Tito 2 - Tz'utujil (Ja Cꞌacꞌa Chominem)

¹ Pro ja nwajoꞌ chawe, ni neꞌatijoj wiꞌ ja kachꞌalal tre ja utzlaj tijonem.

² Ja taꞌiꞌ, ja rjawaxic chi nqueban quewariꞌ, bien nquechꞌob ja nqueban in neba̱n respetar cumal ja winak in yukul quecꞌuꞌx ruqꞌuin ja utzlaj tijonem ja rcꞌan ja rtzobal Dios in nqꞌuejeꞌe ja rajoben riꞌil xin Dios pa tak quicꞌaslemal in maticapuj quecꞌuꞌx nquecochꞌ nojelal ja npi chiquij.

³ In queriꞌ chique ja naniꞌ chakajaꞌ ja rjawaxic nqueban quewariꞌ, nqueban cuenta ja quicꞌaslemal ja caniꞌ nrajoꞌ ja Dios chique chi nqueban, maxta tiqueban molon tak tzij, ma quekꞌabar ta, tiquiyaꞌaꞌ jun utzlaj ejemplo chiquewach ja rixokiꞌ ja ma e rijaꞌ ta.

⁴ Ja wi queriꞌ nqueban jariꞌ necowini nequitijoj ja rixokiꞌ. Ja tijonem nqueyaꞌ chique quewariꞌ, lokꞌ nequenaꞌ ja quichajilal in tak cal chakajaꞌ,

⁵ bien nquechꞌob ja nqueban, mchita jun achi nquechꞌob, nquichajij chi utz ja tak cochoch, nequetoꞌ ja winak ja cꞌo rjawaxic chique in nequinimaj ja quichajilal utzcꞌa chi matiqueyaꞌ lugar chique winak chi itzel netzijon tre ja rtzobal Dios.

⁶ In queꞌapaxbaj ja cꞌajolaꞌ chakajaꞌ utzcꞌa chi bien nquechꞌob ja nqueban.

⁷ In atat chakajaꞌ rjawaxic chi ni nacꞌut wiꞌ jun utzlaj ejemplo chiquewach. Ja tok neꞌatijoj maxta rmal cꞌoli nawajoꞌ chewiꞌ tok neꞌatijoj in ni nayaꞌ wiꞌ rukꞌij ja tijonem ja nayaꞌ chique.

⁸ Utzlaj tijonem ja nayaꞌ chique utzcꞌa chi ni majun nak ta nchꞌaꞌowi. Ja wi queriꞌ naban ja winak ja ncajoꞌ nquechꞌaꞌ xa qꞌuixbal nquenaꞌ xtiquechꞌaꞌ ta in ni majun nak ta xtiquibij chewe.

⁹ In queꞌapaxbaj chakajaꞌ ja recꞌo quipatrón chi nequinimaj utzcꞌa chi utz netzꞌati in utz ntzꞌati ja quisamaj chakajaꞌ in ma quequicꞌulbaꞌ ta ja quipatrón

¹⁰ in chakajaꞌ ma quequilakꞌaj ta. Utz tiquibanaꞌ tre nojelal utzcꞌa ja quipatrón cꞌo quiconfianza cuqꞌuin. Ja wi queriꞌ nqueban cumal ejeꞌeꞌ canojel ja winak utz nquetzꞌat ja rtzobal Dios, arjaꞌ Toꞌonel kaxin.

¹¹ Ja cꞌa Dios arjaꞌ rcꞌutun ja rutzil chikawach jariꞌ rcꞌamonto totajem chake kanojel ja rok winak.

¹² Ja rutzil xin Dios quewaꞌ nucꞌut chikawach riꞌ, chi nkayaꞌ can nojelal ja matirajoꞌ ja Dios in nojelal ja quicotemal xin rwachꞌulew in bien nkachꞌob ja nkaban in nkaban ja rutzil ja caniꞌ nrajoꞌ ja Dios chake chi nkaban.

¹³ In chakajaꞌ ja rutzil xin Dios nucꞌut chikawach chi npi chi na jutij ja Jesucristo, arjaꞌ nimlaj Dios kaxin, arjaꞌ Toꞌonel kaxin. In kotak chic chi ja tok xtipeti congana nim chic rukꞌij triꞌ in camic nokquicoti chi raybexic.

¹⁴ Kumal ajoj tok xujach riꞌ pa quekꞌaꞌ ja winak chi camsaxi, xokrutoꞌ chipan ja kil kamac utzcꞌa chi arjaꞌ nchꞌachꞌojirsaj ja kacꞌaslemal. Queriꞌ xuban utzcꞌa chi nokoc tinamit rxin utzcꞌa chi nel kacꞌuꞌx trij ja banoj utzil.

¹⁵ Nojel cꞌawaꞌ ja xintzꞌibaj riꞌ queꞌatijoj ja winak tre. Ja tok ncapuj quecꞌuꞌx tayukbaꞌ quecꞌuꞌx. Ja cꞌa wi ecꞌoli ja ma utz ta nqueban queꞌachꞌolij. Ma taxbej ta awiꞌ naban queriꞌ como ja Dios arjaꞌ yoyon chawe chi neꞌaban cuenta. In maxta tayaꞌ awiꞌ chique ja netzelan awxin.