2 Pedro 3 - Bible in Tzeltal de Oxchuc y Tenejapa

Te sc'aalelal ya xtal te Cajwaltique

¹ Quermanotac te bayal c'uxex ta co'tane, ja' xchebal carta in to te yacon ta sts'ibuyele. Ta xchebal te cartae, jich la sc'an co'tan te la jpasbeyex swenta sjachjibal awo'tanic soc tac'uyel swenta yu'un lecuc me te snopjibal awu'unique.

² Ma me xch'ay ta awo'tanic te bila yalojic ta neelal to te ch'ul j'alwanejetique soc te smandal te Cajwaltic te Jcoltaywanej cu'untique, te la yac'beyex anopic te jpuc-c'opetique.

³ Na'aic me stojol ta lec neeluc in to: Ta nopol slajibal c'aal ay mach'atic ya xlabanwanic, yu'un ja' nax baem yo'tanic ta spasel te bila amen ya smulanic spasele.

⁴ Jich me ya yalic ta labanwanej: “¿Tal balix te Cristo, te jich la yal te ya xcha'tale? Melel te c'alal lajic bael te jme'-jtatique, stalel ay te q'uinale, ja' to ta xjajch'ibal te la yich' pasel te ch'ulchan balumilale”, te xiique.

⁵ Ja' in ants-winiquetic to, ma sna'ic stojol te bit'il namey q'uinal ay te ch'ulchane. Smandal Dios te chicnaj ta yolil ja' te balumilale, la yac' ta olil te ja'e.

⁶ Ja' nix ta swenta ja' te laj ta pulemal te balumilale.

⁷ Yan ta ora to, te ch'ulchan balumilal te chicane, quechelic ta lajel ta c'ajq'uel. Ya me xlaj ta c'ajq'uel te bi ora ya x'ich'otic ta c'op te mach'atic ma la xch'uunic te Diose, te jich ya x'ac'otic bael ta lajele.

⁸ Quermanotac te bayal c'uxex ta co'tane, ma me xch'ay ta awo'tanic in to: Te jmil ja'wile, jun nax c'aal ta yo'tan te Cajwaltique. In te jun c'aale, pajal soc te jmil ja'wile.

⁹ Ma yu'unuc jal c'aal xan ma xc'ot sc'op yaloj te Cajwaltique, jich bit'il ay mach'atic te jich scuyojique. Scaj nax yu'un te ya smaliyotique, melel ma sc'an teme ay mach'a ch'ayel ya xbajt'e. Ja' ya sc'an te yacuc sujt'es yo'tanic ta stojol te Diose.

¹⁰ Ma na'biluc cu'untic te bi c'aalil ya xtal te Cajwaltique cu'untic, jich bit'il ma na'biluc cu'untic te ay ajc' nax ya xtal j'elec' ta ajc'ubale. Te bi c'aalil ya xtal te Cajwaltique, xnililet nax me ya xlaj bael te ch'ulchane. Soc ya me xlilaj ta c'ajq'uel spisil te c'aale, te ue, te eq'uetique. Soc te balumilale ya me xlaj ta chiq'uel soc spisil te bitic ay tey ae.

¹¹ Te bit'il la awaiyiquix stojol te jich ya xlaj spisil te bitic aye, jich yu'un ya sc'an te c'axem to xan lec ya x'ainex ta q'uinale soc te ya ach'uunic spisil ora te Diose.

¹² Maliyaic me te bi c'aalil ya xtal te Diose, soc pasaic me spisil te bila ya yac' taluc ta ora yu'une. Te bi c'aalil te ya xtale, te ch'ulchane xpulpon me ta tilel ya xlaj ta c'ajq'uel, soc jich me ya x'ulub te c'aal, u, eq'uetique.

¹³ Yan te jo'otique, ja' ya jmaliytic te ach' ch'ulchan soc te ach' balumilal te ma'yuc xujt'uc mulil tey a te jich yalojix Dios te ya spase.

¹⁴ Jich yu'un quermanotac te bayal c'uxex ta co'tane, te jayeb xan c'aal yacalex ta smaliyele, antayaic me te ma me ayuc bila quechel ta awentaic ta stojol a te ya xjul staex te Diose. Ma me bolobenuc awo'tanic yu'un mulil a te ya xtale.

¹⁵ Na'aic me stojol te ay swentail te jal c'aal smaliyejotic te Cajwaltique, yu'un ya sc'an yo'tan te ya scoltayotique. Jich nix la sts'ibubeyex uuc te quermanotic Pablo, te bayal c'ux ta co'tantique. Ta swenta sp'ijil yo'tan ac'bil yu'un Dios te la yale.

¹⁶ Ta spisil te cartaetic pasbil yu'une, jich yalojix spisil tey a. Ay nax tey a te bila wocol ta na'el stojole. Ay ya syantesbeyic sc'oplal te bila ts'ibubil te mach'atic bol yo'tanic soc te ma'yuc yip yo'tanic ta xch'uunel te Diose, jich nix te bit'il ya syantesbeyic sc'oplal te bila yantic xan ts'ibubil jilel ta Sjun te Diose. Ja' me ch'ayel ya xbajt'ic yu'un.

¹⁷ Jich yu'un, quermanotac te bayal c'uxex ta co'tane, tsajtaya me abaic ta lec te bit'il ana'ojiquix stojole. Ma me xawac' slo'layex te jlo'laywanejetique. Ma me xawijq'uitayic te bila jun nax awo'tanic ta xch'uunele.

¹⁸ Ja'uc me to, na'beyaic xan sba ta lec te Cajwaltic Jesucristoe te Jcoltaywanej cu'untique. Ac'a esmajuc xan ta awo'tanic te xc'uxul yo'tane. Jelawen yutsilal sc'oplal stuquel te Cajwaltique ta ora to soc ta sbajt'el q'uinal. Jichuc.