1 Reyes 20 - Bible in Tzeltal de Oxchuc y Tenejapa

Acab la stsal siriaetic

¹ Te muc' ajwalil yu'un Siria te Ben-adad sbiil la stsob spisil te soldadoetic yu'une, soc lajchayeb xcha'winic (32) yantic muc' ajwaliletic te jun yo'tan soque, soc te caballoetic soc te carretaetic swenta guerra yu'unique. Bajt' ta lum Samaria, la sjoytayic, la yac'beyic guerra.

^2-3 Ja' nix ta yorail a te Ben-adad la sticun abatetic ta yalbeyel tey ta lum Samaria te Acab, te ja' muc' ajwalil yu'un Israel, jich c'o yalbey: —Te Ben-adad jich la yal: “Te ac'ulejal jo'on cu'un, soc te antsetic awu'un soc te anich'nab te bay mero lequique”, xi' me —xiic c'oel ta stojol.

⁴ Te muc' ajwalil yu'un Israel jich la sujt'esbey sc'op: “Jich te bit'il la awalixe, muc' ajwalil, te jo'on soc spisil te bitic ay cu'une, ja' awu'un ya xc'ot”, xi'.

⁵ Te abatetic yu'un Ben-adad cha'bajt'ic xan ta stojol Acab, jich la yalbeyic: —Te Ben-adad jich la yal: “La jticunbatix ta alel te ya awac'bon te ac'ulejal, te antsetic awu'un, soc te anich'nabe.

⁶ Soc xan te pajele, ta jichilan ora ya me jticun soldadoetic cu'un te ya xba yocliyic te apalacio, soc te sna te ajo'tac ta at'ele. Spisil te bitic ya smulanic, ya me yich'ic tel”, xi' me —xiic c'oel te abatetique.

⁷ Ja' yu'un te muc' ajwalil yu'un Israel la sticun ta iq'uel tel te mamaletic yich'oj yat'elic yu'un te lume. Jich la yalbey: —Te ja'exe ya ana'ic te bit'il yac ta sleel bi ya yut ya yuts'inon te winique, manchuc me jamal calojbeyix te ya cac'bey te antsetic cu'une, te jnich'nab soc te jc'ulejale —xi'.

⁸ —Ma x'awaiybey, soc ma me x'awich'bey ta wenta —xiic.

⁹ Jich yu'un te Acab la yalbey bael te abatetic te ticunbilic tel yu'un te Ben-adad: —Albeya te muc' ajwalil te ya jpas te bi la yalbon ta sbabial, pero ma xju' ya jpas stuquel te bila yac ta sc'anel ta ora yo'tic —la yut. Te abatetic la yich'ic bael te sujt'ib te sc'op Ben-adad.

¹⁰ Te Ben-adad la sticunbey ta alel te Acab: —Ac'a yac'bon tulan castigo te diosetic, teme ay to ya xjil sts'ubil a te Samaria, te ya cac'bey juju-jojp te mach'atic jayeb st'unojone —xi'.

¹¹ Jich te muc' ajwalil yu'un Israel la sticunbey ta alel, jich la yalbey: “Ma to xac'ajintay tsalaw, ja' to teme c'ot ta pasele”, la yut.

¹² Te c'alal la yaiy te Ben-adad te sujt'ib te c'ope, yacalic ta uch'bajel soc te yantic muc' ajwaliletic ta xch'in nailwamal spasojique. C'opoj, jich la yalbey te swinictaque: —¡Guerraix! —xi'. Spisilic la xchajban sbaic ta yaq'uel guerra te lum Samaria.

¹³ Ja' nix ta yorail a, te jtul j'alwanej yu'un Dios c'ot ta stojol Acab te muc' ajwalil yu'un Israel, jich albot: —Te Cajwaltic jich la yalix: “Manchuc me ya awil te mero bayal te acontro, jo'on me ya cac'bat ta ac'ab yo'tic, swenta yu'un jich me ya ana' a te jo'on te Awajwalone”, xi' me —xi' te j'alwaneje.

¹⁴ La sjac' te Acab: —¿Mach'a ta swenta ya yac'bon ta jc'ab? —xi'. La yal te j'alwanej: —Te Cajwaltic yaloj te ja' ta swentaic te jch'iel queremetic te ya scoltayic ta at'el te jwentainwanejetic ta juju-jchajp q'uinale —xi'. —¿Mach'a neel ya x'och ta guerra? —xi' xan te Acab. —Ja'at —xi' te j'alwaneje.

¹⁵ Ja' yu'un te Acab la yajtay te jch'iel queremetic ya scoltayic ta at'el te jwentainwanejetic ta juju-jchajp q'uinale, loc' lajchayeb slajchaywinic (232) ta jtul, soc xan jucmil (7,000) soldado-israeletic.

¹⁶ Loq'uic jajch'el ta olil c'aal. Yan te Ben-adad soc te lajchayeb xcha'winic (32) muc' ajwaliletic sjoinej, jun yo'tanic yacalic ta yacubel ta xch'in nailwamal te pasbil yu'unique.

¹⁷ Ja' sbabial neelajic loq'uel te jcoltaywanejetic ta at'el yu'un jwentainwanejetique. C'alal albot yaiy te Ben-adad te ay winiquetic loq'uix tel ta Samaria,

¹⁸ la yal mandal: —Manchuc teme swenta lamal-o'tanil o swenta guerra te loq'uemic tele, pero cuxul me a ya jc'an ya awac'bonic —xi'.

¹⁹ Te jcoltaywanejetic ta at'el yu'un jwentainwanejetic loq'uic tel ta lum, t'unbilic yu'un te soldadoetique.

²⁰ Ta juju-jtul la smil juju-jtul scontroic. Te siriaetic loq'uic ta anel. Te israeletic la snutsic bael, pero te Ben-adad, te muc' ajwalil yu'un siriaetic, col loq'uel ta c'abal, bajt' ta anel ta caballo soc yantic soldadoetic te cajajtic ta caballo.

²¹ Jich te muc' ajwalil yu'un Israel ba sten bael te siriaetique. La yu'uninbey te caballoetic soc te carretaetic yu'un guerra. Mero buen tsalbil c'ot yu'unic te siriaetique.

²² Patil te j'alwanej yu'un Dios la stejc'an xan sba ta stojol te muc' ajwalil yu'un Israel, jich la yalbey: —Baan, tsoba xan yantic soldadoetic awu'un, nopa ta lec te bi ya sc'an ya apase. Melel te muc' ajwalil yu'un Siria, ta yan ja'wil ya me xcha'tal yac'bat xan guerra —xi'.

²³ Te capitanetic yu'un soldadoetic yu'un te muc' ajwalil ta Siria, jich la yalbey te muc' ajwalil yu'unique: —Te diosetic yu'unic te israeletic, puro diosetic yu'un witstiquil, ja' yu'un la stsalotic. Pero teme ya jtsac jbajtic soc ta spamlej, seguro ya jtsaltic.

²⁴ Te bi ya apas yo'tic, muc' ajwalil cu'untic, yacuc aloq'uesbey yat'elic te muc' ajwaliletic, yacuc awac' jwentainwanejetic te banti ayique.

²⁵ Ya me achajban jich yipal soldadoetic, jich nix te bit'il laj ta tsalele, soc jich yipal caballoetic soc carretaetic. Jich me ya jtsac jbajtic soc ta spamlej, tey mero ya jtsaltiquix abi —xiic. Te Ben-adad la yaiybey te sc'opic, jich nix la spas a te bit'il albote.

²⁶ C'alal c'ax jun ja'wil, te Ben-adad la yajtay te siriaetique. Patil bajt'ic ta lum Afec, ba stsac sbaic soc te Israel.

²⁷ Jich nix te israeletic la yajtayic te soldadoetic yu'unique. La yac'beyic bi ya xtuun yu'unic, bajt'ic ta stael te siriaetique. C'o yac' scampamentoic ta stojol te banti ayic te siriaetic. Te israeletic pajal yilelic soc cha'tsojp tentsunetic, yan te siriaetic spisil smacojic te q'uinale.

²⁸ Ja' yorail c'ot jtul j'alwanej yu'un Dios ta stojol te muc' ajwalil yu'un Israel, jich albot: —Jich la yalix te Cajwaltique: “Te siriaetic yalojic te jo'on dioson yu'un witstiquil, te ma diosucon yu'un spamlejtique. Ja' yu'un ya cac'bat ta ac'ab ta spisilic te jich yipal ayique. Jich me ya ana' a te jo'on te Awajwalone”, xi' me te Cajwaltique —xi'.

²⁹ C'ax juqueb c'aal yu'unic te siriaetic soc te israeletic ta campamento te snujp'usitayej sbaique. Ta sjuquebal c'aal jajch' guerra yu'unic. Ja' in c'aal to, te israeletic la smilic jo'winic ta jmil (100,000) soldado-siriaetic te ya xbeen ta yacanique.

³⁰ Te jteb xan soldadoetic jilic, bajt'ic ta anel ta lum Afec. Pero te juqueb xan xcha'winic ta jmil (27,000) soldadoetic colic loq'uel ta c'abale, tenotic yu'un te c'alal jin coel te sts'ajc'ul te lum Afec. Te Ben-adad loc' ta anel, c'ot c'alal ta lum, och snac' sba ta nanatic.

³¹ Ja' yu'un te swinictac, jich albot yu'un: —Caiyojbeytic sc'oplalic te muc' ajwaliletic yu'un israeletic te ya sc'otes ta pasel te bi tratoil ya spasique. Ja' yu'un la', jlaptic ch'ixal pac', soc jun lazo ya jxoj ta jnuc'tic juju-jtul. Ya me xba cac' jbajtic ta stojol te muc' ajwalil yu'un Israel, teme repente ya to spasbotic perdón soc teme ya to yac' xcuxinotique —xiic.

³² Jich la slapic ch'ixal pac', soc la xoj lazo ta snuq'uic. Bajt'ic ta stojol te muc' ajwalil yu'un Israel, jich c'o yalbeyic: —Te Ben-adad ya yalbat wocol ta atojol te muc' ajwalilate: ja' te yacuc laj apasbey perdón, te yacuc laj awac' xan cuxinuque —xiic c'oel. La sjac' te Acab: —¿Cuxul to bal jiche? Te jo'one jich ta co'tan te bit'il mero quermano —xi'.

³³ Te winiquetic mero lequil seña la yaiyic te bi la yal, la sjac'beyic ta ora te sc'ope: —Awermano Ben-adad, te ja'at te muc' ajwalilate —xiic. —Baanic, ic'bonic tel —xi' te Acab. Jich yu'un te Ben-adad ba stejc'an sba ta stojol. Te Acab la yic' moel ta scarreta.

³⁴ Jich la yal te Ben-adad: —Ya me jsujt'esbat te lumetic la spojbey jtat te atate, soc ya me xju' ya awaiy manbajel chonbajel ta Damasco, jich te bit'il la spas ta Samaria te jtate —xi'. La sjac' te Acab: —Te jo'on ya me jcoltayat bael jiche —xi'. Jich la spas trato soc te Acab te Ben-adad, jich la sticun sujt'el.

³⁵ Pero ay jtul winic te ja' sjoy te jchajp j'alwanejetic yu'un Dios, la yalbey te sjoy ta swenta smandal te Cajwaltic, jich la yal: —Wocoluc, ejch'entesawon —xi'. Pero te yane ma ba la sc'an la spas.

³⁶ Ja' yu'un te j'alwanej jich la yalbey: —Melel ma ba la awich' ta muc' te bi la yal te Cajwaltic, te c'alal ya xjajch'at baele, ya me xloc' tel león-choj, ya me smilat —la yut. Melel nix a, te c'alal c'ub bael ta stojol te j'alwanej, loc' tel león-choj, milot yu'un.

³⁷ Patil te j'alwanej la sta xan sba soc yan winic, la yalbey te yacuc x'ejch'entesot yu'une. Te winic la yac'bey yejch'en te j'alwaneje.

³⁸ Jich bajt' te j'alwanej, ba smaliy ta be te muc' ajwalile. Syantesej sba, yich'oj spojtsil-ejch'en ta sit.

³⁹ Te c'alal yac ta c'axel a te muc' ajwalil, jich la yalbey ta tulan: —Te jo'on awabaton, muc' ajwalil cu'un, yacon ta beel bael ta banti yacal guerra, pero tey ta banti ay te guerra loc' tel jtul soldado la yic'bon tel jtul jchuquel. La yalbon te ya yac'bon ta jwenta, pero la yalbon ta jamal, teme col bael ta jc'ab, jo'on ya xlajon ta swenta, o ya jtojbey oxmil (3,000) ta jsejp plata.

⁴⁰ Pero te jo'on awabaton, muc' ajwalil, ch'ay co'tan ta swenta spasel yantic at'eliletic, jich ma ba la quil loc' ta anel te jchuquele —xi'. Te muc' ajwalil yu'un Israel jich la yal: —Ja'at nix ya awal amul, soc ja'at nix ya awal te bila ya xc'ot ta awenta —xi'.

⁴¹ Pero te j'alwanej ora la sloq'ues te spojtsil-ejch'en ay ta site. Te muc' ajwalil la sna' te ja' j'alwanej yu'un te Diose.

⁴² Te j'alwanej jich la yal: —Jich ya yalbat te Cajwaltic: “Melel ja'at la acoltay bael te winic calojix te ya xlaje, ja'at me ya xlajatix ta swenta, soc nix te alumal ja' me ya xlajix ta swenta te slumale”, xi' te Cajwaltique —xi'.

⁴³ Jich yu'un te muc' ajwalil yu'un Israel bajt' ta Samaria, yac ta mel-o'tan soc boloben yo'tan och bael ta sna.