Judas 1 - Tz'utujil (Ja Cꞌacꞌa Chominem)

¹ Anin in Judas, in ajsamajel rxin ja Jesucristo, in rchꞌalal ja Jacobo. Anin ntzꞌibaj ja carta chewe riꞌ ja rixsiqꞌuin rmal ja Dios, ja rixchaꞌon rmal ja Dios ja Tatixel chi ixocnak ix tinamit rxin, ja bien ixbanon cuenta rmal ja Jesucristo rumac ja xa jun ebanon ruqꞌuin.

² Dios ta xtipokonan más ewach, xtibe ta más pa nim checojol ja quicotemal xin Dios rachbil ja rajoben riꞌil xin Dios.

* * * * * * * * * *

³ Chakꞌlaj wachꞌalal, como anin congana ngana nchꞌob más chewach nak rbanic ja totajem xin Dios ja kacochin tre ewqꞌuin jariꞌ punto laj xinyaꞌ chipan jun carta nabey. Pro ja camic cꞌo chic jun punto ja más chi na rjawaxic chi nyaꞌ chipan ja carta como ja camic congana rjawaxic chi nixnuban animar chi congana ta neban cuenta ja tijonem xin Jesucristo ja kaniman ewqꞌuin utzcꞌa chi matiqꞌuextaji. Jariꞌ tijonem ja yatajnak chake ja rok tinamit xin Dios in ni mta wiꞌ qꞌuextajic trij.

⁴ Queriꞌ nbij chewe como ecꞌoli ja rachiꞌiꞌ kas pan ekal eꞌocnak checojol in ejeꞌeꞌ riꞌ tzꞌibtal can ojer chique chipan ja rtzobal Dios chi cꞌol awaꞌ jun nimlaj juicio cajal chiquewach ja caniꞌ xtinchꞌob chewach riꞌ. Ejeꞌeꞌ xa e itzel tak winak, ja rutzil rxin ja katataꞌ Dios ejeꞌeꞌ xa nqueqꞌuex rbixic: —Tebanaꞌ nak cꞌol egana neban, ja Dios arjaꞌ nixrucuy, necheꞌe. Ja quicꞌaslemal jariꞌ ncꞌutuwi chi matiquinimaj ja Dios ja Jefe kaxin in ni xarwariꞌ jun ja kajefe, in matiquinimaj ja kajaw Jesucristo.

⁵ Pro ja camic nwajoꞌ nnataj chewe ja juicio ja kaj chiquij ja tinamit ja xetotajto pan Egipto ojer. Ixix bien ewotak nojel awaꞌ ja xtinbij chewe riꞌ. Ja kajaw Dios tok xetotajto ja tinamit rmal, arjaꞌ xercamsaj na ja recꞌo chiquicojol ja ni ma xyukeꞌ ta wiꞌ quecꞌuꞌx ruqꞌuin.

⁶ In nwajoꞌ nnataj chewe chakajaꞌ ja queban ja ritzel tak ángel ja xa quichꞌakij can ja nimlaj privilegio ja yataj chique rmal ja Dios in queyaꞌ can ja chilaꞌ chicaj ja mero quilugar. Ejeꞌeꞌ ecojon preso rmal ja Dios chipan ja lugar ja bar cꞌo wiꞌ ja nimlaj kꞌekumal, ebacꞌon pa cadena chijutij chi raybexic ja nimlaj kꞌij xin juicio.

⁷ In nwajoꞌ nnataj chewe chakajaꞌ ja ban chique ja winak ja recꞌo chipan ja caꞌiꞌ tinamit Sodoma in Gomorra ojer e cachbil ja recꞌo chipan juleꞌ chic tinamit ja cꞌo chiquinakaj. Ejeꞌeꞌ chakajaꞌ quimajon rbanic juleꞌ itzelal, achiꞌiꞌ nemacun cuqꞌuin cach tak achiꞌiꞌ in ixokiꞌ nemacun cuqꞌuin cach tak ixokiꞌ. Pro chaka jalal tok cꞌoli ja kꞌakꞌ kajto trij ja quitinamit in cꞌati ja tinamit rmal, jariꞌ noc ejemplo rxin ja nimlaj rpokonal chipan ja jun chic kꞌakꞌ ja ni mta wiꞌ chupic trij.

⁸ Pro ja rachiꞌiꞌ ja xenbij chewe ja reꞌocnak checojol queriꞌ ja ritzelal nqueban chakajaꞌ. Cꞌo jeꞌe achicꞌ nqueban jariꞌ nquecoj como quibase chi rbanic ja ritzelal. Ejeꞌeꞌ xa nquecoj ja quicuerpo chi rbanic ja ritzelal, ni majun quigana ruqꞌuin ja xqueba̱n ta mandar cumal ja cꞌo kꞌetbaltzij pa quekꞌaꞌ in xa itzel netzijon chique ja nimak quekꞌij.

⁹ Pro ja lokꞌlaj ángel Miguel xnaꞌ ma queriꞌ ta ntzijon ariꞌ, xnaꞌ ma queriꞌ ta tzijon ariꞌ ja tok congana juleꞌ tzij queban ruqꞌuin ja diablo tre nak xtiban na tre ja cuerpo rxin ja camnak Moisés. Arjaꞌ ma xuban ta nim xbij ta juleꞌ itzel tak tzij tre ja diablo ja nkꞌetbex tzij trij, xa quewaꞌ xbij tre riꞌ: —Ja kajaw Dios arjaꞌ ta xtiyoꞌ rjil rcꞌaxel chawe ja ritzelal abanon, neꞌ tre.

¹⁰ Pro ja cꞌa rachiꞌiꞌ ja xenbij chewe ejeꞌeꞌ tok cꞌoli ja nbix chique in wi matichꞌobtaj cumal xa nechaponi, xa itzel tak tzij nquichꞌabej ja nbix chique. Xa jaꞌ nquechꞌob ja ncꞌutuj ja quicuerpo, xa nak ta ncꞌutuj ja quicuerpo nqueyaꞌ rgana caniꞌ nqueban juleꞌ chicop ja mta quipensar, ja cꞌariꞌ xa neyojtaj rmal.

¹¹ Ejeꞌeꞌ congana lawuloꞌ chique como ja quicꞌaslemal xa queriꞌ ja caniꞌ rcꞌaslemal ja Caín ojer in chakajaꞌ congana nquetij quekꞌij chi rbanic ja rengaño pro xa rmal pwok nquechꞌec trij ja tok nqueban queriꞌ caniꞌ xuban ja Balaam ojer, in chakajaꞌ xeyictaj chiquij ja cꞌo kꞌetbaltzij pa quekꞌaꞌ caniꞌ xuban ja Coré ojer, in congana nquetij na jun nimlaj rpokonal rmal.

¹² Jariꞌ achiꞌiꞌ tok nemol ewiꞌ chi rbanic ja waꞌim jeꞌe ja necꞌutbej ja rajoben riꞌil ja cꞌo checojol ejeꞌeꞌ xa ruqꞌuix Dios nqueyaꞌ ja tok nixcachbilaj chi waꞌim, xa queyon nqueban kaj cuenta quiꞌ. Ejeꞌeꞌ ni majun neꞌoc wiꞌ, xa e caniꞌ juleꞌ sutzꞌ ja mta jab rcꞌan ja xa chaka bar ta triꞌ ncꞌamarel wiꞌ rmal ikꞌ, xa e caniꞌ juleꞌ cheꞌ ja tok nerilaꞌ tiempo xin cosecha mta rwach nuyaꞌ, jariꞌ xa camnak in nbo̱kel in chijutij ncami.

¹³ Ja nqueban ejeꞌeꞌ xa qꞌuixbal rbanic, xa e queriꞌ caniꞌ nuban nimak tak baloj pa mar congana tzꞌil nuyaꞌ can chuchiꞌ ja mar. Ejeꞌeꞌ xa e caniꞌ juleꞌ chꞌumil ja quiyaꞌon can ja mero quebey in cꞌo jun lugar chomin chic quixin congana kꞌekuꞌm in triꞌ neqꞌuejeꞌ wiꞌ chijutij.

¹⁴ In chakajaꞌ jariꞌ achiꞌiꞌ ejeꞌeꞌ bitajnak can chique ojer rmal ja rEnoc nak xtiban na chique. Ja ratiꞌt rmamaꞌ ja rEnoc wi namajto cajlaxic ruqꞌuin ja rAdán in narqꞌuisaꞌ pa rtiempo Enoc wukuꞌ generación nuyaꞌ. Quewaꞌ xbij ja rEnoc riꞌ: —Bien tecꞌwaxaj, ja kajaw Dios arjaꞌ npi na erachbilanto ja ángel rxin pro congana e qꞌuiy,

¹⁵ arjaꞌ npeti chi nurkꞌetaꞌ tzij chiquij canojelal. Canojel ja rajꞌil ajmaquiꞌ ja mta quigana ruqꞌuin ja Dios arjaꞌ nerutakel chipan ja rpokonal pro rumac nojelal ja quibanon ja ni majun rgana ja Dios ruqꞌuin in rumac chakajaꞌ nojel ja cowlaj tak tzij ja quibin tre ja Dios. Queriꞌ bitajnak can rmal ja rEnoc.

¹⁶ Jariꞌ achiꞌiꞌ xa e banol tak wixwotem, ni majun ncajoꞌ, xa jaꞌ nqueyaꞌ rgana ja ncꞌutuj ja quicuerpo, congana nimak tak tzij netzijoni chi nquiyabej kaj quekꞌij in congana buen tak tzij nquibij chique ja winak pro xa cꞌo ncajoꞌ chique.

* * * * * * * * * *

¹⁷ Pro ja chewe ixix chakꞌlaj wachꞌalal, maxta temestaj ja bitajnak cumal ja rapóstol rxin ja kajaw Jesucristo tre ja xtibantaj na,

¹⁸ quewaꞌ ja quibin riꞌ: —Ja chipan ja qꞌuisbal tak kꞌij ecꞌoli ja yokꞌonelaꞌ newinakar na, ejeꞌeꞌ xa jaꞌ nqueyaꞌ rgana ja ritzelal ja ncꞌutuj ja quicuerpo, queriꞌ ja quibin.

¹⁹ Jariꞌ achiꞌiꞌ ejeꞌeꞌ xa e banol tak división, xa jariꞌ nqueban ja nak cꞌo quigana nqueban, mta ja rEspíritu Santo pa tak canma.

²⁰ Pro ja cꞌa chewe ixix chakꞌlaj wachꞌalal, ja ta neban nixqꞌuiyi in nixtiqueꞌe chi utz chipan ja tijonem xin Jesucristo, jariꞌ tijonem mero ruqꞌuin Dios penak wiꞌ. In jun chic, xta jun neban ruqꞌuin ja rEspíritu Santo chi rbanic ja roración.

²¹ Ni ta nixqꞌuejeꞌ wiꞌ chipan ja rajoben riꞌil xin Dios in ni ta ja wariꞌ kꞌij ewayben tok xtipi chic jutij ja kajaw Jesucristo ja tok arjaꞌ npokonaj ewach in chijutij nuyaꞌ chewe ja utzlaj cꞌaslemal ja mta qꞌuisic trij.

²² Ecꞌoli nebini: —Nak la ja kas mero rubey, necheꞌe, pro ja rixix techꞌoboꞌ chiquewach.

²³ In ecꞌo chic juleꞌ ja caniꞌ xajalal majaꞌn quekaj chipan juleꞌ kꞌakꞌ chi necꞌati, jariꞌ queꞌetoꞌoꞌ. In ecꞌo chic juleꞌ ja más chi na itzel ja quicꞌaslemal pro ja rixix tepokonaj quewach pro kas texbej ewiꞌ, kas itzel tetzꞌataꞌ ja ritzelal ja nqueban caniꞌ tre jun tziak tzꞌil tzꞌil congana itzel natzꞌat.

* * * * * * * * * *

²⁴ Ja cꞌa Dios arjaꞌ bien ncowini nixrchajij utzcꞌa chi maquixkaj chipan ja il mac, arjaꞌ ncowini nuyaꞌ chewe chi nixpeꞌe chwach in majun nak ta nixchapbexi, ni chwach nixpeꞌe wiꞌ pa gloria in congana jun nimlaj quicotemal nyataj chewe rmal.

²⁵ Xa ruyon arjaꞌ Dios, mchita jun. Ni majun nkꞌiꞌowi ja rnaꞌoj, arjaꞌ Toꞌonel kaxin. Ni ta xtiyaꞌ wiꞌ rukꞌij, ni ta xtinatax wiꞌ chi arjaꞌ nimlaj Rey, ni ta arjaꞌ wiꞌ xtibano mandar in ni ta xtinatax wiꞌ ja nimlaj poder ja cꞌo pa rukꞌaꞌ. Ni ta quirwariꞌ xtiban tre camic, chwak in chijutij. Amén.