1 Reyes 12 - Bible in Tzeltal de Oxchuc y Tenejapa

Cheb nación c'ot israeletic

¹ Te Roboam bajt' ta Siquem, yu'un spisil Israel bajt' tey a, swenta yu'un ya yaq'uic ta muc' ajwalil.

² Pero la yaiy te Jeroboam, snich'an Nabat; ay to ta Egipto a te banti baem ta anel yu'un xi'el te muc' ajwalil Salomón.

³ C'alal la sticunic ta iq'uel, te Jeroboam soc ta spisil te lum Israel ba sc'oponic te Roboam, jich la yalbeyic:

⁴ —Te atate mero tulan la yabatinotic. Jich yu'un te ja'ate ya me apejc'an te abatinele, te pajal soc ijc'atsil c'oem ta jtojoltic, jich me ya cac' jbatic ta abatinel ta atojol —xiic.

⁵ Te Roboam jich albotic yu'un: —Baanic, cha'wej to xtal awilonic —xi'. Jich bajt'ic.

⁶ Te muc' ajwalil Roboam la sjojc'obey te mamaletic te la sjoinic ta at'el te Salomón, te stat te c'alal cuxul to a. Jich la yalbey: —¿Bila lec ya awalbonic te ja'exe, bi wan ya sc'an ya jsujt'esbey a te sc'opic te winiquetic? —xi' ta stojol te mamaletique.

⁷ Jich la yalic: —Teme ya x'och awac' aba ta abatinel yu'un te lume, soc teme buen lequil c'op ya asujt'esbey a te sc'opique, spisil ora jun yo'tanic ya me yac' sbaic ta abatinel awu'un —la yutic.

⁸ Te Roboam ma ba la yich'bey ta wenta te sc'opic te mamaletique. Ba sjojc'obey te ch'iel-winiquetic pajal xch'iel soque, te ayic ta abatinel yu'une. Jich la yalbey:

⁹ —¿Bi ya awalbonic ja'ex, bi wan ya calbey te winiquetic te yacalic sc'anbelic te ya cac' xan pejc'ajuc yalal te ijc'atsil ac'botic yu'un te jtate? —xi'.

¹⁰ Te ch'iel-winiquetic te pajal xch'ielic soque, la sjaq'uic: —Te winiquetic te ya sc'anic te ya awac'bey pejc'ajuc yalal te ijc'atsil c'oeme te ac'botic yu'un te atate, jich ya sc'an ya awalbey: “Teme buen tulan la yac' sba ta atojolic te jtate, te jo'one mero c'axem to xan jichon a.

¹¹ Teme la yac'beyex buen al ijc'atsil c'oeme, te jo'on mero c'axem to xan jich yalal ya cac'beyex. Teme la smajex ta nujc'ule, te jo'one ya jmajex ta najt'il ts'otbil nujc'ul te ay staq'uinal sni'il”, uta me —xiic te ch'iel winiquetique.

¹² Ta yoxebal c'aal c'ot xan te Jeroboam soc ta spisil te yajwal lum ta stojol te muc' ajwalil Roboam, jich nix te bit'il albotique.

¹³ Pero te muc' ajwalil mero tulan c'oponotic yu'un, ma ba la yich'bey ta muc' te bila albot yu'un te mamaletique.

¹⁴ Ja' la sc'ases ta alel te bila c'opil albot yu'un te jch'iel winiquetic. Jich la yal: —Teme mero al te ijc'atsil la yac'beyex te jtate, ya me cac'beyex ijc'atsil te mero c'axem to xan jich yalal a. Teme la smajex ta nujc'ul te jtate, te jo'one ya me jmajex ta najt'il ts'otbil nujc'ul te ay staq'uinal sni'ile —la yut.

¹⁵ Jich ma ba la yich' ta wenta te yajwal lum te muc' ajwalil. Melel la sc'an te Cajwaltic te jich ya xc'ot ta pasele, swenta yu'un jich ya xc'ot sc'op te Cajwaltic te la yalbey te Jeroboam snich'an Nabat ta swenta sc'op te Ahías te talem ta Silo.

¹⁶ Te c'alal la yilic ta spisilic te lum israeletic te ma ba ich'otic ta wenta yu'un te muc' ajwalile, jich la yalbeyic: —¡Ma'yucotic ta swenta te David! ¡Ma'yuc bi quechel ya yac'botic te snich'an Isaí! ¡Conic ta jnatic ta jpisiltic, israeletic! ¡Te David ac'a scanantay te mach'atic ay ta swenta! —xiic. Jich ora bajt'ic ta snaic spisilic te israeletique.

¹⁷ Te israeletic nainemic tey ta lumetic ayic ta sq'uinal Judá, ja' to nix ajwalil yu'unic te Roboam.

¹⁸ C'alal te Roboam la sticun te Adoram te ja' swentainej yilel te mach'atic sujbilic ta at'el, milot ta ch'ojel ta ton yu'un te israeletique. Jich te muc' ajwalil Roboam, ora mo ta scarreta, bajt' ta anel ta Jerusalén.

¹⁹ Jich la stoy sbaic ta stojol te sts'umbal David te israeletic ja' to c'alal ora to.

²⁰ C'alal la yaiyic te israeletic te cha'julix te Jeroboam, la sticunic ta iq'uel swenta yu'un ya stejc'an sba ta stojol ta spisil israeletic. Jich la yac'beyic yich' yat'el ta muc' ajwalil ta stojol spisil Israel. Ma'yuquix mach'a jil te jun yo'tan ta stojol te sts'umbal David, ja' xanix te sts'umbal Judá.

²¹ C'alal c'ot ta Jerusalén te Roboam, la stsob balunwinic ta jmil (180,000) soldadoetic tsabil yu'un ta spisil ta jchajp naetic ta sts'umbal Judá soc ta sts'umbal Benjamín swenta yu'un ya yac'bey guerra te Israel, yu'un jich ya sujt' xan ta swenta a te yantic israeletique.

²² Pero c'oponot yu'un Dios te Semaías, te ja' swinic te Diose, jich albot:

²³ —Albeya te Roboam snich'an Salomón te muc' ajwalil yu'un Judá, soc spisil te sts'umbal Judá soc te sts'umbal Benjamín, soc te yantic yajwal te lum,

²⁴ te jo'on ya calbey tulan mandal te ma xju' ya yac'bey sba guerra soc te yermanotac israeletique. Ac'a sujt'uc bael spisilic ta snaic, melel jich chapalix cu'un —xi' te Diose. C'alal la yaiyic te bila albotic yu'un Cajwaltic, la xch'uunic, jich sujt'ic bael jich te bit'il la yal mandal te Cajwaltique.

Jeroboam la yac' ta ch'uunel loc'omba

²⁵ Te Jeroboam la spas xan te lum Siquem ay ta swits sq'uinal Efraín, nain tey a. Patil la spas xan te lum Penuel.

²⁶ Pero la yal ta yo'tan: “Te sts'umbal David ya xju' ya yich' xan yip yu'unic te mandalteswanej

²⁷ teme spisil ora ya xbajt'ic ta Jerusalén ta yaq'uel milbil smajt'an Dios ta templo yu'un Cajwaltic te ants-winiquetique. Ya me xmonotic yu'un te Roboam te muc' ajwalil yu'un Judá, jich ya me smilonic, soc ya me sujt'ic xan ta stojol Roboam, ja' te muc' ajwalil yu'un Judá”, xi' ta yo'tan te Jeroboam.

²⁸ C'alal la yaiybey sc'op yantic te muc' ajwalil, la snop te ya spas cheb alal toroetic ta oro. Jich la yalbey te yajwal lum: —Ja'ex israeletic, bayal buelta c'oemex ta Jerusalén. Yo'tic li' ayix te adiosic te la sloq'uesex tel ta Egipto —xi' te Jeroboam.

²⁹ Jich jun la yac' ta Betel, yan la yac' ta Dan.

³⁰ Jich la sta smulic ta stojol Dios te israeletique, melel bajt'ic te ants-winiquetic ta Betel soc ta Dan ta xch'uunel.

³¹ Soc la spasbey toyol xch'uunjibal, soc la yac' ochel ta sacerdote te mach'atic ma ja'uc levita-winiquetique.

³² La yal mandal ta pasel q'uin swenta xch'uunel lotil dios ta yo'lajunebal c'aal sjajch'el te swaxaquebal u, jich te bit'il q'uin ya yich' pasel ta sq'uinal Judá. Ja' nix te Jeroboam te la xchic'bey milbil smajt'an ta scajtijib te sdiosique. Jich la spas ta Betel, la xchic'bey milbil smajt'an te sloc'omba alal toroetic te ja' nix la spase, soc la stsa ochel sacerdoteetic yu'un te toyol ch'uunjibaletic spasoje.

³³ Ta yo'lajunebal sjajch'el a te swaxaquebal u, te Jeroboam la xchic'bey milbil smajt'an te lotil dios ta scajtijib smajt'an te ts'ajc'ubil ta Betel. Ja' yuil te q'uin la smulan yo'tan spasele. La yal ta jamal te ja' q'uin swenta xch'uunel Dios yu'un israeletic ta sc'op. Ja' nix ta yuil a te mo ta scajtijib smajt'an lotil dios ta xchiq'uel pom.