2 Juan 1 - Bible in Tzeltal de Oxchuc y Tenejapa

Spatjibal-o'tanil

¹ Jo'on te ancianoone, ya jpatbat awo'tan, me'tic, te tsabilat yu'un Dios soc te awalataque. Bayal c'uxex ta co'tan ta melel. Soc ma jo'ocon nax jtuquel te c'ux ya caiyex ta co'tane. Ja' c'uxex ta yo'tanic uuc spisil te mach'atic yaiyojic stojol te smelelil c'ope.

² C'uxex ta co'tan ta scaj te smelelil c'op te jc'axel ayix ta co'tantic spisil orae.

³ Ac'a yac'beyex bayal yutsil yo'tan te Jtatic Dios soc te Cajwaltic Jesucristo, te Snich'an te Tatile. Ac'a me xc'uxtayex soc lamaluc me q'uinal awaiyic yu'un, ta swenta bit'il ay ta awo'tanic te smelelil c'ope soc te bit'il ay xc'uxul awo'tanique.

Mandalil yu'un c'uxul-o'tanil

⁴ Bayal bujts'naj co'tan yu'un te awalatac, yu'un la quil te yacalic ta spasel te bi ya yal te smelelil c'ope, jich bit'il spasojotic ta mandal te Jtatic Diose.

⁵ Ta ora to, me'tic, ya calbat wocol te c'ux me ac'a caiy jbajtic ta co'tantic ta jpisiltic. Te bit'il la jts'ibubat in to, ma ach' mandaliluc te la calbate. Ja' nix te caiyojtic stojol ta xjajch'ibal toe.

⁶ Te bit'il ay te xc'uxul co'tantique, ja' teme ya jch'uuntic spasel te bila la yalbotic ta mandal te Diose. Te smandal yalojbotique, ja' te bit'il ya sc'an te c'ux ya caiy jbatic ta jpisiltique. Jich te bit'il awaiyojic stojol ta xjajch'ibale.

Te jlo'laywanejetique

⁷ Yu'un ay tsobol jlo'laywanejetic te yacalic ta beel ta spamal te balumilale, ya yalic te ma la yich' sbaq'uetal te Jesucristo te xtaluque. Te mach'a jich ya yale ja' me jlo'laywanej abi, soc ja' me te anticristo abi.

⁸ Tsajtaya me abaic jiche, swenta yu'un ma tojoluc ya xch'ay te sit awat'el apasojique. Jich me ts'acal ya awich' amajt'anic yu'un.

⁹ Te mach'a ya xjowej baele, soc teme ya yijq'uitay te nopjibal yu'un te Cristoe, yu'un nanix ma ba xch'uunej Dios abi. Yan te mach'a ma xyijq'uitay te nopjibal yu'un te Cristoe, ja' xch'uunej te Jtatic Diose soc uuc te Snich'ane.

¹⁰ Teme ay mach'a ya xtal ta banti ayexe, teme ma ja'uc yich'oj tel te nopjibal yu'un te Cristoe, ma me x'awic' ochel ta ana soc ma me jichuc ya awalbey: “¡Bin nax co'tan te talate!”, ma me xaucat ta stojol.

¹¹ Melel te mach'a jich ya yalbey: “¡Bin nax co'tan te talate!”, teme xie, jich ya sjoin ta spasel te bila amene.

Slajibal c'op te ts'ibubile

¹² Ay bayal te bila c'an jts'ibubeyexe, ja'uc me to, ma jc'an ya jts'ibubeyex xan ta jun soc ta tinta. Yu'un jnopoj te ya xtal quilexe. Jich me ya x'ayanotic soc ya quilbey jba jsitic, swenta yu'un jich me pajal ya xbujts'naj co'tantic ta melel a.

¹³ Ya sticunbat spatjibal awo'tan te yalatac awermana te tsabil yu'un te Diose. Jichuc.