1 Reyes 13 - Bible in Tzeltal de Oxchuc y Tenejapa

Jtul j'alwanej yu'un Dios ta Judá la stij ta c'op te Jeroboam

¹ Te c'alal yac ta xchiq'uel pom ta sba scajtijib smajt'an loc'omba a te Jeroboam, c'ot ta Betel jtul j'alwanej yu'un Dios jajch'em ta Judá, ja' ticunbil yu'un te Cajwaltique.

² Ta swenta smandal te Cajwaltic, tulan c'opoj ta swenta scontroinel te scajtijib majt'anil yu'un loc'omba, jich la yal: —Ja'at scajtijib ta chiq'uel majt'anil, ja'at scajtijib ta chiq'uel majt'anil, jich ya yalbat te Cajwaltique: “Ta swenta sts'umbal te David ya x'ayin jtul alalquerem, Josías sbiil ya xc'ot, ja' me ya smilbat ta aba te sacerdoteetic ta toyol ch'uunjibaletic, te yacal xchic'belic pom ta aba, soc ta aba ya me xchic' sbaquel mach'atic lajemic”, xi' te Cajwaltique —xi'.

³ Ja' nix sc'aalelal a te j'alwanej la spasbey seña yu'el Dios. Jich la yal: —Ja' seña yu'el Dios yaloj in to: Te scajtijib ta chiq'uel majt'anile ts'ubiltic me ya xbajt', soc te tan ay ta sba ya me xpujc' bael —xi'.

⁴ Te c'alal la yaiy te muc' ajwalil Jeroboam te bi la yal te j'alwanej yu'un Dios ta scontroinel te scajtijib ta chiq'uel majt'anil ta Betel, tey teq'uel ta xujc' scajtijib a. La sjach sc'ab, c'opoj, jich la yal: —¡Tsacaic! —xi'. Pero te sc'ab la sjach yu'un la yac' ta ilel te j'alwanej yu'un Dios, ma ba la sc'anix cuts'el yu'un, ora te'ub te sc'abe.

⁵ Ta ora nax jajch' ta lilajel te scajtijib ta ch'iquel majt'anile, ts'ubiltic a c'ot spisil, soc te tan te ay ta sba, pujc' bael, jich nix te bit'il la yal te j'alwanej ta swenta smandal te Diose.

⁶ Ja' yu'un te muc' ajwalil la sc'opon te j'alwanej yu'un Dios, jich la yalbey: —Wocoluc c'oponbon te Dios awu'une, swenta yu'un ya me xlecub a te jc'abe —xi'. Te j'alwanej yu'un Dios la sc'oponbey te Diose. Te sc'ab te muc' ajwalil lecub, jich nix c'ot te bit'il ay ta neelal toe.

⁷ Te muc' ajwalil ora la yalbey te j'alwanej yu'un te Diose: —La' me, ya xbootic ta jna, swenta yu'un ya me xwe'at jtebuc soc ya me cac'bat amajt'an —la yut.

⁸ Pero c'opoj te j'alwanej yu'un Dios, jich la yalbey te muc' ajwalile: —Manchuc teme ya awac'bon oliluc te ac'ulejal, pero ma ba ya joinat bael, ni yacuc jwe' pan, soc ma xcuch' ja' tey a.

⁹ Melel jich spasojon ta mandal te Cajwaltic, jich la yalbon: “Ma me xawe' pan, ma me xawuch' ja', soc ma me sujt'atix tey ta be te banti ya xbaate”, xi' te Cajwaltique —xi'.

¹⁰ Ja' yu'un te j'alwanej yu'un Dios, yan be sujt'ix bael, swenta yu'un ma teyuc sujt'ix bael a te banti beil tal ta Betel.

¹¹ Pero ay jtul mamal j'alwanej yu'un Dios te ja' yorail nainem ta Betel a. Bajt' ta stojol te snich'nabe, c'ot ta alel yu'unic te bitic la spasix ta Betel te j'alwanej yu'un Dios te talem ta sq'uinal Judá. Soc la yalbeyic yaiy te static te bi la yal yu'un te muc' ajwalile.

¹² Jojc'obotic yu'un te static te banti beil bajt' te j'alwanej yu'un te Diose. La yalic te snich'nab te banti beil bajt' te j'alwanej yu'un Dios te talem ta sq'uinal Judá.

¹³ Jich la yal te mamale: —Ta ora to chajbanbonic jburro —xi'. Jich la xchajbanic. C'alal chajbaj, mo a te mamale,

¹⁴ bajt' ta spat te j'alwanej yu'un Dios talem ta sq'uinal Judá. Nacal ta yanil jijte' c'o sta, la sjojc'obey: —¿Ja'at bal te j'alwanejat yu'un Dios talemat ta Judá? —la yut. —Jo'on —xi'.

¹⁵ —La' me ya xbootic ta jna, ya jwe'tic pan —xi' te mamal j'alwaneje.

¹⁶ Pero te j'alwanej yu'un Dios talem ta sq'uinal Judá, jich la yal: —Ma xju' ya joinat, soc ma xju' ya x'ochon ta ana, soc ni ya xju' ya joinat ta we'el, ni ya xju' ya joinat ta yuch'el ja' li'to.

¹⁷ Melel te Cajwaltic mero jamal la spason ta mandal: “Ma me xawe' pan, soc ma me xawuch' ja' tey a, soc ma me teyuc ya sujt'atix a te banti beil baate”, xi' te Cajwaltique —xi'.

¹⁸ Pero te mamal la yac' puersa: —Ja' nix jich j'alwanejon yu'un Dios, jichon te bit'ilate. Ta swenta ch'ul abat yu'un Cajwaltic la spason ta mandal te ya quic'at bael yu'un ya cac'bat awe'el awuch'el —la yut. Ja'uc me to slot te mamale.

¹⁹ Pero te j'alwanej yu'un Dios talem ta Judá, bajt' soc te mamal j'alwanej, c'ot ta we'el-uch'el ta sna.

²⁰ Pero te c'alal ayic ta we'el ta mesa a, jul tel sc'op Cajwaltic ta stojol te mamal j'alwanej te la yic' sujt'el te j'alwanej yu'un Dios talem ta Judá.

²¹ Tulan c'opoj te mamale, jich la yalbey te j'alwanej talem ta Judá: —Te Cajwaltic jich la yalix te scaj te la ac'axintaybey smandal te la yalbate,

²² te bit'il sujt'at tel ta we'el ta uch'el te banti la yalbat mandal te ma ba ya apase, ma me ba ya xmujc' abaq'uetal ta banti smuquenal te ame'-atate —la yut.

²³ Te c'alal laj yo'tan ta we'el ta uch'el te j'alwanej yu'un Dios talem ta sq'uinal Judá, te mamal j'alwanej la xchajbanbey sburro.

²⁴ Jich bajt' te j'alwanej yu'un Dios talem ta Judá. Pero ta be loc' ta maquel yu'un jcojt' león-choj, milot yu'un. Te sbaq'uetal chawal jilel ta be. Te burro soc te león-choje tey la yac' sbaic ta sts'eel te mach'a lajeme.

²⁵ Ay c'ax jbeeletic, la yilic te chawal ta be te mach'a lajeme, tey to ay ta sts'eel a te león-choje. C'alal c'otic ta lum te banti nainem te mamal j'alwanej yu'un te Diose, c'o yalic te bila la yilique.

²⁶ Te c'alal la yaiy te mamal j'alwanej, ba yich' sujt'el tel sbaq'uetal te yan j'alwaneje, jich la yal: —Ja' te j'alwanej yu'un Dios la xc'axintaybey smandal te Cajwaltique. Ja' yu'un ac'otix ta milel yu'un león-choj soc laj ta pich'ulayel yu'un, jich nix te bit'il albot yu'un te Cajwaltique —xi'.

²⁷ Ora la yalbey te snich'nab te yacuc xchajbanbot jcojt'uc burro. La xch'uunic spasel te snich'nabe.

²⁸ Te mamal j'alwanej yu'un Dios bajt', chawal ta be c'o sta te mach'a lajeme, tey ayic ta sts'eel a te burro soc nix te león-choje. Te león-choje ma ba sti'oj te mach'a lajem, soc ma ba laj ta pich'ulayel stuquel te burro.

²⁹ Te mamal j'alwanej yu'un Dios la sjachbey te sbaq'uetal te j'alwanej talem ta Judá, la smojt'es ta burro, la yic' sujt'el ta slumal swenta yu'un ya spas seña mel-o'tan, soc ya smuc.

³⁰ La smuc ta smuquenal, soc la yoq'uetay, jich la yal: “Ay, hermano”, xi'.

³¹ Te c'alal laj yo'tan ta smuquele, jich la yalbey te snich'nab: —Te c'alal ya xlajone, tey me x'amuconic a te banti la jmuc te swinic Dios, tey me xawac'bonic jbaq'uetal a te banti ay te sbaq'uetale.

³² Melel puersa me ya xc'ot ta pasel te bi la yal ta swenta smandal te Cajwaltic, ta swenta scontroinel te scajtijib ta chiq'uel majt'anil ta Betel, soc nix te toyol ch'uunjibaletic te ayic ta lumetic ta sq'uinal Samaria —xi'.

³³ Manchuc me jich ay, pero te Jeroboam ma ba la squejch'an te sbolile. Melel la yac' ochel xan yan sacerdoteetic tey nix ta lume, swenta yu'un ya swentainic te toyol ch'uunjibaletic. Te mach'atic la sc'anique, te Jeroboam la yac' ochel ta sacerdoteil tey ta toyol ch'uunjibal yu'un te loc'ombaetique.

³⁴ Ta scaj te jich nix la xch'uun loc'omba te patil alnich'anetic yu'un Jeroboam, ja' smulic c'ot, soc ja' ta scaj te jc'axel lajinbot te sts'umbale.