Romanos 3 - Tz'utujil (Ja Cꞌacꞌa Chominem)

¹ Pro ja wi queriꞌ rbanic ¿la cꞌo cꞌa rcꞌamonpi chake ariꞌ chi ok aj Israel owi la cꞌo cꞌa xoc wiꞌ ariꞌ ja xokban circuncidar? maxla necheꞌ na ja winak chwe.

² Jariꞌ cꞌoli, congana qꞌuiy rcꞌamonto chake. Nabey, pa kakꞌaꞌ ajoj ja rok aj Israel ban wiꞌ recomendar ja rtzobal Dios chi nkaban cuenta.

³ Ecꞌo nacꞌa chake ja ma xeniman ta ja rtzobal Dios pro ¿la tibij cꞌa tzij ariꞌ chi ja Dios matuban cumplir ja ntzujuj chipan ja rtzobal?

⁴ Jariꞌ ni ma can ta wiꞌ. Ja cꞌa rok winak nixtacꞌa jun chake ja maquita xtutzꞌak ta tzij pro ja Dios ma queriꞌ ta, arjaꞌ ni katzij wiꞌ nojelal ja nbij. Caniꞌ tzꞌibtal can chipan ja rtzobal Dios quewaꞌ nbij riꞌ: —Queriꞌ cꞌa rbanic nataꞌ Dios utzcꞌa chi puersa xtikꞌalajin na chi atat ni utz wiꞌ ja naban, ni rubey wiꞌ nojelal ja nabij in tok wi cꞌoli xtichꞌaꞌ chawe pro nij atat wiꞌ xcatchꞌocmaji, neꞌe.

⁵ Pro ja ma utz ta nkaban wi jariꞌ xtikꞌalasan más chi ja Dios ni utz wiꞌ ja nuban ¿nak nechꞌob ixix tre? ¿La tibij an tzij ariꞌ chi ma rubey ta nuban ja Dios ja tok npi ryewal chakij rmal ja ritzelal ja nkaban? Pro ja cꞌa xinbij kaj chewe riꞌ jariꞌ xa quinaꞌoj winak.

⁶ Ja cꞌa Dios arjaꞌ ni mta wiꞌ moda xtuban ta ja ma rubey ta. Mta moda como ja Dios wixta cꞌoli ja ma rubey ta xtuban ¿nak ta cꞌa moda ariꞌ xticowin ta xtukꞌet ta tzij chakij ja rok winak?

⁷ Pro maxla quewaꞌ nabij chwe riꞌ: —Ja ranin wi cꞌo jeꞌe ja tzꞌakoj tzij nban, wi jariꞌ xtikꞌalasan más chi mta tzꞌakoj tzij nuban ja Dios in wi xtiyaꞌ más rukꞌij ja Dios rmal ¿nak cꞌa tre ja tok Dios cꞌa nbij na chwe chi in ajꞌil chi in ajmac in nukꞌet tzij chwij rmal?

⁸ Ja cꞌa wi queriꞌ rbanic ¿nak cꞌa tre ja tok ma quewaꞌ ta nkabij chique ja winak: —Kabanaꞌ cꞌa ja ritzelal utzcꞌa chi xtipi más ja rutzil, kocheꞌ na chique? maxla natcheꞌe. Na xa ecꞌoli winak quijolon ariꞌ ja itzel tijonem chakij, quilasan katzijoxic rmal. Pro ja neyoꞌ awaꞌ ja ritzel tijonem ja cꞌa xinbij chewe riꞌ ejeꞌeꞌ ni rubey wiꞌ chi nkꞌe̱t tzij chiquij in neta̱kel chipan ja rpokonal.

* * * * * * * * * *

⁹ ¿Nak cꞌa nkabij chic tre camic? Ja rajoj ja rok aj Israel ¿la más na utz noktzꞌat rmal ja Dios chiquewach ja ma e aj Israel ta? Jariꞌ ma queriꞌ ta. Como caniꞌ katzꞌaton chic ewqꞌuin chipan awaꞌ carta riꞌ chi ja rok winak okkajnak pa rukꞌaꞌ ja il mac pro ni kanojelal chi aj Israel chi ma aj Israel ta.

¹⁰ Caniꞌ nbij ja ley xin Dios ja tzꞌibtal can quewaꞌ nbij riꞌ: —Ni majun winak ja maquita ajꞌil ajmac pro nixtacꞌa jun.

¹¹ Ni majun ja kas ta chꞌobtajnak ta rmal nak rbanic ja rutzil, ni majun ja kas ta rmajon ta rotakixic janiꞌ ja kas mero rnaꞌoj ja Dios.

¹² Quiyaꞌon can ja utzlaj bey xin Dios pro ni canojelal, ni majun chic quisamaj tre ja Dios. Ni majun nbanowi ja rutzil pro nixtacꞌa jun.

¹³ Ja quechiꞌ congana itzel tak tzij nelto chipan, xa caniꞌ jul jakali ja cꞌo camnak chipan. Ja cakꞌ xa banbal engaño nquecoj wiꞌ. Ja tzij nelto pa quechiꞌ xa banbal camíc, xa caniꞌ veneno rcꞌan jun itzel cumatz.

¹⁴ Xa congana itzel tak tzij, xa congana pokonlaj tak tzij ja nquibij.

¹⁵ Chaka cꞌoli mani nequicamsaj winak.

¹⁶ Xa bar ta triꞌ nebe wiꞌ ni cꞌo wiꞌ camíc nqueban can, xa bis okꞌej nquetic can.

¹⁷ Ni ma cotak ta wiꞌ nak la rbanic ja quiꞌil natqꞌuejeꞌe.

¹⁸ Nixtacꞌa nquixbej ta jutzꞌit quiꞌ chwach ja Dios. Queriꞌ nbij ja rtzobal Dios.

¹⁹ Queriꞌ cꞌa nbij ja ley xin Dios in bien kotak chi chique nbij wiꞌ ja re aj Israel como ejeꞌeꞌ ecꞌo pa rukꞌaꞌ ja ley. Queriꞌ cꞌa rbanic utzcꞌa ja winak ni majun chique ja xticanoy chi ta rmal nak la chi tzijal xtibij ta ja xtitobej chi ta riꞌ chwach ja Dios in xticotakij na canojel chi e ajꞌil e ajmaquiꞌ pro ni canojelal in puersa nquejach na cuenta chwach ja Dios chi aj Israel chi ma aj Israel ta.

²⁰ Queriꞌ xtiqueban como ni majun winak ja ni ta rniman wiꞌ ja ley xin Dios, ni majun ja xtitotaji, xtiwasaxel ta libre chipan ja kꞌetoj tzij ja xtuban ja Dios xta rmal ja ley rniman. Queriꞌ nbij chewe como ja ley xin Dios jariꞌ xa nucꞌut chikawach chi ok ajꞌil ok ajmaquiꞌ.

* * * * * * * * * *

²¹ Pro ja camic kꞌalasan chic chikawach jun utzlaj kꞌetoj tzij ja xuban ja Dios ja xokrtobej ja rok winak in xokrwasajel libre chipan ja kil kamac pro ma rmal ta ja ley xin Dios kaniman chewiꞌ tok xokrwasajel libre. Xarwariꞌ, jawaꞌ ja xuban ja Dios ja cꞌa xinbij kaj chewe riꞌ ni tzꞌibtalto wiꞌ ojer chipan ja ley xin Dios chi nbantaj na in queriꞌ quitzꞌibanto ja rojer tak profeta xin Dios chakajaꞌ.

²² Quewaꞌ rbanic ja utzlaj kꞌetoj tzij ja xuban ja Dios riꞌ, xa rumac ja yukulbal kacꞌuꞌx ruqꞌuin ja Jesucristo rmalariꞌ xokrutoꞌ in xokrwasajel libre in queriꞌ cꞌa xtuban chique canojelal ja winak ja xtiyukeꞌ quecꞌuꞌx ruqꞌuin como xa ok junan chi nimlaj kanojelal.

²³ Xa ok junan como mta jun winak ja maquita cꞌo ril rumac rbanon, mta jun ja cowinnak ta rkꞌiꞌon ta chi nrcꞌaj ta ja mero utzlaj cꞌaslemal xin Dios.

²⁴ Pro ja Dios nokrwasajel libre, nuban chake caniꞌ mta kil kamac kabanon pro jariꞌ jun utzil nuban chake, xa nsipaj chake, mta nkalokꞌbej. Ja Cristo Jesús arjaꞌ tojowi ja kil kamac, xcꞌa rmalariꞌ ja tok nokwasaxel libre ja wi xa jun nkaban ruqꞌuin.

²⁵ Arjaꞌ takto waweꞌ chwachꞌulew rmal ja Dios chi xoc jun sacrificio pro jun sacrificio ja tzursan kaxin ruqꞌuin ja Dios. In noktzur ruqꞌuin ja Dios ja wi nyukeꞌ kacꞌuꞌx ruqꞌuin ja Jesucristo chi ja rquiqꞌuel arjaꞌ jariꞌ tojbexi ja kil kamac. Ja Dios tok xutoj ja kil kamac triꞌ xucꞌut wiꞌ chikawach chi arjaꞌ ni rubey wiꞌ nuban tre ja kꞌetoj tzij, ma chaka ta quiꞌ tre ja il mac nbani. Queriꞌ nbij chewe como arjaꞌ tok majaꞌn tipeti ja Jesucristo xa rcochꞌon ja il mac quibanonto ja winak.

²⁶ Pro arjaꞌ xutoj na utzcꞌa chi bien nkꞌalajin na chikawach ajoj ja rokcꞌo chipan awaꞌ tiempo riꞌ chi arjaꞌ ni rubey wiꞌ nuban tre ja kꞌetoj tzij. Queriꞌ cꞌa xuban utzcꞌa chi bien kꞌalaj chi arjaꞌ jun utzlaj kꞌetol tzij in ma ruyon tariꞌ pro utz chic nokrutzꞌat ja nyukeꞌ kacꞌuꞌx ruqꞌuin ja Jesús, nokrwasajel libre, nuban chake caniꞌ mta kil kamac kabanon.

²⁷ Ja wi queriꞌ rbanon chake ja Dios ¿nak ta cꞌa xtikayabej ta kakꞌij ajoj camic nechꞌob ixix? Jariꞌ ni mta wiꞌ. Mta como xa rumac ja yukulbal kacꞌuꞌx ruqꞌuin ja Jesús tok utz chic nokrutzꞌat ja Dios in ma rmal ta chi cꞌoli kaban ja kachꞌecbej ta.

²⁸ Triꞌ cꞌa nkatzꞌat wiꞌ chi ja Dios tok utz natrutzꞌat in tok natrwasajel libre chipan awil amac jariꞌ xa rmal yukulbal acꞌuꞌx ruqꞌuin ja Jesucristo tok nuban queriꞌ chawe in ma rmal ta chi cꞌoli ja ley xin Dios animan.

²⁹ In chakajaꞌ ja Dios arjaꞌ Dios kaxin chi nimlaj kanojelal, ma kayon ta kaxin ja rok aj Israel pro quixin chakajaꞌ ja ma e aj Israel ta.

³⁰ Quixin como xa jun ja Dios in ja Dios arjaꞌ utz nerutzꞌat na ja raj Israel ja wi xtiyukeꞌ quecꞌuꞌx ruqꞌuin ja Jesucristo in xa rumac ja yukulbal quecꞌuꞌx tok nerwasajel na libre in nuban chique caniꞌ mta quil quemac quibanon. Ja cꞌa ma e aj Israel ta utz nerutzꞌat na chakajaꞌ ja wi xtiyukeꞌ quecꞌuꞌx ruqꞌuin ja Jesucristo in xa rumac ja yukulbal quecꞌuꞌx tok nerwasajel na libre in nuban chique caniꞌ mta quil quemac quibanon.

³¹ Ja cꞌa tok yukul chic kacꞌuꞌx ruqꞌuin ja Jesucristo ¿la tibij cꞌa tzij ariꞌ chi mchita rsamaj chake ja ley xin Dios? Jariꞌ ma queriꞌ ta. Pro ja kas rubey, ja tok yukul kacꞌuꞌx ruqꞌuin ja Jesucristo jariꞌ más chi na nkanimaj ja ley xin Dios.