1 Corintios 13 - Bible in Tzeltal de Oxchuc y Tenejapa

Ja' cajal sc'oplal te xc'uxul-o'tanile

¹ Manchuc teme bayal ta jchajp c'opiletic te ya xc'opojon ta sc'op ants-winiquetic o sc'op ch'ul abatetic, ja'uc me to, teme ma'yuc xc'uxul te co'tane, ja' jich c'oemon te bit'il xcananet nax campana soc te bit'il stsintson nax sc'op te platilloe.

² Soc manchuc teme ya caiy j'alwanej, soc teme ya jna' spisil te muquen c'ope, soc teme ay ta co'tan spisil te bila ay ta nopele, soc teme ay xch'uunjel co'tane, soc teme ya xju' cu'un ya jq'uej bael ta yan q'uinal te witsetique, teme ma'yuc xc'uxul te co'tane, tojol ayon ta q'uinal abi.

³ Soc manchuc teme ya jq'uebanbey spisil jbiluc te me'baetique, soc teme jun co'tan ya cac' jba ta c'ajq'uel soc te jbaq'uetale, ja'uc me to, teme ma'yuc xc'uxul te co'tane, ma'yuc bi ya xloc' cu'un xujt'uc a.

⁴ Te mach'a ay xc'uxul yo'tane, spisil ya xcujch' yu'un, soc ay yutsil yo'tan, soc ma spas jex-o'tanil. Ma xyac' sba ta ich'el ta muc', soc ma stoy sba.

⁵ Ma spas te bila ma lecuque, soc ma stuqueluc nax ya sle te bila ya sc'an yo'tane. Ma x'ilin, soc ma xcupetuc slab yo'tan.

⁶ Ma smulan te bila ma stojiluc te bila ay ta pasele, ja' ay sbujts' yo'tan yu'un te bila melele.

⁷ Spisil ya xcujch' yu'un, spisil ya xch'uun, spisil ya smaliy, soc spisil ya sts'ijc' yu'un.

⁸ Te xc'uxul-o'tanile ma'yuc bi ora ya xch'ay sc'oplal stuquel. Yan te bay ya caiytic j'alwaneje, ya me xlaj sc'oplal stuquel. Soc ya me sta yorail te ma'yuc mach'a ya xc'opojix xan ta yantic c'opiletic, soc ya me sta yorail te ma xtuunix te p'ijilile.

⁹ Melel olil nax te bila jna'ojtique, soc olil nax ya jna'tic yalel te alwanej-c'ope.

¹⁰ Ja'uc me to, te c'alal ya sta yorail te ts'acal ya jna'tic stojole, tey me ya xch'ay sc'oplal a te bit'il olil nax jna'ojtique.

¹¹ Te c'alal alalon to ae, jich c'opojon te bit'il alal, soc jich co'tan te bit'il alal, soc swenta alal te bila la jnop ta co'tane. Yan te c'alal winicubone, jich la quijq'uitay jilel ta jpat te bila swenta te alale.

¹² Ta ora to yacotic ta yilel ta espejo te ma chicanuc ta ilel ta leque. Ja'uc me to, ta patil ya me quilbeytic sit ta jsitic. Ta ora to olil nax jna'oj stojol, ja'uc me to, ta patil ts'acal me ya jna' stojol spisil, jich te bit'il Dios la sna'bon jbae.

¹³ Jich yu'un ay oxten te ma xlaj sc'oplale: Ja' te xch'uunjel-o'tanile, ja' te bila ay ta maliyele, soc te xc'uxul-o'tanile. Ja'uc me to, te bay cajal sc'oplal ta yoxebale, ja' te xc'uxul-o'tanile.