Tito 1 - Tz'utujil (Ja Cꞌacꞌa Chominem)

¹ Anin in Pablo ntzꞌibajel chawe ja carta riꞌ Tito. Anin in ajsamajel rxin ja Dios in chakajaꞌ in apóstol rxin ja Jesucristo. Arjaꞌ xinrutak cuqꞌuin ja rechaꞌon rmal ja Dios chi quitoꞌic utzcꞌa chi nyukeꞌ más quecꞌuꞌx ruqꞌuin utzcꞌa chakajaꞌ chi ncotakij ja utzlaj tijonem xin Jesucristo ja natrucꞌaj chipan jun utzlaj cꞌaslemal ja caniꞌ nrajoꞌ ja Dios.

² In triꞌ cꞌa ncotakij wiꞌ más chi cꞌo jun utzlaj cꞌaslemal ja mta qꞌuisic trij in nequicoti chi raybexic. Jariꞌ ja utzlaj cꞌaslemal ja Dios ojer rtzujunto. Majaꞌn titzꞌucari ja rwachꞌulew tok rtzujun in ni nuyaꞌ wiꞌ como ja Dios arjaꞌ ma tzꞌakol tzij ta.

³ Ja Dios tok xurwilaꞌ ja kꞌij ja rchominto xutakto rbixic ja rtzobal. Arjaꞌ Toꞌonel kaxin, arjaꞌ biyon chwe chi anin nyaꞌ rbixic ja rtzobal jariꞌ ja rsamaj xuban recomendar chwe chi nban.

⁴ Ja cꞌa ratat Tito xa junan yukul wiꞌ kacꞌuꞌx awqꞌuin ruqꞌuin ja Jesucristo, at ncꞌajol chwach ja Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja Jesucristo ja Toꞌonel kaxin. Ejeꞌeꞌ ta xtiquipokonaj awach.

* * * * * * * * * *

⁵ Anin xatnuyaꞌ can pa Creta utzcꞌa chi nachomij ja ma chomtajnak ta tre ja samaj xin Dios ja majtajnak. In xinbij can chawe chi nojel tinamit ja recꞌo wiꞌ ja kachꞌalal chi neꞌaban nombrar anciano chiquicojol ja nebano cuenta quixin.

⁶ Pro ja rjawaxic ja rcꞌaslemal jun anciano quewariꞌ, ni majun nak ta nchapbexi in ma e caꞌiꞌ ta ja rxjayil. In ja ralcꞌwal chakajaꞌ rjawaxic chi quiniman ja Jesucristo in e nimanelaꞌ, maxta nbix chique chi e itzel tak winak.

⁷ Ja nebano cuenta ja kachꞌalal ejeꞌeꞌ e ajsamajelaꞌ rxin ja Dios. Rmalariꞌ tok rjawaxic chique chi utz ja quicꞌaslemal. Maxta ma tuyaꞌ ta pa cuenta ja nbix tre. Maxta ma cꞌayew ta npi ryewal in ma tikꞌabar ta in ma banol chꞌaꞌoj ta. In chakajaꞌ maxta congana tel rucꞌuꞌx trij ja pwok in utz rchꞌaquic tibanaꞌ.

⁸ Ja rjawaxic tre chi nuban, nuyaꞌ quiposada ja neꞌekaj ruqꞌuin ja cꞌo rjawaxic chique. In ni nrajoꞌ wiꞌ ja rutzil, nuchꞌob chi utz ja nuban, ni utz wiꞌ ja nuban, Dios cꞌayon rxin in nucochꞌ chi matuban ja ritzelal.

⁹ In rjawaxic chi nnimaj chijutij ja tijonem ja kayaꞌ chique ja kachꞌalal como ja kabij chique ni katzij wiꞌ. Ja wi queriꞌ nuban ncowini nyukbaꞌ quecꞌuꞌx ja winak tre ja utzlaj tijonem in ncowini neruchꞌec ja nechꞌaꞌo rxin.

¹⁰ Como e qꞌuiy ja ma e nimanelaꞌ ta. In ecꞌoli chiquicojol ja nebini chi ni rjawaxic wiꞌ chique ja kachꞌalal chi nquinimaj ja costumbre quixin ja raj Israel. Ejeꞌeꞌ nquibij juleꞌ tzij ja mta noc wiꞌ in nequeban engañar ja winak.

¹¹ Jariꞌ winak queꞌakꞌilaꞌ como ejeꞌeꞌ ni pa tak familia nequeyoj ja winak pa tak cochoch, xa itzel tak tijonem nquecꞌut chiquewach. Jariꞌ nquichꞌecbej ja quipwok pro ma utz ta rchꞌaquic nqueban.

¹² Cꞌo jun achi ojer aj Creta arjaꞌ rtzꞌiban can nak quibanic ja winak ja rach tak aj Creta. Quewaꞌ rtzꞌiban can riꞌ: —Ja wach tak aj Creta ejeꞌeꞌ nij e tzꞌakol tak tzij wiꞌ, xa e junan cuqꞌuin ja ritzel tak chicop ja netijoni, xa e munaꞌ in xa e sakꞌoriꞌ, neꞌe.

¹³ In ni katzij wiꞌ ja xbij. Ja cꞌa nwajoꞌ chawe, tachꞌaꞌaꞌ chique in cowlaj tak tzij queꞌachapbej utzcꞌa chi nyukeꞌ quecꞌuꞌx ruqꞌuin ja utzlaj tijonem ja rcꞌan ja rtzobal Dios.

¹⁴ In queriꞌ nqueban, ma tiqueyaꞌ ta caso tre ja juleꞌ tzij ja mta noc wiꞌ ja nbix chique cumal ja raj Israel nixtacꞌa nqueyaꞌ ta caso tre ja nbix chique cumal ja winak ja xa itzel nquetzꞌat ja utzlaj tijonem xin Jesucristo.

¹⁵ Ja winak ja chꞌajchꞌoj canma ejeꞌeꞌ ni necowin wiꞌ nquetzꞌat ja rutzil. Ja winak ja xa tzꞌil canma in matiquinimaj ja Dios ejeꞌeꞌ nojel itzel nquetzꞌat. Ejeꞌeꞌ riꞌ xa itzel quinaꞌoj in matitiꞌon chique ja ritzelal nqueban.

¹⁶ Nquibij chi cotak rwach ja Dios pro ni kꞌalaj wiꞌ chi ma katzij ta como xa itzelal ja nqueban. Xa itzel netzꞌati, ma e nimanelaꞌ ta in maquecowini nquecꞌut ja rutzil chiquewach ja winak.