Marcos 13 - Tz'utujil (Ja Cꞌacꞌa Chominem)

¹ Cꞌacꞌariꞌ xelto ja Jesús chipan ja nimlaj templo xin Dios, kas rmajon binem ja tok cꞌo jun chique ja rdiscípulo tiloc ruqꞌuin in xbij tre: —Maestro, tatzꞌataꞌ can mpeꞌ ja templo leꞌ, congana buen tak abaj ocnak in congana banon rbanic ja tak jay rcꞌan, neꞌe.

² Bix tre rmal ja Jesús: —¿La natzꞌat ja nimak tak jay rxin ja templo leꞌ? Pro anin nbij chewe chi nerilaꞌ na jun kꞌij ja tok xtiyojtaji nojelal, ni majun abaj xtiriklaꞌ chi ta riꞌ, neꞌxi ja discípulo.

³ Ja cꞌa Jesús arjaꞌ tzꞌubul parwiꞌ ja ti jayuꞌ rbinaꞌan Rjayuꞌal Olivo in nutzꞌat pon ja nimlaj templo xin Dios. Ja cꞌa Pedro e rachbil ja Jacobo, ja Juan in Andrés, ejeꞌeꞌ quiyonaj quiꞌ ruqꞌuin in quibij tre:

⁴ —Tabij chake ¿nak kꞌij xtibantaji jalaꞌ ja cꞌa xabij kaj chake leꞌ? In chakajaꞌ ¿nak chi retalil nwinakari ja ncꞌutu rxin chi xajalal majaꞌn tibantaj cumplir nojelal ja cꞌa xabij chake? xecheꞌ tre.

⁵ Ja cꞌa Jesús xumaj rbixic chique quewariꞌ: —Kas tebanaꞌ jutzꞌit cuenta ewiꞌ, maxta cꞌo jun quixbano engañar.

⁶ Queriꞌ nbij chewe como e qꞌuiy ja winak nepi na jeꞌe in xa queyon nquecoj quiꞌ chi e Cristo, quewaꞌ nquibij chique ja winak riꞌ: —Anin in Cristo, necheꞌ na chique, in e qꞌuiy ja winak xquequeban engañar.

⁷ Cꞌo nimak tak chꞌaꞌoj xtiban na nojel nat nakaj pro ja tok xtekaj rbixic ewqꞌuin maxta texbej ewiꞌ rmal como ni rjawaxic wiꞌ chi nbantaj cumplir nojel awaꞌ wariꞌ pro jariꞌ ma qꞌuisbal rwachꞌulew ta.

⁸ Queriꞌ nbij chewe como cꞌo jeꞌe tinamit xtiyictaj na trij juleꞌ chic tinamit in chakajaꞌ ja gobierno jeꞌe nyictaj trij juleꞌ chic gobierno. In chakajaꞌ cꞌo nimak tak cubarkan nbantaj na in nimak tak waꞌal in caniꞌ chique winak neyojtaj na in neyictaji rmal ja quiyewal. Nojel awaꞌ wariꞌ xa majbal rxin ja nimak tak rpokonal.

⁹ Pro tebanaꞌ jutzꞌit cuenta ewiꞌ chiquewach ja winak como ejeꞌeꞌ nixquecꞌamel na pa tak kꞌetbaltzij in nixquirapaj chakajaꞌ pa tak jay xin molbal riꞌil. Nixquecꞌamel chiquewach gobernador, nixquecꞌamel chiquewach rey pro mwal anin tok xtiban queriꞌ chewe. Queriꞌ xtiban chewe utzcꞌa chi nel ntzijoxic chiquewach.

¹⁰ Ja tok majaꞌn tipeti ja qꞌuisbal rwachꞌulew rjawaxic nabey chi ja utzlaj tzij ja ncꞌamonto nekaj na rbixic cuqꞌuin ja winak ja recꞌo nojel tak nación. Cꞌa tokocꞌariꞌ xtipeti ja qꞌuisbal rwachꞌulew.

¹¹ Ja cꞌa tok xquixcꞌamarel chiquewach chi nixjach pa quekꞌaꞌ maxta quixoclaꞌ il tre ja nebij ja netobej ewiꞌ chiquewach. Pro como chipan ariꞌ hora cꞌoli xtiyataj chewe ja xtebij chique, ja ta cꞌariꞌ xtebij chique. Queriꞌ nbij chewe como ma ixix ta ja nixtzijoni triꞌ pro ja rEspíritu Santo arjaꞌ nyoꞌ chewe nak ja xtebij chique.

¹² Ja xtiqueban ja ralaxic chique ja cach tak alaxic nequejach na pa camíc in queriꞌ xtiqueban ja tatixelaꞌ chakajaꞌ chique ja calcꞌwal in chakajaꞌ ja ralcꞌwalaxelaꞌ ejeꞌeꞌ neyictaj na chiquij ja tatixelaꞌ in nequejach na pa camíc.

¹³ Ja cꞌa rixix xa itzel nixtzꞌat na cumal canojel ja winak pro mwal anin ja tok xtiban queriꞌ chewe. Pro canojel ja xtiquecochꞌ quewach chipan ja rpokonal in ni matiqueyaꞌ can wiꞌ ja yukulbal quecꞌuꞌx wqꞌuin ejeꞌeꞌ riꞌ nquewil na ja totajem xin Dios.

¹⁴ Pro kas turkaj chewe ja bitajnak can rmal ja rojer profeta Daniel. Ja xbij ja Daniel chi nerilaꞌ na jun kꞌij ja tok cꞌoli ja npeti ja más chi na itzel ntzꞌa̱t rmal ja Dios. Ja cꞌa tok npeti arjaꞌ npeꞌe chipan ja lugar ja ma yatal ta trij chi npeꞌe triꞌ in congana camíc nuban. (Ja nesiqꞌuin awaꞌ juleꞌ tzij riꞌ kas tiquiwasaj jutzꞌit quinaꞌoj trij.) Jariꞌ, tok xtetzꞌat chi paꞌl chic chipan ja lugar, ja cꞌa neban, ja rixcꞌo chipan ja departamento Judea mejor quixanmaji, tewawaj ewiꞌ pa tak cꞌachelaj.

¹⁵ Ja rixcꞌo parwiꞌ terraza triꞌ mejor quixanmaji chakajaꞌ, ma quixkajpi chi ta pa tak ewochoch chi rlasaxic ja remebaꞌil pa jay,

¹⁶ in ja rixcꞌo pa tak chenoj triꞌ mejor quixanmaji chakajaꞌ, ma quixmelojpi chi ta chi ewochoch chi rcꞌamaric echaqueta.

¹⁷ Anin congana npokonaj quewach ja rixokiꞌ ja xajalal majaꞌn queqꞌuejeꞌ tak cal triꞌ in chakajaꞌ ja recꞌo chic tak yaquiꞌaꞌ chwaquekꞌaꞌ.

¹⁸ Tecꞌutuj tre ja Dios chi ma pa rtiempo tew ta ja tok xterilaꞌ ja kꞌij chi nixanmaji.

¹⁹ Queriꞌ nbij chewe como cꞌo jun nimlaj rpokonal npi na pro janila nim. Jaruꞌ pa tiempo tzꞌucarsanto ja rwachꞌulew rmal ja Dios mta jun rpokonal penak ta ja más ta nim chwach awaꞌ ja nintajini nbij chewe riꞌ in ni mchita wiꞌ jun xtipi chi ta ja más chi ta nim chakajaꞌ.

²⁰ Xarwariꞌ xa pajtali ja rtiempo como ja Dios queriꞌ ja rchomin. Ja cꞌa wixta maquita pajtali ja rtiempo ni ta majun winak xtutoꞌ ta riꞌ chipan. Pro cumal ja winak ja rechaꞌon rmal ja Dios chewiꞌ tok pajtali ja rtiempo.

²¹ Ja cꞌa wi cꞌo jun xtibij chewe chi: —Peti ja Cristo, waweꞌ cꞌo wiꞌ riꞌ, wi neꞌe, ma tenimaj ta. Owi nbij chewe chi: —Quelaꞌ cꞌo wiꞌ leꞌ, wi neꞌe, chakajaꞌ ma tenimaj ta.

²² Queriꞌ nbij chewe como ecꞌoli winak ja nepi na, juleꞌ xtiquecoj quiꞌ chi e Cristo in juleꞌ xtiquecoj quiꞌ chi e profeta xin Dios pro ma katzij ta ja nquibij. Ejeꞌeꞌ cꞌo nimak tak milagro xtiqueban, jutzꞌit laj nequeban engañar ja winak ja rechaꞌon rmal ja Dios pro jariꞌ mta moda xquequechꞌec ta.

²³ Bien tebanaꞌ cuenta ewiꞌ chwach ja wariꞌ como xinyaꞌ pon rbixic chewe.

* * * * * * * * * *

²⁴ Ja tok chaka maril xtocꞌowi jawaꞌ nimlaj rpokonal riꞌ cꞌacꞌariꞌ maticaꞌy chic ja kꞌij, nkꞌekumiri in maticaꞌy chic ja icꞌ chakajaꞌ.

²⁵ Ja cꞌa chꞌumil jariꞌ netzakto in ja nimak tak poder rxin ja caj nsi̱l na.

²⁶ Cꞌacꞌariꞌ ja winak ejeꞌeꞌ nquetzꞌat na ja Ralcꞌwalaxel ja xoc alaxic cuqꞌuin ja winak, arjaꞌ cꞌamonto rmal juleꞌ sutzꞌ, janila jun nimlaj poder cꞌo chic pa rukꞌaꞌ in congana nim chic rukꞌij.

²⁷ In ecꞌoli ja ángel rxin nerutakel chi nebe, neꞌequimoloꞌ ja winak ja rechaꞌon rmal pro nojel rwachꞌulew nebe wiꞌ chi quimolic, mta ja maquita xqueꞌekaj wiꞌ chi quimolic.

²⁸ Camic tewasaj cꞌa enaꞌoj trij jun cheꞌ higuera jariꞌ ncꞌambej tzij chewach. Ja higuera ja tok npulani cꞌo tak rukꞌaꞌ nwinakari in ruxak chakajaꞌ jariꞌ retal nucꞌut chewach chi xa nnakajinto ja rtiempo cꞌatan.

²⁹ In queriꞌ cꞌa tre chakajaꞌ ja tok xtemaj rtzꞌatic nojel ja cꞌa xinbij chewe jariꞌ retal nucꞌut chewach chi ma nat chi ta cꞌo wiꞌ ja kꞌij ja xecꞌwaxaj chwe, congana nakaj cꞌoto chi wiꞌ triꞌ.

³⁰ Ni katzij wiꞌ ja xtinbij chewe riꞌ, ja tinamit Israel ejeꞌeꞌ cꞌa ecꞌo na ja tok nbantaj cumplir nojel awaꞌ wariꞌ, ma chupnak ta quewach.

³¹ Ja caj in rwachꞌulew jariꞌ xa nchu̱p na rwach pro ja ntzobal anin jariꞌ ni matichup wiꞌ rwach, mta ariꞌ ja maquita nbantaj cumplir.

³² Pro majun winak otakyon ja mero kꞌij in ja mero hora ja xtibantaji in nixtacꞌa ángel ta chakajaꞌ ja recꞌo chilaꞌ chicaj in nixtacꞌa ja Ralcꞌwalaxel ta chakajaꞌ pro ja nataꞌ Dios xa ruyon arjaꞌ ja rotakyon.

³³ Kas tebanaꞌ cuenta, quixcꞌascꞌoti in chijutij temajaꞌ rbanic ja roración como ma ewotak ta nak kꞌij tok xquinmelojpi chic jutij chwachꞌulew.

³⁴ Ja xtinban anin chewe queriꞌ ja caniꞌ nuban jun achi ja tok nbe pa jun viaje nat in ja rnakun nujach can pa quekꞌaꞌ ja rmoso chi nqueban cuenta. Arjaꞌ nuyaꞌ can ja quisamaj chiquijujunal in nbij can tre ja chajil jay chi ncꞌascꞌoti.

³⁵ In queriꞌ cꞌa chewe ixix chakajaꞌ, quixcꞌascꞌoti como anin in junan ruqꞌuin ja rajaw jay in ma ewotak ta nak hora tok xquinmelojpi chic jutij, maxla pa rocbal akꞌaꞌ, maxla pa ncꞌajakꞌaꞌ, maxla pa rsakaric owi tok nsakari.

³⁶ Ja tok chaka jalal xquinpi chic jutij maxta ixwarnak triꞌ.

³⁷ In ma ruyon ta chewe ixix nbij wiꞌ chi nixcꞌascꞌoti pro queriꞌ nbij chique canojelal chi necꞌascꞌoti, neꞌe ja Jesús chique.