1 Reyes 19 - Bible in Tzeltal de Oxchuc y Tenejapa

Elías an bael ta wits Horeb

¹ Te Acab la yalbey spisil te Jezabel te bitic la spas te Elías, soc te bit'il la smil te j'alwanejetic yu'un Baal.

² Te Jezabel la sticun ta alel te Elías: “Teme ja'at Eliasat, te jo'on Jezabelon. Ac'a yac'bon tulan castigo te diosetic, teme pajel ta jichilan ora te ma jichuc ya jpasbat uuc te bit'il la apasbey te j'alwanejetique”, xi'.

³ Elías la yaiy te nopol ya xlajix ta milele. Swenta yu'un jich ma xlajinbot xcuxlejal a, bajt' ta lum Beerseba te ay ta sq'uinal Judá. Tey la yijq'uitay a te yabate.

⁴ Te Elías toj bael ta jochol taquin q'uinal. Sjunal c'aal been, ja' to c'o snajc'an sba ta ye'tal retama-te'. Mero yo'tanuc ya xlajix, jich la yal: —¡Tiq'uix a, Cajwal! Lajinbonix te jcuxlejale. Ja' mas lec te ya xlajone, jich bit'il lajic te antiguo jme'-jtate —xi'.

⁵ La smejts'an sba ta ye'tal retama-te', och swayel. Pero c'ot jtul ch'ul abat, tijot yu'un, jich albot: —Jajch'an, we'a waj —xi' sc'oplal.

⁶ Te Elías la yil ta sjoyobal, ta nopol sjol la yil ay waj te wobil ta sba ac'al, soc jun ch'in jarra ja'. Te Elías jajch', och ta we'el, patil way xan.

⁷ Pero te ch'ul abat yu'un te Cajwaltic, cha'tal xan ta stojol swenta xchebal buelta. Jul xan ta tijel yu'un, jich albot: —Jajch'an, we'an xan. Teme ma ba we'ate, mero najt' me ya awaiy te beele —xi'.

⁸ Te Elías jajch', och ta we'el ta uch'ajel. Te we'elil ac'bot yip yu'un, been cha'winic (40) c'aal soc cha'winic (40) ajc'ubal, ja' to c'ot c'alal ta Horeb, ja' te wits yu'un te Diose.

⁹ C'alal c'ot, och bael ta nailch'en, tey c'ax yu'un a te ajc'ubale. Pero te Cajwaltic c'oponot yu'un, jich albot: —¿Bi ya apas li'to, Elías? —xi' sc'oplal.

¹⁰ La sjac' te Elías: —Mero bayal ac'oplal ya caiy ta co'tan, Cajwal Dios te Spisil ya xju' awu'une. Melel te jlumal israeletic la xch'ayix ta yo'tanic te bila achapoj soque. La sbusq'uiniquix ta jinel te scajtijib amajt'an te banti ya yich' chiq'uele, soc la smilic ta puñal te j'alwanejetic awu'une. Jtuquel xanix jilemon, pero ya sleonic yu'un ya slajinbonic jcuxlejal uuc —xi' te Elías.

¹¹ Te Cajwaltic jich albot yu'un: —Loc'an tel ta fuera, tey xatejc'an aba ta jtojol, ta sba te witse —xi' sc'oplal. Ja' nix yorail a c'ax te Cajwaltique. Tal mero tulan ic' soc buen tulan yip te la swuy te witstiquile soc wuy te tonetic ta stojol Cajwaltic, pero te Cajwaltic ma ba tey ay a ta iq'ue. C'alal c'axix a te iq'ue, tal nijq'uel, pero ja' nix jich ma ba tey ay a te Cajwaltic ta nijq'uele.

¹² C'ax nax a te nijq'uele, tal c'ajc', pero ma ba tey ay a te Cajwaltique. Pero c'alal c'axix a te c'ajq'ue, ay bila chicnaj ta aiyel, buen c'unc'un xlamet yutsil sc'op.

¹³ C'alal la yaiy te Elías, la smac sit ta smeyil pac'. Loc' tel ta sti'il te nailch'ene. Jich ora jul c'op ta stojol, te jich la yal: —¿Bi ya apas, Elías? —xi'.

¹⁴ La sjac': —Mero bayal ac'oplal ya caiy ta co'tan, Cajwal te Diosat te Spisil ya xju' awu'une. Melel te jlumal israeletic la xch'ayix ta yo'tanic te bila chapal awu'un soque. La sbusq'uiniquix ta jinel te scajtijib ta chiq'uel amajt'ane, soc la smiliquix ta puñal te j'alwanejetic awu'une. Jtuquel xanix jilemon, pero ya sleonic yu'un ya smilonic uuc —xi'.

¹⁵ Jich albot yu'un te Cajwaltic: —Baan, sujt'an bael ta be te banti talat, c'alal ta jochol taquin q'uinal ta nopol lum Damasco. Baan, ac'beya aceite ta sjolic swenta seña te ya x'och ta muc' ajwalil ta Siria te Hazael,

¹⁶ soc te Jehú te smam Nimsi te ja' ya x'och ta muc' ajwalil ta Israel, soc nix te Eliseo te snich'an Safat ta lum Abel-mehola ac'beya aceite ta sjol swenta seña te ya x'och ta j'alwanej, ta swenta ajelol ya xjil.

¹⁷ Jich yu'un te mach'a ya xcol ta spuñal Hazael, ja' me ya smil te Jehú, soc te mach'a ya xcol ta spuñal te Jehú, ja' me ya smil te Eliseo.

¹⁸ Ja'uc me to, ya calbat in to: ay to jucmil (7,000) ta jtul ta Israel te ma ba squejanej sbaic ta stojol Baal soc te ma'yuc sbujts'iyejique. Ja'ic ya me yich'ic canantayel cu'un —xi'.

Ic'ot ta at'el Eliseo

¹⁹ Te Elías jajch' bael tey a, c'o sta te Eliseo, yac ta at'el ta arado soc wacaxetic. Ta stojol te Eliseo yacal ta at'el lajchaychajp wacaxetic, ja' nix yacal ta at'el soc ta slajchaychajbal wacaxetic te Eliseo. Te Elías bajt' ta stojol Eliseo, la yac'bey ta snejq'uel te smeyil paq'ue.

²⁰ Te Eliseo ora la yijq'uitay te wacaxetic, bajt' ta animal ta spat Elías, jich c'o yalbey: —Ac'awon bael ta bujts'iyel swenta spatil yo'tan te jme'-jtat te ya xjile, patil ya me jt'unat —xi'. La sjac' te Elías: —Ya xju' ya xbaat, pero na'a me te bi la jpasbate —xi'.

²¹ Te Eliseo la yijq'uitay jilel te Elías. Bajt', la stsac cheb toroetic, la sesan, ja' la swo ti'bal a te yugo-te'. La yac'bey sti'ic te slumale. Patil la st'un bael te Elías, la yac' sba ta abatinel yu'un.