Romanos 2 - Tz'utujil (Ja Cꞌacꞌa Chominem)

¹ Como yatal camíc chiquij ja nebanowi ja ritzelal rmalcꞌariꞌ tok mta nquitobej quiꞌ ja winak ja tok neꞌoqui e caniꞌ kꞌetol tak tzij trij jun winak. Mta como ejeꞌeꞌ tok nquekꞌet tzij trij jariꞌ xa nquekꞌet kaj tzij chiquij ejeꞌeꞌ queyon. Queriꞌ cꞌa rbanic como ejeꞌeꞌ nquekꞌet tzij trij pro ejeꞌeꞌ jun nebanowi ja ritzelal chakajaꞌ.

² Bien cꞌa kotak chi ja Dios arjaꞌ ni rubey wiꞌ nuban ja tok nukꞌet tzij chiquij ja nebanowi ja juleꞌ itzelal ja nbin chic chipan awaꞌ carta riꞌ.

³ Ja cꞌa winak ja tok neꞌoqui e caniꞌ kꞌetol tak tzij chiquij cach tak winak tok nqueban ja ritzelal pro wi ejeꞌeꞌ jun nebanowi ja ritzelal chakajaꞌ ¿la maquita cꞌa xtukꞌet tzij ariꞌ chiquij ja Dios nechꞌob ixix?

⁴ Owi maxla xa ni mta nqueban tre nojel ja rbanon pa quicuenta ja Dios como arjaꞌ janila ja rutzil ryaꞌon chique, janila rcuyun ja ryewal chiquij, janila ja rpaciencia cuqꞌuin. ¿La ma cotak ta cꞌa chi ja Dios tok nuyaꞌ ja rutzil chique ma chaka ta nuyaꞌ chique pro rumac chi nqueqꞌuex ja quinaꞌoj, rumac chi nqueyaꞌ can ja ritzelal?

⁵ Pro como ja canma xa cowirnak chi rbanic ja ritzelal, como xa mta quigana xtiqueqꞌuex ta ja quinaꞌoj jariꞌ xa janiꞌ nquisiqꞌuij más ja ryewal Dios chiquij. Tokoriꞌ xtikaj chiquij ja ryewal Dios ja tok xterilaꞌ ja nimlaj kꞌij xin juicio. Chipan ariꞌ kꞌij ja Dios arjaꞌ xtukꞌet tzij chiquij ja winak in ni rubey wiꞌ ja kꞌetoj tzij xtuban.

⁶ Rubey nuban como arjaꞌ nuyaꞌ na rtojbalil chique ja winak janiꞌ queban chipan ja quicꞌaslemal chiquijujunal.

⁷ Juleꞌ xtuyaꞌ chique ja utzlaj cꞌaslemal ja mta qꞌuisic trij. Ejeꞌeꞌ riꞌ ja ni matiqueyaꞌ can wiꞌ ja banoj utzil como ejeꞌeꞌ xajutij quimajon rtijic quekꞌij chi nequilaꞌ ja gloria xin Dios, ja ta ncajoꞌ chi utz netzꞌa̱t rmal ja Dios in neqꞌuejeꞌ ta chipan jun quicotemal ja mta yojtajic trij.

⁸ In juleꞌ chic xa janiꞌ xtipi más ja ryewal Dios chiquij. Ejeꞌeꞌ riꞌ xa jaꞌ nquechꞌob ja cꞌo rcꞌamonto chique ejeꞌeꞌ queyon. Ma ja ta nquinimaj ja xin Dios pro xa nqueyaꞌ quiꞌ tre ja banoj itzelal.

⁹ Congana pokon xtiquetij na ja winak ja nebanowi ja ritzelal, congana lawuloꞌ xtiqueban rmal pro ni canojelal. Queriꞌ cꞌa xtiqueban chi aj Israel chi ma aj Israel ta xarwariꞌ chiquij ja raj Israel xtikaj wiꞌ nabey.

¹⁰ Pro canojel ja winak ja nebanowi ja rutzil ejeꞌeꞌ nequilaꞌ na ja gloria xin Dios, utz netzꞌa̱t na rmal ja Dios in neqꞌuejeꞌ na chipan ja quicotemal xin Dios. Queriꞌ cꞌa xtiqueban chi aj Israel chi ma aj Israel ta xarwariꞌ chique ja raj Israel xtiyataj wiꞌ nabey.

¹¹ Queriꞌ cꞌa rbanic como ja Dios arjaꞌ ma jun ta utz nutzꞌat in ma jun ta itzel.

¹² Queriꞌ nbij chewe como canojel ja winak ja ma quicꞌaxan ta ja ley xin Dios ja tzꞌibtal can rmal ja Moisés wi cꞌoli quil quemac quibanon jariꞌ nquetij na rpokonal rmal xarwariꞌ ma ja tariꞌ ley xin Moisés ja xtoc chiquij ja tok xquetakel chipan ja rpokonal. In canojel ja winak ja quicꞌaxan ja ley ja tzꞌibtal can rmal ja Moisés wi cꞌoli quil quemac quibanon jariꞌ nkꞌe̱t na tzij chiquij rmal xarwariꞌ ni ja wariꞌ ley xin Moisés ja xtoc chiquij chi rkꞌetic tzij chiquij.

¹³ Queriꞌ cꞌa rbanic como ja tok xcatekaj chwach ja kꞌetbaltzij xin Dios ja wi chaka acꞌwaxan ja nbij ja ley pro wi ma animan ta ja nbij chake chi nkaban jariꞌ macatwasaxel libre. Ja cꞌa wi animan ja nbij ja ley chake chi nkaban jariꞌ natwasaxel libre.

¹⁴ In caniꞌ chique ja ma e aj Israel ta ejeꞌeꞌ ma quicꞌaxan ta ja ley ja tzꞌibtal can rmal ja Moisés pro como ja canma nbin chique nak ja rutzil in nak ja ritzelal rmalcꞌariꞌ tok cꞌoli nqueban jeꞌe ja bien nucꞌam riꞌ ruqꞌuin ja caniꞌ nrajoꞌ ja ley chake chi nkaban. Ja tok queriꞌ nqueban jariꞌ cꞌo jun ley cucꞌan pa tak canma masqui ma quicꞌaxan ta ja ley ja tzꞌibtal can rmal ja Moisés.

¹⁵ Triꞌ cꞌa nkatzꞌat wiꞌ chi ejeꞌeꞌ caniꞌ pa tak canma tzꞌibtal wiꞌ ja caniꞌ nrajoꞌ ja ley chake chi nkaban. Ja cꞌa canma arjaꞌ nbin chique wi utzil ja quimajon rbanic owi xa itzelal. In chakajaꞌ nquechꞌob rij rwach ja nbantaj jeꞌe chiquicojol, cꞌo jeꞌe nbantaj cumal ja winak: —Xa itzel, necheꞌ tre, in cꞌo cꞌa nbantaji: —Ma itzel ta, necheꞌ tre.

¹⁶ Ja tok xterilaꞌ ja nimlaj kꞌij xin juicio tokoriꞌ xtibantaj cumplir nojel awaꞌ ja cꞌa xinbij kaj chewe riꞌ. Ja cꞌa tok xterilaꞌ riꞌ kꞌij ja Dios arjaꞌ xtucoj ja Jesucristo chi rkꞌetic tzij chiquij ja winak, xtucoj chi rkꞌalasaxic nojel ja quichꞌobon in nojel ja quibanon ja xa quiwawan pa tak canma. Queriꞌ nucꞌut chikawach ja utzlaj tzij xin Jesucristo ja ni nmajonto wiꞌ rbixic anin.

* * * * * * * * * *

¹⁷ Pro ecꞌoli quewaꞌ nquibij riꞌ: —Ajoj ok aj Israel, ok tinamit xin Dios, kas necheꞌe, pro jariꞌ xa quekꞌij ejeꞌeꞌ nqueyaꞌ kaj queyon. Ja nquechꞌob ejeꞌeꞌ chi nequilaꞌ na ja totajem xin Dios rumac ja cꞌo cuqꞌuin ja ley ja tzꞌibtal can rmal ja Moisés. Kas nqueyaꞌ quekꞌij chi cotak rwach ja Dios ja katzij chi Dios.

¹⁸ Cotak nak ja rvoluntad Dios, cotak nak ja rutzil in nak ja ritzelal como cꞌutun chiquewach nak nrajoꞌ ja ley chake chi nkaban.

¹⁹ Ejeꞌeꞌ nquechꞌob chi bien necowini nquechꞌob ja rbey Dios chiquewach ja winak ja ma cotak ta rwach ja Dios owi e caniꞌ jun luz ja nsakirsan quebey ja winak ja ma cotak ta nak ja rutzil in nak ja ritzelal

²⁰ owi bien necowini neꞌoc maestro quixin ja winak ja matichꞌobtaj cumal ja rtzobal Dios owi bien necowini nequitijoj ja re tak sencillo. Como cꞌoli ja ley cuqꞌuin ja ncꞌutu chiquewach ja tijonem ja katzij chi tijonem xin Dios xa chewiꞌ tok nquechꞌob chi bien necowini nqueban queriꞌ.

²¹ Como ejeꞌeꞌ nequitijoj juleꞌ chic ¿nak cꞌa tre tok matiquitijoj quiꞌ ejeꞌeꞌ chakajaꞌ? Nquibij chique winak chi: —Ma teban ta alakꞌ, necheꞌ chique, pro ¿la mta cꞌa alakꞌ nqueban ejeꞌeꞌ chakajaꞌ?

²² Nquibij chique winak chi: —Ma rubey ta jun achi nuban rij rwiꞌ ja rxjayil, pro ¿la mta cꞌa rij tak quewiꞌ quixjayilal ejeꞌeꞌ nqueban chakajaꞌ? Ejeꞌeꞌ kas itzel nequetzꞌat cachbal tak winak owi rachbal tak nakun jeꞌe ja nexuqueꞌ winak chiquewach pro ¿la mta cꞌa nqueban ejeꞌeꞌ chakajaꞌ ja xa itzel nutzꞌat ja Dios?

²³ Ejeꞌeꞌ congana nqueyaꞌ rukꞌij ja ley xin Dios ja tzꞌibtal can rmal ja Moisés pro como ejeꞌeꞌ mismo matiquinimaj ja nbij ja ley chake chi nkaban jariꞌ xa ruqꞌuix Dios nqueyaꞌ.

²⁴ Caniꞌ tzꞌibtal can chipan ja rtzobal Dios quewaꞌ nbij riꞌ: —Ja rubiꞌ Dios xa ntzꞌuji xa nyokꞌi cumal ja winak ja ma e rtinamit Dios ta pro xa emwal ixix ja tok nba̱n queriꞌ tre. Queriꞌ ja tzꞌibtal can.

²⁵ In caniꞌ tre ja tok neba̱n circuncidar jariꞌ retal chi e tinamit xin Dios in cꞌoli rcꞌamonto chique pro wi nquinimaj ja nbij ja ley xin Dios chake chi nkaban. Pro ja cꞌa wi matiquinimaj xcꞌa junan ariꞌ ruqꞌuin ja caniꞌ ma e rtinamit Dios ta masqui ebanon chic circuncidar.

²⁶ Caniꞌ tre jun achi ja ma banon ta circuncidar chakajaꞌ pro wi nuban ja rutzil ja caniꞌ nrajoꞌ ja ley xin Dios chi nkaban ¿la ma junan ta cꞌariꞌ ruqꞌuin ja caniꞌ rtinamit Dios masqui ma banon ta circuncidar?

²⁷ Ja winak ja ma banon ta circuncidar ja quicuerpo pro wi nqueban ja rutzil ja caniꞌ nrajoꞌ ja ley chake chi nkaban jariꞌ nkꞌetbex na tzij chiquij ja maquenimani. Queriꞌ xtiban chique como ejeꞌeꞌ cꞌoli ja ley cuqꞌuin ja tzꞌibtal can in ebanon circuncidar pro xa matiquinimaj ja nbij ja ley chake chi nkaban.

²⁸ Queriꞌ cꞌa rbanic como ejeꞌeꞌ masqui e aj Israel, masqui e rtinamit Dios necheꞌxi, pro xa ma katzij ta chi e rtinamit Dios ja wi xa chi quechiꞌ cꞌo wiꞌ. In masqui ebanon circuncidar necheꞌxi, pro xa ma katzij ta chi ebanon circuncidar ja wi chaka costumbre chique in wi xa ruyon ja quicuerpo ja banon circuncidar.

²⁹ Ja cꞌa wi nachꞌuclaꞌaj ja rtzobal Dios jariꞌ katzij chi at aj Israel, jariꞌ katzij chi at rtinamit Dios. In chakajaꞌ, wi majtajnak rchꞌachꞌojirsaxic ja rawanma, wi nsamaji ja rEspíritu Santo pan awanma jariꞌ jun circuncisión ja katzij chi circuncisión, ma ja ta ja circuncisión ja chaka ta acuerpo nba̱n circuncidar. Ja cꞌa wi queriꞌ abanon atat, ja cꞌa Dios arjaꞌ nbin chawe: —Congana utz natnutzꞌat, neꞌ chawe, masqui majun winak xtibin ta queriꞌ chawe.