Romanos 7 - Tz'utujil (Ja Cꞌacꞌa Chominem)

¹ Wachꞌalal, ixix bien ewotak nak rbanic ja ley xin Dios in bien ewotak chi ja ley mchita rukꞌaꞌ chawe ja tok natcami.

² Caniꞌ tre jun ixok, ja ley xin Dios nbij chi jun ixok mta moda xtujach can ta ja rchajil ja tok cꞌa cꞌas na ja rachi. Pro ja cꞌa wi cami rchajil jariꞌ libre chic ja rixok chwach ja ley ja chapyon rxin ruqꞌuin ja rchajil.

³ Ja cꞌa wi cꞌa cꞌas na ja rchajil in wi nucꞌam chic jun achi jariꞌ nbix tre chi adulterio ja nuban. Pro ja wi camnak chic ja rchajil jariꞌ libre chic ja rixok chwach ja ley ja chapyon rxin ruqꞌuin ja camnak rchajil. Ja cꞌa wi ncꞌuleꞌ chic ruqꞌuin jun chic achi jariꞌ ma adulterio ta ja nuban.

⁴ In caniꞌ nuban ja rixok tok noc pa rcuenta jun chic achi queriꞌ cꞌa chewe ixix chakajaꞌ wachꞌalal, xixcam chwach ja ley utzcꞌa chi xixoc chic pa rcuenta ja Jesucristo. Rumac ja rcuerpo ja Cristo tok rip chwa cruz chewiꞌ tok xixcam chwach ja ley in xixoc chic pa rcuenta ja Jesucristo ja cꞌastajnak chic chiquicojol ja camnakiꞌ. Queriꞌ cꞌa kabanon utzcꞌa chi qꞌuiy rwach ja rutzil xtikaban ja caniꞌ najoꞌx chake rmal ja Dios chi nkaban.

⁵ Bien techꞌoboꞌ janiꞌ kacꞌaslemal nabey ja tok kaban xa nak ta cꞌo kagana nkaban. Ja tok cꞌo jeꞌe nchꞌa̱ꞌ chake rmal ja ley jariꞌ xa nucꞌas más ja ritzel tak yarinem ja cꞌo pa tak kanma. Ja cꞌa ritzel tak yarinem congana samaji, xucoj kakꞌaꞌ kakan chi rbanic ja ritzelal utzcꞌa chi qꞌuiy rwach ja ritzelal kaban pro juleꞌ itzelal ja xa pa camíc natrucꞌamel wiꞌ.

⁶ Pro ja camic okwasanel chic libre chwach ja ley, okcamnak chic chwach ja chapyon kaxin nabey. In ja camic cꞌacꞌa chic ja bey kucꞌan chi rnimaxic ja najoꞌx chake rmal ja Dios chi nkaban in ja rEspíritu Santo arjaꞌ chic nucꞌan kaxin chipan ja bey, ma ja ta ja rojer tak costumbre ja tzꞌibtal can.

* * * * * * * * * *

⁷ Ja wi queriꞌ rbanic ja ley xin Dios ¿nak cꞌa nkabij tre nechꞌob ixix? ¿La xa itzel ja ley? Ma itzel ta. Ja cꞌa wixta maquita cꞌoli ja ley maquita nchꞌobtaj ariꞌ mwal nak ja kas mero rbanic ja il mac. Ja ley nbij chi: —Maxta chaka benak chi nayarij quinakun winak, neꞌe. Pro ja wixta maquita cꞌoli ja ley maquita xinwotakij ariꞌ chi xa il mac ja nayarij quinakun winak.

⁸ Pro ja tok bix chwe chi: —Maxta chaka benak chi nayarij quinakun winak, tok xincheꞌxi, chanim xumaj samaj ja il mac, nojel rwach ja ritzel tak yarinem xucꞌas pa wanma. Queriꞌ cꞌa rbanic como ja tok matichꞌobtaj amwal nak ja kas mero rbanic ja ley jariꞌ xa matanaꞌ ja il mac ja naban.

⁹ Ja nabey ja tok majaꞌn tichꞌobtaj mwal nak ja kas mero rbanic ja ley anin in utzlaj achi ja nchꞌob kaj. Pro ja cꞌa tok chꞌobtaj mwal nak rbanic ja mandamiento xin Dios jariꞌ xa janiꞌ xumaj samaj ja il mac pa wanma, xa camíc yatal chic chwij ja nnaꞌ kaj chic.

¹⁰ Ja mandamiento xin Dios jariꞌ yataj chake utzcꞌa chi nokrucꞌaj chipan jun utzlaj cꞌaslemal. Ja chi utzlaj cꞌaslemal ntzujuj chake ja mandamiento xin Dios xa ek yatal camíc chwij rmal ja xinnaꞌ kaj anin

¹¹ como ja tok bix chwe chi: —Ma tayarij ta quinakun winak, tok xincheꞌxi, chanim xumaj samaj ja il mac, xinruban engañar, xucoj ja ley chwij in ja ranin chꞌobtaj mwal chi xa camíc yatal chic chwij rmal.

¹² Queriꞌ cꞌa rbanic ja ley, ma itzel ta, Dios yoyonto. Ja cꞌa mandamiento ja nkawil chipan ja ley, Dios yoyonto, utzlaj kꞌetoj tzij nucꞌut, utzil nrajoꞌ chake.

¹³ Pro wi utzil nrajoꞌ ja mandamiento chwe ¿la rumac cꞌariꞌ ja mandamiento tok xinnaꞌ kaj chi xa camíc yatal chic chwij? Jariꞌ ma rumac ta mandamiento pro rumac ja il mac. Queriꞌ rbanic utzcꞌa chi bien nchꞌobtaj kumal nak ja kas mero rbanic ja il mac utzcꞌa chi nkotakij chi congana itzel na ja il mac.

* * * * * * * * * *

¹⁴ Ja ley ma itzel ta como bien kotak chi ja ley ruqꞌuin ja rEspíritu Santo winakarnakto wiꞌ. No anin xa in winak, inchapon rmal ja il mac.

¹⁵ Inchapon como cꞌo jeꞌe nban chipan ja ncꞌaslemal pro xa matichꞌobtaj mwal nak la tre tok nban queriꞌ. Como anin tok nwajoꞌ nban ja rutzil pro matinban. Pro cꞌo juleꞌ itzelal ja ni majun ngana ruqꞌuin jariꞌ nban.

¹⁶ Queriꞌ cꞌa rbanic, anin nban ja ritzelal pro como mta ngana ruqꞌuin ja ritzelal triꞌ natzꞌat wiꞌ chi ja chwe anin ma itzel ta ja ley, utz.

¹⁷ Ja wi queriꞌ rbanic tibij cꞌa tzij ariꞌ chi ma anin ta ninbanowi ja ritzelal pro ja nbanowi jariꞌ ja il mac ja cꞌayon wxin.

¹⁸ Como anin bien wotak chi ja wanma ni majun utzil cꞌo chipan. Tibij cꞌa tzij ariꞌ chi ni majun utzil cꞌo chipan ja tzabuklaj cꞌaslemal wcꞌan. Mta como maquincowini nban ja rutzil masqui cꞌo ngana nban.

¹⁹ Anin cꞌo ngana ruqꞌuin ja rutzil pro matinban ja rutzil in ni majun ngana ruqꞌuin ja ritzelal pro nban ja ritzelal.

²⁰ Ja cꞌa wi nban ja ritzelal ja ni majun ngana ruqꞌuin tibij cꞌa tzij ariꞌ chi ma anin ta ninbanowi pro ja nbanowi jariꞌ ja il mac ja cꞌayon wxin.

²¹ In niquirwariꞌ ntzꞌaton chipan ja ncꞌaslemal, ja tok cꞌo ngana nban ja rutzil mta ariꞌ ja maquita cꞌoloc pa wanma ja ritzelal in numaj chꞌaꞌoj wqꞌuin.

²² Ja cꞌa kas mero pa wanma congana utz ncꞌwaxaj ja ley xin Dios.

²³ Pro ni cꞌoloc wiꞌ jun itzel poder ntzꞌaton ja cꞌayon rxin ja tzabuklaj cꞌaslemal wcꞌan. Ja ritzel poder ni rmajon wiꞌ chꞌaꞌoj ruqꞌuin ja utzlaj poder ja cꞌayon rxin ja nwiꞌ wanma in ninrucꞌamel preso pa rukꞌaꞌ ja il mac ja cꞌayon rxin ja tzabuklaj cꞌaslemal wcꞌan.

²⁴ Congana lawuloꞌ nuban chwe, xa pa camíc ninrucꞌamel wiꞌ. ¿Nak cꞌa xquintoꞌowi pa rukꞌaꞌ?

²⁵ Maltiox tre ja Dios chi arjaꞌ inrtoꞌon pa rukꞌaꞌ pro xa rumac ja kajaw Jesucristo tok rbanon queriꞌ chwe. Queriꞌ cꞌa rbanic, anin nojel nucꞌuꞌx nojel wanma nyaꞌ wiꞌ tre ja utzlaj poder ja nsamaj pan nwiꞌ wanma chi rnimaxic ja ley xin Dios. Pro ja cꞌa wi xtinyaꞌ wiꞌ tre ja ritzel poder ja nsamaj chipan ja tzabuklaj cꞌaslemal wcꞌan jariꞌ xa ninrucꞌamel pa rukꞌaꞌ ja il mac chi rbanic ja ritzelal.