2 Samuel 5 - Bible in Tzeltal de Oxchuc y Tenejapa

David, muc' ajwalil yu'un Israel soc Judá

¹ Ta patil spisil ta jchajp te sts'umbal Israel bajt'ic ta Hebrón, ja' ba sc'oponic te David. Jich c'o yalbeyic: —Te jo'otic jun jts'umbaltic.

² Manchuc me ja' muc' ajwalil cu'untic a te Saúl, pero ja'at ta mero melel te la awic' bael ta guerra te Israel. Soc ja' nix te Cajwaltic te yalojbat te ja'at te ya awentain soc te ya x'ochat ta ajwalil yu'un Israel —xiic c'oel.

³ Jich c'ot spisilic te mamaletic yich'oj yat'elic yu'un Israel, c'o sc'oponic te muc' ajwalil David ta Hebrón. Te David ay bila la xchap soc. Ja' la yaq'uic ta testigo te Cajwaltique. La yac'beyic yich' yat'el ta muc' ajwalil yu'un Israel te David.

⁴ Lajuneb xcha'winic (30) ya'wilal a te David te c'alal och ta muc' ajwalile. Cha'winic (40) ja'wil jalaj ta muc' ajwalil.

⁵ Ta Hebrón och ta muc' ajwalil yu'un Judá juqueb ja'wil soc olil. Ta Jerusalén och ta muc' ajwalil yu'un spisil Israel soc Judá oxlajuneb xcha'winic (33) ja'wil.

David la yu'unin anjibal ta Sión

⁶ Te muc' ajwalil David soc te swinictac bajt'ic ta Jerusalén, ja' ba yac'beyic guerra te jebuseoetic te tey nainemic a. Te jebuseoetic la scuyic te ma ba ya xju' ya x'och te David ta lume. Jich la yalbeyic: —Ja'at ma xju' ya x'ochat li'to, melel tic' a te ts'o'sitetic soc coxoetic te ma xyac'at ochele —xiic.

⁷ Pero te David ju' yu'un te la yu'unin te anjibal ta Sión, ja' te Lum-yu'un-David sbiil ta ora in to.

⁸ Te David jich la yal yu'un: —Spisil te mach'atic ya xba yac'beyic guerra te jebuseoetic, ac'a ochuc bael ta pasbil beja' ta ye'tal lum, ac'a smil te ma'sitetic soc coxoetic ya yal sbaique. Ja'ic te mero ilaybilic cu'un ta spisil co'tane —xi'. Tey jajch'em a te jich albile: “Te ni ja'uc te ts'o'sitetic, soc ni ja'uc te coxoetic ya xju' ya x'ochic ta templo yu'un Cajwaltic”, te xie.

⁹ Patil te David tey jilix ta nainel ta anjibal, Lum-yu'un-David sbiil c'ot yu'un. La spasbey sts'ajc'ul ta sjoyobal, jajch' ta banti yich'oj pamanel, c'ot c'alal ta sna ajwalil.

Hiram la sticun abatetic yu'un ta stojol David

¹⁰ Te David yan yan yac ta yich'bel yip. Te Cajwaltic te Dios te Spisil ya xju' yu'une, joinbil yu'un.

¹¹ Ja' yu'un te Hiram te muc' ajwalil yu'un lum Tiro la sticun abatetic te muc' yat'el yu'un ta stojol te David, soc la sticun carpinteroetic soc albañiletic. La yich'ic bael cedro, och spasbeyic te smuc'ul na te David.

¹² Te David jich la sna' xan ta lec te ja' Cajwaltic te la yac' ochel ta muc' ajwalil ta Israel, soc te ja' nix te yac ta aq'uel yip te yat'el ta muc' ajwalil ta swenta xc'uxul yo'tan ta stojol te lum Israel.

Yan snich'nab David

¹³ Te c'alal c'ot ta Jerusalén te David te jajch' ta Hebrón, c'o sle xan yantic yinam soc yantic antsetic yu'un tey a. Ja'ic te antsetic te la yac' xan yal-snich'an soc, ay queremetic soc ach'ixetic.

¹⁴ Te snich'nab ayinic ta Jerusalén, ja'ic te Samúa, Sobab, Natán, Salomón,

¹⁵ Ibhar, Elisúa, Nefeg, Jafía,

¹⁶ Elisama, Eliada soc Elifelet.

David la stsal filisteoetic

¹⁷ Te c'alal la yaiyic te filisteoetic te ochix ta muc' ajwalil ta Israel te David, ba sleic ta spisilic. Pero la yaiy te David, jich co bael ta anjibal.

¹⁸ Te filisteoetic talic, c'otic ta suclej yu'un Refaim.

¹⁹ Ja' yu'un te David la sjojc'obey te Cajwaltic, jich la yalbey: —¿Ya bal xju' ya xba jta ta guerra te filisteoetique? ¿Ya bal awac'on ta tsalaw ta stojolic? —xi'. La sjac' te Cajwaltique: —Yac, baan ac'beya guerra. Ya me cac'at ta tsalaw ta stojolic —xi' sc'oplal.

²⁰ Te David c'ot ta Baal-perazim, tey c'o stsal a. Ja' yu'un jich la yal te David: “Te Cajwaltique, jich bit'il snojel ja', la sjambon jbe ta stojol te jcontro”, xi'. Ja' yu'un Baal-perazim sbiil la yac'bey te q'uinale.

²¹ Te filisteoetic la yijq'uitay jilel te yajcananique. Te David soc te swinictaque la yich'beyic bael.

²² Pero te filisteoetic la stsob xan sbaic ta suclej yu'un Refaim yan buelta.

²³ Ja' yu'un te David la sjojc'obey te Cajwaltique, jich albot yu'un: —Ma xawochintay ta sit. Joytayaic, ochintayaic ta spat c'alal ya xc'oex tey ta banti ay te bálsamo-te'etique.

²⁴ Te c'alal ya awaiy ay mach'atic ya xbeenic ta sba te'tiquil, ora me xawochintay. Melel ja' me ya yac' ta na'el te jo'on ya xneelajon awu'un, swenta yu'un ya me yich' ejch'entesel ta swenta lajel te soldado-filisteoetique —xi' sc'oplal.

²⁵ Te David jich la spas te bit'il albot yu'un te Cajwaltique. La stsal te filisteoetic, jajch' ta Gabaón c'alal ta Gezer.