1 Corintios 12 - Bible in Tzeltal de Oxchuc y Tenejapa

Te majt'aniletic ta swenta te Espiritue

¹ Quermanotac, ya jc'an ya ana'ic stojol te bit'il ay sc'oplal te majt'aniletic ta swenta te Espiritue.

² Te ja'exe, ya ana'ic stojol te bit'il ayex a te c'alal ma to ach'uunejic a te Diose. Jun nax awo'tanic la awac' abaic ta jowil alajinbel abaic ta stojol te loc'ombaetic te ma xc'opojique.

³ Jich yu'un ya jc'an te ya ana'ic stojol te ma ja'uc ya xc'opoj ta swenta te Espíritu yu'un Dios te mach'a ya yal te mero amen te Jesuse. Soc ma'yuc jtuluc mach'a ya yal: “Ja' Cajwal te Jesuse”, te xie, te manchuc ja'uc ta swenta yu'el te Ch'ul Espiritue.

⁴ Ajtalam te majt'aniletique, ja'uc me to, ja' nix Ch'ul Espíritu te ya yac'botique.

⁵ Ajtalam te abatinele, ja'uc me to, ja' nix Cajwaltic te ya yabatinotique.

⁶ Ajtalam ta pasel te at'ele, ja'uc me to, ja' nix Dios te ya yac'botic te ya xju' cu'untic spasele.

⁷ Juju-jtul yanyan bit'il ya x'ac'ot chicnajuc ta stojol ta swenta te Espíritu yu'un te Diose, swenta yutsteselic ta spisilic.

⁸ Ta swenta te Espiritue, ay mach'a ya x'ac'bot bayal sp'ijil ta c'op. Soc ja' nix ta swenta te Espiritue te ay mach'a ya x'ac'bot bayal sp'ijil ta q'uinale.

⁹ Soc ay yan ya x'ac'bot xch'uunjel yo'tan ta swenta te Espiritue, soc ay yan ya x'ac'bot yu'el ta slamantesel te jchameletic ta swenta te Espiritue.

¹⁰ Soc ay yan ya x'ac'bot spas jchajp at'eliletic, soc ay yan ya x'ac'ot ta j'alwanej, soc ay yan ya x'ac'bot sna' stsajtayel te espirituetique, soc ay yan ya x'ac'ot te ya xc'opoj ta yantic c'opiletique, soc ay yan ya x'ac'ot te ya sc'ases yantic c'opiletic.

¹¹ Ta spisil in to, ja' nix yat'el te Espiritue. Chican stuquel te bit'il la spucbey ta juju-jtul te majt'aniletique.

Te jch'uunjeletic ja' sbaq'uetal te Cristoe

¹² Jun nax ay te jbaq'uetaltique, ja'uc me to, bayal ta jchajp te bila ay tey a. Manchuc teme bayal ta jchajbe, ja'uc me to, jun nax ay ta scojt'ol. Ja' nix jich te Cristoe.

¹³ Yu'un te c'alal la quich'tic ja' ta swenta te Espiritue, jich jun nax jbaq'uetaltic c'ootic ta jpisiltic. Manchuc teme judioetic o teme jyanlumetic o ayic ta mosoil o teme libre ayique, jun nax te Ch'ul Espíritu te la quich'tic ta jpisiltique.

¹⁴ Melel ta scojt'ol te jbaq'uetaltique, ma junuc nax te bila ay tey a. Bayal ta jchajp te bila chican tey a.

¹⁵ Te jichuc ya yal te acanile: “Te jo'one ma jo'ocon c'abalon, jich ma'yucon ta abaq'uetal”, te xiuque, ¿yu'un bal tey la yijq'uitayix a te sbaq'uetale?

¹⁶ Soc te jichuc ya yal te chiquinile: “Te jo'one ma sitilucon, jich ma'yucon ta abaq'uetal”, te xiuque, ¿yu'un bal tey la yijq'uitayix a te sbaq'uetale?

¹⁷ Te ja'uc sitil scojt'ol te sbaq'uetale, ¿bit'il ya xju' yu'un te ya yaiy stojol te c'ope? Soc te ja'uc chiquinil scojt'ol te sbaq'uetale, ¿bit'il ya yaiybey yic' te bila ya xbeen yiq'ue?

¹⁸ Ja'uc me to, te Diose chican te bit'il la sc'an yo'tan ta bay la yac' juju-jchajp ta bay te jbaq'uetaltique.

¹⁹ Te jchajbuc nax ay ta spisil te bila ay ta jbaq'uetaltique, ma ba chapal te jbaq'uetaltic te jichuque.

²⁰ Melel jun nax te jbaq'uetaltic te ay bayal ta jchajp te bila ay tey ae.

²¹ Te sitile ma xju' ya yalbey jich te c'abale: “Ma'yuc atuul cu'un”, te xiuc soque. Soc te jolole ma xju' ya yalbey te acanile: “Ma'yuc atuul cu'un”, te xiuc soque.

²² Ja'uc me to, te bila ma'yuc yipic yilel te ay ta jbaq'uetaltique, ja' c'axem to xan ay bayal stuul cu'untic.

²³ In te bay peq'uel sc'oplal ya quiltique, ja' c'axem to xan ya jmuctic stuquel. Soc te bay ma snujp'in te ya cac'tic ta ilele, ja' c'axem to xan ya jmactic ta lec.

²⁴ Yan te bay lec ta ilele, ja' ma ba ya jmuctic stuquel. Ja'uc me to, Dios la xchajban ta lec spisil te jbaq'uetaltique. Jich yu'un ta bay peq'uel sc'oplal ya quiltique, ja' ya yich' xan c'uxtayel ta lec,

²⁵ swenta yu'un ma'yuc bila ya scontroin sbaic yu'un te bila ay ta jbaq'uetaltique. Jich talel c'axel ya xc'uxtay sbaic.

²⁶ Teme ay swocol junuc te bila ay ta jbaq'uetaltique, pajal ya yaiybeyic xc'uxul ta scojt'ol. Soc teme ya sta yutsilal junuque, pajal ya yaiybeyic yutsilal ta scojt'ol.

²⁷ Jich te ja'exe ja' sbaq'uetalex te Cristoe. Juju-jtul jun nax c'oemex soc.

²⁸ Ta juju-jtsojp te jch'uunjeletic Dios la yaq'uix te ja' sbabial ay jpuc-c'opetique, te xchebale, ja' te j'alwanejetique, te yoxebale, ja' te p'ijubteswanejetique, soc la yac' te ay mach'atic ya spasic jchajp at'eliletique, soc te ay mach'atic ya xju' ya slamantesic jchameletic, soc te ay mach'atic ya xju' ya xcoltaywanique, soc te ay mach'atic ya xju' ya xwolwanic, soc te ay mach'atic ay smajt'anic te ya xc'opojic ta yantic c'opiletique.

²⁹ Ja'uc me to, ¿spisil bal jpuc-c'opetic? ¿Spisil bal j'alwanejetic? ¿Spisil bal jp'ijubteswanejetic? ¿Spisil bal ya spasic jchajp at'eliletic?

³⁰ ¿Spisil bal ay smajt'anic ta slamantesel te jchameletique? ¿Spisil bal ya xju' te ya xc'opojic ta yantic c'opiletique? ¿Spisil bal ya xju' yu'unic sc'asesel te bila ya yalic ta yantic c'opiletique? Ban c'an jichuc.

³¹ Toyoluc me awo'tanic yu'un te lequil majt'aniletique. Ja'uc me to, ya me calbeyex awaiyic sc'oplal te bila jelawen yutsilal stuquele.