2 Reyes 2 - Bible in Tzeltal de Oxchuc y Tenejapa

Mo ta ch'ulchan Elías

¹ C'alal c'ot yorail yu'un Cajwaltic te la yic' bael ta ch'ulchan ta sutu-ic' te Elías, te Elías soc Eliseo loq'uic bael ta Gilgal.

² Te Elías jich la yalbey te Eliseo: —Jilan li' to yu'un ya sticunon bael ta Betel te Cajwaltique —xi'. Pero te Eliseo jich la yal: —Jc'axel ya cal ta jamal ta stojol Cajwaltic, soc nix ta atojol, te ma ba ya quijq'uitayat atuquel —xi'. Jich la sjoin bael c'alal ta Betel.

³ Pero te j'alwanejetic yu'un Dios nainemic ta Betel, loq'uic ta stael te Eliseo, jich la yalbeyic: —¿Ana'oj bal te yo'tic ya yic'batix Cajwaltic te maestro awu'une? —xiic. La sjac' te Eliseo: —Jich, jna'ojix, pero ma me ayuc bi xawalic te ja'exe —xi'.

⁴ Patil te Elías jich la yalbey te Eliseo: —Jilan li'to, yu'un ya sticunon ta Jericó te Cajwaltique —xi'. Pero te Eliseo la sjac': —Jc'axel ya cal ta jamal ta stojol Cajwaltic, soc nix ta atojol, te ma ba ya quijq'uitayat atuquel —xi'. Jich la sjoin sbaic bael c'alal ta Jericó.

⁵ Pero te j'alwanejetic yu'un Dios nainemic ta Jericó, loq'uic ta stael te Eliseo, jich la yalbeyic: —¿Ana'oj bal te yo'tic ya yic'batix Cajwaltic te maestro awu'une? —xiic. La sjac' te Eliseo: —Jich, jna'ojix, pero ma me ayuc bi xawalic te ja'exe —xi'.

⁶ Jich cha'albot xan yu'un te Elías: —Jilan li'to, yu'un ya sticunon ta muc'ja' Jordán te Cajwaltique —xi'. Pero te Eliseo jich la yal: —Jc'axel ya cal ta jamal ta stojol Cajwaltic, soc nix ta atojol te ma ba ya quijq'uitayat atuquel —xi'. Jich bajt' xchebalic.

⁷ Pero lajuneb yoxwinic (50) j'alwanejetic yu'un Dios c'otic tey a, la slaman sbaic ta nopol nax. Yan te Elías soc te Eliseo la scom sbaic ta beel, la stejc'an sbaic ta sti'il muc'ja' Jordán.

⁸ Te Elías la sloq'ues te smeyil nujc'ule, la sbal, la smaj a te ja'e. Te ja' la sq'uep sba ta juju-jejch', xchebalic c'axic tey ta slumil te ja', jich te bit'il taquin lumq'uinale.

⁹ Te c'alal c'axiquix bael ta ja', te Elías jich la yalbey te Eliseo: —Albon te bi ya ac'an te ya jpasbat ta awenta, te bit'il li' ayon to ta ats'eel —la yut. La sjac' te Eliseo: —Ya jc'an te mero c'axem xan jich ya quich' te espíritu te bit'il ja'ate, jich te bit'il ya yich' jilel sbiluc stat te sba-nich'anile —xi'.

¹⁰ La yal te Elías: —Ma jtebuc nax sc'oplal te bi ya ac'anbone. Pero teme la awilon te c'alal ya x'ic'oton bael, ya me awich' aq'uel. Yan teme ma'uque, ma me ba ya x'ac'botat —xi' te Elías.

¹¹ Te c'alal yacalic ta beel bael a, soc te yacalic ta c'op a, ora nax chicnaj c'ajc' pajal yilel soc carreta, soc c'ajc' te pajal yilel soc caballoetique, jich ac'bot yijq'uitay sbaic. Jich mo bael ta ch'ulchan te Elías, potsot bael ta sutu-ic'.

¹² C'alal la yil te Eliseo te bila c'ot ta pasel, awun, jich la yal: —¡Jtat, jtat, pajal c'oat soc tsobol soldadoetic ta stojol Israel! —xi' ta aw. Te c'alal jich c'ot ta pasele, tey ma'yuquix bi ora la yil a te Eliase. Jich yu'un te Eliseo la stsac te sc'u', la sjats ta olil.

Eliseo ja' sjelol jilel te Elías

¹³ Ora la stambey te smeyil nujc'ul Elías te la xch'oj jilele, sujt' bael ta Jordán, teq'uel c'oel ta sti'il te ja'e.

¹⁴ Ora la smaj ta ja' te smeyil nujc'ul, jich la yal: “¿Banti ay te Cajwaltic, te Dios yu'un Elías?” xi'. Yac to ta smajel a te ja', ora la sjam sba ta juju-jejch'. Te Eliseo cha'c'ax xan tey ta slumil te ja'e.

¹⁵ Te j'alwanejetic yu'un Dios te ayic ta Jericó te yac ta yilel ta c'ubul, jich la yalic te c'alal la yilic: “¡Te espíritu yu'un te Elías, jilix ta swenta Eliseo!” xiic. Ba staic tel, la squejan sbaic ta stojol,

¹⁶ jich la yalbeyic: —Ilawil, li' ayic ta coliltic te abatetic awu'un, ay lajuneb yoxwinic (50) te mero ay yip yo'tanique. Ac'a bael te ya xba slebat te maestro awu'une, teme repente ja' te espíritu yu'un Dios la slic jajch'el, la xch'oj bael ta ba wits, o ta stenlej xatal q'uinal —xiic. Pero albotic yu'un te Eliseo: —Ma'uc, ma'yuc mach'a x'aticunic —xi'.

¹⁷ Pero scaj te mero bayal c'opojic, la yal te ya sticunic te lajuneb yoxwinic (50) winiquetique. Oxeb c'aal yacalic ta sleel te Elías, pero ma ba la staic.

¹⁸ Jich sujt'ic tel ta Jericó te banti jil te Eliseo, jich albotic yu'un: —Jo'on la calbeyex jiche te ma ba ya xbaex, pero puersa baex —xi' sc'oplalic yu'un.

Eliseo la yutstes sloq'uibja' ta Jericó

¹⁹ Te yajwal te lume jich la yalbeyic te Eliseo: —Ilawil te lume, buen lec c'oem ta ilel, jich te bit'il ya awile, pero te ja' amen, soc te slumil mero ma'yuc bi ya xch'i a —xiic.

²⁰ —Ich'bonic tel jun muc'ul yach'il taza soc ats'am —xi' te Eliseo. C'alal ich'bot tel te muc'ul taza,

²¹ te Eliseo bajt' ta bay sloq'uibja', la xch'oj ochel tey a te ats'ame, jich la yal: —Jich ya yal te Cajwaltic: “Jo'on la jlecubtesix te ja'e. Ma'yuquix bi ora ya xjajch' chamel, soc ma'yuquix bi ora ya sboltes te lume”, xi' te Cajwaltique —xi' te Eliseo.

²² Jich ora lecub jilel te ja', jich te bit'il la yal te Eliseo.

²³ Patil te Eliseo jajch' bael tey a, bajt' ta Betel. C'alal yac ta moel bael ta be a, ay jch'iel queremetic ta lum, loc' tel ta tael yu'un. Jajch' ta labanel yu'un te queremetic, jich la yalic ta aw: —¡Moan tel, t'ax jol! ¡Moan tel, t'ax jol! —xiic.

²⁴ Te Eliseo la sut sba ta stojolic, la yil bael: —Yo'tic ya me yac'bat castigo te Cajwaltique —la yut. Ora loc' tel ta ja'mal cha'cojt' osoetic, milotic yu'un cheb yoxwinic (42) ta jtul queremetic.

²⁵ Patil te Eliseo bajt' ta wits Carmelo. Jich sujt' xan bael ta Samaria.