1 Reyes 16 - Bible in Tzeltal de Oxchuc y Tenejapa

¹ Te Cajwaltic la sc'opon te Jehú snich'an Hanani, swenta yu'un ya yalbey sc'oplal te Baasa te amen yat'ele.

² Jich la yal: —Albeya te Baasa: “Jo'on la jtamat jajch'el ta ts'ubil lum, la cac'at ta jwentainwanej yu'un Israel, ja' te lum cu'une. Pero, ja' nix jich la apas te bit'il la spas te Jeroboam: la awac'beyix sle smul te Israel, ja' te lum cu'une. La awaq'uix ilinucon yu'un te muliletic la apasixe.

³ Ja' yu'un, Baasa, ya me jlajinat soc te mach'atic ay awu'une, jich nix ya jpasbat te bit'il la jpasbey te mach'atic ay yu'un te Jeroboam snich'an Nabat.

⁴ Mach'auc achapomal te ya xlaj ta lum, ya me xti'otic yu'un ts'i'etic; teme ta aquiltic ya xlajique, ya me xti'otic yu'un jti'awal mutetic”, ya me awut —xi'.

⁵ Te jayeb xan sc'oplal te Baasa soc te bitic la spas, soc te bitic bayal sc'oplal la spase, ts'ibubil ta libro yu'un yat'el muc' ajwaliletic ta Israel.

⁶ C'alal laj te Baasa la smuquic ta Tirsa. Patil ja' och ta sjelol ta muc' ajwalil te snich'an, ja' te Ela.

⁷ Ta swenta te j'alwanej yu'un Dios Jehú snich'an Hanani, te Cajwaltic la yalbey ta jamal te bi ya xc'ot ta stojol te Baasa soc nix te mach'atic ay yu'un, scaj te ma lecuc ta sit Cajwaltic te bitic la spase. Te Baasa la yac' ilinuc te Cajwaltic, melel lom amen te yat'ele, ja' pajal soc te yat'el Jeroboam soc mach'atic ay yu'un, ja' te lajinotic yu'un te Cajwaltique.

Yat'elic ta muc' ajwalil Ela soc Zimri ta Israel

⁸ Ta waqueb xcha'winic (26) ja'wil yochel ta muc' ajwalil ta Judá a te Asa, te Ela snich'an Baasa och ta muc' ajwalil.

⁹ Pero te Zimri, jtul yabat te ja' jwentainwanej yu'un olil te carretaetic yu'un guerra, la sut sba ta stojol. Ay jun c'aal te Ela ay ta Tirsa ta sna Arsa, mayordomo yu'un, och ta yuch'el, ja' to c'alal yacub.

¹⁰ Ora c'ot te Zimri, la smil, ja' och ta sjelol ta muc' ajwalil. Te jich c'ot ta pasel, ja' juqueb xcha'winic (27) ja'wil yat'el ta muc' ajwalil ta Judá a te Asa.

¹¹ Te c'alal jajch' ta mandalteswanej ta muc' ajwalil te Zimri, la smil spisil te mach'atic ay yu'un te Baasa. Ma'yuquix cuxul jilel ni jtuluc winic, ni xchapomal, ni ja'uc te mach'a jun yo'tan soque te ya xju' ya sujt'esbey spacole.

¹² Jich la slajinbey te mach'atic ay yu'un Baasa te Zimri, jich nix te bit'il jamal albot sc'oplal yu'un Cajwaltic te bila ya xc'ot ta stojole, te ja' albot yu'un Jehú, te j'alwanej yu'un Dios.

¹³ Ja' ta swenta spisil te muliletic la spasic te Baasa soc te snich'ane, ja' te Ela, soc te la yaq'uic yaluc ta mulil spisil te israeletique. La yac' ilinuc te Cajwaltic te Dios yu'un Israel ta scaj te xch'uunel loc'ombaetique.

¹⁴ Te jayeb xan sc'oplal te Ela soc spisil te bi la spase, ts'ibubil ta libro yu'un yat'el muc' ajwaliletic yu'un Israel.

¹⁵ Ta juqueb xcha'winic (27) ja'wil yat'el ta muc' ajwalil yu'un Judá a te Asa, te c'alal te soldado-israeletic ayic ta campamento yu'un ya yac'beyic guerra te lum Gibetón yu'un filisteoetic, te Zimri och ta muc' ajwalil ta Tirsa. Pero jip nax juqueb c'aal te ay ta muc' ajwalil te Zimri,

¹⁶ melel ja' nix ta sc'aalelal a te ayic ta campamento te soldadoetic, la yaiyic te la sut sba ta scontroinel te muc' ajwalil te Zimri, soc te la smilix te ajwalile. Tey nix ta scampamento te soldadoetic la yac'beyic yat'el ta muc' ajwalil yu'un Israel te Omri, general yu'unic te soldadoetique.

¹⁷ Te Omri soc ta spisil te soldado-israeletic la yijq'uitayic jilel te Gibetón te yacalic yaq'uel guerra, ja' och yac'beyic guerra te lum Tirsa.

¹⁸ C'alal la yil te Zimri te ju'ix ta pojel yu'unic te lume, och bael ta anel ta yutil spalacio, la yac'bey sc'aal te sna, tey laj ta c'ajq'uel a.

¹⁹ Jich c'ot ta pasel ta scaj te smul la sle soc te bitic amen la spas ta sit te Cajwaltique. Melel ja' nix la spas te muliletic la spas Jeroboam, te la yac'bey sta smulic te israeletique.

²⁰ Te jayeb xan sc'oplal te Zimri, soc te sc'oplal te bit'il la sut sba ta scontroinel te muc' ajwalil Ela, ts'ibubil ta libro yu'un yat'el muc' ajwaliletic ta Israel.

Yat'el Omri, muc' ajwalil yu'un Israel

²¹ Te lum Israel cha'chajp la yac' sba. Te jchajbe la yac' sba ta swenta Tibni te snich'an Ginat, yu'un ya sc'anic ya x'och ta muc' ajwalil. Te yantique la yac' sbaic ta swenta Omri.

²² Pero te swinictac Omri ju' yu'unic stsalel te swinictac Tibni, te snich'an Ginat. Laj te Tibni, och ta muc' ajwalil te Omri.

²³ Te Omri, c'alal och ta muc' ajwalil ta Israel, ay bulucheb xcha'winic (31) ja'wil yat'el ta muc' ajwalil ta Judá a te Asa. Te Omri lajchayeb ja'wil jalaj ta yat'el ta muc' ajwalil, ja' ajtaybil soc te waqueb ja'wil at'ej ta Tirsa.

²⁴ La smanbey te Semer te swits yu'un Samaria, waqueb xchanwinic (66) kilo plata la stoj. Tey la spas jpam lum a te joytabil ta ts'ajq'ue. Samaria sbiil c'ot yu'un te lume, scaj te Semer sbiil te winic la xchon te witse.

²⁵ Te yat'el te Omri, mero ma lecuc ta sit te Cajwaltique. C'axem to xan jich sbolil a te bit'il yantic muc' ajwaliletic neel c'axique.

²⁶ Melel ja' nix la spas te bitic muliletic la spas te Jeroboam te snich'an Nabat, te la yac'bey sta smulic te israeletique. Ta swenta te loc'ombaetic sdiosinejic la yac' ilinuc te Cajwaltic Dios yu'un Israel.

²⁷ Te jayeb xan sc'oplal te Omri, te yat'el soc te bitic bayal sc'oplal la spas, ts'ibubil ta libro yu'un yat'el muc' ajwaliletic ta Israel.

²⁸ C'alal laj te Omri la smuquic ta Samaria. Ja' och sjelolin ta muc' ajwalil te Acab te snich'ane.

Yat'el Acab, muc' ajwalil yu'un Israel

²⁹ Ta waxaclajuneb xcha'winic (38) ja'wil yat'el ta muc' ajwalil ta Judá a te Asa, och ta muc' ajwalil ta Israel te Acab te snich'an Omri. Jalaj cheb xcha'winic (22) ja'wil ta muc' ajwalil ta stojol Israel ta lum Samaria.

³⁰ Pero te yat'el, mero ma lecuc ta sit te Cajwaltic, c'axem to xan jich a te bit'il la spasic te yantic muc' ajwaliletic neel c'axique.

³¹ Melel ma'yuc sc'oplal ta yo'tan te la spas te muliletic la spas te Jeroboam snich'an Nabat. C'axem to xan jich a te bi la spas te Acabe c'alal nujbin soc Jezabel yantsil-nich'an Et-baal, muc' ajwalil ta Sidón. Jich jajch' xch'uun soc jajch' yalbey wocol te Baal.

³² La spasbey scajtijib ta chiq'uel smajt'an, soc la spas templo yu'un Baal ta Samaria.

³³ Soc la spasbey sloc'omba Asera. Jich la yac' ilinuc te Cajwaltic te Dios yu'un Israel, c'ax jich a te bit'il la yaq'uic ilinuc te yantic muc' ajwaliletic te neel c'axemic yu'une.

³⁴ Ta yorail Acab, te Hiel talem ta Betel la xcha'pas xan te lum Jericó. Ta swenta te bit'il la sjach spasel te sts'ajc'ule, laj te Abiram te sba snich'ane; soc ta swenta te bit'il la yac' te puertaetic yu'un te sts'ajc'ule, laj te ijts'inal querem te Segub sbiile, jich nix te bit'il yaloj te Cajwaltic ta swenta Josué snich'an Nun.