1 Reyes 6 - Bible in Tzeltal de Oxchuc y Tenejapa

Salomón la spas templo

¹ Te Salomón la sjach spasel te templo yu'un Cajwaltic ta xchanebal ja'wil yochel ta muc' ajwalil yu'un Israel a, ta xchebal u sjajch'el ja'wil, ja' te u yu'un Ziv. Ayix chanwinic xcha'bajc' (480) ja'wil sloq'uelic ta Egipto a te israeletique.

² Te templo la spasbey Cajwaltic te muc' ajwalil Salomón, ay juqueb xcha'winic (27) metro snajt'il, soc baluneb metro sjamalul, soc olil xchanlajuneb metro stoylejal.

³ Te jtsal cuarto ay ta yochibal te templo, baluneb metro snajt'il, pajal soc te sjamalul te templo, soc chaneb metro soc olil te sjamalule.

⁴ Te Salomón la spasbey sventanaul te ay jalbil staq'uinale.

⁵ Soc la spasbey sts'ajq'uil ta sts'ajc'ul te templo, ja' nix la yac'bey st'un te sts'ajc'ul ta sjoyobale, jajch'em ta yochibal te templo, soc bajt' ta sjoyobal te muc'ul cuarto te ay ta olile soc ta Mero Ch'ul Awilal. La spas cuartoetic ta c'atal ta sjoyobal.

⁶ Te sba cajale ay cheb metro soc jo'eb xcha'winic centímetro (2.25) te sjamalule; te xcha'cajal te ay ta olile, cheb metro soc lajuneb xchanwinic centímetro (2.70) te sjamalule; te yoxcajal ay ta toyol, oxeb metro soc jo'lajuneb centímetro (3.15) te sjamalule, melel ta spat ch'inuben te sp'isol sts'ajc'ul te templo, swenta yu'un jich ma ba la yich' ts'apel ochel sni'il ts'amte' ta sts'ajc'ul te templo.

⁷ Te bit'il la yich' pasel te templo, la yich' tuuntesel tonetic te mero lec walubile. Ja' yu'un te c'alal la yich' pasel, ma'yuc chicnaj ta aiyel bajbonel martillo, ma'yuc chicnaj t'ojt'onel echej soc ni ayuc bi yantic at'ejibal-taq'uinetic chicnaj sc'op tey a.

⁸ Te sti' te cuarto te ay ta alan, ay ta jejch' ta wa'el yu'un te sts'ajq'uile. Te moel bael ta yantic cuartoetic ayic ta xcha'cajal soc ta yoxcajale, ay jun moibal te bueltatic ta pasel moele.

⁹ C'alal ju' ta pasel yu'un te Salomón te templo, la smac ta ts'amte'etic soc ch'albil cedro.

¹⁰ La spas te cuartoetic ta sjoyobal te templo, te yich'oj cheb metro soc jo'eb xcha'winic centímetro (2.25) stoyolil, soc te tey nix la scajanbey jajch'el ta sts'ajc'ul te ts'amte'-cedroetique.

¹¹ Jich te Cajwaltic la sc'opon te Salomón, jich la yalbey:

¹² —Te bit'il templo cu'un yacalat ta spasele, teme ja' ya at'unbon spisil ta jchajp te mandaliletic cu'une, soc teme ya awac' c'otuc ta pasel ta spisil, te ja'uc ya awac' ta awo'tan te ma xch'ay awu'un te bitic ya yale, ya me cac' c'otuc ta pasel ta awenta te bi la jchap soc David, ja' te anima atate.

¹³ Ja' te ya me x'ainon ta yolil te israeletic, soc ma ba ya jpijt'es te Israel te lum cu'une —xi'.

¹⁴ Te Salomón ju' ta pasel yu'un te templo.

¹⁵ La smacbey ta ch'ujte' yu'un cedro te spajc'ul ta yutile. La smac ta ch'ujte' ta toyol c'alal ta ye'tal, soc la slimbey ch'ujte' c'antaj ta lum.

¹⁶ Soc ta slajibal yutil te templo te ay baluneb metro snajt'ile, la smac ta ch'ujte' yu'un cedro ta toyol c'alal ta ye'tal. La xchajban ta lec, swenta yu'un ja' me ya xtuun ta Mero Ch'ul Awilal.

¹⁷ Te yutil te templo te ay ta elawal yu'un te Mero Ch'ul Awilale, ay waxaclajuneb metro snajt'il.

¹⁸ Te smajq'uil xan ta spajc'ul te templo, puro te' yu'un cedro ch'albil ta sloc'ombail nichimetic soc ch'in ch'umetic. Spisil puro cedro macbil a, ma'yuc chican ta ilel ni junuc ton.

¹⁹ Te Salomón la xchajban te Mero Ch'ul Awilal swenta yu'un ya yac' tey a te scajonil trato yu'un te Cajwaltique.

²⁰ Te yutil te Mero Ch'ul Awilale, baluneb metro snajt'il, baluneb metro sjamalul, soc baluneb metro stoyolil. Ta elawal yu'un te Mero Ch'ul Awilale, te Salomón la spas jun scajtijib smajt'an Dios ta cedro, la slap' ta potsel ta oro.

²¹ Soc la slap' ta potsel ta puro oro te yutil templo soc te Mero Ch'ul Awilale, soc la yac' cadenaetic pasbil ta oro ta yochibal.

²² Jich la slap' ta potsel ta oro spisil te templo, soc nix te scajtijib smajt'an Dios te ja' yu'un te Mero Ch'ul Awilal.

²³ Soc la spasbey sloc'ombail ta olivo cheb querubinetic, tey la yac' ta Mero Ch'ul Awilal. Te jujune ay chaneb metro soc olil (4.50) stoyolil.

²⁴ Te jujun xiq'ue ay cheb metro soc jo'eb xcha'winic centímetro (2.25) snajt'il. Ja' yu'un ta jun sni'il xic' c'alal ta yan sni'il xic', ay chaneb metro soc olil (4.50). Jich ay ta xchebalic.

²⁵ Ta xchebal te sloc'ombail querubinetic jun nax sp'isolic, pajal ay chaneb metro soc olil (4.50) smuc'ul, soc ja' nix jich pajal yilelic ta pasel.

²⁶ Te stoylejalique ja' nix jich chaneb metro soc olil (4.50).

²⁷ Te Salomón la yac' ta Mero Ch'ul Awilal. Te sloc'ombail querubinetic slich'oj te xiq'uique. Ja' yu'un te xic' te june staoj ch'ujt' pajc'; te xic' te yane staoj te yan jejch' ch'ujt' pajq'ue. Te yan xchebal xiq'uic staoj sbaic ta xchebalic ta olil ta spajc'ul te Mero Ch'ul Awilale.

²⁸ Te Salomón la slap' ta potsel ta oro te sloc'ombail querubinetic.

²⁹ Ta spisil sts'ajc'ul ta yutil te Mero Ch'ul Awilal soc ta spat la spasbey sloc'ombail querubinetic, palmaetic soc nichimetic.

³⁰ Soc la slap' oro ta spisoil ta yutil te Mero Ch'ul Awilal, soc ta spat.

³¹ Ta yochibal te Mero Ch'ul Awilal la spasbey sti' ta olivo, te smarcoil ta sjoylejal jo'eb xujc' ta pasel.

³² Ta xchebal te sti'e pasbil ta olivo, la spasbey sloc'ombail querubinetic tey a, palmaetic soc nichimetic, soc la slap' ta potsel ta oro spisilic.

³³ Te yochibal te jtsal ta olil te templo la spasbey smarcoil ta puro olivo, chanxujc' la spas.

³⁴ Ta xcha'lejch'el te sti' pasbil ta c'antaj. Xchebal ya sc'anic puxel ta olil.

³⁵ La spasbey sloc'ombail querubinetic, palmaetic, soc nichimetic. Patil la slap' ta potsel ta lejch'el oro ta spisilic.

³⁶ Soc la spas te scorral-ts'ajc'ul te amac' ta yelaw te templo, la yac'bey oxchol walubil tonetic soc jchol ts'amte'etic yu'un cedro.

³⁷ Ta xchanebal ja'wil yochel ta muc' ajwalil a te Salomón, ta u yu'un Ziv, la yich' jajch'el te sts'ajc'ul te templo yu'un te Cajwaltique.

³⁸ Ta sbuluchebal ja'wil yat'el ta muc' ajwalil te Salomón ta u yu'un Bul, te ja' swaxaquebal u sjajch'el ja'wil, ju' ta pasel te templo, jich nix te bit'il la yich' chapel te c'alal och ta pasele. Juqueb ja'wil a ju' yu'un te templo te Salomón.