Romanos 16 - Tz'utujil (Ja Cꞌacꞌa Chominem)

¹ Camic cꞌo jun kachꞌalal ixok ntakel ewqꞌuin rbinaꞌan Febe, arjaꞌ jun ajsamajel chipan ja riglesia ja cꞌo chipan ja tinamit Cencrea.

² Ja cꞌa tok xtekaj ewqꞌuin congana nban recomendar chewe chi necꞌul pa rubiꞌ ja kajaw Jesucristo como nijawariꞌ yatal chake chi nkaban ja rok tinamit xin Dios. Ja kas nwajoꞌ chewe chi netoꞌ ja kachꞌalal Febe tre xa nak ta ncꞌatzin tre como arjaꞌ e qꞌuiy ja kachꞌalal ertoꞌon in chakajaꞌ inrtoꞌon anin.

³ Teyaꞌaꞌ rutzil rwach ja rAquila rachbil Priscila, ejeꞌeꞌ e wachbil chipan ja samaj xin Cristo Jesús

⁴ in queban jutij jutzꞌit laj xecami chi ntoꞌic. Anin janila nmaltioxij chique pro ma nuyon ta anin nmaltioxij chique pro canojel ja kachꞌalal ja ma e aj Israel ta ja recꞌo pa tak iglesia jeꞌe ejeꞌeꞌ nquimaltioxij chique chakajaꞌ.

⁵ In chakajaꞌ teyaꞌaꞌ rutzil quewach ja riglesia ja nquemol quiꞌ pa cochoch. Teyaꞌaꞌ rutzil rwach ja chakꞌlaj kachꞌalal Epeneto, arjaꞌ kas yukeꞌ rucꞌuꞌx ruqꞌuin ja Jesucristo nabey chiquewach ja juleꞌ chic kachꞌalal ja recꞌo chipan ja departamento Acaya.

⁶ Teyaꞌaꞌ rutzil rwach ja María, arjaꞌ congana jun samaj rbanon checojol.

⁷ Teyaꞌaꞌ rutzil rwach ja rAndrónico rachbil Junias, ejeꞌeꞌ e wach tak aj tinamit in kaban jutij xa junan katij pa cheꞌ cuqꞌuin. Kas lokꞌ nenaꞌi ja rAndrónico in Junias chiquicojol ja rapóstol in chakajaꞌ yukeꞌ quecꞌuꞌx ejeꞌeꞌ nabey ruqꞌuin ja Cristo chinwach anin.

⁸ Teyaꞌaꞌ rutzil rwach ja rAmplias, arjaꞌ chakꞌlaj kachꞌalal como arjaꞌ chakajaꞌ xa jun rbanon ruqꞌuin ja kajaw Jesucristo.

⁹ Teyaꞌaꞌ rutzil rwach ja Urbano como junan xoksamaj ruqꞌuin pa rcuenta ja Cristo. Teyaꞌaꞌ rutzil rwach ja chakꞌlaj kachꞌalal Estacas chakajaꞌ.

¹⁰ Teyaꞌaꞌ rutzil rwach ja rApeles, arjaꞌ ni kꞌalaj wiꞌ chi xa jun rbanon ruqꞌuin ja Cristo. In teyaꞌaꞌ rutzil quewach chakajaꞌ ja recꞌo pa rochoch ja rAristóbulo.

¹¹ Teyaꞌaꞌ rutzil rwach ja Herodión, arjaꞌ wach aj tinamit. In teyaꞌaꞌ rutzil quewach chakajaꞌ ja recꞌo pa rochoch ja Narciso ja xa jun quibanon ruqꞌuin ja kajaw Jesucristo.

¹² Teyaꞌaꞌ rutzil quewach ja Trifena rachbil Trifosa, ejeꞌeꞌ e ajsamajelaꞌ rxin ja kajaw Jesús. In teyaꞌaꞌ rutzil rwach chakajaꞌ ja chakꞌlaj kachꞌalal Pérsida, arjaꞌ congana jun samaj rbanon pa rcuenta ja kajaw Jesús.

¹³ Teyaꞌaꞌ rutzil rwach ja Rufo, arjaꞌ jun ajsamajel chaꞌon rmal ja kajaw Jesucristo in teyaꞌaꞌ rutzil rwach ja ruteꞌ chakajaꞌ como arjaꞌ xuban chwe in caniꞌ chakꞌlaj ral.

¹⁴ In juleꞌ chic ja teyaꞌaꞌ rutzil quewach riꞌ, Asíncrito, Flegonte, Hermas, Patrobas, Hermes in canojel ja kachꞌalal ja recꞌo cuqꞌuin.

¹⁵ In juleꞌ chic riꞌ, Filólogo rachbil Julia, Nereo rachbil ja ranaꞌ, Olimpas in canojel ja tinamit xin Dios ja recꞌo cuqꞌuin.

¹⁶ Ja tok nemol ewiꞌ teyaꞌaꞌ rutzil ewach chibil tak ewiꞌ pro ruqꞌuin ta ja rajoben riꞌil xin Dios. Ja juleꞌ chic kachꞌalal ja nquemol quiꞌ pa rubiꞌ ja Cristo, ejeꞌeꞌ nquetakel rutzil ewach ixix.

¹⁷ Camic wachꞌalal congana nban recomendar chewe, tebanaꞌ cuenta chiquewach ja re ticol tak división in chꞌaꞌoj, juleꞌ winak ja nqueyaꞌ jun tijonem ja matucꞌam riꞌ ruqꞌuin ja tijonem ja cꞌut chewach ixix, ma queꞌewachbilaj ta.

¹⁸ Ejeꞌeꞌ riꞌ winak ma ja ta ja kajaw Jesucristo nquinimaj pro xa quivoluntad ejeꞌeꞌ nqueban kaj queyon. Congana buen tak tzij nquibij, kas nekꞌoloni pro jariꞌ xa nequibanbej engañar ja kachꞌalal ja re tak sencillo.

¹⁹ Ja cꞌa rixix wachꞌalal, bien otakin chic nojel nat nakaj chi congana nixnimani in congana ninquicot chewij rmal xarwariꞌ nwajoꞌ chewe chi bien techꞌoboꞌ nak rbanic ja banoj utzil in xtiqꞌuejeꞌ ta nat chewe ja banoj itzelal.

²⁰ Ja cꞌa Dios ja nyowi ja quicotemal arjaꞌ nkajsaj na chanim ja rchokꞌakꞌ ja Satanás in nbe ja Satanás xeꞌ ewakan. Ja camic xtiqꞌuejeꞌ ta ewqꞌuin ja rutzil ja nkacochij tre ja kajaw Jesucristo. Amén.

²¹ Ja Timoteo ja wachbil chipan ja samaj xin Jesucristo arjaꞌ nutakel rutzil ewach in queriꞌ nqueban chakajaꞌ ja Lucio, ja Jasón in Sosípater, ejeꞌeꞌ e wach tak aj tinamit.

²² Ja Tercio arjaꞌ rmajon rtzꞌibaxic jawaꞌ carta riꞌ in arjaꞌ chakajaꞌ nutakel rutzil ewach pa rubiꞌ ja kajaw Jesucristo.

²³ Ja Gayo nutakel rutzil ewach, arjaꞌ ryaꞌon ja nposada in pa rochoch arjaꞌ nquemol wiꞌ quiꞌ ja riglesia canojel. Ja Erasto ja tesorero xin tinamit arjaꞌ nutakel rutzil ewach in queriꞌ nuban ja kachꞌalal Cuarto chakajaꞌ.

²⁴ Xtiqꞌuejeꞌ ta ewqꞌuin ewanojel ja rutzil ja nkacochij tre ja kajaw Jesucristo. Amén.

* * * * * * * * * *

²⁵ Ja camic ja kas nwajoꞌ anin chi ja Dios ni ta xtiyaꞌ wiꞌ rukꞌij pro ni ta chijutij. Ja Dios arjaꞌ bien ncowini ncowirsaj ecꞌuꞌx utzcꞌa chi cow nixpeꞌi chi rnimaxic ja Jesucristo. Queriꞌ nbij ja utzlaj tzij ja nmajon rbixic chewe, juleꞌ tzij ja nucꞌut chikawach nak rbanic ja Jesucristo. Jawaꞌ utzlaj tzij riꞌ nij awatalto wiꞌ jaruꞌ pa tiempo kas tzꞌucarnakto ja rwachꞌulew pro ja camic kꞌalasan chic chikawach.

²⁶ Ja Dios arjaꞌ rkꞌalasan chic chikawach camic ja utzlaj tzij in chakajaꞌ cꞌo jeꞌe ja quitzꞌiban can ja rojer tak profeta xin Dios ja noqui camic chi rkꞌalasbexic ja utzlaj tzij chiquewach ja winak pro ni chiquewach canojelal ja winak xa nak ta chi tinamital ecꞌo wiꞌ. Ja cꞌaslic Dios ja ni mta wiꞌ camíc trij arjaꞌ ryaꞌon jun orden chi nkꞌalasaxi ja utzlaj tzij chiquewach canojel ja winak utzcꞌa chi ejeꞌeꞌ nyukeꞌ quecꞌuꞌx ruqꞌuin ja Jesucristo in nquinimaj.

²⁷ Rumac cꞌa ja Jesucristo chewiꞌ tok nbij chewe, kayaꞌaꞌ rukꞌij ja Dios ja ni xarwariꞌ jun chi Dios, jun Dios ja majun nak ta nkꞌiꞌo ta ja rnaꞌoj. Ni ta xtiyaꞌ wiꞌ rukꞌij camic, chwak in chijutij. Amén.