1 Samuel 1 - Bible in Tzeltal de Oxchuc y Tenejapa

Dios la yac' te ya x'alaj Ana

¹ Ta switsul sq'uinal sts'umbal Efraín ay lum Ramá sbiil ta banti nain jtul winic Elcana sbiil, sts'umbal Zuf. Jeroham te state, Eliú sbiil te xcha'lamal smame. Te yoxlamal smame Tohu sbiil, snich'an Zuf, sts'umbalic Efraín.

² Te Elcana cheb yinam, Ana sbiil te jtule, te yane Penina sbiil. Te Penina ay yalatac, yan te Ana ma'yuc yal stuquel.

³ Te Elcana jujun ja'wil ya xloc' jajch'el ta slumal, ya xbajt' ta lum Silo ta xch'uunel soc ta yaq'uel milbil smajt'an te Cajwaltic te Spisil ya xju' yu'une. Tey ay a te cheb snich'nab sacerdote Elí: Ofni soc Finees sbiilic, ja' nix sacerdoteetic yu'un te Cajwaltique.

⁴ Te c'alal ya yac'bey milbil smajt'an Dios te Elcana, ya yac'bey swe'el te Penina soc spisil yalatac, queremetic soc ach'ixetic.

⁵ Pero te Ana mero tsabil we'elil ya yac'bey stuquel, yu'un ja' mero c'ux ta yo'tan, manchuc me ma'yuc yal, scaj te ja' nix te Cajwaltic ma la yac' alajuque.

⁶ Ja' yu'un te Penina, te ja' sjoy ta antsile, bayal la yuts'in soc la slaban. Jich la yac' ta mel-o'tan yu'un, te ma x'ac'ot ta alajel yu'un te Cajwaltique.

⁷ Te jujun ja'wil c'alal ya xbajt'ic ta templo yu'un te Cajwaltic, te Penina jich ya staulabey ta alel. Ja' yu'un te Ana ya x'oc' soc ma ba ya xwe' yu'un te mel-o'tane.

⁸ Jich albot yu'un te Elcana, ja' te smamlale: —Ana, ¿bi yu'un te ya x'oc'ate? ¿Bi yu'un te yacat ta mel-o'tan soc te ma xwe'ate? ¿Yu'un bal ma c'axuc jichon ta atojol a te bit'il lajuntul alnich'anetique? —xi'.

⁹ Ay jun buelta te c'alal ay ta Silo a te Ana, c'alal lajix yo'tanic ta we'el, jajch' ta mesa. Te sacerdote Elí nacal ta muc'ul silla ta nopol sti' te templo yu'un te Cajwaltique.

¹⁰ Te Ana jajch' ta buen oq'uel, mero xbiq'uit nax sti' ta oq'uel ta stojol te Cajwaltique.

¹¹ Ay bi la yal ya spas ta stojol, jich la yal: —Cajwaltic te Spisil ya xju' awu'une, ayuc bit'il ya ana'bon yo'bolil jba yu'un te jwocol jo'on te abaton awu'une. Yacuc ana'on, yacuc awac'bon tel jtuluc cal, yu'un jc'axel ya cac'bat awabatin te jayeb c'aal ya xcuxin ta balumilal. Te bit'il ya cac'bat awabatin ta jc'axele, ja' me seña ya xc'ot te ma ba ya jset'bey te stsotsil sjole —xi' te Ana.

¹² Te bit'il jalaj ta sc'oponel Dios te Ana, te Elí la st'ojan sit ta yilel ye,

¹³ melel yac ta sc'oponel Dios ta yo'tan. Ma ba chican ta aiyel te bi yac ta yalele, ja' nax chican te ya stij sba te sti'il ye. Te Elí la scuy ta yu'un yacuben.

¹⁴ Jich la yalbey: —¿Bi to ora te ya aquejch'an te ayacubele? Ja' lec ijq'uitayaix te vino —la yut.

¹⁵ Te Ana la yal: —Ma jichuc, tatic, ma yu'unuc cuch'oj vino, soc ma yu'unuc cuch'oj tulan uch'balil. Scaj te mero c'ux obol jba ya caiy, ja' yu'un yacon ta sc'anel c'uxtayel ta stojol te Cajwaltique.

¹⁶ Ma me xacuyon ta amen ants, tatic, yacon me ta sc'oponel Dios scaj te ma xcujch'ix ya caiy te jwocole —xi'.

¹⁷ Te Elí la yal: —Baan, jun awo'tan xbaat. Ac'a yac'bat te Dios cu'untic te israelotic te bi la ac'anbey ta stojole —xi'.

¹⁸ La yal te Ana: —Mero wocol la awal. Na'awon ta stojol Dios spisil ora —xi'. Patil tey nix toj bael ta banti tal, bajt' ta we'el. Tey ma'yuquix bi ora la smel yo'tan a.

¹⁹ Ta buen sab ta xchebal c'aal, c'alal laj yo'tanic ta yalel wocol ta stojol Cajwaltic, sujt'ic bael ta snaic ta Ramá. Te Elcana la sta sba soc te yiname, ja' te Ana. Jich ora na'ot yu'un te Cajwaltic, tey c'ot ta pasel a te bi la sc'anbeye.

²⁰ Tey ora ayix jilel yal a te Ana. La sta yorail, ayin te yale. Samuel sbiil la yac'bey, ja' yu'un te ja' sc'anojbey te Cajwaltique.

²¹ Te Elcana soc te mach'atic ay yu'un bajt' xan ta Silo. Ba yac' c'otuc ta pasel te bi yaloj ta stojol te Cajwaltic, soc ta yaq'uel milbil smajt'an ta swenta jujun ja'wil,

²² pero te Ana ma ba bajt' stuquel, yu'un jich la yalbey te smamlale: —Te jo'one ma to xboon. Ja' to ya xboon a teme jil xchu' te alale, ja' to me ya quic' bael a, swenta yu'un ya me cac'bey ta sc'ab te Cajwaltic, soc tey me ya xjilix ta jc'axel a —la yut.

²³ Te Elcana te smamlal, la yalbey: —Jich xapas te bit'il lec ta pasel ya awaiye. Ja' to x'awic' bael a te c'alal ya awijq'uitaybey te xchu'e. Ac'a c'otuc ta pasel te bi yaloj te Cajwaltique —xi' sc'oplal yu'un. Jich jil ta sna. La xch'ijtes te yale, ja' to te c'alal jil xchu' yu'une.

²⁴ Te c'alal la yijq'uitay te xchu'e, manchuc me alal to a, pero la yic' bael ta templo yu'un Cajwaltic ta Silo. Soc la yic' bael oxeb toroetic, cheb xcha'winic (22) litro trigo, soc jpojc' nujc'ul pulbil ta vino.

²⁵ C'o smilic jcojt' toro. Jich la yac'beyic yil te alal te Elí.

²⁶ C'opoj te Ana, jich la yalbey te Elí: —Pasa perdón, tatic, te bit'il cuxulat toe, talon ta atojol, melel jo'on te tey la jc'opon Dios ta ats'eele.

²⁷ Ja' la jc'anbey Cajwaltic te yacuc yac'bon tel jtuluc cal. La nix yac'bon a, ja' alal in to.

²⁸ Te jo'one cac'ojbeyix ta stojol te Cajwaltique. Te jayeb c'aal cuxul, ja' me yu'un stuquel te Cajwaltique —xi'. Te Elí la squejan sba ta yalel wocol ta stojol te Cajwaltic, la stinan sba coel c'alal ta lum.