Santiago 4 - Tz'utujil (Ja Cꞌacꞌa Chominem)

¹ ¿Bar nwinakarto wiꞌ ja sícꞌ chꞌaꞌoj neban nechꞌob ixix? Ja ritzel tak yarinem ja cꞌo pa tak ewanma jariꞌ nticowi ja sícꞌ chꞌaꞌoj checojol.

² Ja tok cꞌoli neyarij in wi matiyaꞌ chewe neban camíc rmal. In chakajaꞌ nquiakir ewanma chibil tak ewiꞌ in wi matiyaꞌ chewe ja regana xa netic chꞌaꞌoj rmal. Matiyataj chewe ja newajoꞌ pro ma chaka ta matiyataj chewe, rumac chi ma chi Dios ta necꞌutuj wiꞌ.

³ Owi masqui necꞌutuj pro xa ma rubey ta ja rcꞌutuxic neban chewiꞌ tok matiyataj chewe. Queriꞌ rbanic como ja rechꞌobon ixix tok xtiyataj chewe xa nixquicot kaj ruqꞌuin eyon, xa neban ruqꞌuin nak cꞌol egana neban.

⁴ Xa más na yukul ecꞌuꞌx ruqꞌuin ja ntzujuj ja rwachꞌulew chwach ja nyukeꞌ ecꞌuꞌx ruqꞌuin ja Dios. ¿La ma ewotak ta cꞌa nak rcꞌamonto ja tok yukul ecꞌuꞌx ruqꞌuin ja ntzujuj ja rwachꞌulew? Ja tok queriꞌ neban jariꞌ xa necꞌullaꞌaj ja Dios. Ja winak ja ncajoꞌ nyukeꞌ quecꞌuꞌx ruqꞌuin ja rwachꞌulew xa nak ta chi winakil ejeꞌeꞌ neꞌoc rcꞌulel ja Dios.

⁵ Owi ¿la xa chaka queriꞌ tzꞌibtal can chipan ja rtzobal Dios nechꞌob ixix ja tok nbij chake chi ja rEspíritu xin Dios ja yatajnak chake congana ntiꞌon ranma chakij, matirajoꞌ ja junwiꞌ chi ta xtiyukeꞌ wiꞌ kacꞌuꞌx?

⁶ Pro janila ja rutzil nuyaꞌ chake caniꞌ tzꞌibtal can chipan ja rtzobal Dios, quewaꞌ nbij riꞌ: —Ja Dios nuyaꞌ ja rutzil chique ja nebano taknoꞌy chwach pro nchꞌojin cuqꞌuin ja nquenaꞌ kaj chi congana e nimak. Queriꞌ tzꞌibtal can.

⁷ Teyaꞌaꞌ ewiꞌ pa rukꞌaꞌ ja Dios, cow quixpeꞌe chwach ja Satanás in arjaꞌ nanmaji chewach.

⁸ Quixtiloc ruqꞌuin ja Dios in arjaꞌ chakajaꞌ ntiloc ewqꞌuin. Ja rix ajꞌil ja rix ajmaquiꞌ rjawaxic chi neyaꞌ can ja ritzelal. Ja rixix ja xa cacaꞌ ecꞌuꞌx rjawaxic chi nechꞌachꞌojirsaj ja rewanma.

⁹ Titiꞌon cꞌa chewe ja rewil emac ja rebanon in quixokꞌ rmal chakajaꞌ. Ma quixtzeben chi ta rmal ja quicotemal xin rwachꞌulew, ja neban quixokꞌ rmal ja rewil emac in quixbison rmal.

¹⁰ Tebanaꞌ taknoꞌy chwach ja kajaw Dios, ja cꞌa wi neban taknoꞌy chwach nerilaꞌ na jun kꞌij tok arjaꞌ xtuyaꞌ chewe chi nimak ekꞌij.

* * * * * * * * * *

¹¹ Wachꞌalal, ma tetzijoj ta ewiꞌ. Ja tok natzijoj awiꞌ owi natoc at caniꞌ kꞌetol tzij chiquij ja kachꞌalal jariꞌ junan ruqꞌuin ja xa itzel natzꞌat ja ley xin Cristo, jariꞌ junan ruqꞌuin ja nacoj awiꞌ ayon pa rqꞌuexwach ja ley. Ja wi queriꞌ naban jariꞌ ma ley ta ja nanimaj, xa nacoj awiꞌ ayon chi at kꞌetol tzij.

¹² Pro xa ruyon ja Dios ja Yoꞌl ley, xa ruyon arjaꞌ Kꞌetol Tzij, ruyon arjaꞌ ncowini natrutoꞌ owi natrutakel chijutij chipan ja nimlaj rpokonal. Pro atat ¿nak cꞌa atocnak wiꞌ tok nakꞌet tzij trij jun awach winak?

* * * * * * * * * *

¹³ Camic nwajoꞌ nintzijon ewqꞌuin ja quewaꞌ nebij riꞌ: —Seguro nokbe camic owi chwak pa jun tinamit in jun junaꞌ nokeqꞌuejeꞌ triꞌ, nekabanaꞌ jun negocio in nkachꞌec kapwok, nixcheꞌe.

¹⁴ Queriꞌ nebij pro ja kacꞌaslemal ma kotak ta nak la xin chwak xin cabij. ¿La ma ewotak ta cꞌa nak rbanic ja kacꞌaslemal chi junan ruqꞌuin juleꞌ sutzꞌ nwinakar nojoj in xa jurata nqꞌuis kaj chic?

¹⁵ Ja kas rubey quewaꞌ ta nebij riꞌ: —Ja wi rvoluntad ja kajaw Dios xtuyaꞌ más ja kacꞌaslemal nkaban cꞌariꞌ ja kachꞌobon, quixcheꞌe.

¹⁶ Pro ja neban ixix congana ix nimak nenaꞌ kaj, neyaꞌ ekꞌij, in ja tok queriꞌ neban jariꞌ congana itzel na chwach ja Dios.

¹⁷ Ja wi cꞌo jun utzil ja yatal chawij chi naban, ja wi awotak chi yatal chawij chi naban in wi cꞌa mataban jariꞌ il mac ja naban chwach ja Dios.