Romanos 12 - Tz'utujil (Ja Cꞌacꞌa Chominem)

¹ Wachꞌalal, camic katzꞌaton chic ewqꞌuin chi ja Dios janila rpokonan kawach, janila rbanonto pa kacuenta chi katoꞌic. Rmalcꞌariꞌ congana nban recomendar chewe chi netzujuj ja recuerpo pa rukꞌaꞌ ja Dios chi rbanic ja rvoluntad. Toqui ja recuerpo caniꞌ jun sacrificio pro jun sacrificio cꞌasli, jun sacrificio bien chꞌajchꞌoj, jun sacrificio ja utz ntzꞌa̱t rmal ja Dios. Ja wi queriꞌ neban jariꞌ ni katzij wiꞌ chi yaꞌbal rukꞌij Dios ja neban.

² Maxta tewcꞌaj ixix jun cꞌaslemal ja caniꞌ quicꞌaslemal winak ja xa ruqꞌuin rwachꞌulew yukul wiꞌ quecꞌuꞌx. Pro ja neban, kꞌij kꞌij teyaꞌaꞌ lugar tre ja Dios chi arjaꞌ nuqꞌuex ja renaꞌoj, teyaꞌaꞌ lugar tre chi nucoj cꞌacꞌa tak naꞌoj chewe. Queriꞌ ta xteban jutzꞌit utzcꞌa chi newotakij janiꞌ rvoluntad ja Dios utzcꞌa chi newotakij nak ja utz ntzꞌa̱t rmal ja Dios utzcꞌa chi newotakij chakajaꞌ chi ja rvoluntad ja Dios jariꞌ ni utz wiꞌ in majun nak ta falta tre.

³ Como ja Dios ryaꞌon chwe chi inocnak apóstol rxin ja Jesucristo chewiꞌ tok cꞌo jun paxbanem nyaꞌ chewe riꞌ chejujunal. Maxta congana ix nimak tenaꞌ kaj pro kas techꞌoboꞌ chi utz nak ja kas mero ebanic chejujunal. Bien techꞌoboꞌ chi Dios yoyon chewe ja yukulbal ecꞌuꞌx in xa chewiꞌ tok nixcowini neban ja samaj xin Dios.

⁴ Queriꞌ nbij chewe como qꞌuiy rwach ja samaj ja yatajnak chake chi nkaban. Queriꞌ rbanic caniꞌ rbanic ja kacuerpo, cꞌo wiꞌ rsamaj kawiꞌ in pakawach in cꞌo wiꞌ rsamaj kakꞌaꞌ in kakan, ma jun ta rsamaj chi nojelal.

⁵ In queriꞌ cꞌa chake ajoj chakajaꞌ ja rok xin Jesucristo, ok qꞌuiy pro xa jun cuerpo kabanon kanojelal, ok cuerpo rxin ja Cristo, xa jun kabanon, kayuklaꞌon kiꞌ chibil tak kiꞌ.

⁶ Cꞌo cꞌa ja yatajnak chake rmal ja Dios ja rokocnak wiꞌ pro ma junan ta ja rokocnak wiꞌ. Kasamajij cꞌa ja samaj ja ryaꞌon ja Dios chake chikajujunal. Ja wi Dios ryaꞌon chawe chi natcowini nayaꞌ rbixic ja nkꞌalasaj arjaꞌ chawach tayaꞌaꞌ cꞌa rbixic pro xarwariꞌ rjawaxic chi bien nucꞌam riꞌ ja nabij ruqꞌuin ja tijonem xin Jesucristo ja bar yukul wiꞌ kacꞌuꞌx.

⁷ Ja wi Dios ryaꞌon chawe chi neꞌawilij ja kachꞌalal queꞌawilij cꞌa. Ja wi ryaꞌon chawe chi neꞌatijoj queꞌatijoj cꞌa.

⁸ Ja wi ryaꞌon chawe chi neꞌapaxbaj queꞌapaxbaj cꞌa. Ja wi ryaꞌon chawe chi neꞌatoꞌ ja cꞌo rjawaxic chique queꞌatoꞌoꞌ cꞌa pro nojel acꞌuꞌx nojel awanma. Ja wi ryaꞌon chawe chi neꞌawcꞌaj ja kachꞌalal tatijaꞌ cꞌa akꞌij chi cucꞌaxic, maxta catsakꞌorini. Ja wi ryaꞌon chawe chi nayukbaꞌ quecꞌuꞌx ja netiꞌoni tabanaꞌ cꞌa pro catquicoti chi rbanic.

* * * * * * * * * *

⁹ Tewajoꞌ ewiꞌ pro nojel ecꞌuꞌx nojel ewanma. Itzel tetzꞌataꞌ ja ritzelal, kas tel ecꞌuꞌx chi rbanic ja rutzil.

¹⁰ Caniꞌ nuban jun winak lokꞌ nerunaꞌ ja rchꞌalal queriꞌ ta cꞌa neban ixix chakajaꞌ kas lokꞌ tenaꞌaꞌ ewiꞌ chibil tak ewiꞌ in tebanaꞌ respetar ewiꞌ chibil tak ewiꞌ chakajaꞌ.

¹¹ Tetijaꞌ ekꞌij chi rbanic ja samaj ja ryaꞌon ja Dios chewe chi neban, maxta quixsakꞌorini. Kas ta xtimakꞌeꞌ ewiꞌ ewanma chi rbanic xa nak ta ja najoꞌx chewe rmal ja kajaw Jesucristo chi neban.

¹² Quixquicoti chi raybexic nojelal ja rtzujun ja Dios chake. Ja tok cꞌoli npi chewij tiqꞌuejeꞌe ja repaciencia chi rcochꞌic. Maxta quixcosi chi rbanic ja roración.

¹³ Queꞌetoꞌoꞌ ja kachꞌalal ja cꞌo rjawaxic chique. Ja tok ecꞌoli ja ncꞌatzin posada chique teyaꞌaꞌ quiposada.

¹⁴ Ja nebano pokon chewe tecꞌutuj tre ja Dios chi nuyaꞌ ja rutzil pa quewiꞌ, maxta tecꞌutuj tre chi neruyaꞌ chipan jun rpokonal.

¹⁵ Ja tok ecꞌoli nequicoti quixquicot ixix cuqꞌuin chakajaꞌ. Ja cꞌa tok ecꞌoli neꞌokꞌi quixokꞌ ixix cuqꞌuin chakajaꞌ.

¹⁶ Xta jun neban ewanojelal, xta jun nechꞌob. Maxta congana ix nimak tenaꞌ kaj pro ja neban, kas tel ecꞌuꞌx chiquij ja re tak sencillo chi neꞌewachbilaj. Maxta xa ix kꞌolaꞌ, maxta techꞌob chi congana ewotak.

¹⁷ Ja wi cꞌo jun winak xtibano itzel chewe xa nak ta chi winakil maxta teyaꞌ rjil rcꞌaxel. Tecꞌutuꞌ ja rewutzil chiquewach ja winak, maxta xa itzel tiquetzꞌat ja neban chiquewach.

¹⁸ Ja wi nixcowini kas ta quiꞌil nixqꞌuejeꞌe cuqꞌuin ja winak canojelal, maxta cꞌoli teban ixix ja xa nuyic jun chꞌaꞌoj chiquicojol.

¹⁹ Chakꞌlaj wachꞌalal, ja tok cꞌo jun xtibano jun itzel chewe maxta teyaꞌ rjil rcꞌaxel pro ja neban, tejachaꞌ pa rukꞌaꞌ ja Dios chi arjaꞌ nbano castigar rxin. Caniꞌ tzꞌibtal can chipan ja rtzobal Dios quewaꞌ nbij ja kajaw Dios riꞌ: —Xa nuyon anin yatal chwe chi nyaꞌ rjil rcꞌaxel chique ja winak ja nebanowi ja ritzelal, neꞌe.

²⁰ Rmalcꞌariꞌ tok nbij chewe, wi cꞌo jun ecꞌulel in wi nkꞌakꞌan rupan teyaꞌaꞌ rway. Ja cꞌa wi nchakij ruchiꞌ teyaꞌaꞌ ruyaꞌ. Ja wi queriꞌ neban tre jariꞌ qꞌuixbal xtunaꞌ rmal in numaj tiꞌonem ja ranma rmal ja rbanon chewe.

²¹ Ja tok cꞌo jun itzel nba̱n chewe, wi neyaꞌ rjil rcꞌaxel jariꞌ xa nixruchꞌec ja ritzelal. Mejor ja neban, tebanaꞌ ja rutzil chique ja nebano itzel chewe jariꞌ ixix nixchꞌeco rxin ja ritzelal.