1 Reyes 9 - Bible in Tzeltal de Oxchuc y Tenejapa

Dios la xchap sc'op ta stojol Salomón

¹ Te c'alal ju' ta pasel yu'un Salomón te templo yu'un Cajwaltic, soc te sna, soc spisil te bitic la smulan spasele,

² te Cajwaltic cha'chicnaj xan swenta xchebal buelta ta stojol, jich nix te bit'il chicnaj ta Gabaón.

³ Jich albot: —La caiyix te ac'op soc te la awalbon wocole. La jch'ultesix te templo, te la apasbon swenta yu'un ya x'ainon spisil ora tey a. Ya me jcanantay soc ay me ta wenta cu'un spisil ora.

⁴ Teme jich ya xbeenat ta jsit te bit'il been ta jsit te atat David, teme mero jun awo'tan soc toj awo'tan ya awac' c'otuc ta pasel spisil te jc'op soc te bila chapal sc'oplal cu'une,

⁵ ya me cal mandal te stalel ay awat'el soc ats'umbal ta muc' ajwalil ta stojol Israel, jich te bit'il la calbey te atat David. Ja' te la calbey te ma'yuc bi ora ya spas falta jtul patil alnich'an yu'un ta muc'ul nactijibal yu'un Israel.

⁶ Pero teme ja'at soc awal-anich'nab ya apit abaic ta jtojole, teme ma ba ya awac' c'otuc ta pasel spisil ta jchajp te mandaliletic cu'une, teme ya awac' abaic ta abatinel ta xch'uunel te yantic diosetique,

⁷ ya me jbul loq'uel te Israel ta lumq'uinal te cac'ojbeye. Ya me jch'oj loq'uel ta jtojol te templo te la jch'ultesixe soc te Israele. Ya me x'och ta labanel spisil ora yu'un spisil nacionetic.

⁸ Te templo ya xc'atp'uj ta jinem na, ya me sbusaj sts'ubil. Spisil te mach'a ya xc'ax ta sts'eele, jchajp nax me q'uinal ya yaiy yu'un. Ya me slaban soc ya me sjojc'o bi yu'un te jich la spas te Yajwalic ta stojol te nacione, soc bi yu'un te jich la spasbey te templo.

⁹ Ya me x'albot: “Yu'un la xch'ay ta yo'tanic te Yajwalic te Dios yu'unique, te loq'uesotic tel ta Egipto yu'un te antiguo sme'-statique. Och xch'uunic yantic diosetic soc la yac' sbaic ta abatinel yu'un, ja' yu'un te Yajwalic la yac' taluc ta stojolic mero muc'ul wocol”, xiic me —xi' te Cajwaltique.

Yantic at'el yu'un Salomón

¹⁰ Te Salomón jtab ja'wil a ju' yu'un ta pasel te cheb naetic, ja' te templo yu'un Cajwaltic soc te snae.

¹¹ Te Hiram muc' ajwalil yu'un Tiro ja' la yac' te te'etic yu'un te cheb naetic, ja' te cedro soc c'antaj soc te jayeb oro la sc'ane. Ja' yu'un te muc' ajwalil Salomón la yac'bey jtab ta pam lumetic ta sq'uinal Galilea te Hiram.

¹² Pero c'alal ba yil te lumetic ac'bot yu'un Salomón te Hiram, ma ba la smulan.

¹³ Jich la yal: “¿Bi xanix lumil a te lumetic ya awac'bone, quermano?” xi'. Ja' yu'un te q'uinal te banti ay te lumetic, Cabul sbiil c'ot yu'un. C'alal ora jich sbiil yo'tic.

¹⁴ Te oro la sticunbey Salomón te Hiram, oxmil soc waxacwinic yoxbajc' (3,960) kilo ta spisil.

¹⁵ Ta swenta te sujawan ta at'el, te muc' ajwalil Salomón la yac' ta pasel te templo yu'un Cajwaltic, soc te snae, te pamanbil lume, soc te sts'ajc'ul te Jerusalén, soc nix te lumetic Hazor, Meguido, soc Gezer.

¹⁶ Te sc'oplal Gezer jich ay: Te faraón muc' ajwalil ta Egipto c'ot ta lum Gezer; la stsal ta guerra. La yac'bey sc'aal te lume soc la smil te cananeoetic te ainemic tey a. Patil la sq'uebanbey yantsil-nich'an, ja' te la yinamin Salomón.

¹⁷ Jich te Salomón la xcha'pas xan te lum Gezer, soc te alan Bet-horón,

¹⁸ Baalat soc Tamar, te ayic ta jochol taquin q'uinal ta Judá.

¹⁹ Soc la spas xan spisil te yantic lumetic te banti la stsob te we'elile. Jich nix te yawil te carretaetic yu'un guerra, soc te stsobojibal caballoetic, soc spisil bitic la smulan spasel ta Jerusalén soc ta Líbano, soc ta spisil te q'uinaletic ay ta swenta.

²⁰ Te amorreoetic, hititaetic, ferezeoetic, heveoetic soc jebuseoetic te ma israeluc stuquelic,

²¹ te patil alnich'anetic yu'unic te jilem ta q'uinal, te ma ba ju' yu'unic slajinel te antiguo israeletique, la suj ta at'el te Salomón. C'alal ora jich ayic ta ora to.

²² Yan te israeletic ma ba la suj ta at'el stuquel jich bit'il mozo. Ja' nax la yac' ochel ta soldadoil, ta sjoy ta at'el ta ajwalil, ta jwentainwanejetic, capitanetic soc comandanteetic yu'un carretaetic soc caballoetic yu'un guerra.

²³ Te jsujawetic ta at'el yu'un Salomón, te yac'ojbey swentain te mozoetic, ay lajuneb swaxacwinic xcha'bajc' (550) ta jtul, ja'ic te la swentainic yaq'uel ta pasel te at'ele.

²⁴ Te yantsil-nich'an faraón jajch' bael ta Lum-yu'un-David, c'ax bael ta sna, te pasbot yu'un Salomón. Jich jajch' spaman te lum te Salomone.

²⁵ Te Salomón oxeb buelta ta jujun ja'wil la yac'bey chic'bil soc milbil smajt'an Dios swenta lamal-o'tanil ta sba te scajtijib te la spasbey te Cajwaltique, soc la xchic'bey pom ta stojol. Jich ju' ta pasel te temploe.

²⁶ Te muc' ajwalil Salomón la spas barcoetic ta lum Ezión-geber te ay ta nopol lum Elat ta sti'il te Mar Rojo, ta sq'uinal Edom.

²⁷ Te Hiram la sticun ta barcoetic te abatetic yu'une te ya sna'ic at'el ta lec ta mar, soc te sna'ojbeyic sba ta lec te mar. Ja' nix sjoinejic te abatetic yu'un te Salomón.

²⁸ C'otic ta sq'uinal Ofir. Tey la yich'ic bael jteb ma staoj chanlajunmil (14,000) kilo oro. La yich'beyic bael te muc' ajwalil Salomón.