibal aiyej

¹³ Ay to bayal te bila c'an jts'ibubate, ja'uc me to, ma jc'an te ya jts'ibubat xan ta jun soc ta tinta.

¹⁴ Melel jnopoj te ya xtal quilat ta orae, jich me ya x'ayanotic soc ya quilbey jba sitic.

¹⁵ Lamaluc me q'uinal ya awaiy ta spisil ora. Te quermanotactic li'to la sticunbat spatjibal awo'tanic. Patbeya yo'tanic ta juju-jtul te quermanotactique.