1 Timoteo 3 - Bible in Tzeltal de Oxchuc y Tenejapa

Bi yilel ya sc'an te mach'a jwentainwaneje

¹ Mero melel in to: Teme ay mach'a toyol yo'tan yu'un te yacuc yich' yat'el ta jwentainwaneje, jelawen yutsil te yat'el ya sc'ane.

² Jich yu'un te mach'a ya yich' yat'el ta jwentainwanej, ya sc'an te mero lec sc'oplal, soc te jtul nax ants nujbinem ta q'uinal soque, te ya sna' stsajtayel te yo'tane, te ma xjelaw ta c'ope, te lec yat'ele, te ay yutsil yo'tan ya xnajc'anwane, soc te ay sp'ijil yo'tan ta p'ijubteswaneje.

³ Ma me xyaiy yacubel, ma me c'aemuc ta xjajch'esel c'op, ya sc'an te ay yutsil yo'tane, te lamal yo'tane, soc te ma xbic'taj yo'tan yu'un te taq'uine.

⁴ Ya sc'an te lec ya xmandalaj ta sna, soc te ya sna' spasel ta mandal te snich'nabique te jich ya x'ich'ot ta muc' yu'un te ya xch'uunbot smandal yu'unique.

⁵ Melel ¿bit'il c'an ju'uc yu'un swentainel te jch'uunjeletic yu'un Dios teme ma sna' mandal ta snae?

⁶ Te mach'a ya x'ac'bot yich' yat'ele ma me ja'uc te mach'a xch'uunbel to te Diose, teme repente ya xcaj stoy sba soc te yat'ele. Teme jiche, pajal me castigo ya yich' soc te pucuje.

⁷ Soc ja' ya sc'an te lec sc'oplal yu'un spisil te yantic ants-winiquetic te ma ba xch'uunejic te Diose, swenta yu'un jich me ma xtabot ta alel te yat'ele, soc swenta yu'un ma me teyuc ya x'och ta syac te pucuje.

Bi yilel ya sc'an te diaconoetique

⁸ Ja' nanix jich uuc te mach'atic ya yich' yat'elic ta diaconoile, ya sc'an te lec yo'tanique, soc te toj ya xc'opojique, te ma xyacubique, te ma xbic'taj yo'tanic yu'un slo'layel te taq'uine.

⁹ Ya sc'an te ay xch'uunjel yo'tanique, soc te ma'yuc mulil ta yo'tanique.

¹⁰ Neel ac'a yich' ilel te yat'elique. Teme ma'yuc smulic ya xchicnaje, ac'a yich' yat'elic ta diaconoil.

¹¹ Ja' nanix me jich uuc te antsil-diaconoetique ya sc'an te lec yo'tanique, soc te ma xlewanic ta c'ope, te ya sna'ic stsajtayel te yo'tanique, soc te jun yo'tanic ta spasel spisil te bila ya x'ac'bot ta swentaic spasele.

¹² Te diaconoetique ya sc'an te jtul nax ants nujbinem soque, soc te lec ya xmandalajic ta stojol te snich'nabique soc ta stojol spisil te mach'atic ay ta snaique.

¹³ Melel te diaconoetique ya me x'ich'ot ta muc' yu'un teme lec ya x'at'ejique, soc jich ma xpejc'aj yip xch'uunjel yo'tanic ta stojol te Cristo Jesuse.

Bayal sc'oplal te bila ac'bil jch'uuntique

¹⁴ Jich ay ta co'tan te ya xtal quilat ta ora. Ja'uc me to, la jpasbat in carta to

¹⁵ swenta yu'un teme ma ju' te talon ta orae, jich me ya ana' te bila lec ya sc'an pasel ta stojol te yal-snich'an te Diose, ja' bi, ja' te jch'uunjeletic yu'un te cuxul Diose. In te jch'uunjeletique, ja' yoyal soc ja' yiptajib a te smelelil c'ope.

¹⁶ Jamal chican te bit'il muc' sc'oplal ta c'axem to xan te bila muquen jch'uunejtique, jich te bit'il ay ta alele: “Dios la yich' sbaq'uetal, chicnaj ta balumilal. Ac'ot ta na'el te toj yo'tan yu'un te Espiritue. Ilot yu'un te ch'ul abatetique. La yich' cholel sc'oplal ta stojol te nacionetique. La yich' ch'uunel ta balumilal. Ic'ot moel ta utsilal”, te xie.