2 Corintios 9 - Bible in Tzeltal de Oxchuc y Tenejapa

Smajt'an Dios ta swenta te jch'uunjeletic ta Jerusalén

¹ Ja'uc me to, te bit'il ay sc'oplal te coltayel yu'un te mach'atic ch'ul lum yu'un Dios ta Jerusalén, ma puersauc te ya jts'ibubeyex xan ta carta.

² Melel jna'oj stojol te bit'il bin nax awo'tan ya awaq'uique. Spisil ora toyol q'uinal ya caiy te bit'il ayix jun ja'wil te jajch'ex ta stsobel te coltayele, ja'ex te ayex ta Acayae. Jich nix la calbey yaiyic uuc te macedoniaetique. Jich col spisiluc la snopiquix te ya me yaq'uic uuque.

³ Ja'uc me to, la jticunix in quermanotactic to, swenta yu'un ma'yuc lot ya xc'ot a te bit'il la calbeyex lec ac'oplalic ta stojol te macedoniaetique. Jich yu'un ya sc'an te chapalex ya xc'o staex, jich te bit'il calojixe.

⁴ Ma me ja'uc a te ay cha'oxtul ya sjoinon tel te macedoniaetique teme ma chapaluquex ts'iin te ya xc'o jtatiquexe. Ya me xq'uexawotic awu'unic teme ma chapaluquexe, yu'un jun co'tantic awu'unic te bit'il la caltic ac'oplalique. Soc te ja'exe tey me ya ataic muc'ul q'uexlal uuc a.

⁵ Ja' swentail te la jnop te ya sc'an ya calbey wocol te ya xneelaj bael yilex te quermanotactique, te jich me ya scoltayex ta stsobel spisil te coltayel awalojic te ya awaq'uique. Jich me tsobilix awu'unic ya xc'o jtatic te coltayele. Jich me ya xchicnaj te bit'il yutsil awo'tanic ya awaq'uic soc te ma sujbiluquex cu'untique.

⁶ Na'aic me in to: Te mach'a jteb nax ya yaiy awale, ja' nanix jich, jteb nax te bila ya sc'aje. Soc te mach'a bayal ya yaiy awale, ja' nanix jich, bayal ya sc'aj.

⁷ Juju-jtul ac'a yac' te jich yipal snopoj ta yo'tane. Ma me socuc mel-o'tan te ya yaq'ue, soc ma me sujbiluc te ya yaq'ue, melel ja' c'ux ta o'tanil yu'un Dios te mach'a bin nax yo'tan ya yaq'ue.

⁸ Ya xju' yu'un te Diose te ya yesmantesbeyex spisil ta jchajp bendición, swenta yu'un jich me ma'yuc falta ya awaiyic spisil ora te bila ya xtuun awu'unique, soc jich me ay sobrail awu'unic te ya xju' awu'unic spasel bayal ta jchajp lequil at'elil.

⁹ Jich te bit'il ts'ibubil jilel ta Sjun te Diose: “La spuc te sbiluque, la yac'bey te me'baetique. Te yutsil yat'ele, sbajt'el q'uinal ma xlaj sc'oplal”, te xie.

¹⁰ Dios ya yac'bey yawal te mach'a ya yaiy awale, soc ya yac'bey waj swe'. Ja' nanix jich ya me yac'beyex spisil te bila ya sc'an awel awu'unique, soc ya me yesmantesbeyex te sit awawal-ats'unubique, swenta yu'un jich me ya xju' awu'unic te bayal ya awaiy coltaywanej ta stojol te yantique.

¹¹ Jich me ay bayal ta jchajp ac'ulejalic ya xc'ot, swenta yu'un ya me xju' awu'unic te ma p'isbiluc ya awaiyic coltaywanej spisil ora. Jich me ay bayal mach'atic ya yalic wocol ta stojol Dios yu'un te coltayel ya aticunic bael ta jwentatic.

¹² Yu'un te c'alal ya xc'o cac'beytic ta sc'abic te coltayele, ma ja'uc nax ya cac'beytic yu'un teme ma'yuc yu'unique, ja' ya cac'beytic yu'un te ya yalic bayal wocol ta stojol Dios yu'un a.

¹³ Ya me yalulaybeyic yutsilal sbiil te Diose, yu'un ja' ya xchicnaj ya yilic a te coltayel te bit'il ach'uunejic spasel te bila ya yal te lec yach'il c'op yu'un te Cristoe. Soc ya me yalbeyic jelawen yutsilal Dios yu'un te bit'il ma p'isbiluc la awaq'uic te coltayel ya xtuun yu'unic soc spisil te yantique.

¹⁴ Soc ya me sc'oponbeyex Dios ta atojolic, melel c'ux ya yaiyex ta yo'tanic ta scaj te yutsil yo'tan Dios te chicnajix ta c'axem to xan ta awentaique.

¹⁵ ¡Wocol yalbotic te Diose, melel yac'ojbotic buen muc' jmajt'antic te ma jna'tic xcholel te bit'il aye!