1 Samuel 16 - Bible in Tzeltal de Oxchuc y Tenejapa

David la yich' tsael yu'un ya x'och ta muc' ajwalil

¹ Te Cajwaltic jich la yalbey te Samuele: —¿Jayeb xan c'aal te yacat ta mel-o'tan yu'un te bi c'oem ta swenta te Saule? Ma jc'anix te ja' ochem ta muc' ajwalil ta Israel. Baan nojesa ta aceite te xulubil awu'une. Ya jc'an te yacuc xbaat ta sna Isaí ta Belén, yu'un la jtsabeyix jtul snich'an te ja' ya x'och ta muc' ajwalile —xi'.

² La sjac' te Samuele: —¿Pero bi ya cut ya xboon? Teme ay bit'il ya yaiy te Saúl, ya smilon yu'un —xi'. Jich albot yu'un te Cajwaltic: —Tsaca jcojt' ch'in wacax. “Talon ta yaq'uel milbil smajt'an Cajwaltic”, xaat me.

³ Patil ya me awic' tel te Isaí ta sti'el te ch'in wacax, jo'on ya calbat te bi ya apase. Ja' me ya amalbey aceite ta sjol yu'un ya x'och ta muc' ajwalil te mach'a ya calbate —xi' sc'oplal.

⁴ Jich la spas te Samuel te bit'il albot yu'un te Cajwaltique. C'alal c'ot ta Belén te Samuele, te mamaletic yich'oj yat'elic yu'un te lum, yacalic ta nijq'uel yu'un xiwel ta yo'tanic a loq'uic ta yilel. Jich la yalbeyic: —¿Swenta bal lamal-o'tanil te talate? —la yutic.

⁵ La sjac' te Samuel: —Ja', swenta lamal-o'tanil. Talon ta yaq'uel milbil smajt'an te Cajwaltique. Ac'a me abaic ta ch'ultesel ta stojol te Diose. La' joinawonic ta spasel te milbil smajt'an Diose —xi'. Te Samuel la xch'ultes te Isaí soc te snich'nabe. La yic' ta sti'el te milbil smajt'an te Diose.

⁶ Te c'alal julic tele, te Samuel la yil te Eliab, jich la yal ta yo'tan: “Mero ja' yo'tic te tsabil yu'un Cajwaltic te ya x'och ta muc' ajwalile”, xi' ta yo'tan.

⁷ Pero albot yu'un te Cajwaltic: —Ma me ja'uc xbajt' ta awo'tan te bi yilele; te bi yilel snajt'il soc te bi yilel st'ujbilale, te jo'one ma ja'uc ay sc'oplal cu'un. Ma ja'uc ay ta wenta cu'un te bi ya yich' ta wenta te ants-winiquetique. Ja' ya xbajt' ta yo'tanic te bi yilel stec'lejal, yan te jo'one ja' ya quilbey te bi yilel te yo'tane —xi'.

⁸ Te Isaí la yic' tel stejc'anbey ta sit Samuel te Abinadab, pero te Samuel jich la yal: —Ma ja'uc te tsabil yu'un Cajwaltique —xi'.

⁹ Te Isaí la yic' xan tel stejc'anbey ta sit Samuel te Sama, pero jich la yal te Samuele: —Ma ja'uc te tsabil yu'un te Cajwaltique —xi'.

¹⁰ Te Isaí la stejc'anbey ta sit Samuel ta sjuquebal te snich'nabe, pero te Samuel la yalbey te ma'yuc jtuluc te tsabil yu'un te Cajwaltique.

¹¹ Ta slajibal la sjojc'obey: —¿Ma bal ayuquix yan anich'an? —la yut. —Ja' xanix te ijts'inale, te jcanan-chij cu'untique —xi' te Isaí. La yal te Samuel: —Ticuna ta iq'uel tel, ma xju' ya x'och we'el ja' to teme jul tele —xi'.

¹² Te Isaí la sticun ta iq'uel tel. Te quereme tsaj yelaw, buen t'ujbil, mulantic sba ta ilel. Te Cajwaltic jich la yalbey te Samuel: —Ja' in to, jajch'an malbeya aceite ta sjol swenta seña te ya x'och ta muc' ajwalil —xi' sc'oplal.

¹³ Jich ora la stsac te xulubil nojel ta aceite te Samuele. Q'uelel sitic a te sbanquiltac, la smalbey aceite ta sjol. Jich tsabil c'ot ta muc' ajwalil te querem David. Jich ora tal ta stojol yip yu'el te Cajwaltique. Te Samuel la sc'opon jilel te mach'atic tey ayic a, bajt' xan ta Ramá.

David bajt' ta abatinel yu'un Saúl

¹⁴ Pero te Saule pijt'esot yu'un te espíritu yu'un te Cajwaltique. Ay bol espíritu yac ta uts'inel yu'un, te ja' nix ticunbot yu'un te Cajwaltique.

¹⁵ Ja' yu'un te abatetic jich albot yu'un: —Lec ay yo'tic, ajwalil cu'untic, ay awocol yu'un te bol espíritu ticunbil ta atojol yu'un te Diose.

¹⁶ Ja' yu'un pasawotic ta mandal jo'otic te abatotic awu'une, albotic te ya jlebat jtuluc te mach'a ya sna' stijel ta lec arpa, swenta yu'un te c'alal ya xjajch' yuts'inat te bol espíritu, ya me xju' ya stij arpa. Jich me ya xlecub q'uinal ya awaiy a —xi' sc'oplal yu'un.

¹⁷ La sjac' te Saúl: —Lebonic tel jtuluc jiche te mach'a mero ya sna' stijel ta lec arpa —xi' te Saule.

¹⁸ Pero ay jtul yabat te jich la yal: —Ay quiloj jtul snich'an Isaí, ja' te mach'a ay ta Belén, te mero ya sna' stijel ta lec te arpa, soc mero ma xiw ta guerra, soc buen lamal yo'tan ya xc'opoj. T'ujbil querem, soc joinbil yu'un te Cajwaltique —xi'.

¹⁹ Jich la sticun c'op ta stojol Isaí te Saúl, jich la yal bael: “Ticunbon tel te anich'an David, ja' te ya scanantaybat te chijetic awu'une”, xi' bael te sc'ope.

²⁰ Ja' yu'un te Isaí la sticun te snich'an David ta stojol Saúl, soc la sticun jcojt' burro scuchoj bael pan, jun nujc'ulil vino, soc jcojt' ch'in tentsun.

²¹ Jich c'ot ta stojol Saúl te David, tey och ta abatinel yu'un a te Saule. Mero bin nax yo'tan yu'un te Saúl, la yac' ochel ta jcuch-at'ejibal ta guerra yu'un.

²² Te Saúl la sticun ta alel te Isaí, “Wocoluc, ac'bon join te David, yu'un mero tse'el co'tan yu'un”, xi'.

²³ Ja' yu'un te c'alal ay ta uts'inel te Saúl yu'un te bol espíritu ticunbil yu'un Dios, te David la stsac te arpa, och stij. Jich lecub q'uinal la yaiy te Saúl, ijq'uitayot yu'un te bol espíritue.