1 Reyes 18 - Bible in Tzeltal de Oxchuc y Tenejapa

Elías ba stejc'an xan sba ta stojol Acab

¹ Jich c'ax bael te c'aale. Ta yoxebal ja'wil ta patil, te Cajwaltic la sc'opon te Elías, jich la yalbey: —Baan ta stojol te Acab, yu'un ya cac' taluquix ja'al ta sba balumilal —la yut.

² Te Elías bajt' ta stojol te Acab. Te wi'nal ta Samaria mero tulan ay.

³ Te Acab la yic' tel te Abdías te mayordomo yu'un, te mero xch'uunej ta spisil yo'tan te Cajwaltique.

⁴ Te c'alal te Jezabel jajch' smil te j'alwanejetic yu'un Cajwaltic, te Abdías la snac' ta cheb nailch'en jo'winic (100) ta jtul j'alwanejetic, cha'chajp la yac', lajlajuneb yoxwinic (50) ta jtul ta jujun nailch'en, la yac'bey swe'elic te bay c'alal tuun yu'unique.

⁵ Te Acab jich la yalbey te Abdías: —Ya xba jbeentaytic ta spamal te q'uinal, soc spisil te jujun sloq'uibja', soc te muc'ul ja'etique. Ya quiltic teme ay ya jtatic ac yu'un ya cac'bey swe'ic te caballoetic soc te mulaetic, swenta yu'un jich ma ba ya xlajic a. Melel teme ya xlajique, ma'yuquix chambalametic cu'untic ya xjilotic —xi'.

⁶ Jich la xchapic te banti ya xbajt'ic ta juju-jtul ta spamal te q'uinal. Te Acab toj bael ta yan be, jich uuc te Abdías, yan be a bajt'.

⁷ Ta be loc' ta tael yu'un Elías te Abdías. C'alal la sna'bey sba, la stinan sba coel c'alal ta lum ta stojol, jich la yal: —Ja'at te cajwal Eliasate —xi'.

⁸ —Jo'on —xi' te Elías. Soc jich la yal xan: —Baan albeya te awajwal te li' ayone —xi'.

⁹ Jich la yal te Abdías: —¿Bi falta jpasoj te ya awac'on ta sc'ab Acab yu'un ya smilon?

¹⁰ Ya cal ta jamal ta stojol te Dios cu'untic, te ma'yuc ni junuc lum, ni ta junuc nación, te banti ma ba sticunejat ta leel te cajwale. Te banti albil te ma ba chicanat, te cajwal la yac' te ya yalic ta jamal ta stojol te Dios te melel ma ba yilojat.

¹¹ Yo'tic ya awalbon te ya xboon ta yalbeyel te cajwal te li' ayate.

¹² Te bi ya xc'ot ta pasele: ja' teme la quijq'uitayat jilel, te espíritu yu'un te Cajwaltic ya me yic'at bael te banti ma jna'e. Te c'alal ya xba calbey yaiy te Acab, teme ma ba ya staate, jich me ya smilon awu'un. Te jo'on awabaton, c'alal to ta jqueremil spisil ora quich'oj ta muc' te Cajwaltique.

¹³ ¿Ma bal ayuc awaiyoj te bi la jpas te c'alal te Jezabel yac ta smilel a te j'alwanejetic yu'un te Cajwaltique? Melel la jnac' jo'winic (100) ta jtul, lajlajuneb yoxwinic ta juju-jchajp (50) la cac' ta nailch'en, soc la cac'bey swe'elic te bay c'alal tuun yu'unique.

¹⁴ Yo'tic ya awalbon te ya xboone, te ya xba calbey te cajwal te li' ayate. Ya me smilon yu'un —xi'.

¹⁵ C'opoj te Elías: —Mero jc'axel jamal ya cal ta stojol Cajwaltic te Spisil ya xju' yu'un, soc te ja' yabaton, te yo'tic nix ya xba jtejc'an jba ta stojol Acab —xi'.

¹⁶ Te Abdías ba sle te Acab, c'o yalbey yaiy. Te Acab ba sta sba soc te Elías.

¹⁷ C'alal la yil, jich la yalbey: —¿Ja'at bal te ya awac'bey swocol te Israele? —la yut.

¹⁸ La sjac' te Elías: —Te jo'on ma ja'uc ya cac'bey swocol Israel; ja'at soc te mach'atic ay awu'un te ya awac'bey swocol te Israele. Melel la ach'ay ta awo'tanic te mandaliletic yu'un te Cajwaltic, ja' bajt' ta awo'tan xch'uunel te loc'ombaetic yu'un Baal.

¹⁹ Yo'tic ticuna ta tsobel spisil te israeletic, ac'a ba stsob sbaic ta wits Carmelo. Soc nix te lajuneb yoxwinic xcha'bajc' (450) ta jtul j'alwanejetic yu'un Baal, soc te jbajc' (400) j'alwanejetic yu'un Asera te swentainej Jezabel —la yut.

Elías soc j'alwanejetic yu'un Baal

²⁰ Te Acab la sticun ta iq'uel te israeletic, soc la stsob te j'alwanejetic ta wits Carmelo.

²¹ Te Elías noptsaj bael ta sts'eel te lume, jich la yal: —¿Jayeb xan ora jich ya x'ainex te bit'il ayexe, te cheb awo'tanique? Teme ja' mero Dios te Cajwaltic, ja' me xat'unic jiche; o teme ja' te Baal, ja' ya sc'an ya at'unic jiche —xi' te Elías. Te lume ma jp'aluc la sjac'.

²² Te Elías c'opoj xan, jich la yal: —Jo'on xanix jtuquel cuxulon te j'alwanejon yu'un te Cajwaltique; yan te j'alwanejetic yu'un Baal ay lajuneb yoxwinic xcha'bajc' (450) stuquelic.

²³ Lec ay jiche, ac'a yac'botic cheb toroetic. Ac'a stsaic jcojt'uc, ac'a sesanic, ac'a yaq'uic ta sba si', pero ma me ba ya stsumbeyic sc'aal. Jich te jo'one ya me jpas te yan toro, ya me cac' ta sba si', pero ja' nix jich ma ba ya jtsumbey sc'aal.

²⁴ Ya me xjajch' ac'oponic te diosetic awu'unique, jichon uuc ya me jc'opon te Cajwale. Te mach'a diosil te ya sjaq'ue, te ya sticun tel c'ajc', ja' me te mero Dios abi —xi' te Elías. —Buen lec te bila la awale —xiic ta spisilic te lume.

²⁵ Te Elías jich la yalbey te j'alwanejetic yu'un Baal: —Tsaaic jcojt'uc toro, ja' sbabial xapasic, melel ja' tsobolex. Patil ya me ac'oponic te dios awu'unic, pero ma me xatsumbeyic sc'aal —xi' te Elías.

²⁶ Jich la yiq'uic te toro ac'bot ta swentaic, la spasic. Ta sab c'alal ta olil c'aal yacal sc'oponbelic te Baal. Jich yacalic ta yalel: “¡Baal, jac'a jc'optic!” xiic. Xwilawetic ta sjoyobal ta scajtijib ta chiq'uel majt'anil yu'unic te la spasique, pero ma'yuc ya xchicnaj sc'op ta sjaq'uel te Baal.

²⁷ Ta nopol olil c'aal jajch' ta slabanel te Elías, jich la yal: —Tulan xawawtayic, te melel ja' Dios. Teme repente ma ba jochol, o teme baem ta tsa'anel, o loq'uem bael. O teme wayale, tijel me ya sc'an —xi' te Elías.

²⁸ La yaq'uic xan puersa ta aw, soc jajch' yejch'entes sbaq'uetalic ta cuchilloetic, jich nix te bit'il scostumbreic, ja' to te la yatin xch'ich'elic ta scojt'olic.

²⁹ Pero c'alal c'ax ta olil c'aal, manchuc me tey yacalic ta aw a, soc tey yacalic ta wilawetel jichuc mach'a ma sna' q'uinal, ja' to te c'alal la sta yorail ya yich' aq'uel milbil smajt'an te Cajwaltic, pero ma'yuc chicnaj sujt'ib te sc'opique. Ma'yuc mach'a la sjac', soc ni ayuc mach'a la yaiy.

³⁰ Ja' yu'un te Elías jich la yalbey ta spisil te mach'atic ayic tey a: —La', noptsajanic tel ta jtojol —xi'. Spisil te mach'atic tey ayic a, noptsajic bael ta stojol. Te Elías jajch' xchajban xan te scajtijib chic'bil smajt'an Cajwaltic te jinemixe.

³¹ La stsac lajchayeb tonetic jich te bit'il yajtalul te jayeb ta jchajp te snich'nab Jacob, te la yal te Cajwaltic te Israel sbiil ya xc'ote.

³² La spasbey scajtijib ta chiq'uel milbil smajt'an Cajwaltic a. La xch'ac ta joq'uel ta sjoylejal te scajtijib, jich te bit'il ya x'och jtab litro yawalel te jichuque.

³³ Patil la xchajban te si'e. C'alal chajbaj te si', la sesan te toro, la yac' moel ta ba si'.

³⁴ C'alal chapalix a, jich la yal: —Nojesaic chaneb q'uib ja', malbeyaic ta sba te ti'bal yu'un smajt'an Cajwaltic, soc te si'ile —xi'. La yac'bey xan spasic ta xchebal buelta soc ta yoxebal buelta. Jich la xch'uunic spasel.

³⁵ Te ja' oquin ta sjoyobal te scajtijib ta chiq'uel milbil smajt'an Cajwaltic, soc noj ta ja' te ch'acbil ta joq'uele.

³⁶ C'alal la sta yorail te ya yich' aq'uel te chic'bil majt'anile, te j'alwanej Elías noptsaj bael, jich la yal: —Cajwal, Dios yu'un Abraham, Isaac soc Israel, ac'a ta na'el yo'tic te ja'at Diosat atuquel soc te jo'on awabaton, soc ac'a ta na'el te ja'at nix aticunejon ta spasel te bitic yacalon ta spasele.

³⁷ Jac'bon jc'op, Cajwal, jac'bon jc'op, swenta yu'un ya me sna'ic a te mach'atic li' ayic te ja'at te Diosate, soc te ya awic' xan te yacuc xcha'sujt'ic xan ta atojole —xi'.

³⁸ Ta ora nax la yac' coel tel c'ajc' te Cajwaltic, la xchic' ta scojt'ol te milbil majt'anile, soc te si', soc nix te tonetic, te ts'ubil lum, soc la slajin te ja' ay ta sjoyobale.

³⁹ C'alal la yilic te bi c'ot ta pasel, spisilic te mach'atic tey ayic a, la stinan sbaic coel c'alal ta lum, jich la yalic: —¡Ja' Dios te Cajwaltic, melel ja' nix Dios stuquel a te Cajwaltique! —xiic.

⁴⁰ Ja' yu'un jich albotic yu'un te Elías: —Tsacaic te j'alwanejetic yu'un Baal. Ma me xcol jtuluc —xi'. Te mach'atic tey ayic a, la stsaquic. Te Elías la yic' bael ta beja' Cisón, tey c'o smil a.

Elías la sc'anbey Dios te ya xtal ja'al

⁴¹ Patil te Elías jich la yalbey te Acab: —Baan ta we'el ta uch'ajel, melel ya xchicnajix sc'op te tulan ja'ale —la yut.

⁴² Te Acab bajt' ta we'el ta uch'ajel. Pero te Elías mo bael ta mero stoyolil sba te wits Carmelo. C'o squejan sba, la stinan coel sjol c'alal ta sjol yacan.

⁴³ La yalbey te yabate: —Baan, ilawil bael ta stojol mar —la yut. Jich ba yil, patil jich la yal: —Ma'yuc bi chican —xi'. Pero pasot xan ta mandal yu'un Elías: —Baan juquebuc buelta —xi' sc'oplal.

⁴⁴ Ta sjuquebal buelta sbael a te abate, jich la yal: —Tey ta mar yac ta moel tel ch'in tocal, jich smuc'ul te bit'il te c'abale —xi'. Te Elías jich la yal: —Baan albeya te Acab, ac'a yac'bey scaballoil te scarreta. Ac'a bajt'uquix, swenta yu'un ma me xmacot yu'un ja'al —xi'.

⁴⁵ Te Acab mo ta scarreta, bajt' ta Jezreel. Ja' yorail yaquix ijc'ubel q'uinal yu'un tocal soc ic' ta ch'ulchan, jich tal buen tulan ja'al.

⁴⁶ Te Elías ac'bot yip yu'un te Cajwaltic, jich la stoyes xan moel ta chuquel te snajt'il c'u', jich bajt' ta animal c'alal ta Jezreel. Ja' neel c'ot, ja' patilix c'ot te Acab.