2 Pedro 2 - Bible in Tzeltal de Oxchuc y Tenejapa

Te lotil maestroetic soc te lotil j'alwanejetique

¹ Ja'uc me to, namey q'uinal ay lotil j'alwanejetic ta yolil te lum Israele. Ja' nanix jich ya me xchicnaj lotil maestroetic ta awolilic uuc. Muquen me ya yaq'uic ta nopel yan c'op te ya xjinawane. Ma ja'uc ya yaq'uic ta ich'el ta muc' te Cajwaltic te la stojbey scolelique. Jich me ora ya yich'ic jinel stuquelic.

² Ay me tsobol ta jtul ya sjoin sbaic soc ta spasel spisil ta jten mulil. Jich ya xbolob sc'oplal ta ch'uunel te smelelil c'op yu'un te Diose.

³ Scaj sbic'tal yo'tanic yu'un taq'uin te ya slo'layex ta swenta slotil-c'opic te ya yaq'uic ta nopele. Ja'uc me to, namey chapal sc'oplalic te ya yich'ic castigo yu'un. Ma xju' ya scoltay sbaic te ya xbajt'ic ta lajel.

⁴ Melel te Diose ma la spasbey perdón te ch'ul abatetic te la sta smulic ta stojole. La xch'oj coel ta bay infierno. Tey la yac' ta chuquel ta cadena ta bay te ijc' q'uinale, q'uejbilic tey a, ja' to teme la sta sc'aalelal te ich'el ta c'ope.

⁵ Ja' nanix jich uuc te namey q'uinal ants-winiquetic ta balumilale, ma ba pasbotic perdón yu'un te Diose. La yac' taluc pulemal ta stojolic te bit'il ma ba ich'ot ta muc' yu'unic la yile. Ja' nax la yich' coltayel te Noé, te la yat'elin xcholel te lequil cuxlejal ta q'uinale, soc te juctul xane.

⁶ Dios la yac'bey tulan castigo te cheb lumetic, ja' te Sodoma soc te Gomorrae. Tan a jilic ta c'ajq'uel yu'un. Ja' ejemplo jilem ta stojolic spisil te ants-winiquetic teme ma sc'an yich'ic ta muc' te Diose.

⁷ Ja'uc me to, Dios la scoltay loq'uel te Lote te toj ta winiquile. Bayal la smel yo'tan yu'un te bit'il la yil te amen te bila la spasic te mach'atic ixta yo'tanique.

⁸ Te bit'il toj ta winiquil te Lote, jujun c'aal bayal la smel yo'tan yu'un te jayeb ta jten yixtailique, yu'un la yil soc la yaiy stojol spisil te bila la spasique.

⁹ Jich chican ta jamal te ya xju' yu'un te Cajwaltic te ya yac' ta libre yu'un sujel te mach'atic jun yo'tan yac'oj sbaic ta stojol. Soc ya to sq'uej te mach'atic ma tojuc yo'tanique, swenta yu'un ya yac'bey castigo c'alal ya sta sc'aalelal te ich'el ta c'ope.

¹⁰ C'axem to xan ya me yac'bey castigo ta patil spisil mach'a yat'elinejic spasel te biluc muliluc te ya smulan sbaq'uetalique soc te ma sc'an yajwalinic te Cajwaltique. Tulan yo'tanic, ma'yuc q'uexlal ta yo'tanic, ma xi'ic stoybac'optayel te mach'atic cajal yu'elic ta ch'ulchane.

¹¹ Yan te ch'ul abatetic te cajal yipique soc te cajal bila ya xju' yu'unique, ma xyalbey smulic ta stojol Cajwaltic te mach'atic cajal yu'elic ta ch'ulchane.

¹² Yan in winiquetic to, pajal c'oemic soc chambalametic, te ma sna'ic q'uinale. Ja' nax cuxulic yu'un te ya yich'ic tsaquel ta milele, jich nix ya xlajic uuc te bit'il te chambalametique. Melel ya slabanic te bila ma sna'ic stojole.

¹³ Ya me x'ac'bot stojic ta woclajel te bit'il ya yac'bey c'axuc swocol te yantique. Scuyoj sbaic te staojic bayal sbujts' yo'tanic yu'un te bila ajc' nax ya smulanic spasele. Ya yaq'uex ta q'uexlal yu'un te ya sboltesbeyex ac'oplalic te c'alal ya sjoinex ta spasel te q'uine. Yu'un toyol yo'tanic ta spasel ta awolilic te yixtailique.

¹⁴ Spisil ora ya sleic ta sitic ants te ya spasic mulwej soque. Xujt' ma scom sbaic ta sleel te smulique. Ya slo'laybeyic yo'tan te mach'atic ma'yuc yip yo'tanique. Ay sp'ijilic ta stsobel te taq'uine. Jc'axel u'uninbilic yu'un te ch'ayele.

¹⁵ Jc'axel jowejemiquix ta beel, melel yijq'uitayejiquix te lequil bee. Ja' ejemplo yu'unic te j'alwanej Balaam te snich'an Beor te bic'taj yo'tan yu'un spasel ganar a te bila amen ta pasele.

¹⁶ La yich' comel ta sleel smul yu'un te cojt' burra te uma'e, ja'uc me to, c'opoj jich bit'il ants-winic te burrae. Jich la scom te j'alwanej te manchuc ya spas te bila amene.

¹⁷ Melel te lotil maestroetique jich c'oemic te bit'il pozo te ma'yuc ya'lel. Soc jich c'oemic te bit'il tocal te ya x'eanot bael yu'un te iq'ue. Chapal sc'oplalic te ya xc'o ainuquic sbajt'el q'uinal ta bay mero ijc' te q'uinale.

¹⁸ Melel puro toyba c'op sti'inejic te ma'yuc stuul xujt'uque. Ja' ya xlo'laywanic a te sbic'tal yo'tanique soc te bila ya smulan spasel te sbaq'uetalique. Jich ya xchijtesbeyic yo'tanic te mach'atic colelic to loq'uel tey a ta yolil te mach'atic jowejemic ta q'uinale.

¹⁹ Ya yalbeyic sc'oplal te ayic ta libre. Ja'uc me to, c'axem to xan mosoinbilic yu'un te bila ya xlajinwane. Melel spisil ants-winiquetic, ayic ta moso yu'un spisil te bitic u'uninbilic yu'une.

²⁰ Te mach'atic la sna'beyiquix sba te Jesucristoe te ja' Cajwaltic soc ja' Jcoltaywanej cu'untic stuquele, jich colemiquix loq'uel tey a ta bay sbolil te balumilale. Ja'uc me to, teme patil ya xcha'sujt'ic xan ta spasel te bila jil yu'unic ta neelale soc teme ya x'u'uninotic xan yu'une, c'axem to xan jich ya xbolobic a te bit'il ayic ta neelal toe.

²¹ Ja' lec te manchuc lajuc yilic te lequil bee. Yu'un te bit'il yilojiquixe, ja' wocol te la yijq'uitay ta yo'tanic te ch'ul mandalil te ac'bot xch'uunique.

²² Ja'uc me to, jich c'otix ta pasel ta swentaic te bit'il ay ta alele: “Te ts'i'e, sujt' xan bael ta xcha'lo'el xan xe”, te xie. Soc xan: “Te me' chitam te yich'ojix poquele, sujt' xan bael la xcha'balan xan sba ta ajch'al”, te xie.