1 Reyes 22 - Bible in Tzeltal de Oxchuc y Tenejapa

Micaías la yal te ya yich' tsalel Acab

¹ C'ax oxeb ja'wil ma'yuc guerra yu'unic te Siria soc te israeletique.

² Pero ta yoxebal ja'wil, te Josafat muc' ajwalil yu'un Judá ba yula'tay te muc' ajwalil yu'un Israel.

³ Te muc' ajwalil yu'un Israel jich la yalbey te j'at'eletic yu'une: —Ana'ojic te cu'untic te lum Ramot ta sq'uinal Galaad. Lec ay jiche, ¿bi yu'un ma ba ya jletiquix bi ya jpastic yu'un a te ya jpojbeytic ta sc'ab te muc' ajwalil yu'un Siria yu'unineje? —xi'.

⁴ Patil la sjojc'obey te Josafat: —¿Ya bal ac'an ya ajoinon ta yaq'uel guerra ta lum Ramot-ta-Galaad? —la yut. La sjac' te Josafat: —Jo'on soc te soldadoetic cu'un soc te caballoetic cu'un, ya me joinat ja'at soc te awinictaque,

⁵ pero neel ya sc'an ya yich' jojc'oyel te Cajwaltic teme jich ya sc'an yo'tane —xi'.

⁶ Te muc' ajwalil yu'un Israel la stsob j'alwanejetic te jteb ma sta jbajc' ta jtule. La sjojc'obey ta spisilic: —¿Ya bal xju' ya cac'bey guerra te lum Ramot-ta-Galaad, o ma xju'? —xi'. La sjaq'uic: —Ac'beya guerra, te Cajwaltic ya me yac'bat ta ac'ab —xiic.

⁷ Pero te Josafat la sjojc'o: —¿Ma bal ayuquix j'alwanej yu'un Cajwaltic te ya xju' ya jojc'obeytic? —xi'.

⁸ Te muc' ajwalil yu'un Israel jich la yalbey te Josafat: —Ay jtul xan te ya xju' ya sjojc'obotic ta stojol te Cajwaltique, ja' te Micaías te snich'an Imla. Mero ma jmulanbey sc'op, melel ma'yuc bi ora ya yalbon te bila leque, puro ma lecuc te bila ya yalbone —xi'. Pero jich albot yu'un te Josafat: —Ma xawal jich —xi' sc'oplal.

⁹ Te muc' ajwalil ta Israel ora la yic' tel jtul mach'a yich'oj at'el, la spas bael ta mandal: —Ac'a taluc ta ora te Micaías snich'an Imla —la yut.

¹⁰ Te muc' ajwalil yu'un Israel soc te Josafat te muc' ajwalil yu'un Judá slapoj te sc'u'-spaq'uic swenta ajwalil, nacajtic ta smuc'ul nactijibic te pamanbil ta yochibal te lum Samaria. Spisil te j'alwanejetic yacalic ta c'op ta stojolic.

¹¹ Te Sedequías snich'an Quenaana la spasix xulubiletic pasbil ta taq'uin, jich la yal ta aw: —¡Jich yaloj te Cajwaltic: “Ja' soc in xulubil to ya me awac'bey guerra te siriaetic, ja' to teme laj spisil awu'un!” xi' te Cajwaltic —xi' ta aw.

¹² Spisil te yantic j'alwanejetic jich yacal yalelic uuc. Jich la yalbeyic te muc' ajwalile: —Ac'beya guerra te lum Ramot-ta-Galaad, ya me awaiy tsalaw, melel ya me yac'bat ta ac'ab te lum te Cajwaltique —xiic.

¹³ Te abat c'o yic' tel Micaías, jich la yalbey: —Spisilic te j'alwanejetic yacalic ta yalel te lec ya xc'ot te muc' ajwalile, ma'yuc mach'a ma jichuc ya yal. Ja' yu'un, wocoluc, jich ni me xc'opojat te bit'il yantic, yacuc me awal uuc te lec ya xc'ot te muc' ajwalile —xi'.

¹⁴ Te Micaías la sjac': —Jamal ya cal ta stojol te Cajwaltic te ja' nax ya cal te bila ya yalbon te Cajwaltique —xi'.

¹⁵ C'ot ta stojol te muc' ajwalile, jojc'obot yu'un: —Micaías, ¿ya bal xju' ya cac'beytic guerra te lum Ramot-ta-Galaad, o ma xju'? —la yut. Te Micaías la sjac': —Ac'beya guerra, ya me awaiy tsalaw, melel ya me yac'bat ta ac'ab te Cajwaltique —xi'.

¹⁶ Pero te muc' ajwalil jich la yal: —¿Jayeb to buelta ya calbat te ja' nax ya awalbon ta jamal te bila melel ta stojol te Cajwaltique? —la yut.

¹⁷ Te Micaías jich la yal: —Quiloj ta spisil te israeletique pujq'uemic bael ta witstiquil, jich te bit'il chijetic te ma'yuc jcanan yu'unique. Jich yaloj te Cajwaltic: “Ma'yuc yajwalic, ta juju-jtul lamal yo'tan ac'a sujt'uc bael ta sna”, xi' te Cajwaltique —xi'.

¹⁸ Te muc' ajwalil yu'un Israel jich la yalbey te Josafat: —¿Yu'un bal ma la calbat jiche te ma'yuc bi ora ya yalbon caiy te bila lec te winique? Ja' nax puro amen te bi ya yalbon caiye —xi'.

¹⁹ La yal xan te Micaías: —Ja' yu'un te bi la awalixe, aiya me awaiy te sc'op Cajwaltic: La quil te Cajwaltic nacal ta smuc'ul nactijib, soc la quilbey spisil te ch'ul abatetic ta ch'ulchan, tec'ajtic ta sts'eel ta swa'el soc ta xq'uexen.

²⁰ Te Cajwaltic la sjojc'o mach'a ya xba stijbey jajch'el yo'tan te Acab, swenta yu'un ya xba yac'bey guerra te lum Ramot-ta-Galaad soc tey ya xlaj a. Ay yantic la yalic yan c'op, soc yantic yan bi la yalic.

²¹ Pero ay espíritu te c'o stejc'an sba ta stojol Cajwaltic, la yal te ja' ya spas stuquel. Te Cajwaltic la sjojc'obey bi ya yut ya spas.

²² Te espíritu la yal te ya yac'bey yalic lot ta yeic spisilic te j'alwanejetic yu'un te muc' ajwalile. Te Cajwaltic la yal te jich ya xju' ya slo'laye, ac'a ba spas.

²³ Yo'tic tey me ya ana'ix te Cajwaltic yac'ojbey espíritu yu'un pas-lot ta yeic spisilic te j'alwanejetic awu'une, melel ay ta yo'tan te Cajwaltic te ya sjinat ta jc'axele —xi' te Micaías.

²⁴ Te Sedequías snich'an Quenaaná noptsaj bael ta sts'eel te Micaías, c'o yac'bey majel, jich la yalbey: —¿Banti la yijq'uitayon te Espíritu yu'un Cajwaltic swenta yu'un ya sc'oponat te ja'ate? —xi'.

²⁵ La sjac' te Micaías: —Ya me ana' te bi c'aalil ya xjajch'at ta anac'bel aba ta nanatic —xi'.

²⁶ Ja' yu'un te muc' ajwalil yu'un Israel la yal mandal, jich la yal: —Tsacaic te Micaías, ic'aic bael ta chuquel ta stojol Amón te jwentainwanej ta lum, soc ta stojol Joás te jnich'ane.

²⁷ Albeyaic te jo'on ya cal mandal te ya yaq'uic ta chucjibal, soc ac'a yac'beyic swe' taquin waj soc jteb nax ja', ja' to te c'alal buen lec ayon a ya sujt'on tale —xi'.

²⁸ La to yal xan te Micaías: —Teme buen lec ya sujt'at tel, yu'un nix ma ja'uc c'opoj loq'uel ta co'tan a te Cajwaltic abi —xi'.

²⁹ Jich yu'un te muc' ajwalil yu'un Israel soc te Josafat te muc' ajwalil yu'un Judá, ochic ta yaq'uel guerra te lum Ramot-ta-Galaad.

³⁰ Te muc' ajwalil yu'un Israel, jich la yalbey te Josafat: —Te jo'one ya me jyanajtes jba te ya x'ochon ta guerra. Yan te ja'ate ja' me ya alap te ac'u' swenta ajwalil —xi'. Jich la syanajtes sba te muc' ajwalil yu'un Israel, och ta guerra.

³¹ Pero te muc' ajwalil ta Siria la yalbey mandal te lajchayeb xcha'winic (32) capitanetic yu'un carretaetic te ma me yanuc mach'a ya yac'beyic, ja' me ac'a smilic te muc' ajwalil yu'un Israel.

³² C'alal te capitanetic yu'un carretaetic la yilic te Josafat, ja' la scuyic a te muc' ajwalil yu'un Israel, la sjoytayic ta ora. Pero te Josafat awun, la sc'an coltayel.

³³ C'alal la yilic te ma ja'uc te muc' ajwalil yu'un Israel, la yijq'uitayic jilel.

³⁴ Pero jtul soldado jich nax la st'im bael te yat'ejibal st'imalte', ja' ejch'entesot swenta lajel a te muc' ajwalil yu'un Israel, yu'un buen toj c'ot ta banti jamal te smajq'uile. Ja' yu'un la spas ta mandal te jtij-carreta yu'une: —Suta aba soc te carreta, ic'awon loq'uel ta yolil te guerra, yu'un ejch'enajonix ta jc'axel —xi'.

³⁵ Mero tulan c'ot te guerra ta sjunal c'aal. Te muc' ajwalil la spas tulan te la stejc'an sba ta scarreta ta stojol te siriaetique. Pero c'alal mal c'aal bael, laj te muc' ajwalil yu'un Israel. Te xch'ich'el yac ta oc ta yutil scarreta.

³⁶ C'alal mal c'aal, jich pujc' ta alel ta stojol te soldadoetic: “Juju-jtul ac'a bajt'uc ta slumal soc ta slum-sq'uinal,

³⁷ melel lajix te muc' ajwalile”, xiic. Jich yu'un te muc' ajwalil la yich' iq'uel bael ta Samaria, tey la smuquic a.

³⁸ Patil la spoquic te carreta ta estanque yu'un ja' ta Samaria te banti ya x'atinic te jmulawil antsetique. Te xch'ich'el Acab, lec'bot ta ts'i'etic, jich nix te bit'il yaloj te Cajwaltique.

³⁹ Te jayeb xan sc'oplal te Acab soc spisil te bitic la spase, soc te sna ch'albil ta marfil, soc te lumetic la sjache, ts'ibubil ta libro yu'un yat'el muc' ajwaliletic ta Israel.

⁴⁰ C'alal laj te Acab, ja' jil ta sjelol ta muc' ajwalil te snich'ane, ja' te Ocozías.

Yat'el Josafat, muc' ajwalil yu'un Judá

⁴¹ Ta xchanebal ja'wil yochel ta muc' ajwalil ta Israel a te Acab, te Josafat snich'an Asa och ta muc' ajwalil ta Judá.

⁴² Ay jo'lajuneb xcha'winic (35) ya'wilal a. Jalaj ta muc' ajwalil ta Jerusalén jo'eb xcha'winic (25) ja'wil. Azuba sbiil te sme'e, yantsil-nich'an Silhi.

⁴³ Te Josafat buen toj la yac' sba, jich nix te bit'il te Asa te state. Spisil te bitic la spase, buen lec ta sit te Cajwaltique. Pero te toyol ch'uunjibaletic, te banti ya yac'beyic milbil majt'aniletic soc ya xchic'beyic pom te loc'ombaetic te lume, ma ba la sloq'ues stuquel.

⁴⁴ Te Josafat la xchap soc te muc' ajwalil yu'un Israel te ya slamantesic q'uinal.

⁴⁵ Te jayeb xan sc'oplal soc te bitic yantic bayal yutsil la spase, soc guerraetic la spas, spisil ts'ibubil ta libro yu'un yat'el muc' ajwaliletic yu'un Judá.

⁴⁶ Te Josafat jc'axel la sten loq'uel ta sq'uinal Judá te mach'atic ya spasic mulil ta sbaq'uetalic ta swenta yich'el ta muc' te loc'ombaetic te ay to jilemic ta yorail te Asa, ja' te state.

⁴⁷ (Ta Edom ma'yuc muc' ajwalil, ja' nax jtul jwentainwanej tey a.)

⁴⁸ Te Josafat la spas barcoetic, jich te bit'il te barcoetic yu'un Tarsis, swenta yu'un ya xba yich' tel oro ta Ofir. Pero ma ba ju' yu'unic te bajt'ique, tey nax lajic ta Ezión-geber te sbarcoique.

⁴⁹ Ja' yu'un te Ocozías snich'an Acab la yalbey te Josafat te yacuc sticun swinictac te ja' ya sjoin sbaic ta beel soc ta at'el ta barco soc swinictac Ocozías, pero te Josafat ma ba la sc'an.

⁵⁰ Laj te Josafat, la yich' muquel ta Lum-yu'un-David, te ja' sts'umbale. Ja' och jilel ta sjelol ta muc' ajwalil te snich'ane, ja' te Joram.

Yat'el Ocozías, muc' ajwalil yu'un Israel

⁵¹ Ta juclajuneb ja'wil yochel ta muc' ajwalil ta Judá a te Josafat, och ta muc' ajwalil ta swenta Israel ta Samaria te Ocozías, te snich'an Acab. Cheb ja'wil jalaj ta muc' ajwalil.

⁵² Amen bi la spas ta sit Cajwaltic, yu'un ja' la st'unbey te sbol at'el sme'-state, soc nix te sbol at'el te Jeroboam te snich'an Nabat, te la yac'bey sta smulic te israeletique.

⁵³ Soc la yac' sba ta abatinel ta stojol te Baal, la xch'uun, jich nix te bit'il la spas te state. Jich la yac' ilinuc te Cajwaltic, te Dios yu'un Israel.