1 Timoteo 6 - Bible in Tzeltal de Oxchuc y Tenejapa

¹ Spisil te mach'atic ayic ta mosoile, ac'a me yich'ic ta muc' ta melel te yajwalique, swenta yu'un jich ma ba ya yaq'uic ta toybac'optayel sbiil a te Dios soc swenta yu'un jich ma ba ya xbolob sc'oplal te bila ya cac'tic ta nopele.

² Teme ay yajwalic te xch'uunej Diose, ya me sc'an ya yich' ta muc' yu'un te bit'il yermano sba soc ta stojol te Diose. Ja' ya sc'an te jun yo'tan ya yac' sba ta abatinel, te melel pajal xch'uunej Dios soc te mach'a ay ta abatinel yu'une, soc te c'ux ya yaiy ta yo'tane. Jich me xawac'bey snopic, soc jich me xatac'uyic.

Te mach'a ja' ya xbajt' ta yo'tan te taq'uine

³ Teme ay mach'atic ya yac' ta nopel yan c'op te ma pajaluc soc te lequil c'op yu'un te Cajwaltic Jesucristoe soc te ma pajaluc soc te bila jch'uunejtique,

⁴ tey stoyoj sbaic ta stojol Dios abi. Xujt' ma'yuc bila c'oem ta yo'tanic. Ja' nax baem ta yo'tanic jowil sjaq'uel c'opetic, te pajal soc chamele, te ya xjach a te bic'tal-o'tanile, xatomba, ixta c'op, soc amen-o'tanil.

⁵ Soc ya yut sbaic yu'un te bit'il boloben yo'tanique, yu'un ch'ayix ta yo'tanic te smelelil c'ope. Ja' nax ya sc'an ya sta sc'ulejalic a te bila xch'uunejique. Ma me xajoin aba soc te mach'atic jich yo'tanique.

⁶ Melel ja' mero jc'ulejaltic te bit'il jch'uunejtic ta lec te Diose soc teme jun co'tantic yu'un te bila quich'ojtique.

⁷ Melel ma'yuc bila la quich'tic tel xujt'uc te c'alal julotic ta balumilale, soc ma'yuc bila ya xju' ya quich'tic bael ta patil.

⁸ Jich yu'un, teme ay jwe'eltic soc jc'u'-jpac'tic te ayotic ta balumilale, junuc me co'tantic yu'un.

⁹ Yan te mach'atic ja' nax baem ta yo'tanic te ya stsob te sc'ulejalique, ya me xyalic yu'un te yiljibal yo'tanique soc ja' me spejts'ul ya xc'otic. Ya xbic'taj yo'tanic yu'un bayal ta jchajp te bila ya xlajinotic yu'une. Ya me xjinotic yu'un soc ch'ayel ya xbajt'ic yu'un.

¹⁰ Melel te bic'tal-o'tanil yu'un te taq'uine, ja' mero yisim yu'un spisil ta jchajp te bila amene. Ay mach'atic te scaj sbic'tal yo'tanic yu'un taq'uin te ch'ayix xch'uunjel yo'tanic yu'une. Jich la staiquix bayal swocolic ta c'axem to xan yu'un.

Te lequil tsalaw ta swenta te xch'uunjel-o'tanile

¹¹ Ja'uc me to, te ja'at te swinicat te Diose, xi'a me spisil te bila la calixe. Ja' me xbajt' ta awo'tan te toj ya x'ainate soc te jun awo'tan ta stojol te Diose, soc te ayuc lec xch'uunjel awo'tan soc xc'uxul awo'tan soc yip awo'tan, soc te peq'ueluc ya awac' aba spisil ora.

¹² Aiya me lequil tsalaw ta swenta te xch'uunjel awo'tane, swenta yu'un jich ya xcuxinat sbajt'el q'uinal. Melel ja' swentail te ic'bilatix yu'un te Diose, soc te la awalix ta jamal ta stojol tsobol testigoetic te bit'il ach'uunej te Diose.

¹³ Ta ora to ya jpasat ta mandal ta stojol Dios te yac'ojbey xcuxlejal spisil te bitic aye, soc ta stojol Jesucristo te jamal la yal sba ta stojol te Poncio Pilatoe.

¹⁴ Ja' ya calbat te ya me ach'uun spasel te bila la calbat ta mandale. Ma me xawac' sts'ilaj soc ma me xawac' ta c'axintayel, ja' to te c'alal ya xchicnaj tel te Cajwaltic Jesucristoe.

¹⁵ Ya me xc'ot ta pasel te c'alal ya sta yorail yu'un te Diose. Melel ja' stuquel Dios te bayal yutsile, te ja' Muc' Ajwalil yu'un te muc' ajwaliletique, soc te ja' Ajwalil yu'un te ajwaliletique.

¹⁶ Ja' te mach'a stalel ma xlaj stuquel, te cuxul ta bay te xojobal q'uinal, te jtul ma'yuc mach'a ya xju' ya xnoptsaj tey a. Jtul ma'yuc mach'a la yilix, soc ma'yuc mach'a ya xju' yu'un yilel. Ja' me ac'a ich'otuc ta muc', soc ja' ac'a yich' ajwalinel sbajt'el q'uinal stuquel. Jichuc.

¹⁷ Pasa me ta mandal te mach'atic ay sc'ulejalic ta balumilal te ma me stoy sbaic yu'un, soc te ma me ja'uc ya smuc'ulin yo'tanic te sc'ulejalique, melel ma staleluc ay. Ja' lec te ja' ya smuc'ulin yo'tanic te Diose te stalel cuxul stuquele, te ma p'isbiluc ya yac'botic spisil te bila ya xtuun cu'untic te ya xbujts'naj co'tantic yu'une.

¹⁸ Albeya te ac'a yat'elinic spasel spisil te bila lec ta pasele. Ja'uc me sc'ulejalic ya xc'ot te lequil at'eliletic ya spasique. Toyoluc me yo'tanic ac'a yaiyic c'uxtaywanej soc majt'anteswanej.

¹⁹ Jich ya stsob sc'ulejalic te ya xtuun yu'unic ta patile. Jich me ya staic xcuxlejalic sbajt'el q'uinal.

Slajibal mandal albot yu'un Pablo te Timoteoe

²⁰ Jich yu'un Timoteo, canantaya ta lec te bila ac'bilat awentaine. Ma me xawac' achiquin ta yaiyel stojol jontol c'op aiyejetic te ma'yuc swentaile, soc ma me xawac' achiquin ta yaiyel stojol spisil biluc c'opiluc te cuybil ta p'ijil c'ope.

²¹ Ay mach'atic te la xch'uuniquixe, jich ch'ayix te xch'uunjel yo'tanique. Ac'a yac'bat bayal yutsil yo'tan te Diose. Jichuc.