1 Reyes 21 - Bible in Tzeltal de Oxchuc y Tenejapa

Acab soc sts'usubil Nabot

¹ C'ax c'aal ta patil, ay jtul winic ta lum Jezreel te Nabot sbiil, ay sts'usubil ta lum, ay ta nopol spalacio te Acab, te muc' ajwalil yu'un Samaria.

² Ay jun c'aal te Acab jich la yalbey te Nabot: —Ac'bon te aq'uinal te bay ats'usubil, yu'un ya x'och ta hortaliza cu'un, melel ay nix ta spat jna a. Ta swenta sjelol ya cac'bat yan ts'usubil, te c'axem jich yutsil a te bit'il te awu'une, o teme ya ac'ane, ya jtojbat ta taq'uin —xi'.

³ Pero te Nabot la sjac'bey sc'op te Acab: —Ma sc'an Dios te ya cac'bat te bila yac'ojbon jilel te jme'-jtate —xi'.

⁴ Te Acab bajt' ta sna, ay ta mel-o'tan soc boloben yo'tan ta swenta te bi albot yu'un te Nabot, ta scaj te albot te ma ba ya x'ac'bot te bila ac'bil jilel yu'un sme'-stat. C'alal c'ot ta sna, la smejts'an sba ta swayib, la sut bael sit ta pajc', soc ma ba we'.

⁵ Ja' yu'un te Jezabel te yinam, noptsaj bael ta sts'eel, jich la yalbey: —¿Bi yu'un te ameloj awo'tan, te ma x'ac'an ya xwe'ate? —la yut.

⁶ Te Acab la sjac': —C'opojon soc Nabot te ay ta Jezreel, la jc'anbey te yacuc xchonbon te sts'usubile, o teme ya sc'ane, ya jeltaybey, ya cac'bey yan ts'usubil ta sjelol. Pero ma ba la sc'an la yac'bon —xi'.

⁷ Te Jezabel, ja' te yiname, jich la yal: —¡Pero ja'at ay ta awenta pasaw ta mandal ta stojol Israel! Baan ta we'el, binuc nax me awo'tan. Jo'on me ya jchajban te sts'usubil Nabot —xi'.

⁸ Te ants ora och ta spasel cartaetic ta swenta Acab, la yac'bey te sello yu'un te muc' ajwalile. Ora la sticunbey te mamaletic te yich'oj yat'elic soc te jwentainwanejetic, te tey nix nainemic ta slumal Nabot.

⁹ Jich la yalbey ta cartaetic: “Alaic ta comel we'elil, soc najc'anaic te Nabot ta yolil te alumalique.

¹⁰ Soc leaic cheb lotil testigoetic, ya me anajc'anbey ta stojol, albeyaic ac'a slebeyic smul. Ac'a yalic te la yixtac'optay Dios soc la yixtac'optay te muc' ajwalil. Patil ic'aic loq'uel, milaic ta ch'ojel ta ton”, xi' te ts'ibubile.

¹¹ Te winiquetic ta slumal Nabot, te mamaletic, soc te jwentainwanejetique, la spasic te bila albot yu'un Jezabel ta cartaetic ticunbotic yu'une.

¹² La yalic te ya scom swe'elic, la snajc'anic ta yolil lum te Nabot.

¹³ C'ot cheb lotil testigoetic, la slebeyic smul te Nabot ta stojol te lume. La yalic ta jamal ta lot te la yixtac'optay Dios soc te la yixtac'optay te muc' ajwalil te Nabot. Jich la sloq'uesic bael ta ti'lum, tey c'o smilic ta ch'ojel ta ton a.

¹⁴ Ora la sticunbeyic ta alel te Jezabel te la yich'ix milel ta ch'ojel ta ton te Nabot.

¹⁵ Te c'alal la yaiy te Jezabel, jich la yalbey te Acab: —Baan, u'uninbeya te ts'usubil yu'un Nabot ta Jezreel, te ma ba la sc'an la xchonbate. Te Nabot lajix, ma ba cuxulix —xi' te Jezabel.

¹⁶ C'alal la yaiy te Acab te lajix te Nabot, ba yu'uninbey te sts'usubile.

¹⁷ Ja' yu'un te Cajwaltic la sc'opon te Elías te talem ta Tisbe, jich la yalbey:

¹⁸ —Baan ta ora ta yilel te Acab, te muc' ajwalil yu'un Israel te nainem ta Samaria. Ta ora in to ay ta sts'usubil Nabot, te baem yich'ele.

¹⁹ Jich me ya awalbey: “Jich ya yalbat te Cajwaltic: ‘Te bit'il la amil te Nabot, soc te la apojbey te bila ay yu'une, tey nix ta banti lec'bot xch'ich'el yu'un ts'i'etic, tey nix me ya slec'bat ach'ich'el ts'i'etic uuc a’, xi'” uta me —xi' te Cajwaltique.

²⁰ Te Acab la sjac'bey te sc'op Elías: —¿Ja'at bal jiche te jcontroat te la ataone? —xi'. Te Elías jich la yal: —Jich, la jtaat. Melel puro amen bi ya apas ta sit te Cajwaltique.

²¹ Ja' yu'un jich la yal te Cajwaltic: “Ya cac' taluc wocol ta atojol. Ya cac' lajuc te patil alnich'anetic awu'un, ya me jlajin te queremetic awu'un ayic ta Israel.

²² Soc xan, jich me ya jpasbey te mach'atic ay awu'un te bit'il la jpasbey te mach'atic ay yu'un te Jeroboam te snich'an Nabat, soc te Baasa te snich'an Ahías, ta scaj te la yac' ilinucon yu'un te la yac'bey sta smulic te israeletique”, xi' te Cajwaltique.

²³ Jich te Jezabel, la yalix te Cajwaltic ta stojole: “Ts'i'etic me ya xti'ot yu'un ta aquiltic yu'un Jezreel te Jezabel”, xi' te Cajwaltique.

²⁴ Te mach'atic ay awu'un ya xlajic ta lum, ya me xti'otic ta ts'i'; teme ya xlajic ta aquiltic, ya me xti'otic yu'un jti'awal mutetic —xi' te Elías.

²⁵ (Ma'yuc mach'a yan jich te bit'il Acab, te sujot yu'un yinam, ja' te Jezabel, te la spas te bila amen ta pasel ta sit te Cajwaltique.

²⁶ La sboltes sba ta jc'axel ta scaj te la xch'uun te loc'ombaetic diosinbilique, jich te bit'il la spasic ta spisilic te amorreoetic te la xch'oj loq'uel ta stojol te israeletic te Cajwaltique.)

²⁷ C'alal te Acab la yaiy spisil, la xch'i' sc'u', la slap ch'ixal pac' soc la scom swe'el. La slap ta wayel te ch'ixal paq'uetic, soc bayal la smel yo'tan spisil ora yu'un.

²⁸ Ja' yu'un te Cajwaltic jich la yalbey te Elías:

²⁹ —¿La bal awilix te Acab te la spejc'anix sba ta jtojole? Ta scaj te bit'il bic'tajix ta jtojol, ma ba ya cac' xc'ot te wocol ta stojol te mach'atic ay yu'un te jayeb xan ora cuxule, ja' to me ya xc'ot ta swenta te snich'ane —xi'.