Santiago 2 - Tz'utujil (Ja Cꞌacꞌa Chominem)

¹ Wachꞌalal, janila nim rukꞌij ja kajaw Jesucristo in como yukul kacꞌuꞌx ruqꞌuin chewiꞌ maxta jun utz tetzꞌat in jun itzel.

² Caniꞌ tre jun achi nekaj checojol ja bar emolon wiꞌ ewiꞌ, buena rnopkꞌaꞌ rcojonel puro oro, rwekonel riꞌ, buen tak tziak rcojonel ja nimak rjil, in chakajaꞌ nekaj chic jun achi ewqꞌuin congana ti mebaꞌ, congana lawuloꞌ ti rtziak rcojon.

³ In ixix kas nel ecꞌuꞌx trij ja rcojonel buen tak tziak, cꞌo ta man ta neban tre in nebij tre: —Cꞌo jun tzꞌulbal nim rukꞌij waweꞌ riꞌ, cattzꞌabeꞌ chwach, nixcheꞌ tre. Pro ja cꞌa ti mebaꞌ quewaꞌ nebij tre riꞌ: —Catpeꞌe triꞌ owi cattzꞌabeꞌe pa tokꞌulew, nixcheꞌ tre.

⁴ Ja wi queriꞌ neban jariꞌ ni kꞌalaj wiꞌ chi jun utz netzꞌat in jun itzel. Ja queriꞌ ix caniꞌ juleꞌ kꞌetol tak tzij ja xa itzel tak kꞌetoj tzij ja nqueban.

⁵ Chakꞌlaj wachꞌalal, camic teyaꞌaꞌ ewxquin tre ja xtinbij chewe riꞌ ¿la ma ewotak ta cꞌa chi ja mebaꞌiꞌ waweꞌ chwachꞌulew Dios erchaꞌon chi neꞌoc e biyomaꞌ? Ja ocnak quibiyomal jariꞌ ja yukulbal quecꞌuꞌx ruqꞌuin ja Dios. Ejeꞌeꞌ cꞌo jun nimlaj herencia ja xtiyataj chique, jariꞌ herencia neqꞌuejeꞌe chijutij chipan ja gobierno xin Dios. Queriꞌ rtzujun ja Dios chique e janiꞌ neꞌajoꞌn rxin.

⁶ Pro ixix neban chique tak mebaꞌiꞌ ni ma ecꞌo ta. Ja cꞌa biyomaꞌ lokꞌ neꞌenaꞌ pro ¿la ma ejeꞌeꞌ ta cꞌa biyomaꞌ ja nebano pokon chewe, la ma ejeꞌeꞌ ta cꞌa biyomaꞌ ja nechararan ewxin pa tak kꞌetbaltzij?

⁷ ¿La ma ejeꞌeꞌ ta cꞌa biyomaꞌ chakajaꞌ ja xa itzel netzijon tre ja rubiꞌ ja Jesucristo? pro makanaꞌ maquita congana nim rukꞌij ja rubiꞌ ja Jesucristo, in chakajaꞌ ja rubiꞌ ja Jesucristo jariꞌ nataxi pan ecuenta chi echajixic.

⁸ Cꞌo jun ley tzꞌibtal can chipan ja rtzobal Dios in jariꞌ ley más na nim rukꞌij, quewaꞌ nbij riꞌ: —Caniꞌ nawajoꞌ kaj awiꞌ ayon queriꞌ cꞌa tabanaꞌ chique ja juleꞌ chic winak queꞌawajoꞌ chakajaꞌ. Queriꞌ nbij. Wi katzij chi queriꞌ amajon rbanic caniꞌ nbij ja ley jariꞌ utz ja ramajon rbanic.

⁹ Nowi xa jun utz in jun itzel natzꞌat jariꞌ il mac nattajini naban in ja ley xin Dios natruchap rmal in nbij chawe chi ma xatniman ta.

¹⁰ Queriꞌ nbij chewe como ja ley xin Dios wi cꞌo jun punto tre ja ma xanimaj ta, ley xin Dios ariꞌ ja matanimaj in natchap rmal. Queriꞌ nba̱n chawe masqui animan ja juleꞌ chic ley ja rcꞌan ja rtzobal Dios.

¹¹ Queriꞌ rbanic como ja Dios arjaꞌ rbin can chipan ja ley chi: —Ma taban ta rij rwiꞌ ja rawixjayil owi awachajil, neꞌe, pro ja mismo Dios bini chakajaꞌ chi: —Ma taban ta camíc, neꞌe. Ja cꞌa rixix masqui ma xeban ta rij tak quewiꞌ ewixjayilal owi ewachajilal pro wi xeban camíc tibij cꞌa tzij ariꞌ chi ley xin Dios ja ma xenimaj ta.

¹² Ja cꞌa rixix xa nak ta nebij, xa nak ta neban, bien turkaj chewe chi ja ley xin Cristo ja xokwasanel libre chipan ja kil kamac jariꞌ ley xtoc chewij, jariꞌ xtikꞌetbex tzij chewij.

¹³ Queriꞌ rbanic como ja wi matapokonaj quewach ja winak, tok xterilaꞌ ja nimlaj kꞌij xin juicio queriꞌ nba̱n chawe atat chakajaꞌ matipokonax awach. Nowi napokonaj quewach jariꞌ npokonax awach atat chakajaꞌ, ja juicio xin Dios matikaj chawij ja tok xtikꞌet tzij chawij.

* * * * * * * * * *

¹⁴ Wachꞌalal, ja wi cꞌo jun nbij chi cꞌo yukulbal rucꞌuꞌx ruqꞌuin ja Jesucristo pro wi ni mta wiꞌ ja rutzil nuban ja ncꞌutbej chi cꞌoli ja yukulbal rucꞌuꞌx ¿la cꞌo cꞌa noc wariꞌ ja yukulbal rucꞌuꞌx nechꞌob ixix? Ja wi queriꞌ nuban ¿la ntotaj cꞌariꞌ rmal ja yukulbal rucꞌuꞌx nechꞌob ixix?

¹⁵ Tzucꞌa cꞌo ta jun kachꞌalal achi owi ixok congana ta rjawaxic tre, ni ta tak pena ja tak rtziak rcojon in ni ta majun nutij nojel tak kꞌij,

¹⁶ in jun ta cꞌa chewe quewaꞌ ta nbij tre riꞌ: —Jat cꞌa, tabanaꞌ cuenta awiꞌ, xtawil ta ja ratziak ja nacoj in ja natij chakajaꞌ, neꞌel ta tre. Queriꞌ nbij pro wi majun xuyaꞌel tre ja ncꞌatzin tre ¿nak cꞌa noc wariꞌ juleꞌ tzij ja xbijel tre nechꞌob ixix?

¹⁷ Queriꞌ cꞌa rbanic ja yukulbal acꞌuꞌx chakajaꞌ ja wi mta ja rutzil naban ja nacꞌutbej chi cꞌoli, in ja wi queriꞌ jariꞌ xa camnak chic ja yukulbal acꞌuꞌx, ni majun rsamaj.

¹⁸ Pro maxla cꞌo jun nbij chi junwiꞌ ja yukulbal kacꞌuꞌx ruqꞌuin ja Dios in junwiꞌ chi na ja rutzil jeꞌe ja nkaban. Pro anin nbij tre chi ma katzij ta ja yukulbal rucꞌuꞌx ruqꞌuin ja Dios ja wi mta ja rutzil nuban ja ncꞌutbej chi ni katzij wiꞌ chi cꞌoli ja yukulbal rucꞌuꞌx. Ja wi katzij chi cꞌo yukulbal nucꞌuꞌx ruqꞌuin ja Dios ma chaka ta cꞌoli pro nsamaji, ja cꞌa rutzil ja nban jeꞌe jariꞌ ncꞌutuwi chi cꞌoli.

¹⁹ Atat nabij chi cꞌo jun Dios in xarariꞌ jun in ni rubey wiꞌ ja queriꞌ nabij. Pro ja wi chaka nabij jariꞌ macattotaj rmal, queriꞌ na nquibij demonio, ejeꞌeꞌ chakajaꞌ nquibij chi cꞌo jun Dios pro maquetotaj rmal ja chaka nquibij, xa cꞌo jun nimlaj castigo cajal chiquewach in nebirbot rmal.

²⁰ Ja ramajon rchꞌobic xa mta noc wiꞌ. ¿La matawajoꞌ chi anin nchꞌob jutzꞌit chawach chi ja yukulbal acꞌuꞌx tok mta ja rutzil naban ja nacꞌutbej chi ni katzij wiꞌ cꞌo yukulbal acꞌuꞌx jariꞌ xa camnak chic ja yukulbal acꞌuꞌx?

²¹ Ja kamamaꞌ Abraham cꞌoli xuban ojer ja xcꞌutbej chi cꞌoli ja yukulbal rucꞌuꞌx ruqꞌuin ja Dios in rmal ja xuban chewiꞌ tok utz tzꞌat rmal ja Dios in ban tre caniꞌ mta ril rumac rbanon. Ja cꞌa xcꞌutbej jariꞌ tok ma xpokonaj ta xuyaꞌ parwiꞌ altar ja ti rcꞌajol rbinaꞌan Isaac chi noc rqꞌuexwach jun sacrificio, laj xcamsaj chwach ja Dios.

²² Triꞌ cꞌa natzꞌat wiꞌ chi ja yukulbal rucꞌuꞌx ja rAbraham janila samaji, cꞌoli xuban ja xcꞌutbej chi ni katzij wiꞌ chi cꞌo yukulbal rucꞌuꞌx. Arjaꞌ xnimaj ja bix tre rmal ja Dios jariꞌ xcꞌutbej chi ni katzij wiꞌ chi cꞌo yukulbal rucꞌuꞌx.

²³ In queriꞌ xuban, bantaj cumplir ja tzꞌibtal can chipan ja rtzobal Dios ojer, quewaꞌ nbij riꞌ: —Ja rAbraham arjaꞌ yukeꞌ rucꞌuꞌx ruqꞌuin ja Dios in rumac ja yukulbal rucꞌuꞌx chewiꞌ tok utz tzꞌat rmal ja Dios in ban tre caniꞌ mta ril rumac rbanon. Queriꞌ ja tzꞌibtal can. In bix tre ja rAbraham chakajaꞌ chi amigo xin Dios neꞌxi.

²⁴ Triꞌ cꞌa netzꞌat wiꞌ chi ma chaka ta ruyon ja yukulbal ecꞌuꞌx ncꞌatzini ja tok utz nattzꞌat rmal ja Dios como ni ncꞌatzin wiꞌ chi naban ja rutzil ja nacꞌutbej chi ni katzij wiꞌ chi cꞌo yukulbal acꞌuꞌx ruqꞌuin.

²⁵ In caniꞌ xuban chakajaꞌ ja rixok rbinaꞌan Rahab ja xa itzel ixok nabey, xa achiꞌiꞌ neryarij, arjaꞌ cꞌoli ja xuban in rmal ja xuban chewiꞌ tok utz tzꞌat rmal ja Dios. Tokoriꞌ xuban tok ecꞌo caꞌiꞌ achiꞌiꞌ xerwawaj pa rochoch ja retakonel rmal ja Josué, xerutoꞌ chipan ja camíc, junwiꞌ chic bey xerutakel wiꞌ.

²⁶ Caniꞌ tre jun achi tok mchita rxulaꞌnbal jariꞌ camnak chic. In queriꞌ cꞌa tre chakajaꞌ ja yukulbal acꞌuꞌx ruqꞌuin ja Dios, tok chaka nabij chi cꞌoli pro wi mta ja rutzil xin Dios naban chi nacꞌutbej jariꞌ xa camnak ja yukulbal acꞌuꞌx.