1 Reyes 7 - Bible in Tzeltal de Oxchuc y Tenejapa

La spas yan naetic Salomón

¹ Te Salomón la spas spalacio, oxlajuneb ja'wil a ju' yu'un.

² Soc la spas te na Bosque-yu'un-Líbano sbiil, ay jo'eb yoxwinic (45) metro snajt'il, cheb xcha'winic (22) metro soc lajuneb yoxwinic (50) centímetro sjamalul, oxlajuneb metro soc lajuneb yoxwinic (50) centímetro stoyolil. Yich'oj yip ta swenta chanchol chajbanbil oyetic yu'un cedro. Cajajtic ta sba ts'amte'etic yu'un cedro.

³ Te ts'amte'etic jo'eb yoxwinic (45) ta jch'ix ta spisilic. Ac'otic ta oxchol, jo'lajunch'ix ta juju-jchol ta sba te oyetique. Ta sba te ts'amte'etic, macal ta ch'ujte'etic.

⁴ Ay oxchol ventanaetic yich'oj te na, cholajtic ta ox'oxeb, pajal nax snup'inej sbaic te ventanaetique.

⁵ Spisil te ti'nailetic, ventanaetic, chanxujc' nax ayic, snup'inej sbaic, oxchol pasbil.

⁶ Ja' nix jich la spas jwol na te Cholol-Bayal-Yoyal sbiile, te ay cheb xcha'winic (22) metro snajt'il, oxlajuneb metro soc lajuneb yoxwinic (50) centímetro sjamalul. Soc ja' nix jich la spas jwol na te snup'inej sba soc te yich'oj oyetic soc te ay smujquile.

⁷ Soc la spas yan jwol na yu'un smuc'ul nactijib, ja' te Chajbajibal, swenta yu'un tey ya yich' chajbanel spisil muliletic a. La smac ta sba soc c'alal ta ye'tal ta cedro.

⁸ Te jwol na te banti nain te Salomón, ay yamaq'uil ta spat, soc ay jtsal xan tey a, pajal nix pasbil soc. Te yan jwol xan na la spase, yu'un ja' nain a te yantsil-nich'an faraón te la yic' yinamine, ay jun stsal pajal nix soc te yane.

⁹ Spisil te at'eliletique, ta xjajch'ibal sts'ajc'ul c'alal ta slajibal ta stoyolil, soc ta yelaw c'alal ta yamaq'uil ta yutil, pasbil ta tonetic te mero bayalic stojole, buen ts'acal set'bil ta sierra, chican te bi smuc'ule. Jich ay ta spisilic, ta yutil soc ta spat.

¹⁰ Te xjajch'ibal te sts'ajc'ule ja' nix jich puro tonetic te mero bayalic stojole, soc muq'uic te tonetique, ay chaneb metro soc lajuneb yoxwinic (50) centímetro snajt'il, soc ay yantic te oxeb metro soc oxwinic (60) centímetro.

¹¹ Te sts'ajc'ul moele, ja' nix jich pasbil ta tonetic te mero bayal stojole te walubil soc p'isbil ta lec chican te bi smuc'ul te sp'isole. Soc yich'oj ts'amte'etic yu'un cedro.

¹² Ta sjoyobal te muc'ul amaq'ue, ay oxchol tonetic soc jchol ts'amte'etic yu'un cedro, jich nix te bit'il awilal ta yutil soc te jtsal-na-yochibal templo yu'un Cajwaltic.

Salomón la xchap sc'op soc Hiram

¹³ Te muc' ajwalil Salomón la sticun ta iq'uel tel te Hiram ta lum Tiro.

¹⁴ Te Hiram, yal jtul me'ba ants, sts'umbal Neftalí, yan te state, ja' slumal te Tiro. Ya sna' lec at'el ta bronce. Te Hiram mero ma'yuc bi wocol la yaiy, mero bayal sp'ijil yo'tan yu'un at'el ta bronce. Ya sna'bey swentail te bit'il ay ta tuuntesel te bronce, soc ya sna' spasel biluc at'elil. Jich c'ot ta stojol te muc' ajwalil Salomón, la spasbey spisil te yat'ele.

¹⁵ La yultes te bronce, la spas cheb toyol balal taq'uinetic. Ay waxaqueb metro snajt'il, jo'eb metro soc lajuneb yoxwinic (50) centímetro ta sjoyobal te sbalejal te xch'ujt'e.

¹⁶ Soc la spas xan yan cheb bronce-taq'uinetic swenta sjol, yu'un la yac'bey ta jujun sni'il te snajt'il balal bronce-taq'uinetique. Ay cheb metro soc jo'eb xcha'winic (25) centímetro snajt'il te jujune.

¹⁷ Soc yan xan, la spas cheb jalbil taq'uin, la yac'bey sjal sba jichuc cadena. Tey la yac'bey ta jujun sjol te ay ta sni'il te muc'ul balal bronce-taq'uinetique.

¹⁸ Soc la spas cha'chol granada ta sjoyobal te jujun jalbil taq'uine, swenta xch'alil te sjol te muc'ul balal taq'uinetique. Jich la spasbey ta xchebal te jujun sjole.

¹⁹ Te jujun sjol te ayic ta sni'il te jujun balal taq'uinetic ayic ta jtsal-na-ochibale, jteb ma sta cheb metro stoyolil, jich sloc'tayej ta pasel te bit'il te lirio-nichime.

²⁰ Te sjoyobal soc ta stoyolil te jujun sjole, wolajtic pasbil ta banti muc' sjamalul. Ta sba te jalbil-taq'uine, ay lajunwinic (200) sloc'ombail granadaetic, cha'chol pasbil.

²¹ Te Hiram la yac' ta jtsal-na-ochibal yu'un templo te muc'ul balal taq'uinetique. Te c'alal la yac' ta yawil, te muc'ul balal taq'uin la yac' ta swa'el, Jaquín sbiil c'ot yu'un; te muc'ul balal taq'uin la yac' ta q'uexen, Boaz sbiil c'ot yu'un.

²² Te sni'il te muc'ul balal taq'uinetic, jich yilel ta pasel te bit'il te lirio-nichime. Jich ju' ta pasel te muc'ul balal taq'uinetique.

Bitic ay ta yutil templo

²³ Te Hiram la spas jun muc'ul estanque ta bronce yu'un yawil ja'. Sepel la spas, ay chaneb metro soc lajuneb yoxwinic (50) centímetro te sjamalul te sti'ile. Te stoyolile cheb metro soc jo'eb xcha'winic centímetro (25), te sjoylejal te sti'ile ay oxlajuneb metro soc lajuneb yoxwinic (50) centímetro.

²⁴ Ta ye'tal te swelejal sti'ile, ta sjoyobal te estanque, la spas cheb te bila sjaloj sba baele, yajtalal sit te' yilel, ay lajuneb ta jujun jo'eb yoxwinic (45) centímetro, ja' nix jun ay soc te estanque.

²⁵ Te estanque cajal ta spat lajchayeb toroetic pasbil ta bronce. Te toroetic, oxeb yacalic ta yilel bael ta stojol norte, oxeb yacalic yilel bael ta stojol sur, oxeb yacalic yilel bael ta stojol ta banti ya xloc' tel c'aal, soc oxeb yacalic yilel bael ta stojol smalib c'aal. Te yanique jich ochemic bael ta ye'tal te estanque, swenta yu'un jich cajal ta sbaic a.

²⁶ Te spimil ta pasel te estanque, ay waxaqueb centímetro. Te sti'il, ja' sloc'tayej te spojtsil yacan te lirio-nichime, soc ya x'och chaneb yoxwinic ta jmil (44,000) litro ja'.

²⁷ Soc la spas lajuneb carretaetic yu'un scajtijib yawil ja' pasbil ta bronce. Te jujune ay jun metro soc chanwinic (80) centímetro te snajt'ile, soc ja' nix jich te xujq'ue. Te stoylejal jun metro soc jo'lajuneb xcha'winic (35) centímetro.

²⁸ Te carretaetic jich pasbilic in to: ay lejch'el taq'uinetic yich'oj te jujun carreta, yich'oj yipic ta smarcoil.

²⁹ Tey ta lejch'el taq'uinetic te yich'oj yip a te smarcoile, ay pasbil sloc'ombail león-chojetic, toroetic soc querubinetic. Ta sba soc ta ye'tal te toroetic, soc te león-chojetic, ch'albil ta sloc'ombail sepbil nichimetic.

³⁰ Te jujun carreta, ay chansejp yacan yich'oj pasbil ta bronce, soc te banti ya sutilay sbaic, ja' nix bronce pasbil a. Ta xchanebal xujc' te jujun carreta, ta yalanil yawil ja', ay chejchej-taq'uinetic ipajem a pasbilic ta bronce, sloc'ombail sepbil nichimetic te jujune.

³¹ Te sti' te banti ya xc'ot te yawil ja', ay scorralil yilel te c'axem solel ta stoyolil jo'eb yoxwinic (45) centímetro. Te sti' te yawil ja' sepel nax. Te bi yich'oj yip a, ay waxaqueb xchanwinic (68) centímetro stoyolil, soc tey ta xch'ujt' te sti' ay loc'ombaetic tey a. Te smarcoile ma sepeluc, chanxujc' nax ay ta pasel stuquel.

³² Xchansejpel yacan ayic ta ye'tal te lejch'el taq'uinetique. Jich te staq'uinal ta banti ya sutilay sba te yacane, tey yich'oj tel yip ta carreta. Te stoyolil te juju-jsejp yacane ay waxaqueb xchanwinic (68) centímetro,

³³ soc ja' nix jichic yilel te bit'il seplejal yacan te carretaetic yu'un guerra. Ta banti ya sutilay sba te yacane, te staq'uinal sti'ile, soc te juju-jch'ix staq'uinal te jajch'emic tey ta xch'in sepel staq'uinal ta yolile, spisil pasbilic ta bronce.

³⁴ Te xchanebal te chejchej-taq'uin te ayic ta xchanebal te xujc' te jujun carreta, jun nax ay soc.

³⁵ Te sbae, sepel te sti'e, ay cheb xcha'winic (22) centímetro soc olil stoyolil. Te lejch'el taq'uinetic soc te marcoetic te ay ta stoyolil te carreta, jun nax ay soc.

³⁶ Te Hiram la spasbey sloc'ombail te querubinetique, león-chojetic soc xanetic ta xch'ujt' te lejch'el taq'uinetic soc te marcoetic, chican te bi yilel te sjamalul ta jujune, soc sloc'ombail sepbil nichimetic ta sjoyobal.

³⁷ Jich la spas te lajuneb carretaetic scajtijib yawil ja'etique, spisil ultesbil taq'uinetic, pajal yilel soc pajal smuc'ul.

³⁸ Soc la spas xan lajuneb estanqueetic ta bronce. Te jujune ay jun metro soc chanwinic (80) centímetro sjamalul, ya x'och chanwinic yoxbajc' (880) litro ja'. Ta jujun la yac'bey ta sba ta jujun te lajuneb carretaetique.

³⁹ Jo'eb carretaetic la yac' ta swa'el templo, soc jo'eb ta xq'uexen. Te muc'ul estanque yu'un ja', la yac' ta swa'el te na, ta stojol sloq'uib c'aal soc ta stojol sur.

⁴⁰ Te Hiram la spas oxometic, palaetic, soc muc'ul tazaetic. Jich ju' yu'un spisil te at'el ac'bot spas yu'un Salomón ta templo.

⁴¹ Te at'eliletic la spas: te cheb muc'ul najt'il balal taq'uinetic; te sjol wolajtic pasbil te c'ot ta sni'il te muc'ul balal taq'uinetique; te cheb jalbil bronce-taq'uinetic yu'un xch'alil sjole;

⁴² te jbajc' sloc'ombail granadaetic yu'un te cheb jalbil taq'uinetic, te cha'chol c'ot ta jujun, te la yich' ch'alel ta xchebal a te sjol te muc'ul balal bronce-taq'uin;

⁴³ te lajuneb carretaetic yu'un yawil ja', soc te lajuneb yawil ja'etic la yich' ac'beyel ta sbae;

⁴⁴ te muc'ul estanque yu'un ja', soc te lajchayeb toroetic ta ye'tale;

⁴⁵ soc te oxometic, te palaetic soc te muc'ul tazaetique. Spisil te bitic jayeb tuun ta templo yu'un Cajwaltic, te muc' ajwalil Salomón la yac'bey spas Hiram, pasbil ta puro juxbil bronce.

⁴⁶ Te muc' ajwalil Salomón la yac' ta ultesel ta moldeetic pasbil ta ji' ta muc'ul spamlej yu'un Jordán, ta yolil te lum Sucot soc lum Saretán.

⁴⁷ Mero bayal te bitic pasbil ta bronce te ma ba la sna' la yac' ta p'isel yalal te Salomón.

⁴⁸ Te Salomón la sticun ta pasel ta spisil te yantic bitic tuun ta templo yu'un Cajwaltic: ja' te scajtijib ta chiq'uel pom pasbil ta oro; mesa pasbil ta oro te banti ya yich' aq'uel te ch'ul pan yu'un Cajwaltic;

⁴⁹ te stuchtajib c'ajq'uetic pasbil ta puro oro te ayic ta elawal yu'un te Mero Ch'ul Awilale, jo'eb ta wa'el soc jo'eb ta q'uexen, soc sloc'ombail nichimetic; yawil aceite yu'un c'ajc'; tenazaetic pasbil ta oro;

⁵⁰ vasoetic; stup'jibal te smechail c'ajq'ue; muc'ul tazaetic; muc'ul cucharaetic; soc xchic'jibal pom te spisil pasbil ta puro oro. Soc ja' nix oro te bisagra yu'un te sti' ta Mero Ch'ul Awilal, tey nix ay a ta yutil te templo; soc nix te ti'nailetic yu'un templo.

⁵¹ Te c'alal ju' spisil te biluquetic la yac' ta pasel yu'un te templo te muc' ajwalil Salomón, la yich' bael te bitic pasbil ta oro soc ta plata te la yac'bey Cajwaltic te anima David, ja' te state, c'o yac' ta stsobjibal biluc ta templo yu'un te Cajwaltique.