1 Reyes 14 - Bible in Tzeltal de Oxchuc y Tenejapa

Ahías la yal bi ya xc'ot ta swenta Jeroboam

¹ Jich ora te Abías snich'an Jeroboam, taot ta chamel.

² Te Jeroboam jich la yalbey te yinam: —Baan lapa yan c'u'il te ma'yuc mach'a ya sna'bat aba yu'une, swenta yu'un jich ma ba ya sna'bat aba a te ja'at quinamate, baan ta Silo. Tey nainem a te Ahías te j'alwanej yu'un Dios te la yalbon te jo'on ya x'ochon ta muc' ajwalil yu'un te nacione.

³ Ich'a bael lajunpejch' pan, che'oxeb jayal pan, soc jun jarra ajachab, baan ila awil swenta yu'un ya me yalbat awaiy te bit'il ya xc'ot te alalquereme —xi'.

⁴ Jich la xchajban sba te yinam Jeroboam. Bajt' ta Silo, c'ot ta sna Ahías. Te Ahías ma ba ya yilix q'uinal, yu'un c'unc'un yaquix ta majq'uel sit ta scaj te mamalixe.

⁵ Pero ac'bot sna' yu'un te Cajwaltic te ya xbajt' ta stojol te yinam Jeroboam ta sjojc'oyel te bit'il ya xc'ot te yal yac ta chamele. Soc albot te bila sujt'ib ya yac'bey te sc'ope, soc te bit'il syantesej sba a te ya xc'ote.

⁶ Te c'alal la yaiy te Ahías te yac ta ochel bael ta ti'nail te antse, jich la yalbey: —Ochan, yinam Jeroboam. ¿Bi yu'un ayantesej aba, ya apas aba ta yan ants? Julemix ta jwenta te bi mero tulan sc'oplal ya calbat awaiye.

⁷ Jich yu'un, sujt'an bael ta ora, albeya te Jeroboam te jich yaloj te Cajwaltic te Dios cu'untic te israelotique: “Jo'on la jtsaat loq'uel ta yolil te lume, la cac'at ta ajwalil ta stojol te lum Israel cu'une.

⁸ Jo'on la jpojbey te mandalteswanej te sts'umbal David swenta yu'un ja'at la cac'bat. Pero ma jichuc jun awo'tan ta jtojol te bit'il te cabat David. Melel te David la yac' c'otuc ta pasel spisil te mandaliletic cu'une, mero spisil yo'tan la st'unon. Te at'eliletic yu'une mero toj ta ilel ta jsit.

⁹ Yan te ja'at, mero amen la awac' aba, ma'yuc jich la spasic te yantic neel c'axique. Ja'at mero amen awat'el, jich la awac' ilinucon. Melel la apas yantic diosetic awu'un, loc'ombaetic te pasbilic ta ultesbil taq'uin, jich ma'yuc jc'oplal c'oon awu'un.

¹⁰ Ja' yu'un ya me cac' taluc wocol ta stojol te patil alnich'anetic awu'une: ya me cac' lajuc spisilic te patil alnich'anetic queremetic awu'un li' ta yolil Israel, ma'yuc jtuluc cuxul ya xjil. Jc'axel me ya jmes ta lajinel te patil alnich'anetic awu'une, jich te bit'il ya yich' mesel loq'uel tsa'.

¹¹ Te achapomal ya xlajic ta yut lum, ya me xti'otic yu'un ts'i'etic; soc te ya xlajic ta aquiltic, ya me xti'otic yu'un jti'awal mutetic. Melel jo'on Ajwalilon te jich la calixe”, xi' te Cajwaltique.

¹² “Te ja'at, ants, jajch'an, baan ta ana. C'alal ya atec' ochel te lume, ya me xlaj te alalquereme.

¹³ Jich me spisil Israel ya smel yo'tanic yu'un, soc ya me smuquic. Pero ja' xanix sts'umbal Jeroboam te ya yich' muquele. Melel ta spisil te snich'nab Jeroboam, ja' nax te jtul lec ta sit te Cajwaltic Dios cu'untic te israelotique.

¹⁴ Patil ya me yac' jtuluc ta muc' ajwalil ta Israel te ya slajinbey te sts'umbal Jeroboam te c'alal ay ta ajwalil a. Yo'tic soc ta patil bael,

¹⁵ te Cajwaltic ya me syuq'uilay te Israel, jich te bit'il yip yocja' ya syuq'uilay te jalale. Ya me sbul loq'uel li' ta lequil lum te ac'bot te antiguo sme'-statique, ya me xch'oj bael ta jejch' muc'ja' Eufrates. Melel la spas sloc'omba Asera, jich la yac' ilinuc te Cajwaltique.

¹⁶ Te Cajwaltic ya me yac' ta c'abal te Israel ta scaj te mulil la spas te Jeroboam soc te la yac'bey spasic te lum Israel —xi' te Ahías.

¹⁷ Te yinam Jeroboam jajch' ta beel, bajt'. C'alal c'ot ta lum Tirsa, te c'alal la stec' ochel te sti'il te sna, laj te alalquereme.

¹⁸ Spisil lum Israel bajt'ic ta smuquel soc la yoq'uetayic, jich te bit'il albot yu'un Cajwaltic ta swenta te yabate, ja' te j'alwanej Ahías.

¹⁹ Te jayeb xan sc'oplal te yat'el Jeroboam, te la yaiy guerra soc yantic sc'oplal yat'el ta ajwalil, ts'ibubil ta slibroil yat'el muc' ajwaliletic yu'un Israel.

²⁰ Jeroboam och ta muc' ajwalil cheb xcha'winic (22) ja'wil. Te c'alal laje, ja' la sjelolin ta muc' ajwalil te snich'ane, ja' te Nadab.

Yat'el Roboam, muc' ajwalil yu'un Judá

²¹ Ta Judá och ta muc' ajwalil tey a te Roboam snich'an Salomón. Ay jun yoxwinic (41) ya'wilal a te c'alal och ta muc' ajwalil. Jalaj juclajuneb ja'wil ta muc' ajwalil ta Jerusalén, te jpam lum la stsa te Cajwaltic ta spisil ta jchajp Israel soc ta spisil ta jpam lumetic, te ja' ya x'ain tey a yutsil sbiil te Cajwaltique. Te sme' te Roboam Naama sbiil, te amon-antse.

²² Pero te yat'el Roboam, ma lecuc ta sit Cajwaltic. C'ax jich ilin yu'un a te bit'il ilin yu'un smulic te antiguo sme'-state.

²³ Ja' nix jich la spas toyol ch'uunjibaletic, la stejc'an jajch'el tonetic soc sloc'omba Asera ta spisil ta bujul q'uinal, soc ta spisil yanil te'etic te bayal yabenale.

²⁴ Ja' nix jich te winiquetic ta spamal sq'uinalic la spasic mulil ta sbaq'uetalic ta swenta yich'el ta muc' te loc'ombaetic yu'unique. La spasic spisil ta jchajp muliletic te ilaybil sba, te yacalic ta spasel te nacionetic ma ba xch'uunejic te cuxul Diose, te jc'axel la xch'oj loq'uel ta stojol Israel te Cajwaltique.

²⁵ Ta swenta yo'ebal ja'wil yochel ta muc' ajwalil a te Roboam, te Sisac muc' ajwalil ta Egipto ba yac'bey guerra te Jerusalén.

²⁶ Ju' yu'un spojel te c'ulejalil ta templo yu'un Cajwaltic soc te ay ta sna muc' ajwalile. Spisil la spoj bael, soc la yich' bael spisil te majq'uilic yu'un guerra te pasbilic ta oro yu'un Salomón.

²⁷ Te muc' ajwalil Roboam la spasbey sjelol, te pasbil ta bronce, la yac'bey ta swenta te canantaywanej-soldadoetic, te yacalic ta yilel te yochibal sna te muc' ajwalile.

²⁸ Te jujun buelta ya xbajt' ta templo yu'un Cajwaltic te muc' ajwalile, te jcanantaywanej-soldadoetic ya yich'ic bael. Patil ya yaq'uic xan ta sna te jcanantaywanej-soldadoetique.

²⁹ Te jayeb xan sc'oplal te Roboam, soc spisil te bitic la spase, ts'ibubil jilel ta libro yu'un te yat'el muc' ajwaliletic ta Judá.

³⁰ Te Jeroboam soc te Roboam spisil ora la yac'bey sbaic guerra.

³¹ Te c'alal laj te Roboam, mujc' ta smuquenal sme'-stat ta Lum-yu'un-David. Naama sbiil te sme'e, ja' slumal te Amón. Patil ja' och jilel ta sjelol ta muc' ajwalil te snich'ane, ja' te Abiam.