Santiago 1 - Tz'utujil (Ja Cꞌacꞌa Chominem)

¹ Anin in Santiago in ajsamajel rxin ja Dios in chakajaꞌ in ajsamajel rxin ja kajaw Jesucristo. Wachꞌalal, anin ntakel rutzil ewach ja rix cablajuj tribu aj Israel ja rixchictajnak ixbenak nojel nat nakaj.

* * * * * * * * * *

² Wachꞌalal, ja tok newil jeꞌe prueba chipan ja recꞌaslemal congana ta nixquicot rmal, ma quixbison ta.

³ Queriꞌ nbij chewe como ewotak chi ja prueba jariꞌ nkꞌalasani janiꞌ ja yukulbal ecꞌuꞌx ruqꞌuin ja Dios, ewotak chi wi cꞌol epaciencia chi rcochꞌic ja prueba quewaꞌ rcꞌamonto chewe riꞌ, más na nqꞌuiyi ja repaciencia chi rcochꞌic ja juleꞌ chic prueba ja penak chewach.

⁴ Teyaꞌaꞌ lugar tre ja paciencia chi nsamaj pa tak ewanma, teyaꞌaꞌ lugar tre chi nwinakarsaj nojel rwach ja rutzil xin Dios. Quirtariꞌ neban jutzꞌit utzcꞌa chi nqꞌuiyi utzcꞌa chi nwachini nojel rwach ja rutzil pa tak ewanma utzcꞌa chi majun ja maquita tzꞌakat tre ja rewanma.

⁵ Ja wi ecꞌoli chewe wi cꞌo jeꞌe ja matichꞌobtaj cumal nak rjawaxic chi nqueban tiquicꞌutuj tre ja Dios, arjaꞌ nuyaꞌ chique chi nchꞌobtaj cumal nak nqueban. Arjaꞌ nuyaꞌ chique xa nak ta necꞌutun tre in nojel rucꞌuꞌx nuyaꞌ chique, ma pa chꞌolinem ta.

⁶ Xarwariꞌ, rjawaxic chi yukul quecꞌuꞌx ruqꞌuin tok nquicꞌutuj tre, maxta xa caꞌiꞌ quecꞌuꞌx. Ja wi xa caꞌiꞌ acꞌuꞌx jariꞌ at junan ruqꞌuin ja nimak tak baloj pa mar, ma jun ta rubey, xa bar ta triꞌ ncꞌamarel wiꞌ rmal ja ikꞌ.

⁷ Ja winak ja queriꞌ nqueban maxta tiquechꞌob kaj chi cꞌoli nyataj chique ja netajini nquicꞌutuj tre ja kajaw Dios.

⁸ Ja cꞌa wi xa caꞌiꞌ acꞌuꞌx nacꞌutuj tre ja Dios triꞌ ntzꞌa̱t wiꞌ chi queriꞌ rbanic ja racꞌaslemal chaka ma at chꞌobol ta, ma cꞌayew ta naqꞌuex anaꞌoj.

* * * * * * * * * *

⁹ Ja mebaꞌiꞌ chewe quequicot rmal chi congana nimak quekꞌij netzꞌa̱t rmal ja Dios.

¹⁰ Ja cꞌa biyomaꞌ chewe quequicoti chakajaꞌ rmal chi chꞌobtajnak cumal chi e caniꞌ tak mebaꞌiꞌ chwach ja Dios. Queriꞌ nbij chewe como ejeꞌeꞌ e caniꞌ rusiꞌj kꞌayis xa nocꞌo rwach.

¹¹ Ja tok congana rwakꞌij nchakiji ja kꞌayis in ntiltoꞌi ja rusiꞌj, queriꞌ nuban, ba la noc wiꞌ ja rcoloril. Queriꞌ cꞌa quibanic ja biyomaꞌ chakajaꞌ, ejeꞌeꞌ quimajon rbanic ja quinegocio tok chaka jalal necami.

* * * * * * * * * *

¹² Kas quiꞌil chique ja necochꞌowi ja prueba ja nkꞌax jeꞌe chiquij. Ja tok nquechꞌec ja prueba jariꞌ nquicꞌutbej chi ni katzij wiꞌ chi cꞌo yukulbal quecꞌuꞌx ruqꞌuin ja Dios. Ja wi queriꞌ nqueban cꞌacꞌariꞌ xtiyataj chique ja premio jariꞌ jun utzlaj cꞌaslemal ja mta qꞌuisic trij, jariꞌ premio rtzujun ja Dios chique canojelal ja neꞌajoꞌn rxin.

¹³ Ja wi cꞌo jun chewe nunaꞌ kaj chi cꞌoli ntakchiꞌin rxin chi rbanic ja il mac maxta tibij chi Dios takchiꞌin rxin. Como ja Dios majun nak ta xtitakchiꞌin ta rxin chi rbanic ja ritzelal nixtacꞌa arjaꞌ ta xtitakchiꞌij ta jun chi rbanic.

¹⁴ Pro ja nwinakarto wiꞌ tok noktakchiꞌixi chikajujunal jariꞌ tok cꞌoli nkayarij kaj pa tak kanma ja nokruban engañar in kas pan ekal nokrujicꞌ.

¹⁵ Ja ma utz ta jeꞌe nkayarij kaj pa tak kanma kas pan ekal nqꞌuiyi, tok nqꞌuiswani nalaxi ja il mac pa tak kanma. Ja cꞌa il mac tok qꞌuiynak chic xa camíc rcꞌamonto.

¹⁶ Chakꞌlaj wachꞌalal maxta teban kaj engañar ewiꞌ eyon,

¹⁷ ja Dios ni ruyon wiꞌ utzil ja nuyaꞌto. Xa nak ta rutzil nkacochij, xa nak ta ja nsipax chake ja majun itzelal rcꞌan jariꞌ chilaꞌ chicaj npi wiꞌ, ja katataꞌ Dios arjaꞌ ntakoto. Ja luz ruqꞌuin ja Dios npi wiꞌ nojelal caniꞌ tre kꞌij, icꞌ in chꞌumil, in arjaꞌ mta jutij xtiqꞌuextaj ta, ni utz wiꞌ ja nuban, ni mta wiꞌ kꞌekumal rcꞌan.

¹⁸ Ja xuban, xuyaꞌ chake chi kacꞌaxaj ja utzlaj tzij xin Jesucristo in rmalariꞌ xokalax chic jutij in kawil ja utzlaj cꞌaslemal. Queriꞌ xuban chi xokoc nabey tak cosecha chiquewach ja juleꞌ chic winak como nijawariꞌ rvoluntad ja rchominto.

* * * * * * * * * *

¹⁹ Chakꞌlaj wachꞌalal, más na ncꞌatzin chake chi nkayaꞌ kaxquin tre ja nbix chake chwach ja maxcoꞌ noktzijoni, in maxta ma cꞌayew ta tipit ewayewal.

²⁰ Queriꞌ nbij chewe como ja rayewal ni majun utzil xin Dios rcꞌamonpi ta.

²¹ Rmalcꞌariꞌ nbij chewe, teyaꞌaꞌ can jutzꞌit nojel ja xa ntzꞌilorsaj ja rewanma. Janila ritzelal nalaxi in nqꞌuiyi pa tak kanma ja rok winak, teyaꞌaꞌ can nojelal. Nojel ecꞌuꞌx nojel ewanma teyaꞌaꞌ ewxquin chi rcꞌaxaxic ja utzlaj tzij ja ticon chic pa tak ewanma rmal ja Dios, jariꞌ utzlaj tzij janila rchokꞌakꞌ, nixrutoꞌ chipan ja rewil emac chijutij.

²² Pro ja utzlaj tzij maxta chaka tecꞌwaxaj, tebanaꞌ cumplir ja nbij. Ja wi chaka necꞌwaxaj jariꞌ xa eyon neban kaj engañar ewiꞌ.

²³ Queriꞌ rbanic como ja xa chaka nacꞌwaxaj jariꞌ at junan ruqꞌuin jun achi ja nutzꞌat rwach pan espejo.

²⁴ Pro chaka nutzꞌat. Chaka maril ntzꞌattaj rmal nbe in nmestaj janiꞌ ncaꞌyi.

²⁵ Pro ja wi nojel acꞌuꞌx nojel awanma nayaꞌ awxquin chi rcꞌaxaxic ja utzlaj tzij xin Jesucristo in wi ni matatanbaꞌ wiꞌ rnimaxic jariꞌ quicotemal xin Dios rcꞌamonpi chawe. Queriꞌ rbanic como ma chaka ta nacꞌwaxaj como matamestaj pro naban cumplir ja nbij chawe. Ja utzlaj tzij xin Jesucristo majun ja maquita tzꞌakat tre, jariꞌ nokwasanel libre.

²⁶ Ja wi nachꞌob chi congana animan ja Dios pro wi matakꞌil pan achiꞌ jariꞌ xa naban kaj engañar awiꞌ ayon, jariꞌ majun noc wiꞌ ja rareligión, mta noc wiꞌ ja chaka nabij chi animan ja Dios.

²⁷ Ja religión ja kas utz ntzꞌa̱t rmal ja katataꞌ Dios in nucꞌut chi katzij chi animan ja Dios quewaꞌ rbanic riꞌ, jun, natbe cuqꞌuin acꞌalaꞌ ja ma ecꞌo chi ta ja quitataꞌ queteꞌ in cuqꞌuin chakajaꞌ ja rixokiꞌ ja malcaniꞌ ja recamnak chic ja quichajilal in neꞌatoꞌoꞌ nak cꞌo rjawaxic chique. In jun chic, naban cuenta awiꞌ chwach ja ritzelal ja nqueban ja winak ja xa ruqꞌuin ja rwachꞌulew yukul wiꞌ quecꞌuꞌx, naban cuenta awiꞌ utzcꞌa chi matitzꞌilori ja rawanma rmal ja ritzelal.