Romanos 9 - Tz'utujil (Ja Cꞌacꞌa Chominem)

^1-3 Pro ja wach tak aj Israel ejeꞌeꞌ maticajoꞌ nquinimaj ja Jesucristo in congana npokonaj quewach, ni matel wiꞌ ja bis chwe cumal. Ni katzij wiꞌ ja nbij chewe chi congana ninbison cumal como ja Cristo cꞌayon wxin, ma npayil ta ja nbij chewe. Como ja rEspíritu Santo cꞌo pa wanma chewiꞌ wotak chi ni katzij wiꞌ ja nbij chewe. Ja wixta rubey na ja xquinwasaxel ta pa rukꞌaꞌ ja Cristo in xquintakel ta chipan ja rpokonal chi quitoꞌic ja wach tak aj Israel in conforme ta chi queriꞌ nba̱n chwe.

⁴ Pro makanaꞌ maquita e aj Israel, makanaꞌ maquita xerucoj ja Dios como e ralcꞌwal. In chakajaꞌ chꞌaꞌan jeꞌe chiquicojol ja gloria xin Dios. Ja cꞌa Dios cꞌo jeꞌe chominem xchomarsaj cuqꞌuin in chique xuyaꞌ wiꞌ ja ley in xuchꞌob chiquewach nak nqueban chi nquiyabej rukꞌij ja Dios in qꞌuiy rwach ja xtzujuj chique.

⁵ Makanaꞌ maquita e quijaꞌtzul can ja rAbraham ja rIsaac in Jacob, makanaꞌ maquita cach aj Israel ja Cristo tok xoc kach winak waweꞌ chwachꞌulew. Ja Cristo arjaꞌ Dios in majun ja maquita cꞌo rukꞌaꞌ tre, kas ta xtiyaꞌ rukꞌij camic, chwak in chijutij. Amén.

⁶ Como e qꞌuiy chique ja ma quiwilon ta ja totajem xin Dios ¿la tibij cꞌa tzij ariꞌ chi ja Dios ma rbanon ta cumplir ja rtzujunto chique chipan ja rtzobal? Ma queriꞌ ta como ma canojel ta ja raj Israel ja ni katzij wiꞌ chi e aj Israel chwach ja Dios.

⁷ In chakajaꞌ ma canojel ta ja riy rumam can ja rAbraham ja ni katzij wiꞌ chi e riy rumam can chwach ja Dios pro quewaꞌ bin can tre ja rAbraham rmal ja Dios riꞌ: —Abraham, ruqꞌuin ja rIsaac xquepi wiꞌ ja rawiy amam ja ni katzij wiꞌ chi awiy amam chinwach anin, neꞌxi.

⁸ Triꞌ cꞌa nkatzꞌat wiꞌ chi ja riy rumam can ja rAbraham ja chaka neꞌalaxi ma ejeꞌeꞌ ta ja reꞌocnak ralcꞌwal Dios pro ja wi atalaxnak rmal ja rtzujunto ja Dios jariꞌ ni katzij wiꞌ chi at riy rumam can ja rAbraham chwach Dios.

⁹ Queriꞌ cꞌa rbanic como ja rIsaac ma chaka ta xalaxi pro tzujux tre ja rAbraham rmal ja Dios quewariꞌ: —Quewaꞌ junaꞌ ninmelojpi chic jutij awqꞌuin, tokocꞌariꞌ ja rawixjayil Sara nqꞌuejeꞌ jun ti ral talaꞌ, neꞌxi ja rAbraham rmal ja Dios.

¹⁰ In ma ruyon tariꞌ pro queriꞌ rbanic chakajaꞌ ja tok Rebeca ecꞌo caꞌiꞌ tak ral pa gracia, e ralcꞌwal jun achi in jariꞌ achi Isaac ja kamamaꞌ.

^11-12 Ja cꞌa Rebeca majaꞌn queꞌalaxi ja caꞌiꞌ tak ral tok quewaꞌ bix tre rmal ja Dios riꞌ: —Ja nabey winak arjaꞌ xtiban mandar rmal ja rcabal, neꞌxi. Queriꞌ bix tre masqui majaꞌn queꞌalaxi ja caꞌiꞌ tak ral, masqui mta nak ta quibanon ta triꞌ, nixtacꞌa quibanon ta ja rutzil in nixtacꞌa quibanon ta ja ritzelal chakajaꞌ. Queriꞌ cꞌa rbanic utzcꞌa chi bien nchꞌobtaj kumal chi ja Dios neruchaꞌ ja winak echinatak ja cꞌo rgana neruchaꞌ in ma rmal ta ja quibanon tok neruchaꞌ.

¹³ Caniꞌ tzꞌibtal can chipan ja rtzobal Dios quewaꞌ nbij ja Dios riꞌ: —Ja Jacob jariꞌ xel nucꞌuꞌx trij pro xa itzel xintzꞌat ja rEsaú, neꞌe.

¹⁴ ¿La tibij cꞌa tzij ariꞌ chi ma rubey ta ja nuban ja Dios? Jariꞌ mta moda xtuban ta ja ma rubey ta.

¹⁵ Como ja Dios quewaꞌ rbin can tre ja Moisés riꞌ: —Anin xtinpokonaj quewach echinatak ja cꞌo ngana npokonaj quewach in xquenbisoj ja cꞌo ngana xquenbisoj, neꞌ tre.

¹⁶ Triꞌ cꞌa nkatzꞌat wiꞌ chi ja Dios ruqꞌuin arjaꞌ cꞌo wiꞌ wi npokonaj awach owi mani in ma rmal ta chi cꞌol agana chi npokonax awach rmal in ma rmal ta chakajaꞌ chi naban jun lucha chi npokonax awach rmal.

¹⁷ Caniꞌ tzꞌibtal can chipan ja rtzobal Dios tre ja rey Faraón quewaꞌ bix tre rmal ja Dios riꞌ: —Faraón, anin atncojon como rey utzcꞌa chi nkꞌalasaj janiꞌ ja nimlaj poder ja cꞌo pa nukꞌaꞌ como jariꞌ poder xtincoj chawij in natnkajsaj. Queriꞌ xtinban chawe utzcꞌa chi nel rbixic ja nubiꞌ nojel rwachꞌulew, neꞌe ja Dios tre.

¹⁸ Queriꞌ cꞌa nuban ja Dios, arjaꞌ npokonaj quewach echinatak ja cꞌo rgana npokonaj quewach in ncowirsaj canma chipan ja ritzelal echinatak ja cꞌo rgana nuban queriꞌ chique.

¹⁹ Ja tok necꞌwaxaj ja cꞌa xinbij chewe riꞌ seguro chi quewaꞌ nebij chwe riꞌ: —Ja wi queriꞌ nuban ja Dios chique winak ¿nak cꞌa tre tok cꞌa nuchꞌaꞌ na chique ja ritzelal nqueban? Ja wi ncajoꞌ owi mani mta moda ja maquita nqueban ja ni rchominto wiꞌ arjaꞌ chi nqueban, nixcheꞌ na chwe.

²⁰ Pro como xa ix winak ¿nak cꞌa ixocnak wiꞌ chewiꞌ tok necꞌulbaꞌ ja Dios? ¿La cꞌo ta cꞌa jun bojoꞌy xtibij ta tre ja banyon rxin: —¿Nak tre tok xa quewaꞌ abanon chwe, xticheꞌ ta tre?

²¹ Ja banol bojoꞌy tok cꞌo jun mulaj chꞌabak cꞌo chwach ¿la mta cꞌa rukꞌaꞌ tre ja chꞌabak xtuban tre nak cꞌo rgana nuban tre? ¿La mta rukꞌaꞌ tre chi nuban jun bojoꞌy tre ja congana nim rukꞌij in nuban chic jun bojoꞌy tre ja ma nim ta rukꞌij?

²² Ja Dios ¿la mta cꞌa rukꞌaꞌ tre chi nuban ja cꞌo rgana nuban? Caniꞌ xuban chique ja winak ja cꞌo ryewal chiquij in yatal chiquij chi neta̱kel chipan ja nimlaj rpokonal, arjaꞌ xucochꞌ ja ritzelal queban, janila rpaciencia cuqꞌuin. Xucochꞌ masqui nrajoꞌ nkꞌalasaj ja ryewal in masqui nrajoꞌ nkꞌalasaj ja poder ja cꞌo pa rukꞌaꞌ.

²³ Queriꞌ xuban utzcꞌa chi nkꞌalasaj chi janila nim ja gloria rxin ja nuyaꞌ chique ja winak ja npokonax quewach rmal. Ejeꞌeꞌ riꞌ nij echaꞌonto wiꞌ ojer rmal chi neꞌoc rachbil chipan ja nimlaj gloria rxin.

²⁴ Queriꞌ rbanon chake ja rokchaꞌon rmal, juleꞌ chake ok aj Israel pro ecꞌoli ja ma e aj Israel ta erchaꞌon chakajaꞌ.

²⁵ Caniꞌ tzꞌibtal can chipan ja rtzobal Dios rmal ja profeta Oseas quewaꞌ nbij ja Dios riꞌ: —Ja winak ja ma e ntinamit ta nabey nerilaꞌ na jun kꞌij tok xtinbij chique: —Camic ix ntinamit chic, xquincheꞌ chic chique. Ja winak ja ma xenwajoꞌ ta nabey nerilaꞌ na jun kꞌij tok xtinbij chique: —Camic nixwajoꞌ chic, xquincheꞌ chic chique, neꞌe ja Dios.

²⁶ In chakajaꞌ, ja bar bix wiꞌ chique rmal ja Dios chi ma e rtinamit ta triꞌ chipan ja mismo lugar xtibix chic wiꞌ chique chi e ralcꞌwal ja cꞌaslic Dios. Queriꞌ ja tzꞌibtal can.

²⁷ In chakajaꞌ cꞌoli bin can chique ja raj Israel rmal ja rojer profeta Isaías, quewaꞌ nbij riꞌ: —Ja raj Israel, masqui congana nquesep na quiꞌ, masqui congana cꞌayew chi neꞌaltaji pro xa ma e nim ta ja xquetotaj chique.

²⁸ Como ja Dios arjaꞌ rbin chic chi nutakpi na jun juicio parwiꞌ ja tinamit in jariꞌ matuyaꞌ más tiempo tre pro nutakto chanim. Queriꞌ rbin can ja rIsaías.

²⁹ In chakajaꞌ caniꞌ xbij ja rIsaías nabey chique ja rach tak aj Israel quewariꞌ: —Ja Dios ja rajaw caj in rwachꞌulew ja wixta maquita xuyaꞌ lugar chake chi ecꞌo jujun chake ja ma xecamsax ta cam ta cꞌa kawach ariꞌ ja rok aj Israel ja caniꞌ ban chique ja raj Sodoma in chique ja raj Gomorra ojer, neꞌe.

* * * * * * * * * *

³⁰ Nojel awaꞌ ja nmajon rbixic chewe quewaꞌ rbanic riꞌ. Ja winak ja ma e aj Israel ta ja quibanonto nabey ma ja ta neꞌoclaꞌ wiꞌ il tre ja wi utz quicꞌaslemal owi mani pro ja camic utz chic ja quicꞌaslemal nutzꞌat ja Dios pro xa rmal ja yukulbal quecꞌuꞌx ruqꞌuin ja Jesucristo tok nuban queriꞌ chique.

³¹ Pro ja quibanonto ja raj Israel congana neꞌoclaꞌ il chi rbanic cumplir jun ley in utz neli ja quicꞌaslemal rmal nquechꞌob ejeꞌeꞌ pro ni ma ecowinnak ta wiꞌ quibanon ta cumplir ja ley.

³² ¿Nak tre tok ma ecowinnak ta? Ma ecowinnak ta como ja nquechꞌob ejeꞌeꞌ chi xa natij akꞌij ayon chi rbanic cumplir ja nbij ja ley xin Dios chake chi nkaban in utz neli ja racꞌaslemal rmal pro ni matiqueyaꞌ wiꞌ cuenta tre ja Cristo wi rjawaxic chi nyukeꞌ acꞌuꞌx ruqꞌuin owi mani. Ja cꞌa Jesucristo arjaꞌ caniꞌ jun abaj ja nqꞌuejeꞌ pa quebey in ja queban ejeꞌeꞌ caniꞌ quechokꞌ cakan chwach ja rabaj.

³³ Caniꞌ tzꞌibtal can chipan ja rtzobal Dios quewaꞌ nbij ja Dios ja ncꞌambej tzij riꞌ: —Bien tecꞌwaxaj ja xtinbij chewe riꞌ, cꞌo jun abaj ja nmajon rcojic chipan ja tinamit Sión. Ja cꞌa winak nquechokꞌ na cakan chwach ja rabaj in nquetij na rpokonal rmal. Pro ja cꞌa winak ja xtiyukeꞌ quecꞌuꞌx ruqꞌuin ja rabaj ejeꞌeꞌ mta moda ja maquita xtiquewil ja totajem xin Dios. Queriꞌ rbin can ja Dios.