2 Reyes 5 - Bible in Tzeltal de Oxchuc y Tenejapa

Naamán lecub ta c'a'el-chamel

¹ Ay jtul winic Naamán sbiil. Te Naamán ja' capitán yu'un te soldadoetic yu'un te muc' ajwalil ta Siria. Buen c'uxtaybil, buen ich'bil ta wenta yu'un te muc' ajwalil yu'une, melel te Cajwaltic la yac' yaiy tsalaw te siriaetic ta swenta Naamán. Pero te Naamán yich'oj c'a'el-chamel.

² Ay bayal buelta loc' jajch'el soldadoetic ta yochintayel Israel. Ay jun buelta la yiq'uic bael jtul ch'in ach'ix te och ta scriada te yinam Naamán.

³ Te ach'ixe jich la yalbey te yajwale: —Te cajwale, yacuc xba yil te j'alwanej yu'un Dios te ay ta Samaria, ya xch'aybot te sc'a'el-xchamel te jichuque —la yut.

⁴ Te Naamán ba yalbey te muc' ajwalil yu'un te bi la yal te ch'in ach'ixe.

⁵ Te muc' ajwalil yu'un Siria jich albot yu'un: —Lec ay jiche, baan. Ya me jticunbey carta te muc' ajwalil yu'un Israel —xi' sc'oplal. Jich bajt' te Naamán. La xchajban lajuneb xcha'winic ta jmil (30,000) ta jsejp plata, wacmil (6,000) ta jsejp oro soc lajunchajp c'u'iletic,

⁶ soc la yich'bey bael te carta la yich' ticunbel te muc' ajwalil yu'un Israel, te jich la yale: “Te c'alal ya xc'ot ta awenta te carta in to, ya me ana' te ya jticunbat ta atojol te Naamán te ja' capitán yu'un soldadoetic cu'une, swenta yu'un ya me alecubtes te bit'il yich'oj c'a'el-chamele”, xi' ta carta.

⁷ Te c'alal la yil te carta te muc' ajwalil yu'un Israel, la sjats sc'u' yu'un, swenta seña te la smel yo'tane, soc jich la yal: —¿Yu'un bal Dioson te ya xju' cu'un te ya cac'bey xcuxlejal, soc te ya xju' ya cac' ta lajel, te bit'il la sticunbon tel te jtul winic yu'un ya jch'aybey te xchamele? Tsajtaya awaiyic ta lec, ya me ana'ic te bit'il ya nax sle bi ya yut ya scontroinone —xi'.

⁸ C'alal la yaiy te j'alwanej Eliseo te la sjats sc'u' te muc' ajwalil yu'un te bi ya yal te carta, jich la sticun ta alel: “¿Bi yu'un te la ajats te ac'u'e? Ac'a taluc ta jtojol te winique. Ya me sna' te ay jtul j'alwanej yu'un Dios ta Israel”, xi'.

⁹ Te Naamán bajt' soc scarreta soc caballoetic yu'un, c'o scom sba ta sti'il sna Eliseo.

¹⁰ Pero te Eliseo la sticun ta alel yu'un yabat: —Baan, poca aba juqueb buelta ta muc'ja' Jordán. Jich te abaq'uetale ya me xlecub —la yut.

¹¹ Te Naamán ilin bael, jich yac ta yalel bael: —La cal yu'un ya xloc' staon, soc yacuc stejc'an sba ta jts'eel, yacuc sc'opon te Yajwal te Dios yu'une, soc te yacuc scajan sc'ab ta banti ay te jchamele, te jich ya xlecubone.

¹² ¿Ma bal c'axemuc jich yutsil a jiche te muc'ja'etic yu'un Damasco, ja' te Abaná soc Farfar, te bit'il ta spisil te muc'ja'etic yu'un Israel? ¿Yu'un bal ma xju' ya xboon, ya xba jpoc jba tey a swenta yu'un jich ya xlecubon te jichuque? —xi'. Mero ilinem a, jajch' bael tey a.

¹³ Pero te abatetic yu'un noptsajic tel ta sts'eel, jich albot yu'un: —Cajwal, te ayuc to bi yan mero tulan ta pasel la yac'bat apas te j'alwanej yu'un Dios, ¿yu'un bal ma ba la apas te jichuque? ¿Yu'un bal c'ax wocol ta pasel te ja' nax albotat te ya apoc aba jich ya xlecubate? —xi' sc'oplal yu'un.

¹⁴ Te Naamán bajt', c'o smul sba juqueb buelta ta Jordán, jich te bit'il pasot ta mandal yu'un te j'alwanej yu'un te Diose. Te sbaq'uetal jich c'ot te bit'il sbaq'uetal ch'in querem, mero lec a jil.

¹⁵ Te Naamán soc spisil sjo'tac ba yilic te Eliseo. C'alal c'otic ta stojol, te Naamán jich la yalbey: —Yo'tic la jna'ix ta lec ta spamal balumilal ma'yuc Dios, ja' nax ay Dios stuquel ta Israel. Ja' yu'un, wocoluc, tsaca amajt'an te ya cac'bat te jo'on awabatone —xi'.

¹⁶ Pero jich albot yu'un te Eliseo: —Jc'axel ya cal ta jamal ta stojol te Cajwal te ya yilone, te ma ba ya jtsaque —xi'. Manchuc me la yac' puersa te Naamán, pero ma ba la sc'an te Eliseo.

¹⁷ Ja' yu'un te Naamán jich la yal: —Teme jiche, ac'bon permiso te ya quich' bael cheb ta mulail te slumil sq'uinal Israel, melel te jo'on te awabatone ma'yuquix bi ora ya cac'bey chic'bil soc milbil smajt'an yan diosetic, ja' nax stuquel te Cajwaltique.

¹⁸ Ja' nax ay bi ya calbey wocol yu'un te Cajwaltic te yacuc spasbon perdón: ja' te c'alal ya xbajt' te cajwal ta xch'uunel te lotil dios Rimón ta templo yu'une. Teme ya yich' yip ta jc'abe soc teme puersa ya jquejan jba soc tey ta templo, te yacuc spasbon perdón yu'un te Cajwaltique —xi' te Naamán.

¹⁹ Albot yu'un te Eliseo: —Baan, ma me xamel awo'tan —xi' sc'oplal. Te Naamán jajch' tey a, bajt'. C'alal c'ubix bael a,

²⁰ te Giezi te yabat te j'alwanej Eliseo la yal ta yo'tan: “Te cajwal la yaq'uix bael te Naamán, te siria-winique; ma ba la yich'bey jtebuc te majt'aniletic la yich' tele. Jc'axel ya cal ta stojol te Cajwaltic, ya me xba jnuts ta ora; ya me quil bila ya jta tel ta stojol”, xi' ta yo'tan.

²¹ Jich bajt' te Giezi ta spat te Naamán. C'alal ilot yu'un te Naamán te yac ta bael ta spate, la scom scarreta, co ta sc'oponel, jich la sjojc'obey: —¿Ay bal bila amen yac ta c'oel ta pasel? —la yut.

²² La sjac' te Giezi: —Ma'yuc. Pero te cajwal la sticunon tel, te ya calbat te julelic to cheb queremetic j'alwanejetic yu'un Dios, te talemic ta witstiquil Efraín. Ja' yu'un, ya laj yalbat wocol te ya awac'bey oxmil (3,000) ta jsejp plata soc cha'chajp c'u'iletic —xi' c'oel ta lot.

²³ Te Naamán la sjac': —Wocoluc, ich'a bael wacmiluc (6,000) ta jsejp plata —xi'. La yac' puersa te Naamán te yacuc sc'an ya yich'e. Jich la yac'bey ochel ta cheb costal, soc te cha'chajp c'u'iletique. La yac'bey ta sc'ab cheb abatetic yu'un, swenta yu'un ya yich'beyic bael. Ja' neel ayic bael ta stojol te Giezi.

²⁴ C'alal c'otic ta ch'in wits, te Giezi la stsac te plata yich'oj te abatetique. La sq'uej ta sna, la sticun sujt'el te abatetique.

²⁵ Patil bajt' ta stojol te yajwale. Te Eliseo la sjojc'obey te Giezi, jich la yalbey: —Giezi, ¿banti c'oat tel? —la yut. —Te jo'one, ma'yuc banti baemon —xi' ta lot te Giezi.

²⁶ Pero te Eliseo puersa jich la yal: —Te c'alal te jtul winic co ta scarreta yu'un stabelate, tey joinejat la caiy ta co'tan a. Pero ma yorailuc ta ich'el taq'uin soc c'u'iletic, ni ja'uc ya xju' ta manel awalts'unubil, chijetic, wacaxetic, abatetic soc criadaetic.

²⁷ Ja' yu'un yo'tic te sc'a'el-xchamel te Naamán, ja'at me ya xc'ot ta anujc'ulel, soc te patil alnich'anetic awu'un ta sbajt'el ora —xi' sc'oplal. Te c'alal te Giezi loc' bael ta stojol Eliseo, mero scojt'ol ayix a te c'a'el-chamel ta snujc'ulele, scojt'ol sacubenix jichuc toib a.