1 Reyes 15 - Bible in Tzeltal de Oxchuc y Tenejapa

Yat'el Abiam, muc' ajwalil yu'un Judá

¹ Te Abiam jajch' ta at'el ta muc' ajwalil ta Judá ta swaxaclajunebal ja'wil yochel ta muc' ajwalil ta Israel a te Jeroboam te snich'an Nabat.

² At'ej ta muc' ajwalil oxeb ja'wil ta Jerusalén. Te sme'e Maaca sbiil, te yantsil-nich'an Absalón.

³ Te Abiam ja' nix la spas te bila muliletic la spas te stat ta neelal to, ma junuc yo'tan la yac' sba ta stojol te Cajwaltic te Dios yu'une. Melel ma jichuc la spas te bit'il la spas te David, te ja' sts'umbale.

⁴ Pero ta swenta xc'uxul ta yo'tan David te Cajwaltic, la sc'an te ya to xtil xan te c'ajc' yu'un c'oem ta Jerusalén, ja' te la smojt'es jilel ta muc'ul nactijibal te snich'an te c'alal loq'ue, soc la yac'bey xan yich' yip te Jerusalén.

⁵ Melel te David, buen toj la yac' sba ta sit Cajwaltic, soc ja' la spas te bitic lec sc'oplal ta stojol Cajwaltic yu'une. Melel te jayeb c'aal cuxin, ma'yuc bi ora te la xch'ay ta yo'tan te smandal Cajwaltic, ja' nax te bi la spasbey ta stojol te Urías te hitita-winique.

^6-7 Te jayeb c'aal cuxin te Roboam, spisil ora la yac'bey sbaic guerra soc te Jeroboam, soc la spasic guerra te Abiam soc te Jeroboam. Te jayeb xan sc'oplal te Abiam soc te bitic la spas, ts'ibubil ta libro yu'un yat'el muc' ajwaliletic yu'un Judá.

⁸ Te c'alal laj te Abiam, la smuquic ta Lum-yu'un-David. Patil ja' och jilel ta sjelol ta muc' ajwalil te snich'ane, ja' te Asa.

Yat'el Asa, muc' ajwalil yu'un Judá

⁹ Te Asa och ta muc' ajwalil ta Judá, jtab ja'wil yochel ta muc' ajwalil ta Israel a te Jeroboam.

¹⁰ Jalaj jun yoxwinic (41) ja'wil ta yat'el ta muc' ajwalil ta Jerusalén te Asa. Maaca sbiil te yinam smame, ja' te yantsil-nich'an Absalón.

¹¹ Te yat'el te Asa lec ta sit te Cajwaltic, ja' jich te bit'il la spas te antiguo sme'-stat, ja' te David.

¹² La sten loq'uel ta sq'uinal te winiquetic yacalic ta spasel mulil ta sbaq'uetalic swenta yich'el ta muc' te loc'ombaetic yu'unique. La xch'ay spisil te loc'ombaetic cuybilic ta Dios te pasbil yu'un te sme'-state.

¹³ Soc la sloq'uesbey yat'el te antsil-ajwalil, ja' te Maaca, yu'un la yac' ta pasel sloc'omba Asera. Te Asa la sjin te loc'omba soc la xchic' ta beja' yu'un Cedrón.

¹⁴ Manchuc teme ma ba la sjin te toyol ch'uunjibaletic, te Asa spisil ora jun yo'tan la yac' sba ta stojol te Cajwaltique.

¹⁵ La yac' ta templo yu'un Cajwaltic spisil te oro soc te plata, jich te bit'il la yac'bey Cajwaltic te state.

Te Asa soc Ben-adad la xchap sc'opic

¹⁶ Spisil ora la yac'bey sbaic guerra te Asa soc te Baasa, te muc' ajwalil yu'un Israel.

¹⁷ Te c'alal ba yac'bey guerra te Judá te Baasa, la spasbey sjoyob ts'ajc'ul te lum Ramá, swenta yu'un jich canantaybil a te sbelal Jerusalén. Jich ma'yuc mach'a ya xju' yu'un ya xc'ax sc'opon sba soc te muc' ajwalil ta Judá.

¹⁸ Te Asa la stsob spisil te oro soc te plata te ay to ta yawil ta templo yu'un Cajwaltic, soc te ay ta sna ajwalile. La sticun abatetic yu'un, ba yac'beyic te Ben-adad te ja' muc' ajwalil yu'un Siria, te nainem ta lum Damasco. Te Ben-adad, snich'an Tabrimón, ja' smam te Hezión, albot bael yu'un te Asa:

¹⁹ “Ja' lec ya jchap jc'optic, jich te bit'il la spasic te jtatique. La jticunbat amajt'an oro soc plata swenta yu'un ya me alajinbey sc'oplal te bi achapoj soc Baasa, te muc' ajwalil yu'un Israel. Jich ma ba ya yuts'inonix a, ya me xlamaj q'uinal caiy”, la yut bael.

²⁰ Te Ben-adad la xch'uunbey te bi albot yu'un te muc' ajwalil Asa. Jich la sticun te capitanetic yu'un soldadoetic, ba yac'beyic guerra te lumetic yu'un Israel. Jich la stsal te Ijón, Dan, Abel-bet-maaca, spamal Cineret, soc spisil bael te sq'uinal Neftalí.

²¹ C'alal la yaiy te Baasa, la yijq'uitay jilel spasel sts'ajc'ul te Ramá, sujt' bael ta Tirsa.

²² Jich te muc' ajwalil Asa la sticun ta iq'uel spisil te yajwal Judá, ma me ayuc mach'a ya xjil. C'alal la stsob sbaic, la sticun ta ich'el jajch'el ta Ramá te tonetic soc te'etic te c'an tuunuc yu'un te Baasa ta spasel sts'ajc'ul te lume. Te muc' ajwalil Asa ja' la spasbey sjoyob ts'ajc'ul a te lum Geba ta sq'uinal Benjamín soc te lum Mizpa.

Laj Asa

²³ Te jayeb xan sc'oplal te Asa, te yutsil sc'oplal yat'el, te bitic yan la spas, soc te la spas lumetic, spisil ts'ibubil ta libro yu'un yat'el muc' ajwaliletic ta Judá. Te c'alal mamalix a te Asa, tsacot ta chamel ta yacan.

²⁴ Te c'alal laj, la smuquic ta Lum-yu'un-David te banti muculic te antiguo sme'-state. Ja' la sjelolin ta muc' ajwalil te Josafat, te ja' nix snich'ane.

Yat'el Nadab, muc' ajwalil yu'un Israel

²⁵ Te c'alal cheb ja'wil yochel ta muc' ajwalil ta Judá a te Asa, och ta muc' ajwalil yu'un Israel te Nadab te snich'an Jeroboam. Cheb ja'wil jalaj ta yat'el te Nadab.

²⁶ Pero te bitic la spas, mero amen ta sit Cajwaltic, ja' nix la spas te bitic muliletic la spas te state. Jich la yac' ta mulil te israeletique.

²⁷ Pero te Baasa, snich'an Ahías te ay ta swenta te sts'umbal Isacar, la stsob swinic, la sut sba ta stojol Nadab, jich la smil ta Gibetón, te lum filisteo te yac ta sjoytayel ta guerra te Nadab soc spisil te soldado-israeletique.

²⁸ Te Baasa la smil te Nadab ta yoxebal ja'wil yochel ta muc' ajwalil yu'un Judá a te Asa, ja' och ta sjelol ta muc' ajwalil.

²⁹ Te c'alal bi ora och ta muc' ajwalil, ora la smilbey te mach'atic ay yu'un te Jeroboam. Jich nix te bit'il neel yaloj te Cajwaltic ta swenta te Ahías te talem ta Silo. Te Baasa jc'axel la slajinbey te mach'atic ay yu'un te Jeroboam, ma'yuc cuxul a jil ni jtuluc.

³⁰ Te bit'il jich c'ot, ja' ta swenta te muliletic la spas te Jeroboam, te la yac'bey sta smulic te israeletique. Jich la yac' ilinuc te Cajwaltic te Dios yu'un Israel.

³¹ Te jayeb xan sc'oplal te Nadab soc spisil te bitic la spas, ts'ibubil ta libro yu'un yat'el muc' ajwaliletic yu'un Israel.

³² Te Asa soc te Baasa muc' ajwalil ta Israel, spisil ora la yac'bey sbaic guerra.

Yat'el Baasa, muc' ajwalil yu'un Israel

³³ Ta yoxebal ja'wil yat'el ta muc' ajwalil ta Judá a te Asa, te Baasa snich'an Ahías jajch' ta at'el ta muc' ajwalil ta Tirsa ta stojol spisil Israel. Jalaj chaneb xcha'winic (24) ja'wil ta at'el ta muc' ajwalil te Baasa.

³⁴ Pero te yat'el te Baasa mero amen ta sit te Cajwaltique. Yu'un ja' nix la spas te bitic muliletic la spas te Jeroboam, te la yac'bey sta smulic te israeletique.