Romanos 11 - Tz'utujil (Ja Cꞌacꞌa Chominem)

¹ Pro majutij techꞌob chi ja Dios erchꞌakin can ta ja raj Israel como in aj Israel anin chakajaꞌ. Como anin in riy rumam can ja rAbraham, ruqꞌuin ja tribu xin Benjamín inpenak wiꞌ.

² Ja Dios arjaꞌ ma erchꞌakin can ta ja tinamit Israel como nij erchaꞌonto wiꞌ ojer chi neꞌoc rtinamit. ¿La ma ewotak ta cꞌa ja tzꞌibtal can chipan ja rtzobal Dios ojer? Como ja rojer profeta Elías arjaꞌ xa itzel xutzꞌat ja queban ja rach tak aj Israel in quewaꞌ xbij tre ja Dios riꞌ:

³ —Kajaw Dios, xa equicamsan ja profeta ja xeyoꞌ rbixic ja ratzobal, xa quiyojon jeꞌe ja raltar ja bar kayaꞌ wiꞌ akꞌij. Ja cꞌa camic xa nuyon chic anin incꞌo can pro ncajoꞌ ninquicamsaj chic anin chakajaꞌ, neꞌ tre.

⁴ Pro kas turkaj chewe ja bix tre ja rElías rmal ja Dios: —Ma ayon ta como ecꞌo na wukuꞌ mil achiꞌiꞌ ja neniman wxin ja mta jutij exucul ta chwach ja rachbal winak rbinaꞌan Baal, neꞌxi ja rElías.

⁵ In queriꞌ cꞌa tre ja tiempo ja rokcꞌo wiꞌ camic riꞌ, okcꞌo jujun ja rok aj Israel ja rokchaꞌon rmal ja Dios pro xa rmal ja rutzil tok xokruchaꞌ, xa siptal chake.

⁶ Ja cꞌa wi siptal chake mta cꞌa moda ariꞌ xtikabij ta tre chi cꞌoli kaban ja kachꞌecbej ta. Ja wixta cꞌoli kaban ja kachꞌecbej mta cꞌa moda ariꞌ xtikabij ta tre chi siptal chake.

⁷ Ja nmajon rbixic chewe ¿nak cꞌa nucꞌut chikawach? Quewaꞌ nucꞌut chikawach riꞌ, ja tinamit Israel congana quimajon rtijic quekꞌij chi rchꞌaquic jun cꞌaslemal ja utz ntzꞌa̱t rmal ja Dios pro xa ma chꞌobtajnak ta cumal nak rbanic. Pro ja rokchaꞌon rmal ja Dios cꞌoli ja cꞌaslemal yatajnak chake ja utz ntzꞌa̱t rmal ja Dios. Pro ja cꞌa juleꞌ chic ejeꞌeꞌ ni maticajoꞌ wiꞌ nquinimaj ja Dios in ja Dios xeruyaꞌ can.

⁸ Caniꞌ tzꞌibtal can chipan ja rtzobal Dios quewaꞌ nbij riꞌ: —Ja Dios xusach quipensar, cꞌo paquewach pro matiquetzꞌat ja ncꞌu̱t chiquewach in chakajaꞌ cꞌo quixquin pro matiquicꞌaxaj ja nbix chique in niquirwariꞌ quibanonto camic. Queriꞌ ja tzꞌibtal can.

⁹ In caniꞌ tzꞌibtal can rmal ja rojer rey David chakajaꞌ quewaꞌ nbij riꞌ: —Ja tok quimajon rbanic jun nimlaj waꞌim chi nequicoti chaka jalal tok nekaj na chipan jun rcꞌayewal caniꞌ nuban jun chicop tok nbe pa trampa. Nyataj na chique rtojbalil ja ritzelal quibanon.

¹⁰ Neqꞌuejeꞌ na chipan jun kꞌekumal utzcꞌa chi matiquetzꞌat ja ncꞌu̱t chiquewach. Nquijkalej na nojel ja ritzelal ja quibanon in xajutij xtiluqueꞌ quij rmal, neꞌe ja David.

* * * * * * * * * *

¹¹ Queriꞌ cꞌa queban ja tinamit Israel, ma xquewil ta ja totajem xin Dios pro ¿la tibij cꞌa tzij ariꞌ chi ni mchita wiꞌ chomtajic chiquij? ¿La queriꞌ ja rchominto ja Dios? Jariꞌ ma queriꞌ ta pro quewaꞌ rbanic riꞌ. Ja raj Israel tok ma xquinimaj ta ja Jesucristo rmalcꞌariꞌ tok xekaj chic rbixic ja totajem xin Dios cuqꞌuin ja winak ja ma e aj Israel ta. Queriꞌ rchominto ja Dios utzcꞌa chi ja raj Israel pokon xtiquenaꞌ rmal utzcꞌa chi npi chic jutij quigana chi nquinimaj ja Jesucristo.

¹² Ja tinamit Israel tok ma xquinimaj ta ja Jesucristo rmalcꞌariꞌ tok yataj chic ja nimlaj utzil xin Jesucristo chique ja juleꞌ chic tinamit waweꞌ chwachꞌulew. Ja tok Dios xlasaj chique ja raj Israel ja privilegio ja ryaꞌon chique rmalcꞌariꞌ tok yataj chic ja nimlaj utzil xin Jesucristo chique ja winak ja ma e aj Israel ta. Ja raj Israel wi cꞌol utzil rcꞌamonto ja tok ma xquinimaj ta pior cꞌa ja tok xterilaꞌ ja kꞌij tok xtiquinimaj chic chi nimlaj canojelal.

¹³ Pro ja camic ewqꞌuin ixix nintzijon wiꞌ ja ma ix aj Israel ta. Ja Dios arjaꞌ inrtakon chi ninesamaj checojol ewanojelal ja ma ix aj Israel ta in jawaꞌ samaj riꞌ janila nim rukꞌij.

¹⁴ Anin nyaꞌ rukꞌij jawaꞌ samaj riꞌ ja yatajnak chwe matzij ecꞌoli chique ja wach tak aj Israel xtiquewil na ja totajem xin Dios rmal, matzij ecꞌoli chique xtiquiyarij chi na ja totajem ja caniꞌ yatajnak chewe ixix rmal ja Dios.

¹⁵ Ja Dios tok ma xerucꞌul chi ta ja raj Israel rmalcꞌariꞌ tok xixchomtaj chic ixix ruqꞌuin ja ma ix aj Israel ta. Pior cꞌa ja tok xterilaꞌ ja kꞌij tok xquerucꞌul chic jutij, ja queriꞌ caniꞌ ecamnak nabey pro caniꞌ necꞌastaj chiquicojol camnakiꞌ.

¹⁶ Ja tinamit Israel epartiꞌin, e xin Dios pro ni chi e jun. Caniꞌ tre juleꞌ kꞌor, ja wi cꞌo jutzꞌit tre npartiꞌixi nabey chi noc xin Dios, xin Dios cꞌariꞌ chi nojelal ja kꞌor. In caniꞌ tre jun cheꞌ chakajaꞌ, ja wi partiꞌin ja rcꞌamal chi noc xin Dios, xin Dios cꞌariꞌ chakajaꞌ ja tak rukꞌaꞌ.

¹⁷ Ecꞌo juleꞌ chique ja tinamit Israel ja xeya̱ꞌ can rmal ja Dios, ban chique e caniꞌ rukꞌaꞌ jun cheꞌ olivo pro juleꞌ rukꞌaꞌ ja chꞌakixto. Ja cꞌa rixix ja ma ix aj Israel ta ix caniꞌ rukꞌaꞌ jun chic cheꞌ olivo pro jun cheꞌ ja ma ticon ta, jun cheꞌ ja xa ruyon penak. Ja xuban ja Dios chewe, xixrucoj como ix cachbil ja tinamit Israel ja ma xeruyaꞌ can ta, caniꞌ xixruban ingertar ruqꞌuin jun cheꞌ olivo pro jun cheꞌ arjaꞌ ticyon in camic xa jun chic ebanon cuqꞌuin ja tinamit Israel chi rtijic ja utzlaj cꞌaslemal ja penak ruqꞌuin ja rcꞌamal jawaꞌ cheꞌ riꞌ.

¹⁸ Pro maxta tenaꞌ kaj chi más na nimak ekꞌij ixix chiquewach ja tinamit Israel ja xeya̱ꞌ can rmal ja Dios. Ja cꞌa wi neyaꞌ ekꞌij kas turkaj chewe chi xa ix tak rukꞌaꞌ ja cheꞌ, bien techꞌoboꞌ chi jun cheꞌ ma ja ta rukꞌaꞌ ntzuku rxin ja rcꞌamal pro ja rcꞌamal jariꞌ ntzuku rxin ja tak rukꞌaꞌ.

¹⁹ Maxla cꞌo jun chewe quewaꞌ xtibij chwe riꞌ: —Pro ja Dios xerchꞌakijto ja juleꞌ utzcꞌa chi nokoc ajoj pa quicꞌaxel, maxla xticheꞌ na chwe.

²⁰ Ni katzij wiꞌ chi xerchꞌakijto ja juleꞌ pro xa rmal ja ma xyukeꞌ ta quecꞌuꞌx ruqꞌuin ja Jesucristo xa chewiꞌ tok xerchꞌakijto. Ja cꞌa rixix chakajaꞌ wixta maquita yukul ecꞌuꞌx ruqꞌuin ja Jesucristo maquita cꞌa ixrcꞌulun ariꞌ ja Dios chi ixocnak tinamit rxin. Rmalcꞌariꞌ nbij chewe, maxta teyaꞌ ekꞌij, ja cꞌa neban, texbej jutzꞌit ewiꞌ chwach ja Dios.

²¹ Queriꞌ nbij chewe como ja Dios xerchꞌakijto ja juleꞌ masqui nij e rtinamit wiꞌ ojer in arjaꞌ matipokonaj nuban queriꞌ chewe ixix chakajaꞌ.

²² Bien mpeꞌ techꞌoboꞌ janiꞌ rnaꞌoj ja Dios, bien rotak nuyaꞌ ja rutzil chawe pro bien rotak natruban castigar chakajaꞌ. Arjaꞌ xeruban castigar ja ma xeniman ta rxin pro xuyaꞌ ja rutzil chewe ixix in ni nuyaꞌ wiꞌ ja rutzil chewe ja wi ma xteyaꞌ can ta ja yukulbal ecꞌuꞌx ruqꞌuin ja Jesucristo. Nowi xteyaꞌ can jariꞌ nixrchꞌakijto ixix chakajaꞌ.

²³ In chakajaꞌ ja juleꞌ ja rerchꞌakinto pro wi xtiqueqꞌuex quinaꞌoj in wi xtiyukeꞌ chic quecꞌuꞌx ruqꞌuin ja Jesucristo jariꞌ nerucꞌul chic jutij caniꞌ neruban ingertar ruqꞌuin ja cheꞌ ja bar echꞌakinto wiꞌ. Ja Dios arjaꞌ bien ncowini nuban queriꞌ chique.

²⁴ Ja cꞌa rixix ja ma ix aj Israel ta, ix caniꞌ rukꞌaꞌ jun cheꞌ ja xa ruyon penak. Ma ruqꞌuin ta jun cheꞌ ixpenak wiꞌ ja ticon rmal ja Dios. Pro ja Dios ma xpokonaj ta xixruban ingertar ruqꞌuin jun cheꞌ ja rticon arjaꞌ. Pior cꞌa chique ja raj Israel ja xechꞌakixto, ejeꞌeꞌ e caniꞌ rukꞌaꞌ jun cheꞌ ja ticon rmal ja Dios in bien seguro chi ja Dios matipokonaj xqueruban chic jutij ingertar ruqꞌuin ja cheꞌ ja bar echꞌakinto wiꞌ nabey.

* * * * * * * * * *

^25-26 Wachꞌalal, cꞌoli ja ma kꞌalasan ta nabey pro ja camic Dios rkꞌalasan chic in ja kas nwajoꞌ chewe chi nchꞌobtaj emwal nak rbanic. Kas ta xtichꞌobtaj emwal jawaꞌ wariꞌ utzcꞌa chi matewinakarsaj juleꞌ enaꞌoj ixix eyon in xteyaꞌ ta ekꞌij rmal. Quewaꞌ rbanic ja rkꞌalasan ja Dios riꞌ. Ja tinamit Israel masqui juleꞌ chique congana e cow masqui congana nquechꞌaꞌ ja totajem ja rcꞌamonto ja Jesucristo pro nerilaꞌ na jun kꞌij ja tok xtitotaji ja tinamit Israel pro ni chi jun. Pro cꞌa tokocꞌariꞌ xtibantaj cumplir ja wariꞌ ja tok xquetzꞌakati canojelal ja ma e aj Israel ta ja majaꞌn tiyukeꞌ quecꞌuꞌx ruqꞌuin ja Jesucristo. Pro ja tinamit Israel can ntotaj na caniꞌ tzꞌibtal can chipan ja rtzobal Dios, quewaꞌ nbij ja Dios riꞌ: —Cꞌo jun Toꞌonel ja nwinakar na chipan ja tinamit Sión, arjaꞌ nuchup nojel ja ma utz ta ja quibanonto ja tinamit Israel.

²⁷ Anin cꞌo jun chominem ja nchominto cuqꞌuin in tok xtinchup ja quil quemac jariꞌ nbanbej cumplir ja chominem, neꞌe ja Dios. Queriꞌ ja tzꞌibtal can.

²⁸ Como ja tinamit Israel ma xquinimaj ta ja utzlaj tzij xin Jesucristo rmalcꞌariꞌ tok eꞌocnak chic e rcꞌulel ja Dios in rmalcꞌariꞌ chakajaꞌ tok xekaji ja utzlaj tzij xin Jesucristo ewqꞌuin ixix ja ma ix aj Israel ta. Pro como ja Dios nij erchaꞌonto wiꞌ ojer rmalcꞌariꞌ tok cꞌa nerajoꞌ na. Rumac jun chominem ja rchominto cuqꞌuin ja catiꞌt quimamaꞌ chewiꞌ ja tok cꞌa nerajoꞌ na.

²⁹ Queriꞌ nbij chewe como ja Dios mta moda xtuqꞌuex ta ja rnaꞌoj. Ja wi cꞌoli rsipan chawe nij awxin wariꞌ owi atrchaꞌon chi atocnak tinamit rxin nij at rtinamit wariꞌ chakajaꞌ.

³⁰ Ja nabey tok majaꞌn tipeti ja Jesucristo ixix ja ma ix aj Israel ta ma xenimaj ta ja Dios pro ja Dios xpokonaj ewach in camic ewilon chic ja totajem rmal. Como ja tinamit Israel ma xeniman ta xa chewiꞌ tok ewilon chic ixix ja totajem xin Dios.

³¹ In queriꞌ cꞌa chique ja tinamit Israel chakajaꞌ, ejeꞌeꞌ maquenimani camic pro ja Dios ni rchominto wiꞌ chi nerilaꞌ na jun kꞌij tok xtipokonaj chic quewach in nerutoꞌ. Caniꞌ xuban chewe ixix xpokonaj ewach in queriꞌ xtuban chic chique chakajaꞌ npokonaj na quewach.

³² Como ja Dios arjaꞌ ni rchominto wiꞌ chi npokonaj kawach kanojelal ja rok winak xa nak ta chi ok winakil. Pro ja nabey ni rjawaxic wiꞌ chake kanojelal chakajaꞌ chi nkayaꞌ chakij chi xa ma ok nimanelaꞌ ta. Queriꞌ ja rchominto utzcꞌa chi arjaꞌ ncowini npokonaj chic kawach kanojelal in xa rmalariꞌ tok nokrutoꞌ.

³³ Janila nim ja rchominto jeꞌe ja Dios, congana ja rutzil ryaꞌon chake, congana xucoj rnaꞌoj, ni majun ja maquita rotak. Ni majun nak ta cowinnak ta rkꞌiꞌon ta nojel ja rnaꞌoj, ni majun nak ta cowinnak ta rchꞌobon ta nojel ja nuban jeꞌe.

³⁴ Caniꞌ tzꞌibtal can chipan ja rtzobal Dios quewaꞌ nbij riꞌ: —Ni majun otakyon nojel ja nuchꞌob ja Dios, arjaꞌ maticꞌatzin tre chi cꞌo chi ta jun xtuyaꞌ ta consejo tre.

³⁵ Ni majun chake ja rok winak cꞌo ta kayaꞌon ta tre ja Dios, arjaꞌ mta rucꞌas kuqꞌuin. Queriꞌ ja tzꞌibtal can.

³⁶ Queriꞌ nbij como ja Dios arjaꞌ winakarsyon nojelal, arjaꞌ paꞌl trij nojelal in chakajaꞌ noc na nojelal yaꞌbal rukꞌij. Kas ta xtiyaꞌ rukꞌij camic, chwak in chijutij. Amén.