Romanos 10 - Tz'utujil (Ja Cꞌacꞌa Chominem)

¹ Wachꞌalal, ja kas ngana anin xtiquewil ta ja totajem xin Dios ja wach tak aj Israel, congana ncꞌutun tre ja Dios chi netotaji.

² Como anin bien wotak chi congana nquetij quekꞌij chi ryaꞌic rukꞌij ja Dios pro xa ma chꞌobtajnak ta cumal ja kas mero rbey Dios.

³ Como ejeꞌeꞌ ma xcajoꞌ ta cotakij nak rbanic ja utzlaj cꞌaslemal ja nuyaꞌ Dios chake pro ja queban, cajoꞌ ta quiwinakarsaj nojoj queyon jun utzlaj cꞌaslemal ja junwiꞌ chi na in mta quigana ruqꞌuin ja utzlaj cꞌaslemal ja xin Dios.

⁴ Pro xa ma chꞌobtajnak ta cumal nak rbanic ja ley como ja ley jariꞌ yaꞌonto rmal ja Dios utzcꞌa chi nokurjachaꞌ can pa rukꞌaꞌ ja Cristo. Queriꞌ cꞌa rbanic utzcꞌa utz nutzꞌat ja kacꞌaslemal ja Dios kanojel ja yukul kacꞌuꞌx ruqꞌuin ja Cristo.

⁵ Caniꞌ tzꞌibtal can rmal ja Moisés ojer quewaꞌ nbij riꞌ: —Ja wixta cꞌo jun achi xtuban ta cumplir ja ley xin Dios pro ni ta nojelal utz ta cꞌa nel ariꞌ ja rcꞌaslemal rmal, neꞌe.

⁶ Pro ma cꞌayew ta ja nawil ja utzlaj cꞌaslemal ja tok cꞌo yukulbal acꞌuꞌx ruqꞌuin ja Dios como quewaꞌ tzꞌibtal can tre riꞌ: —Maxta quewaꞌ tachꞌob kaj pan awanma riꞌ: —Congana cꞌayew ja xtibe ta jun chilaꞌ chicaj chi xtercꞌamaꞌ nojoj ta ja Cristo, maxta catcheꞌe,

⁷ owi: —Congana cꞌayew ja xtibe ta jun cuqꞌuin ja camnakiꞌ chi xtercꞌamaꞌ kaj ta ja Cristo, maxta catcheꞌe chakajaꞌ.

⁸ Como xa chanakaj cꞌo wiꞌ ja utzlaj tzij xin Dios, ma cꞌayew ta rilic como jariꞌ tzij natcowini nabij ruqꞌuin achiꞌ in natcowini nachꞌob rij rwach pan awanma. Queriꞌ cꞌa rbanic ja utzlaj tzij ja nucꞌut chikawach ja Moisés in ni queriꞌ ja utzlaj tzij ja kamajon rbixic chique winak camic chakajaꞌ, jun tzij ja nucꞌut chikawach nak rbanic ja tok nyukeꞌ acꞌuꞌx ruqꞌuin ja Jesucristo.

⁹ Xa chanakaj cꞌo wiꞌ como ja wi nabij ruqꞌuin achiꞌ chi ja Jesús arjaꞌ rajaw caj in rwachꞌulew in wi ruqꞌuin awanma nanimaj chi ja Dios xuyic ja Jesús chipan ja camíc jariꞌ nawil ja totajem xin Dios rmal.

¹⁰ Nawil como ja tok ruqꞌuin awanma nanimaj ja Jesucristo jariꞌ utz nutzꞌat acꞌaslemal ja Dios rmal in wi matapokonaj nabij chique winak chi yukul acꞌuꞌx ruqꞌuin ja Jesucristo jariꞌ nawil na ja totajem xin Dios.

¹¹ Caniꞌ tzꞌibtal can chipan ja rtzobal Dios, quewaꞌ nbij chake riꞌ: —Xa nak ta chi winakil ja xtiyukeꞌ rucꞌuꞌx ruqꞌuin mta moda ja maquita xtuwil ja totajem xin Dios. Queriꞌ ja tzꞌibtal can

¹² in queriꞌ nbij como xa ok jun chwach ja Dios wi ok aj Israel owi ma ok aj Israel ta como ja kajaw Jesucristo arjaꞌ kajaw chi nimlaj kanojelal. Arjaꞌ nuyaꞌ ja mebaꞌil xin Dios chique xa nak ta chi winakil ja necꞌutun quitoꞌic tre.

¹³ Caniꞌ tzꞌibtal can chipan ja rtzobal Dios, quewaꞌ nbij riꞌ: —Xa nak ta chi winakil ja ncꞌutuj rtoꞌic tre ja Kajaw jariꞌ can nuwil na ja totajem xin Dios.

¹⁴ Pro ja winak ¿nak moda xtiquicꞌutuj ta quitoꞌic tre ja wi majaꞌn tiyukeꞌ quecꞌuꞌx ruqꞌuin? In jun chic ¿nak moda xtiyukeꞌ ta quecꞌuꞌx ruqꞌuin ja wi majaꞌn tiyaꞌ rbixic chique? In ¿nak moda xtiquicꞌaxaj ta rbixic ja wi mta nyoꞌ rbixic chique?

¹⁵ In ¿nak moda xquebe ta winak cuqꞌuin chi xtequiyaꞌaꞌ ta rbixic chique ja wi mta netakoꞌel cuqꞌuin? Caniꞌ tzꞌibtal can chipan ja rtzobal Dios, quewaꞌ nbij riꞌ: —Congana quiꞌil ja tok cꞌo jun nekaji chiquicojol winak in numaj rbixic chique ja utzlaj tzij xin Dios ja rcꞌamonto quicotemal, neꞌe.

¹⁶ Pro ecꞌoli ja ma xqueyaꞌ ta quixquin tre ja utzlaj tzij xin Dios, caniꞌ tzꞌibtal can ojer rmal ja profeta Isaías, quewaꞌ nbij riꞌ: —Kajaw Dios, xa ma e nim ta ja winak ja quiniman ja utzlaj tzij ja kabij chique, neꞌe.

¹⁷ Ni rjawaxic wiꞌ chi nekaj rbixic ja utzlaj tzij cuqꞌuin winak como ja tok nbix chique jariꞌ nwinakarsani ja yukulbal quecꞌuꞌx in ja utzlaj tzij jariꞌ ruqꞌuin rtzobal Dios npi wiꞌ.

¹⁸ Pro ja wach tak aj Israel ¿la ma quicꞌaxan ta cꞌa ja utzlaj tzij? Quicꞌaxan como caniꞌ tzꞌibtal can chipan ja rtzobal Dios, quewaꞌ nbij riꞌ: —Ekajnak chic ja rbixic nojel nat nakaj tre ja rwachꞌulew, neꞌe.

¹⁹ Pro ¿la ma cotak ta cꞌa nak rbanic? Cotak como jariꞌ bix chique ojer rmal ja Dios caniꞌ tzꞌibtal can rmal ja Moisés quewariꞌ: —Ecꞌo juleꞌ tinamit ja ma e tinamit ta wxin, juleꞌ tinamit ja xa ma e chꞌobol ta pro ja xtinban chique nenucoj na chi e ntinamit. Ja cꞌa rixix congana pokon xtenaꞌ ja xtinban queriꞌ chique in congana nyictaj ewayewal rmal, xecheꞌxi ja raj Israel rmal ja Dios.

²⁰ In chakajaꞌ ja rojer profeta Isaías cꞌoli xbij chique ja raj Israel in ma xbej ta riꞌ chi rbixic chique: —Quewaꞌ nbij ja Dios chewe riꞌ, neꞌe ja rIsaías: —Ecꞌo juleꞌ tinamit ja mta nak ta queban chi rotakixic janiꞌ ja nnaꞌoj pro ja camic cotak chic. Ejeꞌeꞌ ma xquicꞌutuj ta chwe chi ninqꞌuejeꞌ chiquicojol pro ja camic nkꞌalasan wiꞌ chiquewach.

²¹ Pro ja cꞌa rixix ja rix aj Israel kꞌij kꞌij ni nbin wiꞌ chewe pan utzlaj tzij: —Quixmelojto wqꞌuin, inchenak chewe, pro ni maquixniman wiꞌ, ni mateban wiꞌ ja nwajoꞌ chewe chi neban, neꞌe ja Dios chique ja rtinamit. Queriꞌ ja tzꞌibtal can rmal ja rIsaías.