San Mateo 6 - Tz'utujil (Ja Cꞌacꞌa Chominem)

¹ Ecꞌoli winak tok cꞌo jeꞌe nqueban ja chi yaꞌbal rukꞌij ja Dios nqueban pro xa chiquewach winak nqueban wiꞌ utzcꞌa chi nya̱ꞌ quekꞌij cumal ja winak nquechꞌob. Pro ja rixix tebanaꞌ cuenta, maxta teban queriꞌ, nowi queriꞌ neban ni majun rtojbalil nyataj chewe rmal ja Tatixel ja cꞌo chilaꞌ chicaj.

² Rmalcꞌariꞌ nbij chewe, tok cꞌo jun ti ayuda nesipaj maxta tewasaj ja rtzijoxic ja caniꞌ nqueban ja winak ja xa cacaꞌ quipalaj. Ejeꞌeꞌ pa tak jay xin molbal riꞌil nquisipaj wiꞌ ja rayuda in pa tak bey chakajaꞌ utzcꞌa chi nya̱ꞌ quekꞌij cumal ja winak ja netzꞌato quixin. Anin ni katzij wiꞌ ja nbij chewe riꞌ, ejeꞌeꞌ ja tok nya̱ꞌ quekꞌij cumal ja winak ni xa ruyon wariꞌ ja rtojbalil nquechꞌec trij, mchita nak chi ta.

³ Pro ja cꞌa rixix tok cꞌo jun ti ayuda nesipaj mejor ja neban, majun rbixic newasaj, nixtacꞌa ncotakij ta ja recꞌoloc ewqꞌuin.

⁴ Quirtariꞌ neban utzcꞌa majun nak ta notakini. Ja wi queriꞌ neban ja Tatixel ewxin ja nutzꞌat nojelal masqui awatal chiquewach winak, arjaꞌ nuyaꞌ chewe jun rtojbalil pro ni chiquewach winak tok nuyaꞌ chewe.

* * * * * * * * * *

⁵ In jun chic, ja tok neban oración maxta queriꞌ teban ja caniꞌ nqueban ja winak ja xa cacaꞌ quipalaj. Queriꞌ nbij chewe como ejeꞌeꞌ congana nel quecꞌuꞌx trij ja nepeꞌe pa tak jay xin molbal riꞌil chi rbanic oración in pa tak esquina pa bey chakajaꞌ. Queriꞌ nqueban utzcꞌa chi nya̱ꞌ quekꞌij cumal ja winak ja netzꞌato quixin. Anin ni katzij wiꞌ nbij chewe, ja tok nya̱ꞌ quekꞌij cumal ja winak ni xa ruyon wariꞌ ja rtojbalil nquechꞌec trij, mchita nak chi ta.

⁶ Pro ja cꞌa rixix tok neban oración quixoc chipan ja tak ewochoch chejujunal in tetzꞌapij ewiꞌ chipan in quixtzijon ruqꞌuin ja Tatixel ewxin ja matitzꞌattaji. Ja wi queriꞌ neban ja Tatixel ewxin ja nutzꞌat nojelal masqui awatal chiquewach winak, arjaꞌ nuyaꞌ chewe jun rtojbalil pro ni chiquewach winak tok nuyaꞌ chewe.

⁷ In jun chic, ja tok neban oración maxta teban ja caniꞌ nqueban ja winak ja ma cotak ta rwach ja Dios. Queriꞌ nbij chewe como ejeꞌeꞌ chaka jaꞌ nquicamuluj rbixic juleꞌ tzij ja mta rcꞌamonto, ja nquechꞌob ejeꞌeꞌ chi rumac ariꞌ ja maxcoꞌ chi juleꞌ tzij nquibij chewiꞌ tok ncꞌaxaxi ja coración.

⁸ Maxta queriꞌ teban ixix ja caniꞌ nqueban ejeꞌeꞌ como ja Tatixel ewxin arjaꞌ rotak chic nak ja ncꞌatzin chewe masqui majaꞌn tecꞌutuj tre.

⁹ Rmalcꞌariꞌ nbij chewe, ja tok neban oración quewaꞌ nebij riꞌ: —Katataꞌ Dios ja ratcꞌo chilaꞌ chicaj, lokꞌ ta xtinaꞌi ja rabiꞌ cumal ja winak.

¹⁰ Xtikajpi ta ja ragobierno waweꞌ chwachꞌulew, xtinimax ta ja ravoluntad atat waweꞌ ja caniꞌ ntajini nba̱n chilaꞌ chicaj nnimaxi.

¹¹ Tayaꞌaꞌ chake ja kaway ja ncꞌatzin chake camic.

¹² Tacuyuꞌ ja kil kamac ja caniꞌ nkaban ajoj nekacuy ja winak tok cꞌoli quibanon chake.

¹³ Atat ta xcatchajin kaxin, maxta kokaji tok nokrtakchiꞌij ja diablo, koꞌatoꞌoꞌ pa rukꞌaꞌ. Jariꞌ nkacꞌutuj chawe como pan akꞌaꞌ atat cꞌo wiꞌ nojel gobierno in pan akꞌaꞌ cꞌo wiꞌ nojel poder, noc na yaꞌbal akꞌij nojelal, in nij at quirwariꞌ camic, chwak in chijutij. Amén. Queriꞌ ta rbanic ja roración neban.

¹⁴ Ja cꞌa wi neꞌecuy ja winak tok cꞌoli nqueban chewe ja Tatixel ewxin ja cꞌo chilaꞌ chicaj arjaꞌ nixrucuy ixix chakajaꞌ.

¹⁵ Nowi maqueꞌecuy jariꞌ maquixrucuy ixix chakajaꞌ ja Tatixel ewxin.

* * * * * * * * * *

¹⁶ In jun chic, ja tok neban ayuno chi ryabexic rukꞌij ja Dios maxta teban ixix ja caniꞌ nqueban ja winak ja xa cacaꞌ quipalaj como ejeꞌeꞌ ni quigana wiꞌ nqueban nbisoni ja quipalaj, ni lawuloꞌ nqueban tre utzcꞌa chi netzꞌati cumal ja winak chi ayuno ja quimajon rbanic. Anin ni katzij wiꞌ ja xtinbij chewe riꞌ, ja tok nya̱ꞌ quekꞌij cumal ja winak tok nqueban ja rayuno ni xa ruyon wariꞌ ja rtojbalil nquechꞌec trij, mchita nak chi ta.

¹⁷ Pro ja cꞌa rixix ja tok neban ja rayuno tejicaꞌ ewíꞌ in techꞌajaꞌ chi utz ja repalaj

¹⁸ utzcꞌa chi ja winak ma cotak ta chi ayuno ja remajon rbanic, xa jun otakyon jariꞌ ja Tatixel ewxin ja matitzꞌattaji. Ja wi queriꞌ neban ja Tatixel ewxin ja nutzꞌat nojelal masqui awatal chiquewach winak, arjaꞌ nuyaꞌ jun rtojbalil chewe pro ni chiquewach winak tok nuyaꞌ chewe.

* * * * * * * * * *

¹⁹ Maxta xa jaꞌ tibe ecꞌuꞌx ruqꞌuin ja qꞌuiyirsan mebaꞌil waweꞌ chwachꞌulew como ja mebaꞌil xin rwachꞌulew xa ma cꞌayew ta nti̱j cumal chicop owi nkꞌuxari in ma cꞌayew ta chakajaꞌ ja ralakꞌomaꞌ nquejokꞌ chiꞌjay in nquilakꞌajel.

²⁰ Pro ja neban, tibe ecꞌuꞌx trij ja qꞌuiyirsan mebaꞌil xin chilaꞌ chicaj como ja mebaꞌil xin chilaꞌ chicaj jariꞌ mta moda xtitij ta cumal chicop owi xtikꞌuxar ta in mta moda chakajaꞌ ja ralakꞌomaꞌ xqueꞌekaj ta triꞌ xtiquilakꞌaj ta.

²¹ Anin xinbij chewe ja tzij riꞌ como xa nak ta chi mebaꞌil benak ecꞌuꞌx ruqꞌuin triꞌ cꞌo wiꞌ ja rewanma chakajaꞌ.

²² Ja panewach caniꞌ rbanic jun luz ixryaꞌon pa sak, ja wi mta rbanon wi ma yojtajnak ta jariꞌ pa luz cꞌa cꞌo wariꞌ ja recuerpo pro ni chi jun.

²³ Pro ja cꞌa wi yojtajnak jariꞌ pa kꞌekuꞌm cꞌa cꞌo wariꞌ ja recuerpo pro ni chi jun. In queriꞌ cꞌa tre ja luz ja yatajnak chewe pa tak ewanma, ja wi nchupi jariꞌ congana jun nimlaj kꞌekumal nixqꞌuejeꞌ wiꞌ.

²⁴ Jun winak xa nak ta chi winakil ni majun moda xqueqꞌuejeꞌ ta caꞌiꞌ rpatrón, ja queriꞌ jun nrajoꞌ in jun xa itzel nutzꞌat owi jun nnimaj in jun matinimaj. In queriꞌ cꞌa tre chakajaꞌ mta moda xtiyukeꞌ ta ecꞌuꞌx ruqꞌuin Dios in xtiyukeꞌ chi ta ecꞌuꞌx ruqꞌuin ja mebaꞌil xin rwachꞌulew.

²⁵ Rmalcꞌariꞌ ja tok nbij chewe, maxta tekꞌisaj ewiꞌ tre ja recꞌaslemal: —¿Nak nkatij chi cꞌawaꞌ? maxta quixcheꞌe, in nixtacꞌa ja ncꞌatzin tre ja recuerpo chakajaꞌ: —¿Nak nkacoj chi cꞌawaꞌ? maxta quixcheꞌe. Ja Dios arjaꞌ nuyaꞌ nojelal ja ncꞌatzin tre ja recꞌaslemal in tre ja recuerpo ¿la matuyaꞌ cꞌariꞌ chewe chakajaꞌ ja netij in ja necoj?

²⁶ ¿La maqueꞌetzꞌat cꞌa ja tak tzꞌiquin ja nerupup chicaj? Ejeꞌeꞌ nixtacꞌa cꞌo ta tijcoꞌm nquetic in nixtacꞌa cꞌo ta cosecha nquecꞌol pro ja Tatixel ewxin ja cꞌo chilaꞌ chicaj arjaꞌ ntzuku quixin. Pro ¿la ma ixix ta cꞌa ja más na ix vale chiquewach ja tak tzꞌiquin?

²⁷ In jun chic, ni majun chewe masqui congana nkꞌisaj riꞌ ncowin ta ruyon nuyaꞌ ta rqꞌuiybal nel ta más nim rkan.

²⁸ In tre ja tziak ¿nak cꞌa tre tok nekꞌisaj ewiꞌ rmal ja necoj? Tewasaj mpeꞌ enaꞌoj trij ja cotzꞌiꞌj nak nuban tok nqꞌuiyi pa tak kꞌayis pro matisamaji in matikꞌinoni.

²⁹ Ja cꞌa ranin nbij chewe camic, ja rojer rey Salomón masqui congana biyom pro mta rtziak xucoj ta ja más buena ta chwach rcoloril jun trewaꞌ juleꞌ cotzꞌiꞌj riꞌ.

³⁰ Ja cotzꞌiꞌj masqui xa ncami, masqui xa nchakiji chanim in nporox pa kꞌakꞌ pro ja Dios arjaꞌ nuyaꞌ rcoloril. Ja wi queriꞌ nuban ¿la matuyaꞌ cꞌariꞌ chewe chakajaꞌ ja retziak necoj? Xarwariꞌ nbij chewe, ma kas ta yukul ecꞌuꞌx ruqꞌuin ja Dios.

³¹ Rmalcꞌariꞌ nbij chewe, ma tekꞌisaj ta ewiꞌ: —¿Nak nkatij cꞌawaꞌ? maxta quixcheꞌe in: —¿Nak nkacoj cꞌawaꞌ? maxta quixcheꞌe chakajaꞌ.

³² Queriꞌ nbij chewe como ja winak ja ma cotak ta rwach ja Dios ejeꞌeꞌ riꞌ ja nebano queriꞌ. Ja cꞌa chewe ixix, ja retataꞌ Dios ja cꞌo chilaꞌ chicaj arjaꞌ bien rotak chi ncꞌatzin chewe nojel awaꞌ wariꞌ.

³³ Pro ja kas rjawaxic chi neban nabey, ja gobierno xin Dios ni ta ja wariꞌ nechꞌob in ja rutzil xin Dios chakajaꞌ. Ja wi queriꞌ neban nojel awaꞌ ja ncꞌatzin chewe nyataj chewe.

³⁴ Rmalcꞌariꞌ nbij chewe, maxta tekꞌisaj ewiꞌ rmal ja penak chewach xin chwak cabij. Ja wi cꞌoli ja problema xin chwak, xin chwak cꞌariꞌ, maxta tecꞌam camic. Ja jujun kꞌij sobre ja problema chipan.