San Mateo 1 - Tz'utujil (Ja Cꞌacꞌa Chominem)

¹ Ja Jesucristo arjaꞌ riy rumam can ja rojer rey David in chakajaꞌ riy rumam can ja rAbraham. Jawaꞌ ja xtintzꞌibaj riꞌ jawaꞌ quebiꞌ ja ratiꞌt rmamaꞌ ja Jesucristo.

² Ja rAbraham, tatixel rxin Isaac. Ja rIsaac, tatixel rxin Jacob. Ja Jacob, tatixel rxin Judá e rachbil ja rchꞌalal.

³ Ja Judá, tatixel quixin caꞌiꞌ achiꞌiꞌ quibinaꞌan Fares in Zara, in ja queteꞌ, Tamar rubiꞌ. Ja Fares, tatixel rxin Esrom. Ja Esrom, tatixel rxin Aram.

⁴ Ja Aram, tatixel rxin Aminadab. Ja Aminadab, tatixel rxin Naasón. Ja Naasón, tatixel rxin Salmón.

⁵ Ja Salmón, tatixel rxin Booz, in ja ruteꞌ ja Booz, Rahab rubiꞌ. Ja Booz, tatixel rxin Obed, in ja ruteꞌ Obed, Rut rubiꞌ. Ja Obed, tatixel rxin Isaí.

⁶ Ja Isaí, tatixel rxin ja rojer rey David. Ja David, tatixel rxin Salomón, in ja ruteꞌ ja Salomón jariꞌ ixok ja rxjayil Urías nabey.

⁷ Ja Salomón, tatixel rxin Roboam. Ja Roboam, tatixel rxin Abías. Ja Abías, tatixel rxin Asa.

⁸ Ja Asa, tatixel rxin Josafat. Ja Josafat, tatixel rxin Joram. Ja Joram, tatixel rxin Uzías.

⁹ Ja Uzías tatixel rxin Jotam. Ja Jotam, tatixel rxin Acaz. Ja Acaz, tatixel rxin Ezequías.

¹⁰ Ja Ezequías, tatixel rxin Manasés. Ja Manasés, tatixel rxin Amón. Ja Amón, tatixel rxin Josías.

¹¹ Ja Josías, tatixel rxin Jeconías e rachbil ja rchꞌalal, tokoriꞌ xeꞌoc preso ja raj Israel, xecꞌamarel chipan ja nación Babilonia.

¹² Ja cꞌa Jeconías, tatixel rxin Salatiel. Ja Salatiel, tatixel rxin Zorobabel.

¹³ Ja Zorobabel, tatixel rxin Abiud. Ja Abiud, tatixel rxin Eliaquim. Ja Eliaquim, tatixel rxin Azor.

¹⁴ Ja Azor, tatixel rxin Sadoc. Ja Sadoc, tatixel rxin Aquim. Ja Aquim, tatixel rxin Eliud.

¹⁵ Ja Eliud, tatixel rxin Eleazar. Ja Eleazar, tatixel rxin Matán. Ja Matán, tatixel rxin Jacob.

¹⁶ Ja Jacob, tatixel rxin José. Ja José, arjaꞌ rchajil María in jariꞌ María ruteꞌ ja Jesús ja Cristo nokcheꞌ tre.

¹⁷ Jawaꞌ quebiꞌ ja ratiꞌt rmamaꞌ ja Jesucristo in tok namajto cajlaxic ruqꞌuin ja rAbraham in narqꞌuisaꞌ ruqꞌuin ja rey David e catorce canojel. In tok namajto chic cajlaxic ruqꞌuin David in narqꞌuisaꞌ chipan ja tiempo ja xecꞌamarel wiꞌ ja raj Israel pa Babilonia e catorce chakajaꞌ. In tok namajto chic cajlaxic chipan ariꞌ tiempo in narqꞌuisaꞌ ruqꞌuin ja Cristo e catorce chakajaꞌ.

* * * * * * * * * *

¹⁸ Ja Jesucristo tok xalaxi quewaꞌ rbanic riꞌ. Ja María ja ruteꞌ arjaꞌ ryaꞌon chic ruchiꞌ tre ja José chi ncꞌuleꞌ ruqꞌuin. Pro ja tok majaꞌn tiquecꞌam quiꞌ chaka jalal tok xotakixi chi yawaꞌ chic ja María chi nqꞌuejeꞌ jun ti ral. Pro rmal ja rEspíritu Santo samaji chewiꞌ tok queriꞌ xuban.

¹⁹ Ja cꞌa José ja xajalal majaꞌn toc rchajil arjaꞌ utzlaj achi chewiꞌ tok xpokonaj xuyaꞌ ta ruqꞌuix ja María. Rmalcꞌariꞌ tok xuchꞌob chi pan ekal nuyoj ja cꞌulbic.

²⁰ Pro kas cꞌa queriꞌ rmajon rchꞌobic ja tok chaka jalal winakar jun ángel rxin ja kajaw Dios pa rwaram in xbij tre: —José ja rat riy rumam can ja rojer rey David, ma taxbej ta awiꞌ, tacꞌamaꞌ ja María como ja tacꞌal ja cꞌo pa gracia, Espíritu Santo samajin rxin.

²¹ Ja María arjaꞌ nqꞌuejeꞌ na jun ti ral talaꞌ in ja rubiꞌ xtabij tre, Jesús xcatcheꞌ tre. Como ja biꞌaj Jesús tibij tzij Toꞌonel queriꞌ cꞌa ja rubiꞌ xtabij tre como arjaꞌ ntoꞌowi ja rtinamit chipan ja quil quemac, neꞌe ja ángel tre ja José.

²² Nojel ja cꞌa xintzꞌibaj kaj riꞌ ma chaka ta bantaji, rumac chi triꞌ bantaj wiꞌ cumplir ja rbin can ja kajaw Dios ja tzꞌibtal can rmal ja profeta quewariꞌ:

²³ —Bien tecꞌwaxaj ja wariꞌ, cꞌo jun kꞌapoj xtan nyawaj na in rmalariꞌ tok nqꞌuejeꞌe jun ti ral talaꞌ. Jariꞌ talaꞌ Emanuel xtibinaꞌax tre. Queriꞌ ja tzꞌibtal can. Emanuel tibij tzij Dios cꞌo kuqꞌuin.

²⁴ Ja cꞌa tok cꞌasoji ja José queriꞌ xuban ja caniꞌ bix tre rmal ja ángel rxin ja kajaw Dios, cꞌuleꞌ ruqꞌuin ja María.

²⁵ Pro ja tre tiempo tok majaꞌn talaxi ja ti ral ja María ja nabey winak ni majun nak ta queban. Ja cꞌa José tok xuyaꞌ rubiꞌ ja tacꞌal, Jesús xbinaꞌaj tre.