Romanos 1 - Tz'utujil (Ja Cꞌacꞌa Chominem)

¹ Anin ja rin Pablo camic ntzꞌibajel jawaꞌ carta riꞌ chewe ixix wachꞌalal ja rixcꞌo pa Roma. Anin in ajsamajel rxin ja Jesucristo. Ja Dios arjaꞌ xinsiqꞌuini chi xinoc apóstol, arjaꞌ xinchaꞌowi chi ninbe cuqꞌuin ja winak chi nenyaꞌaꞌ rbixic chique ja utzlaj tzij xin Jesucristo ja rtakonto waweꞌ chwachꞌulew.

² Jawaꞌ utzlaj tzij ja rtakonto camic ojer tzujun can. Tzujux can rmal ja Dios in tzꞌibax can chipan ja santilaj tzobal rxin cumal ja rojer tak profeta ja xesamaj pa rcuenta.

³ Jawaꞌ utzlaj tzij ja xinbij chewe riꞌ jawaꞌ ncꞌutu chikawach nak rbanic ja Ralcꞌwal Dios. Ja cꞌa Ralcꞌwal Dios arjaꞌ riy rumam can ja rojer rey David, xoc kach winak.

⁴ Pro bien kꞌalaj chi Ralcꞌwal Dios, bien kꞌalaj chi congana nim ja rpoder, ni junan ja canma ruqꞌuin ja santilaj Dios. Jariꞌ bien kꞌalasaxi chi queriꞌ rbanic, tokoriꞌ kꞌalasaxi ja tok cꞌastaji chiquicojol camnakiꞌ. Ja kajaw Jesucristo jaꞌ cꞌariꞌ ja Ralcꞌwal Dios.

⁵ Rmal cꞌa arjaꞌ tok kacochin tre ja Dios ja rutzil ja nsipaj chake in rmal arjaꞌ chakajaꞌ tok yatajnak ajoj chake chi okocnak apóstol rxin. Ma chaka ta queriꞌ tok banon queriꞌ chake, rumac chi nokbe cuqꞌuin ja tinamit ja recꞌo nojel nat nakaj chwach ja rwachꞌulew chi nekayaꞌaꞌ rbixic ja Jesucristo chique utzcꞌa chi nyukeꞌ quecꞌuꞌx ruqꞌuin in nquinimaj ja rtzobal. Nojel ariꞌ nkaban, yaꞌbal rukꞌij arjaꞌ ja nkaban.

⁶ Caniꞌ chewe ixix wachꞌalal ja rix aj Roma, Dios xixsiqꞌuini chi nixoc ix tinamit rxin ja Jesucristo in xenimaj.

⁷ Jawaꞌ carta riꞌ ewxin ewanojelal wachꞌalal. Ixix janila nixrajoꞌ ja Dios arjaꞌ xixsiqꞌuini chi ixocnak ix tinamit rxin. Ja rutzil ja nsipaj ja Dios chake rachbil ja quicotemal xin Dios, ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

⁸ Camic wachꞌalal nwajoꞌ nbij chewe nabey chi congana nmaltioxij tre ja nDios emwal pro nij ewanojelal. Pa rubiꞌ ja Jesucristo nmaltioxij tre rumac ja bien notakixi nat nakaj nojel chwach ja rwachꞌulew chi ixix ruqꞌuin ja Jesucristo yukul wiꞌ ecꞌuꞌx.

⁹ Como ja Dios arjaꞌ rotak chi anin xajutij nmajon rbanic orar pan ecuenta, ni mta wiꞌ ja maquita ixncojon pan oración. Jariꞌ Dios anin nintajini nmajon rbanic ja rsamaj pro ruqꞌuin wanma nban ja samaj, nintajini nmajon rbixic ja utzlaj tzij ja rcꞌamonto ja Ralcꞌwal.

¹⁰ Xajutij nmajon rcꞌutuxic tre ja Dios matzij xtuyaꞌ chwe camic chi ninbe ewqꞌuin ja wi queriꞌ rvoluntad arjaꞌ como ojer nmajonto rchꞌobic chi ninbe ewqꞌuin.

¹¹ Como anin congana ngana xtutzꞌat riꞌ kawach ewqꞌuin, nwajoꞌ ninbe ewqꞌuin chi nenchꞌoboꞌ chewach nak rbanic ja nsipax jeꞌe chake rmal ja rEspíritu Santo, nwajoꞌ chi necochij más tre. Queriꞌ nwajoꞌ chewe utzcꞌa chi ncowir más ecꞌuꞌx ewanma chipan ja rtzobal Dios.

¹² Pro ja ninbe ewqꞌuin jariꞌ ma eyon ta ixix cꞌoli rcꞌamonto chewe pro cꞌoli rcꞌamonto anin chwe chakajaꞌ como cꞌoli ja yukulbal ecꞌuꞌx ixix ruqꞌuin ja Jesucristo in cꞌoli ja yukulbal nucꞌuꞌx anin ruqꞌuin chakajaꞌ jariꞌ nkabanbej animar kiꞌ chibil tak kiꞌ ja tok xquinekaji.

¹³ Camic wachꞌalal, nwajoꞌ nchꞌob chewach chi anin qꞌuiylaj mul nchꞌobon chi ninbe ewqꞌuin pro ma incowinnak ta. Nwajoꞌ ninbe ewqꞌuin nencꞌoloꞌ ja cosecha rxin ja obra xin Dios ja cꞌo checojol ixix chilaꞌ pa Roma ja caniꞌ nintajini nban camic chiquicojol ja juleꞌ chic tinamit ja ma e aj Israel ta.

¹⁴ Ja utzlaj tzij xin Jesucristo cꞌo chi nukul chi nenyaꞌaꞌ rbixic chique ja winak xa nak ta chi winakil, wi netzijon pa griego owi mani, wi e ajtijaꞌ owi ma e ajtijaꞌ ta.

¹⁵ Rmalcꞌariꞌ tok nbij chewe, ja wi Dios xtuyaꞌ chwe can ninbe ewqꞌuin nenyaꞌaꞌ rbixic ja utzlaj tzij xin Jesucristo chewe ixix chakajaꞌ ja rixcꞌo pa Roma.

¹⁶ Queriꞌ nbij chewe como ja utzlaj tzij xin Cristo, anin ma qꞌuixbal ta nnaꞌ nyaꞌ rbixic. Ma qꞌuixbal ta como ja utzlaj tzij xin Cristo jariꞌ ja nimlaj poder xin Dios, nerutoꞌ ja winak chipan ja quil quemac, nerutoꞌ xa nak ta chi winakil ja nyukeꞌ quecꞌuꞌx ruqꞌuin ja Jesucristo. Cuqꞌuin ja raj Israel xekaj wiꞌ rbixic nabey in chakajaꞌ ntajini nekaji camic cuqꞌuin ja ma e aj Israel ta.

¹⁷ Ja utzlaj tzij xin Jesucristo jariꞌ nimlaj poder xin Dios nincheꞌ tre como ruqꞌuin awaꞌ utzlaj tzij riꞌ nkꞌalajin wiꞌ nak rbanic ja utzlaj kꞌetoj tzij xuban ja Dios ja xokrtobej ja rok winak in xokrwasajel libre chipan ja kil kamac. Pro ja nacꞌambej jawaꞌ totajem xin Dios riꞌ yukulbal acꞌuꞌx ruqꞌuin ja Jesucristo in nyataji ja totajem chique canojel ja nyukeꞌ quecꞌuꞌx ruqꞌuin. Caniꞌ tzꞌibtal can chipan ja rtzobal Dios quewaꞌ nbij riꞌ: —Ja winak ja utz netzꞌa̱t rmal ja Dios ejeꞌeꞌ nquewil na ja utzlaj cꞌaslemal ja mta qꞌuisic trij pro rumac ja yukulbal quecꞌuꞌx ruqꞌuin ja Dios chewiꞌ tok nquewil.

* * * * * * * * * *

¹⁸ Como ja Dios ja cꞌo chilaꞌ chicaj arjaꞌ rkꞌalasan chic camic chi congana ryewal penak rumac nojel ja nqueban ja winak ja quimestan chic ja Dios in matiqueyaꞌ chic caso tre ja nbij in xa itzelal ja nqueban. Ja cꞌa ritzelal nqueban jariꞌ nquitzꞌapbej quixquin, maticajoꞌ ncotakij nak ja kas mero rbanic ja Dios ja katzij chi Dios.

¹⁹ Ja cꞌa wixta cꞌo quigana cotakij nak rbanic xecowin ta cꞌariꞌ cotakij ta como jariꞌ bien kꞌalasan chic chiquewach rmal ja Dios.

²⁰ Jaruꞌ pa tiempo winakarsanto ja rwachꞌulew ni kꞌalaj wiꞌ nak rbanic ja Dios chi arjaꞌ masqui matitzꞌattaji ruqꞌuin awach pro bien nchꞌobtaji nak rbanic. Bien kꞌalaj ja nimlaj poder ja cꞌo pa rukꞌaꞌ ja ni mta wiꞌ qꞌuisic trij in bien kꞌalaj chakajaꞌ chi arjaꞌ Dios. Nojel ja rwinakarsan jeꞌe jariꞌ ncꞌutuwi chi queriꞌ rbanic. Ja cꞌa winak ja mta quigana ncotakij nak rbanic bar ta cꞌa xtipi wiꞌ tzij cumal ja xtiquitobej ta quiꞌ chwach ja Dios.

²¹ Majun xtiquitobej ta quiꞌ como ejeꞌeꞌ masqui kꞌalasax chiquewach nak rbanic ja Dios ja katzij chi Dios pro xa queban tre caniꞌ ma Dios ta in nixtacꞌa cꞌo ta quimaltioxij ta tre chakajaꞌ. Ja quinaꞌoj ni majun rsamaj, xa yojtaji. Ja canma mchita ja rnaꞌoj Dios rcꞌan, xa kꞌekumiri.

²² Congana jakal quewiꞌ necheꞌe pro xa e nacnak tak winak xeꞌoc wiꞌ.

²³ Ma xqueyaꞌ chi ta rukꞌij ja lokꞌlaj Dios ja mta camíc trij, xa cachbal tak winak in cachbal tak chicop xequecoj pa rqꞌuexwach. Xexuqueꞌ chiquewach cachbal tak winak pro makanaꞌ maquita cꞌo camíc chiquij ja winak. Xexuqueꞌ chiquewach cachbal tak chicop xa nak ta chi chicopal caniꞌ chique ja nerupup chicaj owi nebin chwachꞌulew owi nquichararaj quiꞌ pa tokꞌulew.

²⁴ Rmalcꞌariꞌ tok ma xerukꞌil chi ta ja Dios pro ja xuban, xersokpij can chipan ja ritzelal ja nquiyarij kaj pa tak canma, xuyaꞌ lugar chique chi quitzꞌiloj más ja quicꞌaslemal. Ja tok qꞌuiswani cꞌo nariꞌ queban chiquibil tak quiꞌ, quitzꞌiloj ja quicuerpo tre juleꞌ itzelal ja más chi na qꞌuixbal rbanic.

²⁵ Ma chaka ta queriꞌ queban, rumac ja queyaꞌ can ja Dios ja katzij chi Dios in xequinimaj chic jeꞌe ja ma katzij ta chi e Dios. Xa ja chic ariꞌ queyaꞌ quekꞌij ja rewinakarsan jeꞌe in xexuqueꞌ chiquewach no ariꞌ ja katzij chi Dios ja winakarsyon nojelal jariꞌ ma xqueyaꞌ chi ta rukꞌij pro makanaꞌ maquita congana nim rukꞌij camic, chwak in chijutij. Amén.

²⁶ Rmalcꞌariꞌ ja Dios xeruyaꞌ can, xuyaꞌ lugar chique chi nqueban ja ncꞌutuj ja ritzel tak yarinem ja cꞌo pa tak canma ja más chi na qꞌuixbal rbanic. Pakasaꞌ rixokiꞌ xeyojtaji, xemacun chic cuqꞌuin cach tak ixokiꞌ, ma achiꞌiꞌ chi ta ja nequiyarij.

²⁷ In queriꞌ chique achiꞌiꞌ chakajaꞌ, xemacun chic cuqꞌuin cach tak achiꞌiꞌ, ma ixokiꞌ chi ta ja nequiyarij. Queriꞌ queban ja rachiꞌiꞌ, xa congana nquiyarij quiꞌ, ni majun chi queqꞌuix. Nojel ja queban congana tzꞌilor canma rmal. Ja cꞌariꞌ rtojbalil ja ni takal wiꞌ chique. Ja cꞌariꞌ quechꞌec trij ja queyaꞌ can ja utzlaj bey xin Dios.

²⁸ Ejeꞌeꞌ ni majun xbij quecꞌuꞌx tre chi qꞌuejeꞌ ta ja Dios pa tak quewiꞌ pa tak canma. Rmalcꞌariꞌ ja Dios arjaꞌ xersokpijel, xuyaꞌ lugar chique chi xa itzel tak naꞌoj chic nquechꞌob, xuyaꞌ lugar chique chi nqueban jeꞌe ja ma yatal ta chique chi nqueban.

²⁹ Ejeꞌeꞌ xa emakꞌenirnak chi rbanic nojel rwach ja ritzelal. Xa il mac nqueban achiꞌiꞌ cuqꞌuin ixokiꞌ, xa itzel netzꞌatoni, chaka benak chi yarin quinakun winak, nqueban itzel chique winak in nquiakir canma chiquij in nequicamsaj. Xa e ticol tak chꞌaꞌoj, xa e banol tak engaño in nojel ja rutzil xa itzel nquetzꞌat.

³⁰ Ejeꞌeꞌ xa nequitzijoj winak, xa itzel nquetzꞌat ja Dios, xa e tzꞌujunelaꞌ xa e yokꞌonelaꞌ. Congana e nimak nquenaꞌ kaj, xa nqueyaꞌ quekꞌij, xa itzelal ja nquiwinakarsaj. Ejeꞌeꞌ maquequinimaj quitataꞌ queteꞌ,

³¹ xa ma e chꞌobol ta nak la utz nak la ma utz ta, xa matiqueban cumplir ja nquitzujuj, mta quigana cuqꞌuin quitataꞌ queteꞌ in nixtacꞌa cuqꞌuin ta calcꞌwal chakajaꞌ. Ejeꞌeꞌ ni maquecuyun wiꞌ in ni matiquipokonaj wiꞌ quewach winak.

³² Ejeꞌeꞌ bien cotak ja rbin can ja Dios chi ni yatal wiꞌ camíc chawij ja tok naban ja juleꞌ itzelal ja caniꞌ cꞌa xinbij kaj chewe riꞌ. Pro masqui cotak pro ni quimajon wiꞌ rbanic camic. In ma ruyon ta itzelal ja nqueban, na xa congana nel quecꞌuꞌx chiquij ja winak ja tok nqueban ja ritzelal ja caniꞌ nqueban ejeꞌeꞌ.