Romanos 5 - Tz'utujil (Ja Cꞌacꞌa Chominem)

¹ Queriꞌ cꞌa rbanic, rumac ja yukulbal kacꞌuꞌx ruqꞌuin ja Dios chewiꞌ tok nba̱n chic chake rmal ja Dios caniꞌ mta kil kamac kabanon in rmalariꞌ tok oktzurnak chic ruqꞌuin ja Dios pro xa rmal ja kajaw Jesucristo tok banon queriꞌ chake.

² In jun chic, como ruqꞌuin ja Jesucristo yukul wiꞌ kacꞌuꞌx rmalariꞌ tok sipan chake jawaꞌ rutzil xin Dios ja cꞌa xinbij kaj chewe riꞌ in cow okpaꞌl chipan. In kotak chakajaꞌ chi nekachbilaj na ja Dios chipan ja utzlaj cꞌaslemal ja cꞌo wiꞌ arjaꞌ in congana nokquicoti chi raybexic.

³ In jun chic, congana nokquicot rmal chakajaꞌ ja rpokonal ja nkatij pa rubiꞌ ja Jesucristo. Nokquicoti como bien kotak chi chipan ja rpokonal nqꞌuiy wiꞌ más ja kapaciencia.

⁴ Ja cꞌa paciencia jariꞌ ncowirsan más ja kacꞌaslemal chi rbanic ja rutzil. Ja cꞌa tok ncowir más ja kacꞌaslemal chi rbanic ja rutzil jariꞌ xa janiꞌ nokquicot más chi raybexic nojel ja rtzujun chake ja Dios.

⁵ In nojel ja kayben ja rtzujun chake ja Dios mta moda ja maquita xtuyaꞌ in xtikayaꞌ ta kaqꞌuix rmal. Mta moda como ja Dios arjaꞌ bien rkꞌalasan chic chikawach chi congana nokrajoꞌ. Arjaꞌ xutakto ja rEspíritu Santo kuqꞌuin in xa janiꞌ nojnak ja rajoben riꞌil xin Dios pa tak kanma rmal.

⁶ Bien kꞌalaj chi congana nokrajoꞌ ja Dios como xutakto ja Cristo chi katoꞌic. Ajoj ni ma okcowinnak ta wiꞌ katoꞌon ta kiꞌ in ja tok xurwilaꞌ ja tiempo ja ni chomarsanto wiꞌ tokocꞌariꞌ peti ja Cristo, xurcam kaj pa kacuenta ja rok winak pro makanaꞌ maquita itzel ja kacꞌaslemal.

⁷ Masqui kas jic ja racꞌaslemal pro congana cꞌayew chi cꞌo jun winak ja maquita npokonaj ncam pan acuenta. Owi congana at utzlaj winak maxla ecꞌo jujun ja neqꞌuejeꞌ conforme chi necam amwal.

⁸ Pro ja Dios tok cꞌa okcꞌo na chipan ja kil kamac arjaꞌ xutakto ja Cristo chi xurcam kaj pa kacuenta in triꞌ xucꞌut wiꞌ chikawach nak rbanic ja rajoben riꞌil ja cꞌo tre chi congana nokrajoꞌ.

⁹ Ja Cristo wi conforme xuban queriꞌ chake ja tok cꞌa okcꞌo na chipan ja kil kamac más chi na conforme chi nokrutoꞌ camic. Como ja camic, rumac ja rquiqꞌuel banon chic chake caniꞌ mta kil kamac kabanon in rmalariꞌ tok bien kotak chi ma xtikaj ta chakij ja ryewal Dios como ja Cristo arjaꞌ xtitoꞌo kaxin chipan.

¹⁰ Ja Dios xa ok rcꞌulel ja tok peti ja Ralcꞌwal, xurcam kaj pa kacuenta in ja rcamic jariꞌ tzursan kaxin ruqꞌuin ja Dios. Ja Dios wi conforme xuban queriꞌ chake tok xa ok rcꞌulel más chi na conforme chi nokrutoꞌ camic. Como ja camic oktzurnak chic ruqꞌuin ja Dios in rmalariꞌ tok bien kotak chi ni xtiyataj na wiꞌ chake ja totajem xin Dios como cꞌastajnak chic ja Ralcꞌwal.

¹¹ In ma ruyon tariꞌ pro congana noktajini nokquicoti camic chakajaꞌ rumac ja xa jun kabanon chic ruqꞌuin ja Dios pro xa rumac ja kajaw Jesucristo tok banon queriꞌ chake como arjaꞌ tzursyon kaxin camic ruqꞌuin ja Dios.

* * * * * * * * * *

¹² In caniꞌ tre chakajaꞌ ja tok tzꞌucarto ja il mac waweꞌ chwachꞌulew xa rumac jun achi chewiꞌ tok tzꞌucarto. In tzꞌucarto ja camíc chakajaꞌ pro xa rumac ja il mac bani tok tzꞌucarto. Queriꞌ cꞌa bantaji, xa janiꞌ be más pa nim ja camíc, xa nokcami ja rok winak pro ni kanojelal. Nokcami como ok ajꞌil ok ajmaquiꞌ kanojelal.

¹³ Masqui chipan ja tiempo tok majaꞌn tiyaꞌi ja ley xin Dios tre ja Moisés pro ni cꞌo wiꞌ ja il mac nqueban ja winak triꞌ. Pro xarwariꞌ, ma xbix ta chique chi ley xin Dios ja matiquinimaj como majaꞌn tiyaꞌi ja ley chipan ariꞌ tiempo.

¹⁴ Pro ni xecam wiꞌ ja winak ja xeqꞌuejeꞌ chwachꞌulew chipan ja tiempo ja xumajto pa rtiempo Adán in xurqꞌuisaꞌ cꞌa pa rtiempo Moisés. Masqui ma junan ta rwach ja il mac queban chwach ja caniꞌ xuban ja rAdán pro ni xecam wiꞌ. Rumac ja rAdán tok tzꞌucarto ja camíc in rumac ja Jesucristo tok tzꞌucarto ja totajem xin Dios. Ja Jesucristo arjaꞌ ja Toꞌonel ja tzujunto ojer rmal ja Dios.

¹⁵ Pro ja totajem ja nsipaj ja Cristo jariꞌ más chi na samaji chwach ja il mac ja xuban ja rAdán. Congana samaji ja il mac ja xuban jun achi in congana e qꞌuiy ja winak ecamnak rmal. Pro más chi na samaji ja totajem ja nacochij tre ja Dios, más chi na samaji ja rutzil ja nsipaj chawe ja jun chic achi rbinaꞌan Jesucristo in congana e qꞌuiy ja winak etotajnak rmal.

¹⁶ Más chi na samaji ja totajem ja nsipaj ja Jesucristo chwach ja il mac ja xuban ja rAdán. Ja cꞌa rAdán arjaꞌ xuban jun il mac in xokyojtaji ja rok winak rmal, itzel chic xokrutzꞌat ja Dios rmal. Pro masqui congana qꞌuiy rwach ja il mac kaban pro ja totajem ja nsipaj ja Jesucristo jariꞌ chomarsani nojelal, utz chic nokrutzꞌat ja Dios rmal.

¹⁷ Rmal ja il mac ja xuban jun achi chewiꞌ tok xoqui ja camíc chakij ja rok winak in xokqꞌuejeꞌ pa rukꞌaꞌ ja camíc. Pro más chi na xtisamaji ja cꞌacꞌa cꞌaslemal ja nyataj chake rmal ja jun chic achi rbinaꞌan Jesucristo. Ja wi nkacochij tre ja Dios ja nimlaj totajem nuyaꞌ, wi Dios nbij chic chake chi: —Utz chic nixnutzꞌat, wi neꞌ chake, jariꞌ nokoc na rach kꞌetol tak tzij ja Jesucristo chipan jun cꞌacꞌa cꞌaslemal ja mta qꞌuisic trij.

¹⁸ Queriꞌ cꞌa rbanic, caniꞌ tre ja jun achi rbinaꞌan Adán arjaꞌ xuban jun il mac in rmal ja il mac xuban chewiꞌ tok itzel xokrutzꞌat ja Dios kanojel ja rok winak. In queriꞌ cꞌa tre ja jun chic achi rbinaꞌan Jesucristo chakajaꞌ arjaꞌ xuban jun utzlaj samaj in rmal ja utzlaj samaj xuban chewiꞌ tok nyataj chake kanojel camic chi utz chic nokrutzꞌat ja Dios chipan jun cꞌacꞌa cꞌaslemal.

¹⁹ Queriꞌ cꞌa rbanic como caniꞌ tre ja jun achi rbinaꞌan Adán arjaꞌ ma xnimaj ta ja Dios in congana e qꞌuiy xeꞌoc e ajꞌil e ajmaquiꞌ rmal. In queriꞌ cꞌa tre ja jun chic achi rbinaꞌan Jesucristo arjaꞌ xnimaj ja Dios in congana e qꞌuiy ja utz nerutzꞌat na ja Dios rmal.

²⁰ Ja cꞌa Dios tok xuyaꞌ ja ley tre ja Moisés jariꞌ xcꞌutbej chi xa janiꞌ benak más pa nim ja ritzelal ja nqueban ja winak. Pro masqui be más pa nim ja il mac pro más chi na be pa nim ja totajem ja nkacochij tre ja Dios.

²¹ Queriꞌ cꞌa rbanic utzcꞌa chi nyataj chic chake ja totajem ja nkacochij tre ja Dios utzcꞌa chi pa rukꞌaꞌ chic nokqꞌuejeꞌ wiꞌ. Caniꞌ tre nabey xa pa rukꞌaꞌ ja camíc xokqꞌuejeꞌ wiꞌ in xa nokcam rmal. Pro ja camic utz chic nokrutzꞌat ja Dios in rmalariꞌ arjaꞌ chijutij rmajon rsipaxic chake ja totajem. Queriꞌ cꞌa nuban chake utzcꞌa chi nokeqꞌuejeꞌ na chipan jun utzlaj cꞌaslemal ja mta qꞌuisic trij. Pro xa rmal ja kajaw Jesucristo tok xtiban queriꞌ chake.