2 Reyes 16 - Bible in Tzeltal de Oxchuc y Tenejapa

Yat'el Acaz, muc' ajwalil yu'un Judá

¹ Ta sjuclajunebal ja'wil yochel ta muc' ajwalil a te Peka, snich'an Remalías, och ta muc' ajwalil ta Judá te Acaz, snich'an Jotam.

² Ay jtab ya'wilal a te c'alal och yat'ele. Jalaj ta muc' ajwalil ta Jerusalén waclajuneb ja'wil. Te yat'ele ma ba lec ta sit te Cajwaltic te Dios yu'une, ma jichuc te bit'il yat'el te David, te antiguo sts'umbale.

³ Melel ja' la st'unbey sbe te anima muc' ajwaliletic ta Israel, asta la yac' ta chiq'uel ta majt'anil ta stojol lotil diosetic te snich'ane, jich te bit'il c'ax amen ya spasic te yantic nacionetic te la xch'oj loq'uel ta stojolic te israeletic te Cajwaltique.

⁴ Soc xan, la yac'bey milbil smajt'an soc la xchic'bey pom ta toyol ch'uunjibal, ta toyol witsetic, soc ta spisil ye'tal te'etic te bayal sc'ab soc yabenale.

⁵ Ja' yorail a, te Rezín, muc' ajwalil yu'un Siria, soc te Peka snich'an Remalías, muc' ajwalil yu'un Israel, bajt'ic ta Jerusalén ta yaq'uel guerra. C'o sjoytayic te lum te banti ay Acaz, pero ma ba la yu'uninic.

⁶ Te muc' ajwalil ta Edom la yich' xan te lum Elat; jich yu'un te edometic c'otic tey a. C'alal la stenic loq'uel ta Elat te judioetic, ja' jilic ta nainel tey a c'alal ora.

⁷ Ja' yorail a te Acaz la sticunbey c'op te Tiglat-pileser, muc' ajwalil yu'un Asiria. Jich la sticunbey ta alel: “Jo'on te abaton awu'une, jichon te bit'il anich'ane. Ja' yu'un, la', coltayawon ta sc'ab te muc' ajwalil yu'un Siria soc te muc' ajwalil yu'un Israel te yac ta yac'belonic guerra”, xi' ta stojol.

⁸ Te Acaz la stsac te plata soc oro te ay ta templo yu'un Cajwaltic, soc nix te ay ta snae. La sticunbey smajt'anin te muc' ajwalil yu'un Asiria.

⁹ Te muc' ajwalil yu'un Asiria la yich'bey ta wenta te sc'ope. La xchajban swinictac yu'un guerra ta scontroinel Damasco, la stsal. C'alal ju' yu'un, la yac'bey yijq'uitay slumalic te yajwal te lume, la sticun bael ta Kir, soc la smil te Rezín.

¹⁰ C'alal c'ot ta Damasco te muc' ajwalil Acaz, swenta yu'un ba sta sba soc te Tiglat-pileser, muc' ajwalil yu'un Asiria, la yil tey a te scajtijib ta chiq'uel smajt'an te lotil diose. C'alal la yil la sloq'uesbey splanoil te mero jich nix yilel ta pasele, la sticunbey te sacerdote Urías.

¹¹ Te Urías la spas te scajtijib ta chiq'uel majt'anil, ja' nix jich te bit'il albot ta jun yu'un te muc' ajwalil Acaz, te ticunbot tel c'alal ta Damasco. Ju'emix yu'un a te c'alal sujt' tel ta Damasco te Acaz.

¹² C'alal sujt' tel ta Damasco te muc' ajwalile, la yil te scajtijib ta chiq'uel majt'anile. Noptsaj bael, c'o xchic'bey ta sba te smajt'an te Diose;

¹³ ja' nix la xchic' te majt'anil harina yu'une, la smalbey ta sba te scajtijib te majt'anil te vino yu'une, soc la stsijts'anbey te scajtijib majt'anil te xch'ich'el te milbil majt'anil swenta lamal-o'tanile.

¹⁴ Ja' nix jich te scajtijib ta chiq'uel majt'anil pasbil ta bronce ay ta stojol te templo yu'un Cajwaltic, te Acaz la sloq'ues tey a, la yac' ta xujc' ta stojol norte yu'un te scajtijib ta chiq'uel majt'anile. Tey jilix ta olil yu'un te templo a soc te yach'il scajtijib majt'anile.

¹⁵ Patil la yalbey mandal te sacerdote Urías, te tey ta muc'ul scajtijib ya me xchic' te majt'anil chambalam ta sab, soc te majt'anil harina ta smalel c'aale. Ja' nix jich te smajt'an Dios te ya xbajt' ta chiq'uel soc te majt'anil harina te ya yac' te muc' ajwalile, soc nix te smajt'an Dios ya yac' ta chiq'uel spisil te israeletique, soc te majt'anil harina soc te vino yu'unique. Soc la yalbey xan te ya stsijts'anbey ta scajtijib ta chiq'uel smajt'an Dios spisil te xch'ich'el majt'aniletic, soc xch'ich'el te yantic majt'aniletique. Pero te scajtijib ta chiq'uel smajt'an Dios te pasbil ta bronce, ja' nax ya xtuun yu'un teme ay bi ya sjojc'obey te Cajwaltique.

¹⁶ Te sacerdote Urías spisil la spas te bitic albot spas yu'un te muc' ajwalil Acaz.

¹⁷ Patil te muc' ajwalil Acaz la sboj loq'uel te joyob lejch'el taq'uin yu'un yawil ja', soc la sloq'ues te toroetic pasbilic ta bronce ta bay cajal te muc'ul yawil ja', la scajan ta sba tonetic.

¹⁸ Soc swenta yu'un jich lec yo'tan yu'un a te muc' ajwalil yu'un Asiria, la sloq'ues ta templo yu'un Cajwaltic te yawil te smuc'ul nactijib swenta sc'aalelal cux-o'tan te pasbil yu'unic soc te ti'nail ta spat templo yu'un yochibal te muc' ajwalile.

¹⁹ Te jayeb xan sc'oplal yat'el Acaz soc te bitic spasoje, ts'ibubil ta libro yu'un yat'el muc' ajwaliletic ta Judá.

²⁰ C'alal laj, la smuquic ta banti mucul te anima sts'umbal ta Lum-yu'un-David. Patil ja' och ta sjelol te snich'ane, ja' te Ezequías.