2 Reyes 4 - Bible in Tzeltal de Oxchuc y Tenejapa

At'ej yu'el Dios ta aceite

¹ Ay jtul ants te la yinamin jtul j'alwanej yu'un Dios, bajt' ta stojol Eliseo, jich c'o yal: —Te jmamlale lajix. Ana'oj te la yich' ta muc' te Cajwaltique. Yo'tic talix ta jtojol te jc'an-betile, ya sc'an ya yic'bon bael smozoin te cheb calataque —xi'.

² Jojc'obot yu'un te Eliseo: —¿Bi ya xju' ya jpasbat ta awenta? Albon caiy bila ay awu'un ta ana —xi' sc'oplal. La sjac' te antse: —Te jo'on te awabatone, ma'yuc bila ay cu'un ta jna, ja' nax jun ch'in oxom aceite —xi'.

³ Albot yu'un te Eliseo: —Baan jiche, yo'tic ya me amajan tsobol jochol ch'in oxometic yu'un apat-axujc', spisil te ya xju' awu'un smajanele.

⁴ Patil ya me x'ochat ta ana soc te awalatac, maca te ana, ochan nojesa ta aceite spisil te oxometique. Parte ya awac' te nojemiquixe —xi' sc'oplal.

⁵ Te ants la sc'opon jilel te Eliseo, ba smac sba ta na soc te yalataque. Jich jajch' snojes te oxometic yac ta ich'el tel yu'un te yalataque.

⁶ C'alal noj spisil te oxometic, la spas ta mandal te jtul yale: —Ich'bon tel yan oxom —la yut. Pero la sjac' te yale: —Ma'yuquix yan —xi'. Jich ora quejch'aj ta oc te aceite.

⁷ Patil bajt' te antse, c'o yalbey te j'alwanej yu'un te Diose, jich albot yu'un: —Baan chona te aceite, toja a te abete. Te jayeb xan ya xjil, ja' me ya aman a te bitic ya xtuun awu'un soc awalatac —xi' sc'oplal.

Eliseo soc sunem-ants

⁸ Ay jun c'aal c'ax ta lum Sunem te Eliseo. Ay jtul ants tey a te ich'bil ta muq'ue. Bayal buelta albot yu'un te yacuc xc'ax ta we'ele. Ja' yu'un spisil ora te jayeb buelta c'ax tey a te Eliseo, och ta we'el.

⁹ Te ants jich la yalbey te smamlale: —Te jo'one ya jna' te ja' ch'ul j'alwanej yu'un Dios te winic te spisil ora ya xc'axe. Te c'alal ya xtal, ya xc'ax yula'tayotic.

¹⁰ Ja' lec ya jpasbeytic junuc scuarto ta sba te jnatique. Ya cac'beytic junuc swayib, jun smesa, jun silla soc jun sc'ajc', swenta yu'un te c'alal ya xc'ax yula'tayotic, ya xju' tey ya xjul a —xi'.

¹¹ Te Eliseo la sta yorail te c'ot ta cuarto, swenta yu'un tey ya xwayix a.

¹² Jich la yalbey te Giezi te yabate: —Ic'a tel te sunem-antse —la yut. Te abat la yic' tel. C'alal jul tel te ants ta stojol Eliseo, jich la yalbey te yabate:

¹³ —Jojc'obeya te ants teme ay bi ya sc'an ya jpasbeytic ta stojole, melel mero lec yo'tan ta jtojoltic. ¿Ay bal bi ya sc'an te ya xju' ya jc'oponbeytic te muc' ajwalil yu'une, o teme ja' te capitán yu'un soldadoetique? —xi'. La yal te antse: —Lec ayon soc te jlumale —xi'.

¹⁴ Te Eliseo la sjojc'obey te yabate: —¿Pero bila lec ya xju' ya jpasbeytiquix ta stojol a jiche? —xi'. La sjac' te Giezi: —Ma jna'. Ma'yuc yal te antse; te smamlale mamalix —xi'.

¹⁵ —Ic'a tel —xi' te Eliseo. Te abat ba yic' tel, jich te antse teq'uel c'oel ta ti'nail.

¹⁶ Te Eliseo jich la yalbey: —Te ja'wil ya xtal, jich bit'il ora to, apetoj meix awal a —la yut. La sjac' te antse: —Ma niwan, tatic. Ja'at te swinicat Dios, ma me xalo'layon te jo'on awabatone —xi'.

¹⁷ Pero jich te bit'il albot yu'un te Eliseo, jich ora ayix jilel yal. C'alal ta yan ja'wil, ayin jtul squerem-al.

¹⁸ Muc'ub te alalquereme. Pero jun c'aal loc' bael ta yilel te stat te sjoinej te jc'ajwiletique.

¹⁹ Jajch' ta aw te quereme: —¡Ay, ja' te jole! ¡C'ux jol! —xi'. Te stat jich la yalbey te yabate: —Ic'a bael ta banti ay sme' —la yut.

²⁰ Te abat la stsac, la yic' bael te banti ay te sme'e. Te sme' la snajc'an ta yacan c'alal ta olil c'aal te yale. Te alalquereme laj.

²¹ Pero te antse la yic' moel ta scuarto te j'alwanej yu'un Dios, la yac'bey jilel ta swayib. Loc' bael, la smac jilel te sti' nae.

²² La yic' tel sc'opon te smamlale, jich la yalbey: —Ticunbon jtul abat soc jcojt' burra, yu'un ya xba quil te j'alwanej yu'un Diose. Ora ya sujt'on tel —xi'.

²³ La sjojc'obey te smamlale: —¿Bi yu'un ya xba awil yo'tic? Ma yorailuc yach'il u, soc ma yorailuc sc'aalelal cux-o'tanil —xi'. —Ma x'aan awo'tan yu'un —xi' te antse.

²⁴ La yal mandal ta chajbanel te burra. Jich la yalbey te yabate: —Ya xbootic ta ora. Ma me xawac' xjalajotic, chican ya calbat te banti ya jc'an ya jcom jba —xi'.

²⁵ Jich bajt' te antse, c'ot ta wits Carmelo, tey ta banti ay te j'alwanej yu'un Dios. C'alal la yil te yac ta talel ta c'ubul te ants te Eliseo, jich la yalbey te Giezi te yabate: —Ila awil, ja' te sunem-antse.

²⁶ Animajan, baan c'opona, jojc'obeya teme lec aye, soc teme lec ay te smamlal soc te yale —la yut. Te abate bajt', pero te ants la yal te lec ayique.

²⁷ Ora c'ot tey ta wits te banti ay te Eliseo, c'o spetbey yacan. Te Giezi noptsaj bael, c'an sjits loq'uel, pero te Eliseo la yal mandal: —Ijq'uitaya, mero bayal swocol. Te Cajwaltic ma ba yalojbon te bi la spase —xi'.

²⁸ Jich c'opoj te antse: —Tatic, ¿yu'un bal la calbat te ya jc'an jtul cale? ¿Ma bal lajuc calbat jiche te ma ba ya alo'layone? —xi'.

²⁹ Te Eliseo jich la yalbey te Giezi: —Chajbana aba, ich'a te jbastone, baan tey a. Teme ay mach'a ya ata aba soque, ma me xapatbey yo'tan; teme ay mach'a ya spatbat awo'tan, ma me xajac'bey, jich ma xjalajat a. Cajanbeya ta yelaw te alalquerem te jbastone —la yut.

³⁰ Pero te sme' te alalquereme jich la yalbey te Eliseo: —Jc'axel ya cal ta stojol Cajwaltic, soc nix ta atojol, te ma ba ya xboon teme ma ba ya xbaate —xi'. Jich te Eliseo la sjoin bael.

³¹ Pero te Giezi, neelajem yu'unic stuquel. La scajanbeyix ta yelaw te alalquerem te sbastón Eliseo, pero ma'yuc jxujt'uc seña te ya xcuxin yu'une. Ja' yu'un te Giezi ba sta tel te Eliseo, jich c'o yalbey: —Te alalquereme ma xcuxin —xi'.

³² C'alal och bael ta na te Eliseo, te ch'in querem lajemix a, tixil ta wayibal.

³³ Jich och bael, la smac te sti' nae, och sc'opon te Cajwaltique. Ja' nax xchebal soc te ch'in querem te lajeme.

³⁴ Te Eliseo mo bael ta wayibal, la spajc'an sba ta sba te ch'in quereme. Tey la yac' ye a ta banti ye, soc tey la yac' sit a ta banti sit, soc tey la yac' sc'ab a ta banti sc'ab te ch'in quereme, jich la spajc'an sba ta scojt'ol sbaq'uetal te ch'in quereme. Te sbaq'uetal te ch'in quereme jajch' ta q'uixnajel.

³⁵ Te Eliseo jajch', och ta comcom beel tey ta yut cuarto. Patil cha'mo xan bael ta wayibal, c'o xcha'pajc'an xan sba ta banti sbaq'uetal te ch'in quereme. Ora nax te querem ac'bot jat'ismajel juqueb buelta, jajch' swic' sit.

³⁶ Te Eliseo la yic' tel te Giezi, jich la yalbey: —Ic'a tel te sunem-antse —la yut. Te Giezi jich la spas. C'alal c'ot tey a te sunem-ants ta banti ay te Eliseo, jich albot yu'un: —Li' ayix te awale —xi' sc'oplal yu'un.

³⁷ Te ants noptsaj tel, la stinan sba coel c'alal lum ta stojol te Eliseo. Patil la stsac te yale, loc' bael ta cuarto.

At'ej yu'el Dios ta we'elil

³⁸ Patil te Eliseo sujt' bael ta lum Gilgal. Ja' yorail a te jajch' bayal wi'nal ta sjoyobal q'uinal. Te c'alal joyolix ta naclej ta sts'eel Eliseo te j'alwanejetic yu'un Dios, te Eliseo jich la yalbey te abat yu'une: —Ac'a ochel ta c'ajc' te muc'ul oxome, chajbanbeya swe'elic te j'alwanejetic yu'un Dios —xi'.

³⁹ Te abatetic loc' bael jtul, bajt' ta ja'maltic ta stulel sit te ja'male. La sta jpejt' ja'mal tey a, la stulbey sit, pajal soc ja'mal ch'um yilel. La xchuy bael ta pac' ja' to te noj te paq'ue. C'alal sujt' tel, c'o sesen. La yac' ochel ta we'elil, manchuc me ma ba sna'oj teme lec ta we'ele.

⁴⁰ Patil ac'bot swe'ic te j'alwanejetic yu'un Dios. C'alal ochic ta we'ele, jajch'ic ta aw: —¡J'alwanej, te we'elil chajbanbile, ay svenenoil! —xiic. Jich ma ba la swe'iquix.

⁴¹ Pero jich la yal te Eliseo: —Ich'bonic tel jtebuc harina —xi'. C'alal la yac' ochel te harina ta yutil te oxome, jich la yal: —Ac'beyaiquix swe'elic te mach'atic li' ayique —xi'. We'ic spisilic, ma'yuquix bila amen ay ta oxom.

⁴² Patil c'ot jtul winic talem ta Baal-salisa. Yich'ojbey c'oel jtab ta pejch' waj pasbilic ta cebada te loq'uelic to ta samet, soc yach'il trigo ta morral. Te Eliseo la yalbey mandal te abat yu'une: —Ac'beya te mach'atic li' ayique, ac'a swe'ic —xi'.

⁴³ Pero te abate jich la yal: —¿Bi ya cut ya cac'bey swe'ic te jo'winic (100) ta jtul mach'a li' ayique? —xi'. La sjac' te Eliseo: —Ac'beya swe'ic te mach'atic li' ayique, melel te Cajwaltic la yalix te ya xwe'ic, soc te ay to ya xjil sobrail —xi'.

⁴⁴ Jich nix la spas a te abate. Jich we'ic te mach'atic tey ayic a, jil to xan sobrail a, jich nix te bit'il la yal te Cajwaltique.